MAKANI AAKUYUNGIZYA
Mbokonzya Kuzunda Chiyanza Chakusanaa Zizo Zyamubili Zyakuzyazya
Chiyanza chisesemya chakusanaa zizo zyamubili zyakuzyazya chitondeezya kuti muntu tasimide pe kuzintu zyabukombi, chipa muntu kuti ayande kulibotezya alimwi chinyongania mizeezo. * Muntu ulaachiyanza eechi ulakonzya kubona bamwi bantu mbuli zibelesyo zyakuti azuzikizye chiyandisyo chakwe chakoonana. Aabo balaachiyanza eechi tababoni koonana mbuli nzila yakutondeezyania luyando pesi bakubona mbuli nzila yakuzuzikizya chiyandisyo chabo chakoonana akuti babotelwe kwachiindi nchicheecho. Pesi kubotelwa kwabo nkwachiindi chifwiifwi biyo. Mubwini, kulaakuti chijaye zizo zyamubili zili mbuli “bwaamu abusofwaazi amujamuja azisusi zibi akulikumbuzya,” chiyanza eechi chipa kuti muntu ayande kuchita zintu eezyo.—BaKolose 3:5.
Mwaapostolo Paulo wakalemba kuti: “Nubayandiki . . . atulisonzole busofwaazi boonse nibuba bwamubili nibuba bwamoyo, atulondole busalazi bwesu cakuyoowa Leza.” (2 BaKorinto 7:1) Ikuti kakukuyumina kuswiilila majwi aaya, utabonaanga tukoyoozwidilila pe. Jehova ‘ulilibambilide kukulekelela’ akukugwasya. (Intembauzyo 86:5; Luka 11:9-13) Nikuba kuti zimwi ziindi ulakachilwa, pesi chiyandisyo chako chakuleka chiyanza eechi chitondeezya kuti ulaa maboneno aali kabotu. Alubo yeeya kuti “Leza mupati kwiinda myoyo yesu, alimwi ulizi zintu zyoonse.” (1 Johane 3:20) Leza taboni zibi zyesu luzutu pesi ulazibona zintu zyoonse zili mumyoyo yesu. Akaambo kakuti utuzi kabotu, ulatweetelela chiindi notukomba katukumbila kuti atulekelele. Nkinkaako, utaleki kukomba kuli Leza mbuli mwana mbwakumbila lugwasyo kuli wisi kuti kali mumapenzi. Jehova uyookugwasya kuti ubaa manjezeezya aali kabotu. (Intembauzyo 51:1-12, 17; Isaya 1:18) Masimpe kuti weelede kuchita kweendelana ankombyo yako. Muchikozyano, weelede kutantamuka kufumbwa zintu zikonzya kupa kuti ubaa muzeezo wakoonana alimwi weelede kutantamuka kumvwananaa bantu batali kabotu. *
Ikuti chiyanza eechi kachiinkila kunembo kukukatazya, weelede kubuzya muzyali naa muKristu uusimide kuzintu zyabukombi naa mweenzinyokwe ngosyoma. *—Tusimpi 1:8, 9; 1 BaTesalonika 5:14; Tito 2:3-5.
^ par 1 Chiyanza chakusanaa zizo zyamubili zyakuzyazya nkusania zizo zyamubili zyakuzyazya munzila iipa kuti muntu abaa chiyandisyo chakoonana.
^ par 2 Zimwi mpuli zisala kubelesya kompiyuta antanganana kuti zikonzye kulikwabilila. Kuyungizya waawo, zimwi mpuli zyuula mapulogilamu aakkompiyuta atazumizyi zintu zisofweede. Nikuba boobo, tatweelede kwaasyoma chakumaninina pe mapulogilamu aaya.
^ par 1 Kuti ujane amwi malayilile akonzya kukugwasya munkani eeyi, langa chibalo chitii “Young People Ask . . . How Can I Conquer This Habit?” muSinsimuka! yamu November 2006, abbuku liti, Questions Young People Ask—Answers That Work, Volume 1, aapeji 178-182.
