Yixtalajel jawa winkil soka wa kʼabʼi ma sok pilan jasunuk bʼa wa xya kʼixnajanan mini lek xyila ja Dyosi, pes kechanta wa xya kʼajyan bʼa oj wa ekʼ jawa gusto sok wa sjomo jawa pensari. Ja matik jachʼ wa skʼulani oj kʼot spensaraʼuke bʼa kechanta oj ya makunuk ja smoji bʼa yajel ekʼuk ja snesesida. Ja smeranili, yajni oj staʼ sbʼaj sok jun ixuk ma winik mixato oj yabʼ yajbʼal bʼa oj sjeʼ wa skʼana sbʼaje, bʼa yeʼna kechantani bʼa jutsʼin gustoʼil sok yajel ekʼuk ja sgana yiʼoj bʼa stajel jun ixuk ma winik. Pe ja jaw kechanta ekʼum bʼej. Ja smeranili, yixtalajel jawa winkili mi slama ja jas wa xkʼankʼuniyuj skʼulajel jawa kwerpo bʼa wa x-ikʼwani och slejel mulal sok ixuk winik sok bʼa jastik kux; kechanta bʼa wa xya kʼixnajanan (Colosenses 3:5).

Ja jekabʼanum Pablo stsʼijbʼan: «Jayuj quermano jumasa ja huenlex ja jel yaj huax cabyexi, [...]. Jayuj sbej xa ni oj cʼultic lec fuerza ba toj oj ajyucotic porque ta mi cʼa, huaj to cabtic, huantic sleejel yajcʼachil ja jmultiqui. La xa cactatic can juntiro ja jpiero modotic ajyi. Sbej ni oj xiucotic yuj ja Diosi» (2 Corintios 7:1). Pe ta ja weʼn wanani yijel wokol skʼuʼajel ja yaljelik it, mok eluka gana. Ja Jyoba tolabida «pwestoxta [ay] bʼa oj kʼulwan[uk] perdonar» sok bʼa oj skoltaya (Salmo 86:5; Lucas 11:9-13). Pe yuja wa xtʼabʼtʼuni jawa kʼujoli sok waxa kʼulan pwersa bʼa mixa oja kʼuluk, ama ayni ekʼele wantoxa kʼulan, wanani sjejel waxa kʼana oja wakan skʼulajel. Mokni chʼayuka kʼujol «ja Diosi huan ni snaa spetzanil,  como jel nihuan ja yeni. Jayuj [wa] scʼulan perdonar spetzanil ja jas malo ja ba jcʼujoltiqui» (1 Juan 3:20). Yajni ja yeʼn wa xyilawotik, mi jaʼ wa xwaj skʼujol ja jmultiki, jani wa xwaj skʼujol ja bʼa jastal ja jmodotiki. Yuja wa snaʼa lek ja jastal mero wala taxtiki, wani snaʼa jyajaltik yajni wa xkʼanatikyi a-sjeʼ syajulal skʼujol jmoktiki. Ja yuj, mokni wakan slejel ja Dyosi yajelyi orasyon tolabida sok juna modo bʼa chʼin, jastal ja yal kerem wa xwaj soka stati yajni wa skʼana skoltajel. Ja Jyoba ojni bʼobʼ ya ajyuk sak jawa kʼujoli (Salmo 51:1-12, 17; Isaías 1:18). Kechan, ja jas oja kʼan ja bʼa wa worasyoni jachni oj cha kʼuluk, jastal mixa oja kʼel ixuk winike bʼasane bʼa tuktukil tikʼe ma stsajel lek ja matik oja mojtayi. *

Pe ta minikʼa xa jipakan yixtalajel jawa winkili, alayabʼ jawa tat (ma wa nan) Taʼumantiʼi ma jun jmoj-aljeltik bʼa takʼan ay sok wa xchamskʼujol bʼa weʼna (Proverbios 1:8, 9; 1 Tesalonicenses 5:14; Tito 2:3-5). *