Okuzanisa ebicweka by’ensoni ngeso etarukusemeza Ruhanga, eretera omuntu kwefaaho wenka kandi n’okuba n’ebitekerezo ebibi. * Omuntu anyakwine engeso enu arora abandi—nk’eby’okukozesebwa omu kuterana. Arora kuterana nk’okutaine kakwate n’okugonza baitu nk’omulingo gw’okwesemeza hamu n’okwehumuza. Baitu okwesemeza n’okwehumuza oku kuba kw’akacu kake. Amananu gali ngu, omu kiikaro ky’okufesa ebicweka ebya hansi habintu nka “obusihani, nobugwagwa, nokwegomba okwensoni, nomukoijo omubi,” kuzanisa ebicweka by’ensoni kwongereza okwegomba okubi.—Abakolosai 3:5.

Omukwenda Paulo akahandika ati: “Nukwo obutunyina emirago enu abarukugonzebwa, tweyogyeho okusisikara kwona okwomubiri nokwomwoyo, ntuhikiriza okwera omu kutina Ruhanga.” (2 Abakolinso 7:1) Obu kiraaba nikikugumirra kuhondera ebigambo binu, otahwamu amaani. Yahwe ‘arahuka okuganyira’ kandi ayetegekere kukukonyera. (Zabuli 86:5; Luka 11:9-13) Mali, omutima gwawe ogukukurumiriza hamu n’amaani goona agotairemu kuleka engeso enu—nobworaaba obwire obundi n’olemwa—nikyoleka ngu oine entekereza enyakuhikire. Kandi ikara n’okijuka ngu “Ruhanga nakira obukuru omutima gwaitu kandi amanyire byona.”  (1 Yohana 3:20) Ruhanga tarora ebibi byaitu byonka; Baitu amanyire byona ebi tulengaho kukora. Kinu kimuletereza kutugirra embabazi obu tumusaba okutuganyira. Nahabweki titusemeriire kujwaha kusaba Yahwe kuruga ha mutima, nkoku omwana airukira hali ise obwaba atungire ebizibu. Yahwe n’aija kukuha omuntu ow’omunda omurungi. (Zabuli 51:1-12, 17; Isaya 1:18) Baitu nikikwetagisa kukorra ha kusaba kwawe kandi oine eky’orukukoraho. Ekyokurorraho, osemeriire kulengaho kwetantara kurora ebisisani byona eby’orwanju hamu n’abanywani ababi. *

Kakuba engeso ey’okuzanisa ebicweka byensoni ekulema kucwa, n’osabwa obazeho n’omuzaire wawe Omukristayo rundi munywani wawe anyakukuzire omu by’omwoyo. *—Enfumo 1:8, 9; 1 Abasesalonika 5:14; Tito 2:3-5.