APENDISE
¿Kʼuxi ta tsalel li yixtolanel kʼunile?
Li yixtolanel skʼunil jun krixchanoe jaʼ jtos kʼusi chopol nopem ti tsokes ti kʼu yelan oy ta mantale, yuʼun jaʼ noʼox tspas li kʼusi tskʼan yoʼonton stuke xchiʼuk tsokes li snopbene. * Li buchʼutik jech tspasike xuʼ van chilik kʼuchaʼal yixtolik sventa chchiʼin xa yaʼeluk li yantike, ti jaʼ noʼox sventa chetʼes yoʼontonike. Ta melel, yan-o skʼoplal tsnopik ta sventa li kʼanbaile xchiʼuk yan-o skʼoplal tsnopik ta sventa li chiʼinejbail ta vayele, yuʼun tsnopik ti skʼunilike jaʼ noʼox chtun yuʼunik sventa ch-echʼ-o yoʼontonik jlikeluk xchiʼuk tslamajes yoʼontonik kʼalaluk kʼakʼubem tajmek skʼunilike. Pe jlikel noʼox ti tslamajes yoʼontonike. Jech onoʼox ta melel, li yixtolanel kʼunile muʼyuk bu tspajes «li mulivajele, li kʼusitik ibal sbae [xchiʼuk] ti oy tajek ta [oʼontonal li chiʼinejbail] ta vayele», jaʼ noʼox mas tskʼan-o ti chchiʼinvanik ta vayele (Kolosenses 3:5).
Xi la stsʼiba li jtakbol Pabloe: «Kuni kʼanbil chiʼiltak, jsakubtas jbatik ta sventa li kʼusi tsokes jbekʼtaltike xchiʼuk li kʼusi oy ta jnopbentike, sventa mas chʼul xijkʼot ta xiʼtael li Diose» (2 Korintios 7:1). Jlom krixchanoetike toj echʼ xa noʼox tsots ta pasel chaʼiik ti chichʼik albel ti akʼo lekikuk o sakikuke; pe skʼan mu xakʼ sbaik ta tsalel, yuʼun li Jeovae «ta [x]chʼay ti mulil[e]» xchiʼuk chkoltavan (Salmo 86:5, Ch; Lukas 11:9-13). Xuʼ van tstsʼujik bakʼintik, pe lek stalelal chakʼik ta ilel, yuʼun chopol chaʼi yoʼontonik xchiʼuk chakʼbeik yipal ta stsalel li kʼusi chopol nopem xaʼiik spasele. Mu me xchʼay ta joltik ti «mas to toyol skʼoplal li Diose, jaʼ mu sta li koʼontontike xchiʼuk xojtikin skotol li kʼusitike» (1 Juan 3:20). Kʼalal tskʼelutike, maʼuk chakʼ sat li ta jmultike, yuʼun jaʼ tskʼel skotol ti kʼukelantike. Lek xojtikin li kʼusitik ta jpat jxokontike, xchiʼuk chichʼutik ta kʼux kʼalal xijvokolet ta jkʼanbetik xkʼuxul yoʼontone. Jaʼ yuʼun, mu xkikta jbatik ta skʼoponel ta sjunul koʼontontik xchiʼuk ti bikʼit xkakʼ jbatik ta skʼoponele, jech kʼuchaʼal jun nichʼonil ti tsaʼ stot kʼalal tskʼan koltaele. Ta melel, li Jeovae xuʼ sakubtas li jnopbentike (Salmo 51:1-12, 17; Isaías 1:18). Pe mu baluk noʼox ti ta jkʼopontik li Diose, yuʼun skʼan jech jpastik ti kʼuchaʼal ta jkʼantike xchiʼuk ti jpʼeluk koʼontontik jpastike, jech kʼuchaʼal ti mu jkʼeltik kʼusiuk jtosukal pornografiae xchiʼuk ti jchʼak jbatik ta stojolal li chopol amigoiletike. *
Mi mu noʼox stsal avuʼun ti chavixtolan akʼunile, jaʼ lek ti xavalbe li atot o ameʼ yajtsʼaklom Kristoe o junuk ermano o ermana ti xvinaj ti yij ta mantale xchiʼuk ti oy ta yoʼonton li yantike (Proverbios 1:8, 9; 1 Tesalonisenses 5:14; Tito 2:3-5). *
^ par. 1 Li yixtolanel kʼunile jaʼ li spikulanel o xjaxilanel sventa tstsan li kʼunilale, jaʼ to mi echʼ yoʼonton chaʼiike.
^ par. 2 Ep buchʼutik yakʼojik venta ti lek ti teuk oy li komputadora bu xuʼ chil skotol utsʼ-alalile, ti jaʼ chkoltavan sventa lek noʼox smelolal tstunesike. Yantike stikʼojbeik programaetik sventa mu x-och li kʼusitik chopol ta kʼelele. Pe skʼan me jvules ta joltik ti programaetik taje, maʼuk skʼan xal ti mu xa xetʼes li kʼusitik chopole.
^ par. 1 Li kʼusitik liʼ chichʼ alel batele akʼbil sventa chakʼ ta ilel kʼuxi xuʼ xichʼ tsalel li yixtolanel kʼunile: Sujo ta snopel yan kʼusitik li anopbene (Filipenses 4:8). Mu xakʼel kʼusitik ti tstij avoʼonton ta skʼanel li kʼusitik muʼyuk leke (Salmo 119:37). Kʼano ta orasion li «juʼelal ti mu kʼusi xkoʼolaj-oe» (2 Korintios 4:7). Batuk avoʼonton ta spasel li kʼusitik ta sventa mantale (1 Korintios 15:58).
