Te mirimiriraa i te mero atiraa, e peu ïa ta te Atua e ore e au. E faatupu riirii hoi te reira i te mau peu o te turai i te taata ia haapao noa ia ratou iho e o te haaviivii i te feruriraa. E tae roa atoa te hoê taata mirimiri i te mero atiraa i te hiˈo ia vetahi ê ei taoˈa noa no te haamâha i to ˈna mau hinaaro e taoto i te hoê apiti. E ere atura ïa te taotoraa i te hoê apiti i te faaiteraa i te here, e peu noa râ o te faanavenave maa taime e o te haamâha i te hiaai puai e taoto i te hoê apiti. E taime poto noa râ ia mâha te reira. Inaha, eita te mirimiriraa i te mero atiraa e haapohe i te mau mero o te tino, “to roto hoi te mau peu taotoraa tia ore, te peu viivii, te hinaaro faufau vî ore,” e faaaraara râ i te reira.—Kolosa 3:5.

Ua papai te aposetolo Paulo: “Taeae here ma, . . . e tamâ anaˈe ïa ia tatou iho i te mau viivii atoa o te tino e o te feruriraa, e ia moˈa roa ˈtu â tatou a mǎtaˈu ai i te Atua.” (Korinetia 2, 7:1) Mai te peu e te aro nei oe no te pee i teie mau parau, eiaha e taora i te tauera. “Ua tia” noa ia Iehova ia “faaore mai i te hara” e ia tauturu. (Salamo 86:5; Luka 11:9-13) Inaha, te faahaparaa to oe iho aau ia oe e ta oe mau tutavaraa i te faaea i te rave i taua peu ra, noa ˈtu e e topa faahou oe i te tahi mau taime,  e tapao faaite ïa o te hoê huru feruriraa maitai. A haamanaˈo atoa e “mea rahi aˈe te Atua i to tatou aau e ua ite o ˈna i te mau mea atoa.” (Ioane 1, 3:20) Aita noa te Atua e ite ra i ta tatou mau hara, te ite atoa ra râ o ˈna i te taata taatoa. Maoti taua ite i te mau mea atoa ra, e nehenehe ta ˈna e faaroo ma te aumauiui i ta tatou mau taparuparuraa haavare ore i to ˈna aroha hamani maitai. No reira, eiaha roa ˈtu e fiu i te fariu i te Atua na roto i te pure haavare ore e te haehaa, mai te hoê tamarii o te fariu i to ˈna papa ia fifi oia. E horoa ˈtu Iehova i te hoê manaˈo haava tamâhia. (Salamo 51:1-12, 17; Isaia 1:18) Parau mau, e titauhia ia rave oe i te mau taahiraa avae maitatai ia au i ta oe mau pure. Ei hiˈoraa, e tutava oe i te ape i te mau huru peu faufau atoa e te mau amuimuiraa iino atoa. a

Ia tamau noa to oe fifi, a aparau na ïa i te reira e te hoê o to oe na metua Kerisetiano aore ra i te hoê hoa feruriraa paari i te pae varua e te hamani maitai. b—Maseli 1:8, 9; Tesalonia 1, 5:14; Tito 2:3-5.