KAPÍTULO 9

¿Mbaʼépa ikatu ajapo añeñandúramo cheaño?

Eñeimahinamína reimeha ko situasiónpe: iporãiterei la día ha ndereguerekói hína mbaʼeve rejapo vaʼerã. Ne amigokuéra katu oplanea ojapo álgo oñondivepa ojediverti hag̃ua, péro naneinvitái hikuái. Upeichagua situasiónpe ningo katuete reñeñandu vaíta, repensáta nemboykeha hikuái ha ikatu voi reñeporandu: “¿Mbaʼére oiméne nacheinvitaséi hikuái aime hag̃ua hendivekuéra?”.

 IKATU oime oikóma raʼe nderehe la ojeʼéva oñepyrũvo ko kapítulo. Ikatu voi repensa erekoha algún provléma ndejokóva ani hag̃ua neamígo. Por ehémplo, reñemongetasérõ peteĩ persónandi haʼete voi rechuchupaitéva ha ndesuperaite upéva. Ha oimérõ neotĩ, ikatu ni ndereikuaái mbaʼépa eréta reguerekóramo peteĩ oportunida reñeʼẽ hag̃ua ótrondi. Upévare ikatu ijetuʼu jepi ndéve rekonsegi hag̃ua ne amigorã.

Péro aníkena reñentrega, nde ikatu ndepuʼaka entéro umi provlémare ha ekonsegi ne amigorã. ¡Jahechamína mbaʼéichapa ikatu rejapo upéva!

● Primer provléma: repensa vaipa ndejehe. Oĩ mitãrusu ha mitãkuña opensáva ndovaleiha mbaʼeverã ha mbaʼeve nosẽporãiha chupekuéra. Ikatu voi opensa avave ndohayhuiha chupekuéra ha ndorekoiha mbaʼeve iñinteresantemíva heʼi vaʼerã. Oiméramo reñeñandu upéicha, ijetuʼúta ndéve rekonsegi hag̃ua ne amigorã.

Solusión: eñekonsentra umi mbaʼe porã reguerekóvare (2 Corintios 11:6). Epensa umi kualida porã reguerekóvare ha umi mbaʼe rejapokuaávare, ha eanota umíva koʼápe:

․․․․․

 Katuete ningo reguerekónte avei nde defékto, ha ndaivaíri reikuaa mbaʼépa umíva (1 Corintios 10:12). Péro nemanduʼákena reguerekoha avei heta mbaʼe porã, ha reikuaáramo umíva katuete reñeñandu porãvéta ha nerepensavaimoʼãi ndejehe.

● Segundo provléma: neotĩ. Katuete reñemongetase nde rapichakuérandi, péro ereko jave oportunida ndereikuaái mbaʼépa eréta. Elizabeth orekóva 19 áño heʼi: “Che ningo cheotĩeterei ha ijetuʼu chéve añemongeta ótrondi. Ahecharamo umi ermáno ikatúvape oñeʼẽ oimeraẽvandi rreunionhápe, pórke che nañanimái ajapo upéva”. Ikatu oime nde avei rehasa hína upeichagua situasión ha repensa ndaikatumoʼãiha ndepuʼaka hese. ¿Mbaʼépa nepytyvõta?

Solusión: eñeinteresa nde pyʼaite guive umi ótrore. Ani rejepyʼapy, natekotevẽi oiko ndehegui peteĩ persóna ojapóva oimeraẽ mbaʼe ojeguerohory hag̃ua chupe. Upéva rangue, reho vaʼerã hese mbeguekatúpe, por ehémplo ikatu reiporavo peteĩ persóna ha eñehaʼã eikuaa porãve chupe. Jorge heʼi: “Sapyʼánte reporandu haguénte peteĩ persónape mbaʼéichapa oĩ térã mbaʼetekópa oho hese itravahohápe, ikatúma nepytyvõ upéi oiko hag̃ua chugui ne amigoite”.

Peteĩ konsého: ani reheka ne amigorã umi haʼéva nde avegua añónte. La Biblia heʼi oĩ hague heta haʼéva oñoamigoite  ndahaʼéiramo jepe ojoavegua, por ehémplo Rut ha Noemí, David ha Jonatán, ha Pablo ha Timoteo (Rut 1:16, 17; 1 Samuel 18:1; 1 Corintios 4:17). Nemanduʼákena naiporãmoʼãiha ndénte rejagarrapa ha nderehejái umi ótrope oñeʼẽ. Entérope ñandegusta ñane amigokuéra ñanerendúramo. Ha upéva peteĩ ventáha ndéve g̃uarã, pórke peguereko hag̃ua peteĩ konversasión, natekotevẽmoʼãi nde memete reñeʼẽ.

Eanota koʼápe mokõi persóna okakuaapámava réra reipotáva ne amigorã:

․․․․․

Eñehaʼãna eñemongeta peteĩva umi eanota vaʼekuéndi. Upéicha rehecháta rehekáramo ne amigorã “enterove umi ermanokuéra” apytépe nereñeñandumoʼãveimaha neaño (1 Pedro 2:17).

● Tercer provléma: nderetrataporãi umi ótrope. Oĩ ohechaukaséva ivaletereiha, opensáva oikuaaha opa mbaʼe, ikatuha oapoʼi hapichakuérape ha oñembohory hesekuéra. Oĩ avei oñemohatãva haʼe opensávape ha okritika ótrore ndojapóiramo umi mbaʼe chupe ogustaháicha (Eclesiastés 7:16). Katuete ningo nereimesemoʼãi umichagua persónandi. Péro, ¿noiméipa nde voi retrata jepi upéicha nde rapichakuérape? La Biblia derechoite voi heʼi itavyha umi persóna ‘osegíva oñeʼẽ’ heʼi hag̃ua vyroreínte, ha avei ‘peteĩ persóna oñeʼẽtereíramo katuete ojavytaha’ (Eclesiastés 10:14; Proverbios 10:19).

Solusión: eñemoĩ nde rapicha lugárpe (1 Pedro 3:8). Sapyʼánte ikatu ojeʼe peteĩ mbaʼe nandegustapáiva. Upéicha jave eñehaʼã vaʼerã nepasiénsia, eñekonsentra umi mbaʼe porã ojeʼe vaʼekuére ha  eheja nde rapichakuérape tomombeʼu la opensáva. Ha sapyʼánte rehechakuaárõ iporãvetaha remombeʼu repensaha diferénte, eñehaʼã vaʼerã reime trankílo ha ere porãnte la repensáva.

Reñemongeta vove ótrondi, eñehaʼã eñeʼẽ nde rapichakuérape nde voi reipotaháicha oñeñeʼẽ ndéve. La Bíbliape jatopa ko konsého iporãitéva: “Pesegíkena pejapo opa mbaʼe pejeplageaʼỹre ha pejodiskutiʼỹre” (Filipenses 2:14). Upévare, reikóramo rejodiskuti, reñembohory nde rapichakuérare ha reapoʼi térã retrata vai chupekuéra, avave ndoikosemoʼãi ne amígoramo. Péro katuete oĩta heta nderayhúva resegíramo ko konsého: “Umi mbaʼe pejéva siémpre iporã ha ijuky vaʼerã” (Colosenses 4:6).

¿Reñehaʼã vaʼerãpa reguereko amígo toiko la oikóva?

Umi suherénsia oĩva ko kapítulope nepytyvõta reheka ha retopa hag̃ua ne amigorã. Péro iporãta avei reguerekóramo  enkuénta ko mbaʼe: ndaikatumoʼãi voínte jajapo umi mbaʼe ogustáva enterovetépe. Jesús heʼi vaʼekue voi oĩtaha ndochaʼéiva umi ojapóvare iporãva (Juan 15:19). Upévare, natekotevẽi repensa katuete rekonsegi vaʼerãha ne amigorã toiko la oikóva.

Upéicharõ jepe, nderejapomoʼãima guive peteĩ mbaʼe ndogustáiva Ñandejárape, eñehaʼã vaʼerã rejogueraha porã enterovéndi. La Biblia omombeʼu peteĩ mitãrusu hérava Samuel ojedesidi hague ojapotaha opa mbaʼe Ñandejára oguerohorýva. ¿Mbaʼépa ohupyty? “Jehová ha umi hénte ohayhuve chupe” (1 Samuel 2:26). Remoĩramo nde párte, ¡nde avei ikatúta rekonsegi upéva!

RETOPAVÉTA INFORMASIÓN VOLÚMEN 1, KAPÍTULO 8-PE

Retopavéta informasión pe DVD héravape “Los jóvenes preguntan... ¿Cómo conseguir amigos verdaderos?”, ojetradusímava mas de 40 idiómape

MBAʼÉPA JAHECHÁTA PE ÓTRO KAPÍTULOPE

¿Mbaʼépa ikatu rejapo reiko vaíramo peteĩ ne amigoiténdi?

TÉXTO OĨVA LA BÍBLIAPE

“Pe omeʼẽva y hapichápe hoyʼu hag̃ua, orresivíta avei y” (Proverbios 11:25).

PETEĨ KONSÉHO

Reñemongetárõ peteĩ persónandi eñehaʼã ani opa rei pene konversasión. Por ehémplo, oporandúrõ mbaʼetekópa raʼe ne fin de semána, ani ere chupe “trankílo”, ha upévante. Emombeʼu chupe mbaʼépa rejapo raʼe ha eporandu avei chupe mbaʼépa ojapo.

¿REIKUAÁPA RAʼE?

La Biblia ohechauka Moisés, Jeremías ha Timoteo provávlemente hiʼotĩ hague avei (Éxodo 3:11, 13; 4:1, 10; Jeremías 1:6-8; 1 Timoteo 4:12; 2 Timoteo 1:6-8).

UMI MBAʼE AJAPÓTAVA

¿Mbaʼérepa ijetuʼu jepi chéve akonsegi hag̃ua che amigorã? ․․․․․

¿Mbaʼépa ajapóta akonsegi hag̃ua che amigorã? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa ikatu oĩ kristiáno oñeñandúva haʼeño?

● ¿Mbaʼépa ikatu rejapo anivéma hag̃ua repensa vai ndejehe?

● Reguerekóramo peteĩ ermáno imitãvéva ndehegui ha oñeñandúva haʼeño, ¿mbaʼéichapa ikatu reipytyvõ chupe?

[Komentário oĩva páhina 88-pe]

“Kongregasiónpe, peteĩ ermána oikoseterei kuri che amígaramo, péro che napenái vaʼekue hese. Upéi aikuaa porãve chupe ha ahechakuaa chevyraiterei hague ajapórõ guare upéva. Koʼág̃a haʼe che amigaite, ha hiʼarive 25 áño voi cherasa” (María).

[Taʼanga oĩva páhina 87-pe]

Oĩ heta mbaʼe ikatúva rejapo rekonsegi hag̃ua ne amigorã