KAPÍTULO 5

¿Añemantene vaʼerãpa vírhen amenda mboyve?

“Oĩ hetaiterei chemboligáva arekóma hag̃ua rrelasión sexuál” (Kelly).

“Che núnka ndarekóiva rrelasión sexuál, ha legálmente atĩ lénto haʼe hag̃ua upéva” (Juan).

“¿NDE piko vírhen gueteri?”. Oiméne ndereipotaiete oñeporandu ndéve upéva, pórke oĩ heta mitãrusu ha mitãkuña voieterei orekómava rrelasión sexuál. Ha oĩ voi opensáva irraroitereiha oĩramo álgien ndojapóiva upéva.

Ikatu oime ndestira ha avei oĩ nemboligáva

Reservíramo Ñandejárape, katuete reikuaa porã la Biblia heʼiha ‘jarrechasaite vaʼerãha pe tekovai’ (1 Tesalonicenses 4:3).  Upéicharõ jepe, ikatu sapyʼánte ijetuʼu ndéve rekontrola hag̃ua umi deséo reguerekóva. Por ehémplo, Pablo omombeʼu: “Sapyʼánte ou jepi che akãme umi pensamiénto itieʼỹva, ha ndaikuaái ni mbaʼérepa oiko upéva”. Ha péva ojehu jepi avei heta mitãrusu ha mitãkuña oparupiguápe.

Avei, ikatu oĩ nemboligáva reguerekóma hag̃ua rrelasión sexuál térã oñembohorýva nderehe pórke neʼĩra rejapo upéva. Por ehémplo, ikatu ne kompañerokuéra heʼi peteĩ ndoguerekóiva gueteri rrelasión sexuál neʼĩraha ikariaʼy térã ikuñataĩ. Elena omombeʼu: “Che kompañerokuéra opensa ndaivairiha jaguereko rrelasión sexuál oĩramo la oportunida upearã, ha heʼi voi hikuái  igustoitereiha upéva. Upévare iñextrañoiterei chupekuéra oĩramo ndojapóiva la haʼekuéra heʼíva”.

Péro oĩ peteĩ mbaʼe noñemombeʼuguasúiva. ¿Mbaʼépa? María imanduʼa mbaʼéichapa oñeñandu vaʼekue oreko rire rrelasión sexuál inóviondi: “Upe rire apyta atĩ, arrenegaiterei ha chepochyeterei voi apytávo chejehe ha che nóviondi”. Pyʼỹinte umi orekóva rrelasión sexuál imitãiterei reheve opyta oñeñandu avei péicha. Heta mitãrusu ha mitãkuña odesidíva oreko rrelasión sexuál imitãiterei reheve tuichaiterei ojeperhudika ijupe voi, ha opyta ombyasy la ojapo vaʼekue oikove aja entéro.

Péro ikatu oime nde avei reikuaase peteĩ mbaʼe Sandra oñeporandu vaʼekue: “Ñandejára oipotárõ ñamenda raẽ jareko hag̃ua rrelasión sexuál, ¿mbaʼére ñandeapo jareko hag̃ua pe deséo ñanemitã guive?”. Añetehápe iñimportánte ñambohovái upe porandu, ha upearã ikatu ñapensami koʼã mbaʼére:

Ñande yvypóra jarekónte voi heta mbaʼe ñandegustáva ha ñandestiráva. Ñandejára Jehová ñandeapo vaʼekue voi ikatu hag̃uáicha ñañandu, jajapose ha jadisfruta heta mbaʼe, ndahaʼéi umi rrelasión sexuál añónte.

Ndaikatúi voínte jajapo entéro mbaʼe ñandegustáva térã ñandestiráva. Ñandejára ñandeapórõ guare, omeʼẽ vaʼekue ñandéve pe kapasida ikatu hag̃uáicha jajejokokuaa.

¿Mbaʼépa ñaaprende? Sapyʼánte jarekotanteha voi pe deséo jajapose hag̃ua peteĩ mbaʼe, péro avei jarekoha la kapasida  ñakontrolávo upe deséo. Epensamína ko ehémplore: ivaietereíta oĩramo ombyepotíva hapichápe káda ke ipochy térã orrenega hese. Upéicha avei, naiporãmoʼãi peteĩ persóna opensáramo ikatuha oreko rrelasión sexuál káda ke oreko pe deséo.

Ñandejára oipota jarrespeta haʼe opensáva umi rrelasión sexuál rehe. La Biblia heʼi: “Káda uno oikuaa vaʼerã mbaʼéichapa ipuʼakáta hetére osegi hag̃ua hekopotĩ ha ojerrespeta” (1 Tesalonicenses 4:4). Heʼi avei opa mbaʼe orekoha itiémpo, por ehémplo “tiémpo jahayhu hag̃ua ha tiémpo nañandejaʼéi hag̃ua”. Upéicha avei, umi rrelasión sexuál oreko itiémpo ha ilugár (Eclesiastés 3:1-8). Upévare, nde ikatu rekontrola umi deséo reguerekóva.

Péro, ¿mbaʼépa rejapóta oĩrõ oporandúva ndépa haʼe gueteri vírhen oñembohory hag̃uánte nderehe? Ani rekyhyje chugui. Oimérõ oporandu upéva oipotágui retĩ térã rekyhyje, ikatu ere chupe: “Si. Ha avyʼaiterei asegi haguére upéicha”. Térã ikatu avei ere: “Che nañeʼẽséi umívare oimeraẽvandi” (Proverbios 26:4; Colosenses 4:6). a Péro rehechakuaáramo pe oporandúva ndéve ipyʼaporãha ha oikuaaseveha ko témagui, ikatu reaprovecha pe oportunida reexplika hag̃ua mbaʼépa heʼi la Biblia ha mbaʼérepa redesidi rejapo upéicha.

¿Mbaʼépa ikatu avei ere oĩramo álgien oporandúva ndépa haʼe gueteri vírhen oñembohory hag̃uánte nderehe?

․․․․․

Peteĩ rregálo iporãitereíva

¿Mbaʼéichapa Jehová oñeñandu oĩ rupi odesidíva oreko rrelasión sexuál omenda mboyve? Epensamína ko ehémplore: ñamoĩ chupe repreparaha peteĩ rregálo ne amígope, ha ikuriosoiterei  rupi, haʼe oavríntema remeʼẽ mboyve chupe. ¿Mbaʼéichapa reñeñandúta? Katuete nandegustamoʼãi upéva. Upéicha avei, ikatu jaʼe umi rrelasión sexuál haʼeha peteĩ rregálo Ñandejára opreparáva umi omendávape g̃uarã, ha haʼe oipota ñahaʼarõ upe moménto peve (Génesis 1:28).

Upéicharõ, ¿mbaʼépa rejapóta sapyʼánte reñandúramo pe deséo ereko hag̃ua rrelasión sexuál? Tekotevẽ reaprende rekontrola pe deséo. Ejerure Jehovápe tomeʼẽ ndéve ijespíritu, ha upéva nepytyvõta rejejokokuaa hag̃ua (Gálatas 5:22, 23). Ani nderesarái Jehová ‘núnka ndojokomoʼãiha mbaʼeve iporãva umi iñeʼẽrendúvagui’ (Salmo 84:11). Jorge heʼi: “Sapyʼánte apensáramo ndahaʼemoʼãiha la ivaietereíva arekóramo rrelasión sexuál  amenda mboyve, chemanduʼa upéva chereja vaietereitaha Ñandejára renondépe. Aime segúro ndaiporiha mbaʼeve iporãvéva pe amista arekóvagui Jehovándi, ha ni mbaʼevéicharõ ndaperdeséi upéva”.

Upéicharõ, oiméramo nde vírhen gueteri, ndaipóri reñeñandu vai hag̃ua térã retĩ hag̃ua upe haguére. Umi persóna hekovai térã hekokyʼáva la otĩ vaʼerã, pórke upéva operhudika ha omongyʼa chupekuéra opavave renondépe. Upévare, aníkena reheja ko múndo ogueroviaka ndéve iporãvetaha nerepenáiramo la Biblia heʼívare. Añetehápe, reñemantenéramo vírhen remenda peve rehupytýta hetaiterei mbaʼe porã. Por ehémplo upéicha rekuidáta hína nde salúre, nderejapomoʼãi peteĩ mbaʼe repytátava rembyasyeterei, ha iñimportanteveha, reime porãta Ñandejára ndive.

RETOPAVÉTA INFORMASIÓN VOLÚMEN 1, KAPÍTULO 24-PE

[Nóta]

TÉXTO OĨVA LA BÍBLIAPE

‘Peteĩ persóna odesidíramo ipyʼaite guive nomendamoʼãiha [térã oñemantenetaha vírhen], upéicharõ pe odesidíva oĩ porã’ (1 Corintios 7:37).

PETEĨ KONSÉHO

Ani rejeheʼa umi ndorrespetáivare Ñandejára opensáva umi rrelasión sexuál rehe, haʼéramo jepe ne rrelihionpegua.

¿REIKUAÁPA RAʼE?

Umi omenda mboyve ndorrespetáiva Ñandejára heʼíva umi rrelasión sexuál rehe, hasy okambia hag̃ua omenda rire. Péro umi oĩva soltéro ha oikóva Ñandejára oipotaháicha, normálmente osegi upéicha omenda rire ha ifiél hembiayhúpe.

UMI MBAʼE AJAPÓTAVA

¿Mbaʼe mbaʼépa ikatu ajapo añemantene hag̃ua vírhen amenda peve? ․․․․․

¿Mbaʼépa ikatu ajapo che amigokuéra chemboligáramo ani hag̃ua arrespeta pe adesidi vaʼekue? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa oĩ oñembohorýva hapicháre haʼe haguére vírhen?

● ¿Mbaʼérepa ikatu ijetuʼu peteĩ persónape oñemantene hag̃ua vírhen?

● ¿Mbaʼérepa iporãve reñemantenéramo vírhen remenda peve?

● ¿Mbaʼéichapa reexplikáne ne ermáno térã ermána imitãvévape iporãveha opyta vírhen omenda peve?

[Komentário oĩva páhina 51-pe]

“Tuichaiterei ningo chepytyvõ ajejokokuaa hag̃ua chemanduʼávo umi hekovaíva ha hekokyʼáva ndoikemoʼãiha Ñandejára Rréinope” (Lidia, imanduʼávo Efesios 5:5-re).

[Rrekuádro oĩva páhina 49-pe]

Rekompleta hag̃ua

¿Mbaʼépa la añetehápe oikóva upe rire?

Umi mitãrusu, mitãkuña, ha umi entretenimiénto nomombeʼúi mbaʼéichapa osufri umi orekóva rrelasión sexuál omenda mboyve. Jahechamína 3 situasión, ha upéi embohovái umi porandu:

● Peteĩ ne kompañéro heʼi oñenóma hague hetaiterei kuñándi, igustoitereiha ha ndoperhudikaiha avavépe. ¿Siértopa upéva? ¿Mbaʼéichapa oiméne oñeñandu umi mitãkuña? ․․․․․

● Opakuévo peteĩ pelíkula, peteĩ mitãrusu ha peteĩ mitãkuña neʼĩrava omenda oñeno oñondive ohechaukaségui ojoayhuha. ¿Mbaʼépa ere añetehápe oikotaha peteĩ paréha ojapóramo avei la ojehechaukáva upépe? ․․․․․

● Peteĩ kariaʼy ichurroitereíva heʼi orekoseha rrelasión sexuál nendive ha avave ndoikuaamoʼãiha. ¿Mbaʼépa oikóta reaseptáramo upéva? ․․․․․

[Taʼanga oĩva páhina 54-pe]

Reguerekóramo rrelasión sexuál remenda mboyve, haʼete reavrímava peteĩ rregálo oñemeʼẽ mboyve ndéve