Мастурбация — Худаға яқмайдиған адәт. Униң билән шуғулланған адәмниң әқли зәһәрлиниду вә у пәқәт өзиниң җинсий хумарини қандурушнила ойлайду *. Шундақла у башқиларни өз хумарини қандуруш үчүнла пайдилинидиған қурал сүпитидә қараштурушни башлиши мүмкин. Җинсий алақә униң үчүн сөйгүсини көрситиш әмәс, бәлки бир дәқиқилик ләззәтлиниш вә шәһваний һәвәсини бесиш адитигә айлиниду. Бу пәқәт вақитлиқла. Әслидә, мастурбация «җинсий әхлақсизлиқ, напаклиқ, шәһвәткә» бағлиқ тән әзалирини өлтүрүшниң орниға, уларни техиму қозғайду (Колосилиқларға 3:5).

Әлчи Паул: «Қәдирданлирим,... келиңлар, Худа қорқунучида муқәддәсликни мукәммәлләштүрүп, тән билән роһни булғайдиған һәммә нәрсидин өзүмизни тазилайли»,— дәп язған (Коринтлиқларға 2-хәт 7:1). Әгәр сизгә мошу мәслиһәтни орунлаш қийин болса, үмүтүңизни үзмәң. Йәһва Худа дайим ярдәмгә келишкә вә кәчүрүшкә тәйяр (Зәбур 86:5; Луқа 11:9—13). Бу начар адәтни ташлаш үчүн қилған һәрикитиңиз нәтиҗисиз болсиму, вижданиңизниң әйиплигини һәм бу адитиңизни ташлашқа бар күчиңизни салғанлиғиңиз нийитиңизниң яхши екәнлигини көрситиду. Шундақла «Худа бизниң жүригимиздин улуқ вә һәммини билидиғанлиғини» әстин чиқармаң (Йоһанниң 1-хети 3:20). У пәқәт гуналиримизнила әмәс, бәлки бизниң қандақ адәм екәнлигимизни көриду. У биз һәққидә һәммини билгәчкә, рәһим-шәпқәт тилигинимиздә,  дуалиримизни һәмдәртлик билән тиңшайду. Шуңа, чатаққа йолуққанда дадисиға жүгригән кичик балидәк, сизму Йәһваға кәмтәрлик вә ихлас билән дуа қилиң. Йәһва сизгә пак виждан бериду (Зәбур 51:1—12, 17; Йәшая 1:18). Әлвәттә, сиз дуалириңизға бенаән һәрикәт қилишиңиз керәк. Мәсилән, порнографияниң һәрқандақ түридин вә яман муамилидин нери турушиңиз керәк *.

Әгәр мастурбация қилиш адитини ташлаш қийин болса, мәсиһий ата-аниңиз яки роһий җәһәттин йетилгән ғәмхорчан достуңиз билән сөзлишиң * (Пәнд-нәсиһәтләр 1:8, 9; Салоникилиқларға 1-хәт 5:14; Титқа 2:3—5).