XIENGETELO
Ku Hlula Mukhuva Wa Ku Enerisa Ku Navela Ka Wena Hi Ku Tikhoma-khoma Swirho Swa Le Xihundleni
Lowu i mukhuva lowu nga xi tsakisiki Xikwembu, lowu endlaka leswaku munhu a anakanya hi ku enerisa ku navela ka yena n’wini ka timhaka ta masangu naswona wu endla leswaku a ehleketa swilo swo biha. * Munhu la hanyaka hi mukhuva lowu u sungula ku languta van’wana tanihi swilo swo tienerisa ha swona. Eka yena timhaka ta masangu a ti endliwi hikwalaho ka rirhandzu, ko va ndlela yo enerisa ku navela ka yena ntsena. Kambe, ku tienerisa koloko ko va ka xinkarhana. Bibele yi vula leswaku hi fanele hi dlaya swirho swa miri “malunghana ni vumbhisa, thyaka, ku navela [ko biha] ka vuxaka bya rimbewu,” kutani munhu la hanyaka hi mukhuva wolowo u va a nga landzeli nawu wa Xikwembu.—Vakolosa 3:5.
Muapostola Pawulo u te: “Varhandziwa, a hi tibasiseni eka swilo hinkwaswo leswi nyamisaka nyama ni moya, hi hetisekisa vukwetsimi hi ku chava Xikwembu.” (2 Vakorinto 7:1) Loko swi ku tikela ku hanya hi ndzayo leyi, u nga heli matimba. Yehovha u tshama a “lunghekele ku rivalela” ni ku pfuna. (Pisalema 86:5; Luka 11:9-13) Leswi ripfalo ra wena ri tshamelaka ku ku karhata nileswi u endlaka matshalatshala yo tshika mukhuva lowu, hambileswi minkarhi yin’wana u pfaka u rheta, swi kombisa leswaku u tiyimisele ku wu hlula. Nakambe, tsundzuka leswaku “Xikwembu i xikulu eka timbilu ta hina naswona xi tiva swilo hinkwaswo.” (1 Yohane 3:20) Xikwembu a xi languti swidyoho swa hina kambe xi languta timbilu ta hina. Tanihi leswi xi vonaka leswi nga etimbilwini ta hina, xi ta yingisela swikhongelo swa hina loko hi kombela ku rivaleriwa. Kutani u nga karhali ku khongela eka Xikwembu hi mbilu hinkwayo ni hi ku titsongahata, ku fana ni n’wana loyi a lavaka mpfuno eka tata wa yena loko a ri ni swiphiqo. Yehovha u ta basisa ripfalo ra wena. (Pisalema 51:1-12, 17; Esaya 1:18) Kambe u fanele u hanya hi ku pfumelelana ni swikhongelo swa wena. Hi xikombiso, u fanele u papalata mixaka hinkwayo ya swifaniso swo navetisa rimbewu ku katsa ni vanghana vo biha. *
Loko swi ku tikela ku tshika mukhuva lowu, vulavula ni mutswari la nga Mukreste kumbe Mukreste la wupfeke ni munghana la ku rhandzaka. *—Swivuriso 1:8, 9; 1 Vatesalonika 5:14; Tito 2:3-5.
^ ndzim. 1 Ku tikhomakhoma swirho swa wena swa rimbewu i ku swi tlangatlangisa ku endlela leswaku u eneriseka hi tlhelo ra rimbewu.
^ ndzim. 2 Ndlela leyinene leyi mindyangu yo tala yi yi tirhisaka leswaku yi lawula ndlela leyi khompyuta ya le kaya yi tirhisiwaka ha yona i ku yi veka laha un’wana ni un’wana a kotaka ku yi vona. Nakambe, mindyangu yin’wana yi xava tiprogreme tin’wana leti sivelaka munhu ku vona swilo leswi nga riki swinene. Hambiswiritano, tiprogreme leti a ti nge siveli hinkwaswo.
^ ndzim. 1 Leswaku u kuma swiringanyeto leswi nga ku pfunaka ku hlula mukhuva lowu, vona xihloko lexi nge “Vantshwa Va Vutisa . . . Ndzi Nga Wu Hlurisa Ku Yini Mukhuva Lowu?” eka Xalamuka! ya November 2006, ni le ka buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 1, matluka 205-11.
