Tiku xakstu wi tuku natlawa xlakata namakgkatsi pi wi tiku tatalakgxtumima, akgtum talismanin nema ni lakgati Dios, xlakata tlawa kaj xakstu napaxkikan chu lakglakgalhi xtalakapastakni. * Tiku kgalhikgo uma talismanin max kaj nakaʼakxilhkgo amakgapitsin la tiku kaj tlan nakatatalakgxtumikgo xlakata tlan nalimakgkatsikgo xmaknikan. Ni paxkinankgo chu kaj lakapastakkgo wi tiku natatalakgxtumikgo, tlawakgo xlakata tsinu nalimakgapaxuwakgo xmaknikan chu tlan nalimakgkatsikgo. Pero, ama tuku tlan makgkatsikgo kaj lakapala titaxtu. Tlan nawanaw pi tiku xakstu wi tuku natlawa xlakata namakgkatsi pi wi tiku tatalakgxtumima, uma ni makaksa makni xlakata nialh natlawaputun talakgxtumit nema ni xlitatlawat chu xalixkajni, wata tlawa pi tlakg natatalakgxtumiputun (Colosenses 3:5).

 Apóstol Pablo tsokgnalh: «Wixin, nti lhuwa kkapaxkiyan, [...] kachakgamakgaw mpaks ntu xlakgalhilh nkintiyatliwakan, chu nkispiritukan, xlakata xlipaks nalisantujlayaw, lantla lilamaw kxtamakpuwan Dios» (2 Corintios 7:1). Komo lu tuwa makgkatsiya namakgantaxtiya uma limapakgsin; talakaskin ni natamakgxtakga, xlakata Jehová putum kilhtamaku skgalalh wi xlakata “namatsankgenaninan” o natapatinan chu namakgtayanan (Salmo 86:5; Lucas 11:9-13). Max namin kilhtamaku natlawaparaya uma talismanin, pero kalimasiya pi tlan lakapastaka akxni nitlan limakgkatsiya tuku tlawa chu kaliskujti nialh chuna natlawaparaya. Putum kilhtamaku kalakapastakwi «xaliwaka ntlanka Dios, ni xawa nkintapuwankan, chu na lakgapasa xlipaks nkatuwaj» (1 Juan 3:20). Akxni kinkaʼakxilhan ni kaj akxilha kintalakgalhinkan, akxilha la likatsiyaw. Xlakata liwana lakgapasa la limaw kilatamatkan, kinkalakgkatsanan akxni skiniyaw kakinkalakgalhaman. Wa xlakata putum kilhtamaku katlawaniw oración, kalimasiyaw pi kanajlaniyaw chu ni lankajwa namakgkatsiyaw, chuna la akxni chatum aktsu kgawasa lakaskin namakgtayakan skini xtlat kamakgtayalh. Xlikana, Jehová tlan tlawa pi nakgalhiyaw xatlan kintalakapastaknikan (Salmo 51:1-12, 17; Isaías 1:18). Xlikana ni kaj talakaskin natlawayaw oración, na natlawayaw la naskinaw chu liwana kililakapastakatkan nialh chuna natlawayaw, nialh naʼakxilhaw tuku xalixkajni, max lakchixkuwin o lakpuskatin tiku nitu lhakganankgonit chu ni nakatalalinaw tiku nitlan xtayatkan. *

Komo wi tiku nila namakgxtakga uma talismanin nema akxilhwi kʼuma tatakgatsin, katachuwinalh xtlat (o xtse) tiku na kstalanina Cristo o chatum tala (chixku o puskat) xalak congregación tiku tliwakga wi xtakanajla chu tiku xlikana makgtayaputun (Proverbios 1:8, 9; 1 Tesalonicenses 5:14; Tito 2:3-5). *