9 YATICHÄWI

Sapakiw jikxatasta, ¿kamachiristsa?

Wali suma uruwa, ukampis janiw utan kun lurañs puedktati. Ukat amigonakamax kusistʼiriw mistuwayapxi. Wasitampiwa sapak jikxatasxarakikta. Jan jawsawayapktam ukat wal chuym ustʼayasta, ukampis kunatsa jan kamsawayapkpachätam ukaw jukʼamp jan walïkiti. Kunatsa jan awistʼawayapkpachituxa sasaw lupʼiskta, kun pantjataj laykuch jan nayampïñ munapkpacha sasa.

 INAS aka uñkatasin qillqatäki ukham jikxatasirïsta. Mayninakatxa kunas jayarstʼaykiristam ukhamwa amuyasisma. Inas parltʼañ munasaxa, khathattʼasis arschisma. Ukhamarak inas wayn tawaqu masinakamamp chikäskasax parltʼañsa wal axsarayasirakchisma. ¡Wali chʼamäspaw jaqinakamp parltʼañaxa!

Aynachtʼañat sipansa, ¿kamachtʼasmasa? Mä qhawqha yanaptʼanaka.

● 1) Juma pachpaw jan sum amuyaskasmati. Yaqhip wayn tawaqunakaxa jupanakpachaw sinti jiskʼachasipxi. Janis khitis jupampïñ munkaspa ukat janis kun parltʼañsa yatkaspa ukham amuyasipxi. Jumax ukham amuyassta ukhaxa, jukʼampwa mayni wayn tawaqunakatxa jithiqtasma.

Kamachasmasa: kunsa lurañ yatta uk amuytʼasiñamaxa (2 Corintios 11:6). Kunjam jaqïtasa ukat kunsa lurañ yatta ukanak aka chiqar qillqtʼasïta.

․․․․․

 Chiqpachansa taqiniw pantjasirïtanxa, ukat wali askirakiwa kuna tuqit chʼamachasiñasas wakisi uk yatisiñaxa (1 Corintios 10:12). Ukampis janiw pantjasiñ mayakti yatktaxa. Kunanaksa lurañ yatta uk amtasipunïta ukhaxa, janiw juman payachasiñax utjkaniti ukat janirakiw juma pachpas jiskʼachaskätati.

● 2) Axsarayasiñaw utjaspa. Wal parltʼañ munasktaxa, ukampis kunapachatix parltʼañ horasax purini ukhaxa, janiw kamsañs yatktati. Elisa sat 19 marani tawaqux akham siwa: “Axsarayasikipuntwa. Cristiano tantachäwinakan wal parltʼapki uka jilat kullakanakar uñjasax wal musphärta, kunattix janiw nayax jupanakjam parltʼirjamäkti” sasa. Inas jumax uka tawaqjam jikxatasiraksta, ukat axsarayasikipunismach ukham amuyasiraksta.

Kamachasmasa: mayninakax kunjamäsipkisa uk yatxatañama. Axsarayasirïstaxa jan sint llakisimti: janiw wakiskiti taqit sipansa wali wal parltʼir tukuñamaxa. Maynimpiw parlañ qalltasma. Jorgex akham siwa: “Kunjamakïsktasa, irnaqäwiman walikïstati sas jisktʼañax jukʼamp sum uñtʼañwa yanaptʼiristamxa” sasa.

 Akham lurasmaxa: jan mita masinakamampikix parlkamti. Biblian qillqatarjamaxa, janiw taqinix mita masinakapat amigonakanipkänti, jan ukasti walja maranakatwa apasipxäna, sañäni, Rut warmimpi Noemimpi, Davitampi Jonatanampi ukat Timoteomp Pablompi (Rut 1:16, 17; 1 Samuel 18:1; 1 Corintios 4:17). Amtañamapuniwa, parltʼasax janiw sapamaki parlañamäkiti, maynix arstʼarakiñapawa. Istʼatäñwa taqinis munapxi. Ukaw wal yanaptʼätamxa, kunattix janiw parlañanxa sapamakix pʼiqtʼkätati.

Kawkïri jilïr jaqinakar uñtʼañs munasma uk aka chiqar qillqtʼasïta.

․․․․․

Jupanakamp parltʼañax wali askïspawa, maynimpikis parltʼma. Walja cristiano jilat kullakanakasat amigoniyäta ukhaxa, janiw sapakix jikxataskätati (1 Pedro 2:17).

● 3) Jan suma chuymamp uñjaña. Taqinir arsutapamp chuym ustʼayiri ukat jiskʼachiri, ¿ukham wali wal tukur jaqir uñtʼtati? Jan ukaxa, arsutaparjam lurayañ muniri ukat jan jupar istʼañ munapki ukanakar jiskʼachiri, ¿ukham sinti suma jaqir tukur uñtʼtati? (Eclesiastés 7:16.) Chiqpachansa, ukham jaqimpi chikachasiñxa janiw munkpachätati. Ukampis ¿janit jumax ukham tukkpachäta? Bibliax akham siwa: “Pisi amuytʼanix sint parli” ukat “wali parlañanxa jucha lurañawa utji” sasa (Eclesiastés 10:14; Proverbios 10:19).

Kamachasmasa: mayninakax kunjamsa jikxatasipxpacha ukwa amuytʼañama (1 Pedro 3:8). Janisay jumax jupanakjam amuykstaxa, paciencianïñamawa, sapa  mayniw chuymapatjam arsunisipkani. Kunanaksa kikpa amuyapxtaxa ukanakat parltʼma. Ukat jumax mayja amuysta ukat uk qhanañchañamax wakischi ukhaxa, suma arunakampi ukat wali amuyump arstʼma.

Kunjam arunakamp parlatäñsa munta ukham parlarakma. Bibliax akham sasaw iwxi: “Taqi kunsa amuk lurapxam jan jumanak pura chʼaxwasa” (Filipenses 2:14). Sapa kutis jiskhisiña munasksta, mayninakatsa larusisksta, jan wali arunakampis tuqisksta ukat wali wal tuktʼasin mayninakar jiskʼachasksta ukhaxa, janiw khitis jumar jakʼachaskätamti. Ukampis ‘parlatanakamax sumapunïni ukat jan khitirus coler churirjam parlkäta’ ukhaxa, janiw jumat jithiqtapkaniti (Colosenses 4:6).

¿Khitimpis amigoskaksnati?

Jan mayninakan jithiqtapxañapatakix kunas yanaptʼiristamxa uk akan liytʼawaypachätawa. Ukampis amuytʼasirïñamawa:  kunattix janiw taqinin amigopäkasmati. Suma jaqinakarus yaqhipanakax uñisipxaniwa sasaw Jesusax säna (Juan 15:19). Ukhamasti, janiw wakiskiti taqinir munkir jan munkir amigoptayañaxa.

Ukhamäkipansa, taqinimpis sum apasiñatak chʼamachasma, ukampis janiw jupanak laykux Diosan yatichäwinakap pʼakintañamäkiti. Bibliax qillqaskäna uka tiemponakanxa, Samuel sat waynax Diosar kusisiyañatak chʼamachasiñwa amtäna. ¿Amtapar phuqänti? “Sarnaqatapasti [Jehová] Tatitutakisa, jaqinakatakisa askirakïnwa” (1 Samuel 2:26). Jumatix chʼamachtʼasïtaxa, Samueljamarakiw jikxatasïta.

JUKʼAMPI YATXATAÑATAKIX MAYÏR LIBRON 8 UKAT 14 YATICHÄWINAKAP UÑXATÄTA

Jukʼampi yatxatañatakix akïr DVD uñtarakisma: Los jóvenes preguntan... ¿Cómo conseguir amigos verdaderos?, akax pusi tunka arunakat sipansa jila arunakaruw wakichasi

JUTIR YATICHÄWI

Wali munat amigomax akatjamat jan walpun uñjxiristam ukhaxa, ¿kamachasmasa?

BIBLIAX KAMSISA

“Khititï churañ yatki ukaw jukʼamp katuqi.” (Proverbios 11:25)

AKHAM LURASMAXA

Kunapachatï parlaskta ukhax jan jankʼak parlañ tukuykamti. Amuytʼañataki, maynitix “kunjamakis domingox pasawayta” sasin jisktʼiristam ukhaxa, janiw “waliki” sasin sañamakïkiti. Jan ukasti kunanaks lurta ukwa sum qhanañchtʼañama ukat juparus jisktʼañamarakiwa.

¿YATIYÄTATI?

Moisesas Jeremiasas ukat Timoteos mä juk’ axsarapxirïnwa siw Bibliaxa (Éxodo 3:11, 13; 4:1, 10; Jeremías 1:6-8; 1 Timoteo 4:12; 2 Timoteo 1:6-8).

¡AKANAK LURÄ!

Akaw nayrïr jan waltʼäwijaxa: ․․․․․

Jan aynachtʼañatakix akanak lurañ amtä: ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● Yaqhip cristianonakaxa, ¿kunatsa sapak jikxatasipxi?

● Jan juma pachpa jan wali uñjasiñamatakixa, ¿kunanaksa lurasma?

● Mä sullkanïsma ukhax jan sapak jikxatasiñapatakixa, ¿kuns sasma?

[88 janan qhanañchäwipa]

“Tama taypinxa mä kullakaw nayan amigajäñ wal munäna, ukampis janiw nayax yäqkayätti. Ukat mä qhawqha tiempotwa uka kullakar sum uñtʼta, ukhakiw jan amuytʼasirïtajat amtasiskta. Nayat 25 mara jiläkchisa, jichhax mayni amiganakajjam wali munat amigajapuniwa.” (María)

[87 janan fotopa]

Jumax jupanakar jakʼachasismawa