Kgaolo 9

Nka Lebeletšana Bjang le go Lewa ke Bodutu?

Ke letšatši le le kgahlišago gomme ga o na seo o se dirago. Lega go le bjalo, bagwera ba gago ka moka ba na le seo ba se dirago. Ba intšhitše e bile ba a ipshina moo ba lego gona. Le mo lekgeng le, ba go šiile! Go se laletšwe go bohloko, eupša se se bolelwago ke seo se bohloko le go feta. O ipotša gore: ‘Mohlomongwe go na le selo se itšego se se fošagetšego ka nna. Ke ka baka la’ng go se na motho yo a nyakago go gwerana le nna?’

 MOHLOMONGWE ka makga a itšego o kile wa ba boemong bjo bo hlalositšwego letlakaleng le lego ka go le letshadi. O ka ikwa eka go na le lepheko le legolo leo le go aroganyago le dithaka tša gago. Nako le nako o a dikadika ge o leka go thoma poledišano le tšona. Ge o hweditše sebaka sa go boledišana le tšona, o ikwa o lewa ke dihlong. Ke ka baka la’ng go le thata gakaaka go fo swara poledišano le dithaka tša gago?

Go e na le go fo dula o le lekatana ka baka la mapheko a itšego, o ka hwetša ditharollo. A re bone kamoo o ka di hwetšago ka gona.

● Lepheko 1: Go itebelela ka tsela e fošagetšego. Bafsa ba bangwe ba phela ba inyatša. Ba kgodišegile gore ga go na motho yo a ba ratago le gore ga go na selo sa mohola seo ba ka tlaleletšago ka sona poledišanong. Na o ikwa ka tsela yeo? Ge e ba go le bjalo, go itebelela ka tsela e bjalo e fošagetšego go tla fo oketša lepheko leo le go aroganyago le dithaka tša gago.

Tharollo: Naganišiša ka dika tša gago. (2 Bakorinthe 11:6) Ipotšiše gore: ‘Dika tša ka tše dibotse ke dife?’ Nagana ka bokgoni bjo itšego bjo o nago le bjona goba dika tše dibotse ke moka o di lokeletše ka mo tlase.

․․․․․

 Ga go na pelaelo gore o na le mafokodi gomme ke mo gobotse go lemoga seo. (1 Bakorinthe 10:12) Eupša o bile o na le mo gontši mo o ka go dirago. Go lemoga dika tša gago go tla go nea kgodišego yeo o e hlokago e le gore o se sa itebelela ka tsela e fošagetšego.

● Lepheko 2: Go lewa ke dihlong. O ka rata go thoma poledišano, eupša ge sebaka se tšwelela ga o tsebe gore o reng. Elizabeth wa nywaga e 19 o lla ka gore: “Ke phela ke lewa ke dihlong. Ke hwetša go le thata kudu go boledišana le batho dibokeng tša Bokriste gomme ke tloga ke duma bao ba kgonago go dira seo!” Ge e ba o swana le Elizabeth, o ka nagana eka ga go kgonege gore o fenye lepheko le.

Tharollo: Kgahlegela batho ba bangwe e le ka kgonthe. O se ke wa tshwenyega, ga go hlokagale gore o fetoge motho yo a se nago dihlong yoo a ratago go boledišana le motho yo mongwe le yo mongwe. Thoma ka go kgahlegela motho o tee feela. Mofsa yo a bitšwago Jorge o re: “Go fo botšiša batho ba bangwe gore ba phela bjang goba go ba botšiša ka mošomo wa bona go go thuša gore o ba tsebe gakaone.”

Tšhišinyo še: O se ke wa nyaka go gwerana feela le dithaka tša gago. Ba bangwe ba bagwera ba paala bao ba begilwego ka Beibeleng e be e le batho bao ba fetanago ka nywaga e mentši kudu, ba bjalo ka Ruthe le Naomi, Dafida le Jonathane gotee le  Timotheo le Paulo. (Ruthe 1:16, 17; 1 Samuele 18:1; 1 Bakorinthe 4:17) Le gona gopola gore poledišano ke go abelana dikgopolo, ga go fo bolela motho o tee. Batho ba tšeela godimo batheetši ba babotse. Ka gona ge e ba o na le go ba le dihlong, gopola gore ga se gore e swanetše go ba wena o bolelago ka dinako tšohle!

Ngwala maina a batho ba babedi ba bagolo bao o ka ratago go ba tseba gakaone.

․․․․․

Ke ka baka la’ng o sa ye go yo mongwe wa batho ba o ba ngwadilego ka mo godimo gomme o thome poledišano le yena? Ge o phegelela go nyaka dibaka tša go boledišana le batho bao ba lego “[mokgatlong] wohle wa bana babo rena,” o tla ikwa o se sa lewa ke bodutu kudu.—1 Petro 2:17.

● Lepheko 3: Mokgwa wo o sa rategego. Motho yo a ipotšago gore o a tseba o dula a na le tshekamelo ya go diriša maroga, go kodutla goba go nyenyefatša batho. Le gona go na le motho yo a fo go rata go ngangišana le motho yo mongwe le yo mongwe le go gapeletša dikgopolo tša gagwe. Ka ge motho yo bjalo a “[itira] yo a lokilego kudu,” o akgofela go ahlola motho le ge e le ofe yo a sa phelego ka go dumelelana le kamoo yena a nyakago ka gona. (Mmoledi 7:16) Ruri ga go na pelaelo gore ga o rate go ba gare ga batho ba bjalo! Lega go le bjalo, na go ka direga gore go tšweletše lepheko ka baka la ge wena o itshwara ka e nngwe ya ditsela tše? Beibele e re: “Lešilo le bolela mantšu a mantši,” e bile e re “go aroga ga go ke go hlokega moo mantšu a atilego.”—Mmoledi 10:14; Diema 10:19.

Tharollo: Hlagolela go ba le ‘kwelobohloko.’ (1 Petro 3:8) Gaešita le ge o sa dumelelane le pono ya motho yo o boledišanago le yena, ka go se fele pelo mo dumelele gore a bolele. Bolela kudu ka dintlha tšeo le dumelelanago  ka tšona. Ge e ba o nagana gore o swanetše go ganetša motho yoo ka taba e itšego, dira bjalo ka boleta le ka šedi.

Bolela le batho ba bangwe ka tsela yeo o ka ratago gore ba bolele le wena ka yona. Keletšo ya Beibele ke ya gore ‘o dule o dira dilo tšohle ka ntle le go ngongorega le go ngangišana.’ (Bafilipi 2:14) Dingangišano tše di sa hlokagalego goba go kwera batho ba bangwe le go ba roga goba go itira moloki ka go ba ahlola, go fo dira gore ba se ke ba go batamela. Ba tla go rata kutšwanyana ge e ba ‘mantšu a gago ka mehla e le a kgahlišago.’—Bakolose 4:6.

Na o Swanetše go Leka go Hwetša Bagwera go sa Šetšwe Seo se Diregago?

Ka morago ga gore o itlhahlobe ka tsela ye e kopana, mohlomongwe o bona ditsela tše dingwe tšeo ka tšona o ka hwetšago ditharollo tša go tloša mapheko ao a ka bago a tšweletše magareng ga gago le batho ba bangwe. Go ba gona, o swanetše go lebelela  dilo ka tsela ya kgonthe. O ka se letele gore motho yo mongwe le yo mongwe a go rate. Jesu o boletše gore batho ba bangwe ba be ba tla hloya bao ba dirago se se nepagetšego. (Johane 15:19) Ka gona ga go na mohola go leka go hwetša bagwera go sa šetšwe seo se diregago.

Lega go le bjalo, o ka dira maiteko a lekalekanego a go ba yo a rategago o dutše o sa kwanantšhe ditekanyetšo tša gago tšeo di theilwego Beibeleng. Samuele wa mehleng ya Beibele o be a ikemišeditše ka go tia go dira seo se tlago go kgahliša Modimo. Mafelelo e bile afe? O ile a tšwela pele a gola e bile “a ratwa kudu ke Jehofa le batho.” (1 Samuele 2:26) Ka go dira boiteko, go ka ba bjalo le ka wena!

BALA KA MO GO OKETŠEGILEGO MABAPI LE TABA YE GO BOLUMO 1, KGAOLO 8

Bakeng sa tsebišo e oketšegilego, bogela DVD ya “Young People Ask—How Can I Make Real Friends?” E hwetšagala ka maleme a ka godimo ga a 40

KGAOLONG YA RENA YEO E LATELAGO

Gateetee mogwera wa gago wa paala o thoma go itshwara bjalo ka lenaba la gago le legolo. O ka dira eng ka seo?

KEY SCRIPTURE

“Yo a nwešago ba bangwe meetse ba kgolwa le yena o tla nwešwa meetse a kgolwa.”—Diema 11:25.

KELETŠO

Tšwetša pele poledišano. Ka mohlala, ge e ba motho a go botšiša gore o thabetše mafelobeke, o se ke wa fo re ee. Hlalosa lebaka leo le dirilego gore o a thabele. Ke moka o botšiše motho yoo gore yena o be a dira eng mafelobekeng.

NA O BE O TSEBA . . . ?

Beibele e bontšha gore Moshe, Jeremia le Timotheo ba ka ba ba be ba na le dihlong.—Ekisodo 3:11, 13; 4:1, 10; Jeremia 1:6-8; 1 Timotheo 4:12; 2 Timotheo 1:6-8.

KGATO YEO KE TLAGO GO E TŠEA!

Lepheko le legolo leo le ntšhitišago go dira bagwera ke ․․․․․

Ke tla leka go hwetša tharollo ya lepheko le ka go ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng Bakriste ba bangwe ba ka lewa ke bodutu?

● Ke’ng seo se ka go thušago gore o itebelele ka tsela e lekalekanego, go e na le go dulela go nagana ka dilo tše di fošagetšego?

● O ka kgothatša bjang moratho wa gago yo a lwantšhanago le go lewa ke bodutu?

[Ntlhakgolo go letlakala 88]

Kgaetšedi yo mongwe wa Mokriste o be a leka go ikgweranya le nna, eupša ka nakwana ka se arabele. Ge mafelelong ke arabetše, ke ile ka ikwa ke le lešilo kudu! O ile a ba yo mongwe wa bagwera ba ka ba paala bao nkilego ka ba le bona gaešita le ge a mpheta ka nywaga e 25!’’—Marie

[Seswantšho go letlakala 87]

O ka hwetša tsela ya go fenya mapheko ao a go aroganyago le dithaka tša gago