Sarango ngia na terê ti mo ti koli wala ti wali ayeke mbeni ye so anzere na lê ti Nzapa ape. A yeke sara si zo abi bê ti lo gï ti kaï anzara ti terê ti lo wani na a yeke sara si lo bi bê ti lo gï na ndö ti asioni ye. Zo so ayeke sara ka ngia na terê ti lo ti koli wala ti wali alingbi na nda ni ti bâ wali wala koli tongana senge ye ti kaï na nzara ti terê ti lo. Na lê ti lo, bungbingo koli na wali ayeke pëpe mbeni lege so koli na wali ti lo ayeke fa ndoye na popo ti ala, me a yeke mbeni sarango ye so ndani ayeke gï ti wara nzerengo terê teti kete ngoi nga ti tene nzara ti terê ti lo adë. Me nzara ti terê ti lo ni ayeke dë gï teti kete ngoi. Ti tâ tënë ni, ahon ti tene sarango ye tongaso asara si amembre ti terê ti lo akui “tongana a ndu lango-sioni, sioni ye, nzara ti terê so a kanga ni pëpe,” a yeke sara si anzara ni so alondo.—aColossien 3:5.

Bazengele Paul atene: “Aita so mbi ndoye ala mingi, . . . zia e sukula terê ti e wani ti zi aye kue so asara si terê na bibe aga sioni, nga na lege ti kpengo mbeto ti Nzapa zia e gi ti ga azo so ayeke nzoni-kue ahon ti kozo.” (2 aCorinthien 7:1). Tongana a yeke ngangu mingi na mo ti sara ye alingbi na atënë so, zia bê ti mo anze pëpe. Jéhovah ayeke “nduru ti pardonné zo” lakue nga ti mû maboko na lo lakue (Psaume 86:5; Luc 11:9-13). Biani, so bê ti mo ayeke fâ ngbanga na ndö ti mo nga so mo yeke sara kue ti zia lege ti sioni sarango ye so, atâa so ngoi na ngoi mo yeke tï na yâ ni, a fa so mo yeke na nzoni bango ndo. Nga, dabe ti mo so “Nzapa ayeke kota ahon bê ti e, na lo hinga ye kue.” (1 Jean 3:20). Nzapa ayeke bâ gï asiokpari ti e pëpe, me lo yeke bâ e na asarango ye ti e kue. Ye so amû lege na lo ti dengi  mê na sambela ti e tongana e yeke toto na lo ti sara nzoni bê na e. Ni la, ngbâ ti ga na mbage ti Nzapa, sara terê ti mo kete na sambela lo na bê ti mo kue, gï tongana ti so mbeni kete molenge ayeke gue na mbage ti babâ ti lo na ngoi so lo yeke na kpale. Jéhovah ayeke sara si mo duti na nzoni conscience (Psaume 51:1-12, 17; Ésaïe 1:18). Biani, a lingbi mo sara ambeni mbilimbili ye so ague oko na atënë so mo tene na yâ ti sambela ti mo. Na tapande, a lingbi mo sara kue ti kpe alege nde nde ti bango porno nga na asioni kamarade. *

Atâa so kue, tongana kpale ti mo ni angbâ, e wa mo ti sara lisoro na ndö ni na babâ wala mama ti mo so ayeke ita, wala na mbeni ita so ayeke biazo so ayeke mbeni kamarade ti mo so aye mo mingi. *—aProverbe 1:8, 9; 1 aThessalonicien 5:14; Tite 2:3-5.