MAKANI AAYUNGIZYIDWE
Mbomukonzya Kuleka Cilengwa Cakulyoomba
Cilengwa cakulyoomba ncibi kuli Leza alimwi cipa kuti muntu kayeeya buyo kulikkomanisya mwini alimwi cipa kuba amanjezyeezya mabi. * Muntu uulaacilengwa eeci mukuya kwaciindi inga kayeeya buyo makani aakoonana abona musankwa naa mukaintu. Ikoonana inga takuboni kuba nzila yakutondezyanya luyando akati kabantu bobilo bakwetene, pele walo ukubona kuba nzila yakulikkomanisya kwakaindi buyo kasyoonto alimwi akumanizya luunyaunya lumujisi. Pele luunyaunya lwakwe lumana buyo kwakaindi kasyoonto. Masimpe ngakuti, muciindi cakujaya zizo zyamubili ‘kujatikizya zisusi mbuli bwaamu, busofwaazi, aluunyaunya,’ cilengwa cakulyoomba cipa kuti zibuke.—Bakolose 3:5.
Mwaapostolo Paulo wakalemba kuti: “Nobayandwa, atulisalazye kuzintu zyoonse zisofwaazya mubili amuuya, alimwi atulondole kusalala kwesu lyoonse mukuyoowa Leza.” (2 Bakorinto 7:1) Ikuti naa cilamuyumina kutobela majwi aali kulugwalo oolu, mutatyompwi pe. Jehova lyoonse “ulilibambilide kulekelela zibi” alimwi akumugwasya. (Intembauzyo 86:5; Luka 11:9-13) Masimpe, ikuti naa mulakatazyigwa mumoyo alimwi mulasoleka canguzu kucileka cilengwa eeci—nokuba kuti zimwi ziindi mulazundwa akucicita alimwi—nkokuti muli amoyo mubotu. Alimwi mutalubi kuti “Leza mupati kwiinda myoyo yesu alimwi ulizyi zintu zyoonse.” (1 Johane 3:20) Leza tagoleli buyo aakubona zibi zyesu; ulabona muntu woonse mbwabede mumoyo. Akaambo kakuti ulituzyi kabotu, ulatweetezyegwa notupaila akumulomba kuti atulekelele. Aboobo, mutaleki pe kupaila kuli Leza cakulicesya alimwi camoyo woonse, mbubonya mwana mbwataleki kuunka kuli bausyi nali mumapenzi. Jehova uyakumupa manjezyeezya aasalala. (Intembauzyo 51:1-12, 17; Isaya 1:18) Pele alimwi mweelede kubweza ntaamu zikonzya kumugwasya kucita zintu kweelana amipailo yanu. Mucikozyanyo, mweelede kutantamuka zintu zyamusyobo woonse ziletela muzeezo wakoonana alimwi akuleka kusobana abantu batali kabotu. *
Ikuti naa camukatazya kuleka cilengwa cakulyoomba, amubaambile bazyali banu Banakristo naa mweenzinyoko uusimide kumuuya alimwi uumubikkila maano. *—Tusimpi 1:8, 9; 1 Batesalonika 5:14; Tito 2:3-5.
^ munc. 1 Kulyoomba caamba kulisyoba naa kulisobanya kubusankwa naa kubukaintu, kanji-kanji ikupa kuti muntu asike mpozimumana nguzu amizeezo yakoonana.
^ munc. 2 Mumikwasyi minji babikkide bubambe bugwasya bwakubikka kkompyuta antangalala mpobakonzya kwiibona banamukwasyi boonse. Alimwi mikwasyi imwi yuula mapulogilamu aakkompyuta aagwasyilizya kusinkila zintu zitayandiki. Nokuba boobo, taaku pulogilamu iikonzya kusyomwa cakumaninina.
^ munc. 1 Kutegwa mujane nzila zibeleka izikonzya kumugwasya kuzunda cilengwa cakulyoomba, amubone cibalo cili mu Sinsimuka! ya Chingisi yamu November 2006 icijisi mutwe wakuti “Young People Ask . . . How Can I Conquer This Habit?” alimwi amapeeji 178-182 mubbuku lyakuti Questions Young People Ask—Answers That Work, Bbuku 1.
