Wiivukula, eri yoolema ehinimusivela Muluku, yeeyo enimwiiriha mutthu ophavelaka wiihakalaliha paahi, nto yoolema eyo ennihonona muupuwelo wa mutthu. * Mutthu yoole oniivukula, pooti-tho waathokoreryaka atthu akina ntoko etthu epakeliwe orupihiwa paahi. Nave-tho, mutthu owo pooti othokoreryaka enoka ntoko etthu yoophavela wiihakalaliha paahi, ni omaliha munkhela awe, ohiya ntoko etthu epakeliwe wira mulopwana ni muthiyana alepinhe ekasamento aya yooniheryaneke ophenta. Masi ophavela omaliha munkhela owo khonipisa. Tthiri, mutthu yoole oniivukula, onootepa wuncererya soophavela sa erutthu awe, ntoko “enamuttompe, oraruwa, osiveliwa n’itthu sonanara [s’ekhapa]”, ohiya opwetexa itthu iyo.​—aKolosi 3:5.

Murummwa Paulo olempe so: “Axinn’aka òphentiwa! Okhala wira ninroromela wakhela sorera iya, nrapihe sonanara sothene s’erutthu ni s’eroho: niphaveleke omaleliha exariy’ahu nimuttittimihaka Muluku”. (2 aKorinto 7:1) Akhala wira vannoorikelani weettela moolumo ala, muhuupuweleke wira khamunikhala-khala nweryaka wiiwelela. Okathi wotheene, Yehova toolikana ene moophavela ‘wòlevelelani’ ni wookhaliheryani. (Esalimo 86:5; Luka 11:9-13) Mwekeekhai, wiimananiha ni wiilipiherya wanyu moophavela ohiya yoolema eyo, ethoonyeryo yoowi murima anyu ti wooloka, nnaamwi ikwaha sikina moceelaka osyaka mweettelo owo. Nave-tho, muhiliyaleke wira ‘Muluku ti mulupale ovikana murim’ahu: [ni] onnisuwela sothene’. (1 Yohani 3:20) Muluku khoniwehexexa soottheka sahu paahi; masi oniweha okumi ahu wotheene. Okhala wira onnisuwela itthu sotheene voohimya sa hiyo, nto onniwerya oniwiriyana mooreerela murima moolumo ahu vaavo vaninvekela ahu onimorela ikharari. Nto, nivikaniheke onvekela Muluku mowiiyeviha ni murima wotheene, ntoko mwaana onaaroromela atithi awe okathi onikhalana awe mixankiho. Yehova onrowa wooreelihani wira mukhalane yowuupuxerya ya murima yooloka. (Esalimo 51:1-12, 17; Yesaya 1:18) Mpakeke itthu sintthuneya moovarihana ni mavekelo anyu. Mwa ntakiheryo, muhaana wiimananiha wira musyake inamuna sotheene sa epornografia ni wataana ni atthu oohiloka. *

Akhala wira muxankiho anyu wa wiivukula onnivikaniha, xontte mmuleele tiithi inyu aahiiso maama anyu, yoowo ori muKristau, aahiiso mpatthani oolipa momunepani masi onrowa woowiriyanani saana. *​—Miruku 1:8, 9; 1 aTesalonika 5:14; Tito 2:3-5.