APPENDIKS
Lusim Pasin Bilong Pilai Long Sem
Pasin bilong pilai long sem em wanpela pasin em God i no laikim, na dispela pasin i kirapim man long tingim laik bilong skin bilong em yet tasol na i bagarapim tingting bilong em. Man o meri i save pilai long sem bilong em, em inap tingim ol narapela olsem ol i samting bilong inapim tasol laik bilong em long mekim maritpasin. Na ol i kirap long tingim maritpasin olsem samting bilong inapim tasol laik bilong skin, na ol i no tingim olsem em rot bilong man na meri long kamapim pasin bilong ol long laikim narapela narapela. Tasol amamas man i kisim long dispela rot em bilong liklik taim tasol. Pasin bilong pilai long sem i no kilim i dai ol laik bilong bodi long mekim “pasin pamuk, pasin i no klin, [na] bel kirap,” nogat, em i save kirapim ol dispela laik nogut.—Kolosi 3:5, NW.
Aposel Pol i tok: “Yumi mas rausim olgeta pasin doti bilong bodi na bilong spirit, na yumi mas kamap klin olgeta long ai bilong God.” (2 Korin 7:1) Sapos yu hatwok long bihainim dispela tok, orait no ken ting yu no inap winim dispela hevi. Oltaim Jehova i redi long “rausim sin” na helpim yu. (Song 86:5; Luk 11:9-13) Taim bel bilong yu i kotim yu na yu traim long lusim dispela pasin, dispela i soim olsem yu gat gutpela tingting—maski sampela taim yu pundaun na mekim gen. Tingim tu olsem “God i winim tru bel bilong yumi na em i save long olgeta samting.” (1 Jon 3:20, NW) God i no lukim tasol sin bilong yumi, nogat, em i lukim man olgeta. Em i save long olgeta samting bilong yumi, olsem na em inap pilim hevi bilong yumi na putim yau taim yumi askim em long marimari long yumi. Olsem na no ken les long beten na long pasin daun askim God long helpim yu, olsem liklik pikinini i save go long papa taim em i gat hevi. Jehova bai mekim na maus bilong bel bai i no kotim yu. (Song 51:1-12, 17; Aisaia 1:18) Tru, yu yet i mas mekim ol samting i stret wantaim beten bilong yu. Olsem, yu mas wok strong long abrusim olgeta kain ponografi na ol poroman nogut. a
Sapos yu save pilai yet long sem bilong yu, plis toktok long dispela samting wantaim wanpela papa o mama Kristen o wanpela pren husat i strong long ol samting bilong spirit na em i save tingim yu tru. b—Sindaun 1:8, 9; 1 Tesalonaika 5:14; Taitus 2:3-5.
a Bilong bosim pasin bilong yusim kompiuta, planti famili i save putim kompiuta long hap we olgeta inap lukim. Na tu, sampela famili i baim ol kompiuta program i save blokim ol piksa na stori nogut. Tasol ating ol dispela program i no inap blokim olgeta piksa nogut.
b Bilong kisim sampela save moa long olsem wanem yu ken lusim pasin bilong pilai long sem, lukim stori “Ol Yangpela i Laik Save . . . Olsem Wanem Mi Inap Lusim Dispela Pasin?” long Kirap! bilong Janueri-Mas, 2007, na buk Sampela Askim Bilong Ol Yangpela—Ol Gutpela Bekim, Volium 1, pes 205-11.
