TE TAHI ʼU FAKAMAHINO
ʼE Kotou Lava Tuku Ia Te Aga ʼAē Ko Te Mulu
Ko te mulu, ko he aga ʼe fehiʼa kiai te ʼAtua, heʼe ina fakatupu ʼi he tahi ia te manatu pē ʼaē kiā ia totonu pea mo ʼulihi tona ʼatamai. * Ko he tahi ʼe ina fai ia te aga ʼaē ko te mulu, ʼe feala pē anai ke ina fakaʼuhiga te hahaʼi ohagē pē ko he ʼu meʼa ke fai kiai ni ʼu felāveʼi fakasino, moʼo fakafīmālieʼi pē tona ʼu holi fakasino. ʼE mole ina fakaʼuhiga te ʼu felāveʼi fakasino ohagē ko he temi ʼe fefakahāʼaki ai te ʼofa ʼa he taumātuʼa, kae ko he temi moʼo fakafīmālieʼi ai tona ʼu holi fakasino. Kae ko te fakafīmālie ʼaia ʼe fakatemi pē ia. ʼI tona ia fakahagatonu, ko te mulu ʼe mole ina fakamate te ʼu koga ʼo te sino “ ʼo ʼuhiga mo te fai folonikāsio, mo te aga heʼemaʼa, mo te ʼu holi ki te ʼu felāveʼi fakasino,” kae ʼe ina fakatupu ia te ʼu holi fuli ʼaia.—Kolose 3:5.
Neʼe tohi fēnei e te ʼapositolo ko Paulo: “Kāiga ʼofaina, tou fakamaʼa ia tātou mai te meʼa ʼuli fuli pē ʼo te kakano pea mo te laumālie, ʼo fakakātoa ia te māʼoniʼoni ʼi te manavasiʼi ki te ʼAtua.” (2 Kolonito 7:1) Kapau ʼe mata faigataʼa kiā koutou ia te mulimuli ki te ʼu palalau ʼaia, ʼaua naʼa kotou lotovaivai ai. Ko Sehova ʼe “fakamolemole gafua” tuʼumaʼu pē pea mo fia tokoni atu. (Pesalemo 86:5; Luka 11:9-13) Koia, kapau ʼe vevele tokotou leʼo ʼo loto pea mo kotou faiga ke kotou tuku te aga ʼaia, ʼe ko he meʼa ʼe lelei, tatau aipē peʼe kotou tōtō ʼi ʼihi temi. Pea kotou toe manatuʼi foki, “ko te ʼAtua ʼe lahi age ia ʼi totatou loto pea ʼe ina ʼiloʼi ia meʼa fuli.” (1 Soane 3:20) ʼE mole gata pē te sio ʼa te ʼAtua ki ʼatatou ʼu agahala, kae ʼe sio ia ki totatou ʼulugaaga kātoa. ʼAki tana mahino ʼaia kiā tātou, ʼe feala ai ke lotomahino mokā fagono mai ki tatatou ʼu kole mamahi age ʼaē ke manavaʼofa mai kiā tātou. Koia ʼaua naʼa kotou fiu ʼi te fakaovi ki te ʼAtua, ʼo kotou faikole ki ai ʼaki he agavaivai pea mo fakamālotoloto, ohagē ko he tamasiʼi ʼe ʼalu ki tana tamai mokā hoha ki he meʼa. ʼE foaki atu anai e Sehova ia hokotou leʼo ʼo loto ʼe maʼa. (Pesalemo 51:1-12, 17; Isaia 1:18) ʼE mahino ia, ʼe tonu ke kotou fai he ʼu fakatuʼutuʼu ʼe lelei ʼo mulimuli ki te ʼu faʼahi ʼaē neʼe kotou kole. Ohagē lā, ʼe kotou faiga anai ʼo tekeʼi ia te ʼu faʼahi fuli ʼaē ʼe fakahā ai ni ʼu felāveʼi fakasino heʼeʼaoga ʼo fēia mo te ʼu fakakaugā kovi. *
Kapau ʼe hoholo pē takotou aga ʼaē ko te mulu, pea ʼe lagi lelei hakotou fakahā ia tokotou fihifihia ʼaia ki he Kilisitiano ʼi tokotou fāmili peʼe ko hokotou kaumeʼa kua fotufotuʼa ʼi te faʼahi fakalaumālie pea mo ʼofa kiā koutou. *—Tāʼaga Lea 1:8, 9; 1 Tesalonika 5:14; Tito 2:3-5.
^ pal. 1 Ko te mulu ʼe ko he amoamo peʼe ko he palu ʼo te ʼu potu tapu ʼo te sino, ʼaē ʼi te agamāhani ʼe iku ki te logoʼi ʼo he lelei ʼo te ʼu felāveʼi fakasino.
^ pal. 2 Ke ʼiloʼi ia te ʼu meʼa ʼaē ʼe sioʼi ʼi te olotinatea ʼi te loto fale, tokolahi te ʼu fāmili ʼe natou fakatuʼutuʼu ke hili te olotinatea ʼi he faʼahi ʼe feʼaluʼaki ai te fāmili. Tahi ʼaē meʼa, ʼe totogi e ʼihi fāmili he polokalama olotinatea ke mole hā ai he ʼu meʼa ʼe kovi. Kae ko te ʼu taʼi polokalama ʼaia ʼe mole tonu ke tuku kātoa kiai tatatou falala.
^ pal. 1 Kapau ʼe kotou fia maʼu he ʼu tokoni ʼaoga ke feala ai hakotou tuku ia te aga ʼaē ko te mulu, kotou vakaʼi te Réveillez-vous ! ʼo Novepeli 2006, te ʼalatike “Les jeunes sʼinterrogent... Comment vaincre cette habitude ?” (ʼE feʼekeʼaki e te kau tūpulaga... ʼE lava feafeaʼi he tuku ʼo te agamāhani ʼaia?) pea mo te tohi Les jeunes sʼinterrogent — Réponses pratiques, ʼi te ʼu pāsina 205 ki te 211.