XIENGETELO
Hlula a mukhuwo wa ku ti vuxela manyawunyawu ya masango
A ku ti vuxela manyawunyawu ya masango hi ku hlakanisela ziro za wubeleki, ku nga mukhuwo wu khunguvanyisako Nungungulu, wu maha munhu ava ni mawonela ma kucako makangwa na ma bihisa a kupima. Loyi a ti vuxelako manyawunyawu ya masango hi ku hlakanisela ziro za wubeleki a nga ha gumesa hi ku wona vanhu vanwani kota zibya ntsena za ku ti tsakisa hi zona hi tlhelo ga masango. I sangula ku wona a kuhlengela masango kota ndlela ya ku ti tsakisa za xikhatanyana, na ku nga hi ndlela ya kuva a vanhu vambiri va kukombisana liranzo. Kanilezi a kutitsakisa loko ka xikhati xo kari ntsena. Wutshanwini ga ku daya a ziro za miri xungetano hi “wubhayi, ni kungahlazeki, ni wurembi, ni kumbilukela ka kubiha,” loyi a ti vuxelako manyawunyawu ya masango o zi hlanganyeta. — Va Le Kolosi 3:5.
Mupostoli Paule i lo tsala aku: “Varanzekako, a hi ti hlazeni kunyenyezeni kontlhe ka miri ni moya, hi mbhelelisa a kubasiswa ka hina a kuchaveni ka Nungungulu.” (2 Va Le Korinte 7:1) Loku zi ku karatela a ku lanzela magezu lawa, u nga mbheli ntamu. Jehova i tshama na a longile a ku ku “tsetselela” ni ku ku vuna. (Tisimu 86:5; Luka 11:9-13) Hakunene, lezi a mbilu ya wena yi ku konako ni lezi u mahako mizamo ya ku tsika a mukhuwo lowo — hambu loku uta na u zi phindaphindanyana — zi komba a matshamela ma nene. Alakanya kambe lezaku “Nungungulu wa hombe ku hunza timbilu ta hina, wa zi tiva zontlhe.” (1 Johani 3:20) Nungungulu i wona za ku hunza a zionho za hina; i wona a munhu yentlhe. Kota lezi a tivako zontlhe ha hina yena wa zi kota ku hi zwela wusiwana azwa a tihuwa ta hina ta mbilu yontlhe ta ku kombela tipswalo. Hikwalaho, u nga tshuki u karala a ku tshinelela Nungungulu hi mukhongelo wo ti koramisa wa mbilu yontlhe, a ku fana ni nwanana loyi a yako ka dadani wakwe loku a karatekile. Jehova i ta ku katekisa hi ku ku nyika a livalo li basileko. (Tisimu 51:1-12, 17; Isaya 1:18) Hambulezo, u fanele ku maha zilo hi kuyelana ni mikhongelo ya wena. Hi xikombiso, u nga ha zama ku potsa a tixaka tontlhe ta zithombe za vanhu va nga ambalangiko nchumu zinwe ni kuhlengela ni vakubiha. *
Loku a xikarato xa wena xa ku ti vuxela manyawunyawu ya masango xi simama, hi kombela lezaku u wulawula hi mhaka leyo ni mupswali wa muKristu kutani munghana wo buva hi tlhelo ga moya a khatalako khwatsi hi wena. * — Mavingu 1:8, 9; 1 Va Le Tesalonika 5:14; Titusi 2:3-5.
^ nzi. 4 Kasi ku zi kota a ku ti wonela kutiriseni ka komputadori ya laha mutini, a mingango yo tala yi yi veka laha zi kotekako kuva yi woniwa hi vontlhe. A ku hunza lezo, a mingango yo kari yi xava milongoloko ya komputadori leyi yi hlutako zilo zi nga lavekiko. Hambulezo, a ku na longoloko wu tsumbekako hi kumbhelela.
^ nzi. 5 Kasi ku kuma mawonela ma nene xungetano hi ndlela ya ku hlula a ku ti vuxela manyawunyawu ya masango, wona a nzima “Os Jovens Perguntam . . . Como posso vencer esse mau hábito?” ka Despertai! ga Novembro wa 2006 ni bhuku Os Jovens Perguntam — Respostas Práticas, Volume 1, maphajina 178-182.
