FAAOPOOPOGA
Ia Manumalo i le Masaniga Leaga o le Taaloalo i Totogasā
O le taaloalo i totogasā, o se masaniga e faaleagaina ai le itu faaleagaga, ma e tupu ai le manaʻo e faamalie tuʻinanauga o le tino, lea e faaleagaina ai mafaufauga lelei. * O se tagata e taaloalo i ona totogasā, atonu e manatu o ia i isi tagata e pau lo latou aogā o le faia o feusuaʻiga, e faamalie ai ona tuʻinanauga. Ua avea feusuaʻiga e na o se mea e fiafia puupuu i ai, ma faamalie ai tuʻinanauga o le tino, ae e lē o se gaoioiga e faaali ai le alofa. Ae e puupuu lava lenā lagona o le faamalieina. O le mea moni, o le taaloalo i totogasā, e faatupu ai tuʻinanauga o itutino nai lo o le fasiotia o na tuʻinanauga lea e fesootaʻi atu i le “faitaaga, o amioga lē mamā, [ma] le tuʻinanau [ma le lē pulea] i feusuaʻiga.”—Kolose 3:5.
Na tusi le aposetolo o Paulo: ʻLe ʻaupele e, seʻi o tatou faamamā iā i tatou mai i mea uma e faaleagaina ai le tino ma le agaga, a ia faaatoatoaina le faapaiaina i le mataʻu i le Atua.’ (2 Korinito 7:1) Afai o loo e tauivi e usiusitaʻi i na upu, aua e te lotovaivai. O Ieova “e nofosauni e faamagalo” ma fesoasoani mai i taimi uma. (Salamo 86:5; Luka 11:9-13) Ae o se itu lelei le ootia o lou loto, ma au taumafaiga e tuu lenā masaniga, e ui e iai taimi e te toe lolo ai e fai. Ia manatua foʻi, “e sili atu le Atua i o tatou loto, e na te silafia foʻi mea uma lava.” (1 Ioane 3:20) E lē na o agasala e silasila mai ai le Atua; ae e silasila mai foʻi o ia i ituaiga tagata e iai i tatou. Ona o lea, e faafofoga mai o ia ma le alofa i a tatou ʻaiʻoiga mo le alofa mutimutivale. Aua neʻi e fiu e faalatalata atu ma le lotomaulalo i le Atua i tatalo faatauanau, e pei ona alu atu o se tamaitiiti i lona tamā pe a tupu se mea iā te ia. O le a foaʻi mai e Ieova iā te oe se lotofuatiaifo mamā. (Salamo 51:1-12, 17; Isaia 1:18) Ae e tatau ona ōgatusa au gaoioiga ma au tatalo. O se faaaʻoaʻoga, ia taumafai e ʻalofia ata ma faamatalaga uma o feusuaʻiga ma aumea leaga. *
Afai e faaauau ona iai lou faafitauli o le taaloalo i totogasā, faamolemole talatalanoa atu i ou mātua Kerisiano, po o sau uō alofa e matua faaleagaga. *—Faataoto 1:8, 9; 1 Tesalonia 5:14; Tito 2:3-5.
^ pala. 1 O le taaloalo i totogasā o le milimili po o le lomilomi lea o totogasā, lea e iʻu ai ina maua i le lagona o le tetega (seʻi tulou lava le gagana).
^ pala. 2 O le toʻatele o aiga e tuu a latou komepiuta i nofoaga faitele o le fale, ina ia pulea ai le faaaogāina o le komepiuta. E lē gata i lea, e faatauina mai e nisi aiga ni polokalame i le komepiuta e teena ai ata ma faamatalaga lē lelei. Ae e iai lava lape o na polokalame, e lē mafai ona faatuatuaina atoatoa.
^ pala. 1 Mo nisi faamatalaga i le auala e manumalo ai mai lenei masaniga o le taaloalo i totogasā, tagaʻi i le mataupu “Ua Fesili Mai Talavou . . . Pe e Iai se Fesoasoani Ina ia Tuu ai Lea Amio?” i le Ala Mai! o Aperila-Iuni 2007, itulau 12-14, ma le tusi Fesili ua Fesili Mai ai Talavou—Tali e Aogā i le mataupu 25 ma le 26.
