Apay a Masaksakitak Unay?
KAPITULO 8
Apay a Masaksakitak Unay?
“No ubingka pay, ti panagriknam ket kanayonka a nakaradkad. Ngem kellaat nga agbaliw ti amin gapu iti grabe a sakit. Mariknam a limmakayka iti agpatnag.”—Jason.
IDI 18 ti tawen ni Jason, naammuanna nga isu ket addaan iti Crohn’s disease. Maysa daytoy a makapalupoy ken naut-ot a sakit iti bagis. Nalabit agsagsagabaka met iti nakaro a sakit wenno pisikal a depekto. Mabalin a narigat kenka ti panagpelles, pannangan, ipapan idiay eskuelaan, ken dadduma pay nga aktibidad a laklakaen ti adu.
Ti nakaro a sakit pagbalinennaka a kasla balud gapu ta kednganna ti wayawayam. Mabalin a malidayanka. Baka ipagarupmo pay ketdi nga adda naaramidmo a di makaay-ayo iti Dios wenno impagtengna kenka dayta a sakit kas naisangsangayan a suot iti kinatarnawmo. Nupay kasta, kuna ti Biblia: “Iti dakes a bambanag saan a mabalin a suoten ti Dios Santiago 1:13) Paset laeng ti agdama a kasasaad ti tao ti panagsakit, ken mapagteng kadatayo amin ti “tiempo ken ti di mapakpakadaan a pasamak.”—Eclesiastes 9:11.
ket isu saanna met a suoten ti asinoman.” (Makaparagsak ta inkari ni Jehova a Dios ti maysa a baro a lubong a sadiay “awanto ti agtataeng nga agkuna: ‘Masakitak.’” (Isaias 33:24) Uray dagiti natay mapagungardanto, iti kasta maaddaanda iti gundaway a mangtagiragsak iti dayta a baro a lubong. (Juan 5: 28, 29) Ngem kabayatanna, kasanom a maaramid ti kasayaatan iti laksid ti kasasaadmo?
Ikagumaam ti agbalin a positibo. Kuna ti Biblia: “Ti puso a narag-o nasayaat a pangagas.” (Proverbio 17:22) Nalabit ipagarup ti dadduma a saan a maitutop ti agrag-o ken agkatawa no agpaspasarda iti nakaro a sakit. Ngem ti panagkatawa ken ti naragsak a panaglalangen pasalibukagenna ti panunot ken parayrayenna ti determinasionmo nga agbiag. No kasta, panunotem no ania ti maaramidam tapno agbalin a naragragsak ti biagmo. Laglagipem a ti rag-o ket maysa kadagiti bunga ti espiritu ti Dios. (Galacia 5:22) Matulongannaka ti espiritu ti Dios a mangibtur iti sakitmo buyogen ti rag-o.—Salmo 41:3.
Mangipasdekka kadagiti realistiko a kalat. “Ti sirib adda kadagidiay naemma,” kuna ti Biblia. (Proverbio 11:2) Makatulong ti kinaemma tapno saanmo a mabaybay-an wenno nalabes a pakaseknan ti salun-atmo. Kas pagarigan, no ipalubos ti kasasaadmo, makatulong ti maitutop a panagwatwat tapno sumayaat ti riknam. Dayta ti gapuna a masansan nga addaan dagiti ospital iti programa a physical therapy para kadagiti ubbing a pasiente. Iti adu a kaso, ti maitutop nga ehersisio saan laeng a tumulong a mangpaimbag no di ket tumulong pay a mangpaganaygay. Ti napateg, tingitingem a naimbag ti kasasaadmo sa mangipasdekka kadagiti realistiko a kalat.
Sursuruem a pakilangenan ti sabsabali. No ngay adda mangdillaw iti kasasaadmo? Kuna ti Biblia: “Saanmo nga ipaay ta pusom kadagiti amin a sao a sawen dagiti tattao.” (Eclesiastes 7:21) No dadduma nasaysayaat no saanmo lattan nga ikankano dayta. Wenno saan, mabalinmo a sakbayan ti situasion. Kas pagarigan, no alusiisen ti dadduma a makakita kenka a naidalit iti de pilid a tugaw, mabalinmo a kunaen: “Nalabit masdaawka no apay nga addaak iti de pilid a tugaw. Kayatmo kadi a maammuan?”
Dika sumuko. Idi naipasango ni Jesus iti nakaro a panagsagaba, nagkararag ken nagtalek iti Dios. Impamaysana ti panunotna iti rag-o nga agur-uray kenkuana, saan ket nga iti rigat a sagsagabaenna. (Hebreo 12:2) Nakasursuro ni Jesus kadagiti narigat a kasasaad a napasaranna. (Hebreo 4:15, 16; 5:7-9) Inawatna ti tulong ken pammaregta. (Lucas 22:43) Saan a ti rigat nga ib-ibturanna ti kangrunaan a pakaseknanna no di ket ti pagimbagan dagiti sabsabali.—Lucas 23:39-43; Juan 19:26, 27.
‘Maseknan Kenka’ ni Jehova
Aniaman ti sakitmo, dimo koma panunoten a saanka a napateg iti Dios. Iti kasumbangirna, ipatpateg unay ni Jehova dagidiay mangikagkagumaan a mangay-ayo kenkuana. (Lucas ) ‘Maseknan kenka’ kas indibidual, ken maragsakan a mangusar kenka kas adipenna uray no adda sakitmo wenno an-annayem.— 12:71 Pedro 5:7.
Dimo ngarud ipalubos a lapdannaka ti buteng wenno panagduadua a mangaramid kadagiti banag a kayatmo ken masapul nga aramidem. Kanayon nga agpannurayka iti tulong ni Jehova a Dios. Maawatanna dagiti kasapulam kasta met ti rikriknam. Kanayonanna, maipaayna kenka “ti pannakabalin a nalablabes ngem ti gagangay” tapno makapagibturka. (2 Corinto 4:7) Inton agangay, nalabit agbalinto a positibo ti panangmatmatmo a kas ken Timothy, a natakuatan nga addaan iti chronic fatigue syndrome iti edad a 17. Kinunana: “Sigun iti 1 Corinto 10:13, saan nga ipalubos ni Jehova a mapasarantayo ti nalablabes ngem ti kabaelantayo nga ibturan. Apay ketdin nga ipapanko a diak kabaelan idinto ta agtalek ti Namarsua kaniak a kabaelak daytoy a pannubok?”
No Adda Am-ammom a Masaksakit
No ngay nasalun-atka, ngem adda am-ammom a masaksakit wenno baldado? Kasanom a matulongan? Kangrunaanna, babaen ti panangipakita iti “pannakipagmaymaysa ti rikna” ken panagbalin a “nadungngo a mannakipagrikna.” (1 Pedro 3:8) Tarusam ti sasaadenna. Panunotem no sika ti adda iti kasasaadna. Ni Nina, a nayanak nga addaan iti spina bifida, kinunana: “Makapaupay no maminsan ta dagiti dadduma a tattao kasaritadak a kas ubing gapu ta bassit ti bagik ken naidalitak iti de pilid a tugaw. Nupay kasta, adda dagidiay agtugaw no kasaritadak tapno saanko ida a tangtangaden ket maay-ayatanak a makisarita kadakuada!”
No kumitaka iti labes dagiti an-annayenda, matakuatam nga awan ti nakaidumaan kenka dagidiay adda sakitna. Ken panunotem—‘makaiburayka iti naespirituan a sagut’ iti pannakisarsaritam kadakuada! No kasta ti aramidem, mabenepisiaranka met ta ‘makapagsisinnukatkayo iti pammaregta.’—Roma 1:11, 12.
ADU PAY TI MABASAM MAIPAPAN ITI DAYTOY A TOPIKO ITI TOMO 1, KAPITULO 13
KANGRUNAAN A TEKSTO
“Iti dayta a tiempo . . . awanto ti agtataeng nga agkuna: ‘Masakitak.’”—Isaias 33:23, 24.
BALAKAD
Saanmo unay a pagbutngan ti maysa a banag no ammom ti maipapan iti dayta. Gapuna, ammuem a naimbag ti kasasaadmo. Espesipiko a saludsodem iti doktormo dagiti banag a saan unay a nalawag kenka.
AMMOM KADI . . . ?
Ti sakit wenno kinabaldadom ket saan a dusa nga impagteng ti Dios. Imbes ketdi, resulta dayta ti natawidtayo amin a kinaimperpekto manipud ken Adan.—Roma 5:12.
DAGITI ARAMIDEK!
Tapno kanayon a positibo ti panangmatmatko nupay masakit wenno baldadoak, masapul nga ․․․․․
Ti maysa a realistiko a kalat a mabalinko nga ipasdek ket ․․․․․
No adda mangdillaw iti kasasaadko, tamingek dayta babaen ti ․․․․․
Ti kayatko a saludsoden kadagiti dadakkelko maipapan iti daytoy a banag ket ․․․․․
ANIA TI MAKUNAM?
● Kasanom a mausar ti impormasion iti daytoy a kapitulo a mangtulong iti maysa a tao a baldado wenno addaan iti nakaro a sakit?
● No addaanka iti nakaro a sakit, ania dagiti positibo a banag a mabalinmo nga utoben tapno maaramidmo ti aniaman nga ipalubos ti kasasaadmo?
● Apay a maikunam a ti sakit ket saan a tanda ti di pananganamong ti Dios?
[Kahon/Ladawan iti panid 75]
DUSTIN, 22
“Malagipko pay laeng ti panagsangsangitko iti takkiag ni nanang idi naammuak a maidalitak iti de pilid a tugaw. Walo laeng ti tawenko idi.
Addaanak iti muscular dystrophy (in-inut a panagkapuy dagiti masel). Masapul nga adda mangpelles, mangdigus, ken mangpakan kaniak. Diak maingato dagiti imak. Ngem okupado ken naragsakak latta, ken adu ti rumbeng a pagyamanak. Kanayon a makiramramanak iti ministerio ken agserserbiak kas ministerial nga adipen iti kongregasion. Diak pay ketdi ibilang a nakaay-ay-ay ti kasasaadko. Iti panagserbi ken Jehova, kanayon nga adda aramiden ken padaanan. Padpadaanak ti baro a lubong ti Dios, inton ‘kumalay-atak a kas iti panagkalay-at ti kalakian nga ugsa.’”—Isaias 35:6.
[Kahon/Ladawan iti panid 75]
TOMOKO, 21
“Idi uppat ti tawenko, kinuna kaniak ti doktor: ‘Tungpal-biag a maineksionanka iti insulin.’
Nagrigat a manteneren ti asukar iti dara ti maysa a diabetiko. Masansan a diak makan ti kayatko a kanen, ket dagidiay diak kayat a kanen isu ti masapul a kanek. Agarup 25,000 a darasen a naineksionanak, isu nga agkalkalion ti takiag ken luppok. Ngem tinulongandak dagiti dadakkelko a mangaramid iti aniaman nga ipalubos ti kasasaadko. Kanayon a naragsak ken positiboda, ken intukitda iti panunotko ti kinapateg dagiti naespirituan a banag. Nakaim-imbag ni Jehova kaniak. Idi impalubos ti salun-atko, impakitak ti apresasionko babaen ti panagserbik iti amin-tiempo.”
[Kahon/Ladawan iti panid 76]
JAMES, 18
“Saan nga ammo dagiti tattao a pakilangenan ti kas kaniak a karkarna ti langana.
Maysaak nga unano. Langa ti kangrunaan a kitkitaen dagiti tattao isu a kanayon nga ikagkagumaak a paneknekan a saanak a bassit nga ubing nga addaan iti nabangag a timek. Imbes a maldaanganak gapu ta naidumaak, inkagumaak nga impamaysa ti panunotko iti kinasiasinok. Kapkapnekak ti biagko. Agad-adalak iti Biblia ken naynay nga ikarkararagko ti pannarabay ni Jehova. Kanayon nga adda iti sibayko ti pamiliak a mangparparegta kaniak. Ur-urayek ti tiempo inton ti Dios ikkatenna ti amin a sakit. Kabayatanna, agbibiagak kas maysa nga unano ngem diak ipalubos a ti kina-unanok ti pagrikusan ti biagko.”
[Kahon/Ladawan iti panid 76]
DANITRIA, 16
“Ammok lattan nga adda sakitko ta naut-ot ti bagik uray no mangalaak laeng iti sangabaso a danum.
Nagrigat ti maaddaan iti sakit a fibromyalgia ta nakaut-ut-ot ti bagi. Kas maysa nga agtutubo, kayatko ti agbalin a kas kadagiti gagayyemko, ngem marigatanak itan a mangaramid iti aniaman. Nagrigatko pay nga alaen ti tuturogak! Kaskasdi, nasursurok a babaen ti tulong ni Jehova, maaramidko dagiti gagangay a trabaho nupay adda sakitko. Nabaelak pay ti nangbusbos iti kanayonan nga oras iti ministerio kas maysa nga auxiliary pioneer. Narigat ngem naaramidko dayta. Inkagumaak nga ipakat ti amin a kabaelak ngem ammok met dagiti limitasionko. No makalipatak, kanayon a palagipannak ni nanangko!”
[Kahon/Ladawan iti panid 77]
ELYSIA, 20
“Kanayon a nangato ti gradok iti eskuelaan. Ita, marigatanakon a mangbasa iti ababa laeng a sentensia, ket maldaanganak no dadduma gapu iti dayta.
Nagrigat nga aramiden dagiti simple nga aktibidad no addaanka iti chronic fatigue syndrome. Marigatanak pay a bumangon iti pagiddaan. Ngem pulos a diak impalubos a ti sakitko ti agbalin a pagrukodan ti kinataok. Inaldaw a basbasaek ti Biblia uray no sumagmamano a bersikulo laeng, wenno saan, ibasaannak ti maysa a kameng ti pamiliak. Dakkel ti utangko a naimbag a nakem iti pamiliak. Saan pay ketdi nga inawat ni tatangko ti annongenna iti kombension tapno matulongannak a tumabuno. Pulos a saan a nagreklamo. Ibilangna a dakkel a pribilehio ti panangasikaso iti pamiliana.”
[Kahon/Ladawan iti panid 77]
KATSUTOSHI, 20
“Kellaat lattan nga agriaw ken agkuripas- pasak, nga uray la madadael amin a madalapus ti ima ken sakak.
Agtawenak pay laeng iti lima idi naaddaanak iti sakit a kissiw. Agingga iti mamimpito iti kada bulan nga agdikar dayta. Inaldaw a masapul nga agtomarak iti agas isu a naglakaak a mabannog. Ngem ikagkagumaak a panunoten dagiti sabsabali, saan laeng a ti bagik. Iti kongregasionmi, adda dua a kapatadak nga agserserbi iti amin-tiempo. Nagdakkel ti naitulong dagitoy kaniak. Idi nagturposak, ad-adun nga oras ti busbusbosek iti ministerio. Inaldaw a makidangdangadangak iti sakitko a kissiw. Ngem no madi ti riknak, masapul nga aginanaak. Kabigatanna, nasayaat manen ti riknak.”
[Kahon/Ladawan iti panid 78]
MATTHEW, 19
“Narigatmo a maala ti respeto dagiti kapatadam no ibilangdaka a saan a ‘normal.’
Kayatko la unay ti agay-ayam iti isport ngem diak kabaelan. Addaanak iti cerebral palsy, ket nagrigat ti uray magna laeng. Nupay kasta, diak pampanunoten dagiti diak kabaelan nga aramiden. Nagbalinak nga okupado kadagiti aktibidad a kabaelak, kas iti panagbasa. Sadiay Kingdom Hall a mariknak nga awan ti aniaman a pagdanagak. Makaliwliwa met a maammuan nga ipatpategnak ni Jehova gapu iti makin-uneg a kinataok saan a ti makinruar a langak. Kinapudnona, diak pampanunoten a baldadoak. Ibilangko ti bagik kas maysa a tao nga addaan iti kanayonan ken naisangsangayan a karit a nasken a daeran.”
[Kahon/Ladawan iti panid 78]
MIKI, 25
“Kabaelak idi ti agay-ayam iti isport. Kalpasanna kasla giddaton a bimmaketak nupay agtutuboak pay laeng idi.
Nayanakak nga addaan iti abut iti puso. Sa la nadlaw dagiti sintoma dayta idi agtutuboakon. Naoperaanak innem a tawenen ti napalabas ngem kaskasdi a nalakaak pay laeng a mabannog ken agkarasakit iti nakaro ti ulok. Gapuna, nangaramidak kadagiti nalaka a maragpat ken simple a kalat. Kas pagarigan, nakapagserbiak kas amin-tiempo a ministro, ket adu ti naaramidak iti panangasabak babaen ti surat ken telepono. Kasta met, natulongannak ti sakitko a mangpatanor kadagiti galad nga awan kaniak, kas iti mabayag a panagitured ken kinaemma.”
[Ladawan iti panid 74]
Mabalin a kaska la naipupok iti pagbaludan no addaanka iti nakaro a sakit—ngem ipanamnama ti Biblia a makaluk-atkanto