FAN̈AMPINY FAN̈AZAVAN̈A
Ialà Raha Ratsy Mahazatra Io
Misy olo zatra misoma raha mahalelahy izy na mahaman̈angy izy. Manafosafo na mandrokotro izio mare izy, baka mahatsiaro sambatra. Tsy tiany Zan̈ahary olo zatra man̈ano zen̈y, fotony izy tia ten̈a ndreky maloto sain̈y. Olo karaha zen̈y mivolan̈a fa fitaovan̈a fan̈anovan̈a firaisan̈a fo olo hafa, fa tsisy raha ilan̈a iro eky. Amindro, firaisan̈a io tsy mila olo aroe fa na olo araiky efa mety man̈ano izio, koa fa ty ho sambatra mare. Tsy ten̈a fahasambaran̈a raha karaha zen̈y, fotony raha mandalo fo. Olo zatra man̈ano zen̈y, tsy mamono fan̈irian̈a ratsy amy ratsambatan̈anany, karaha ataony “fijangajangan̈a, fahalotoan̈a, fan̈irian̈any nofotro” tsy aradàlan̈a. Izy man̈ano raha mampiaho izio fo.—Kolosianina 3:5.
Apostoly Paoly nivolan̈a: “Ke irarian̈a atsika ry havako aby han̈adio ain̈intsika ho afaka amy fahalotoan̈a jiaby, na amy nofotro zen̈y na amy fan̈ahy, baka atsika ho masin̈y amy raha jiaby amy fatahoran̈a Zan̈ahary.” (2 Korintianina 7:1) Izikoa sarotro aminao man̈araka zen̈y, aza malemy troko. Jehovah ‘von̈ono han̈ambela hadisovan̈anao’, ndreky han̈ampy anao. (Salamo 86:5; Lioka 11:9-13) Efa tsara izikoa anao mahay fa tsy mety raha ataonao. Anao koa ma efa mifen̈y miala amy raha ratsy nahazatra anao io, ndray mbala tsendriky ten̈a afaka amizio. Tsarova fa ‘Zan̈ahary io be mandilatra fontsika, sady izy koa mahay raha jiaby.’ (1 Jaona 3:20) Tsy fahotan̈antsika fo hitany Jehovah fa toetry tsarantsika koa. Zen̈y mahavy atsika koa fa mangataka izy han̈ambela hadisovan̈antsika, izy mahinakinaka atsika. Ke man̈anova karaha tsaiky tsy misalasala mangataka raha amy babany, izikoa fa misy raha manahiran̈a izy in̈y. Anao koa tsy voly mangataka Jehovah han̈ambela hadisovan̈anao, izy han̈ampy anao baka anao tsy hijaly jery. (Salamo 51:1-12, 17; Isaia 1:18) Anao koa mila man̈ano raha mifan̈araka amy vavaka nataonao. Mila mifen̈y mare koa anao tsy hizaha na hamaky raha vetaveta. Mivoleza minaman̈a aminolo tia raha tsy manjary. *
Izikoa hitanao fa mbala tsy resinao fo raha ratsy mahazatra anao io, mivolàn̈a aminolobenao na amy Kristianin̈y araiky matotro atokisanao. *—Ohabolana 1:8, 9; 1 Tesalonianina 5:14; Titosy 2:3-5.
^ feh. 2 Maro olo man̈ambela ordinaterandro amy tany hitanolo jiaby antran̈ondro, baka voaramaso fo. Misy koa mivanga programo mahavita man̈adoso raha ratsy, miaraka izy miboaka. Ndray izy man̈ano zen̈y, tsy ten̈a mafatoky programo aby io.
^ feh. 1 Misy hevitry tsara arehan̈a koa amy lahatsoratra aby amy “Manontany ny Tanora Hoe... Ahoana no Hialako Amin’io Fahazarana Io?”, amy Mifohaza! Novambra 2006 ndreky amy boky Manontany ny Tanora— Torohevitra Mahasoa (malagasy), Boky Voalohany, pazy 178-182.
