YAKONJECESYA
Kumalana ni Cisyoŵe Cakung’andila Kuyalo
Cisyoŵe cakung’andila kuyalo cikusamsakalisya Mlungu. Cisyoŵeci cikusamtendekasya mundu kuti agambeje kuganisya yakulisangalasya jika, nambosoni cikusajonanga nganisyo sya mundu. Mundu jwakusang’andila kuyalo, akusagambaga kwawona ŵandu ŵane mpela pakumacisya lukumbokumbo lwakwe lwagonana. Mundu jwacisyoŵe celeci akusakuwona kugonana mwakulemweceka. Ŵangakuwona kuŵa litala lyakulosyana cinonyelo, nambo mpela litala lyakulisangalasya jika pakusaka kuti amasye kumbila gonana. Kumasya kumbila kweleku kukusaŵa kwa kandaŵi kamnono. Nambo kusala yisyene, mmalo mwakumasya kumbila “cikululu, yausakwa, yakusaka yangalumbana kapena kuti kumbila [mwangaligosa] kugonana,” mundu jwakusang’andila kuyalo akusasacilila mnope kutenda yeleyi.—Akolose 3:5.
Ndumetume Paulo ŵalembile kuti: “Acalongo acimjangu, . . . kwende tutyosye yindu yosope yakusakasya cilu cetu kapena mtima wetu. Nipo pakogopa Mlungu tuliswejesye kuŵa ŵaswela mtima.” (2 Akolinto 7:1) Naga yikwasawusya mnope kuya maloŵe gelega, akajasa mtima. Ndaŵi syosope Yehofa akusaŵa ‘jwakoseka kululucila,’ soni kukamucisya. (Salimo 86:5; Luka 11:9-13) Mundu akusalosya kuti akwete mtima wambone pakuligamba mumtima, soni pakulingalinga kuti amalane ni cisyoŵeci, atamose kuti ndaŵi sine mpaka atandilesoni kung’andila kuyalo. Akumbucilesoni kuti “Mlungu ali jwamkulungwa kujipunda mitima jetu, soni kuti akusamanyilila yosope.” (1 Yohane 3:20, NW) Mlungu ngakusagamba kulola yakulemwa yetu, nambo akusayiwona yosope yayikutendekwa pa umi wa mundu. Yeleyi yikusamtendekasya kuti atupikanile patukum’ŵenda kutyocela pasi pa mtima kuti atutendele canasa. M’yoyo, akaleka kum’ŵenda Mlungu ni mtima wosope soni mwakulinondiya kuti ŵakamucisye, mpela mwakusatendela mwanace jwakusawutucila kwa babagwe pasimene ni yakusawusya. Yehofa cacakamucisya kuti akole cikumbumtima ceswela. (Salimo 51:1-12, 17; Yesaya 1:18) Nambope akusosekwa kutenda yindu mwakamulana ni mapopelo gawo. Mwambone, akusosekwa kuŵambala kulolela yindu yiliyose yakuŵagula, soni kukunguluka ni ŵandu ŵakusakala. *
Naga yikusawusya kumalana ni cisyoŵe cakung’andila kuyalo, conde amsalile nganijo nangolo jwaciklistu kapena mjawo jwamkomangale mwausimu, soni jwakusasamala ya wawojo. *—Miyambo 1:8, 9; 1 Atesalonika 5:14; Tito 2:3-5.
^ ndime 2 Kuti akalolelaga yakuŵagula pa Intaneti, maŵasa gane gakusaŵika kompyuta pamalo gakuwonecela kwa wosope. Maŵasa gane gakusasuma mapologalamu gane ga pakompyuta gakamucisya kuti yindu yakusakala yikawonecelaga pa kompyuta jawo. Tukumbucilesoni kuti mafoni ga m’miyala, soni tumakompyuta twam’miyala tukusakolasoni Intaneti, soni kuti mapologalamu gakamucisya kuti yindu yakusakala yikawonecelaga pa yindu yeleyi ndaŵi sine gangakamucisya.
^ ndime 1 Kuti amanyilile yine yampaka atende kuti amalane ni cisyoŵe cakung’andila kuyalo, alole ngani jakuti “Zimene Achinyamata Amadzifunsa . . . Kodi Ndingathetse Bwanji Chizolowezi Chimenechi” mu Galamukani! ja November 2006, soni alole buku ja Ciceŵa jakuti Mafunso Achichepele Akufunsa—Mayankho Amene Amathandiza pa mapeji 205 mpaka 211.
