Jamasatwa jan walinak lurta, ¿kamachiristsa?
16 YATICHÄWI
Jamasatwa jan walinak lurta, ¿kamachiristsa?
□ Machjasiña
□ Awk taykax jan wali tuqir wiytirit uñtʼki uka jaqinakamp sarnaqaña
□ Jan wali arunakan musicanak ischʼukiña
□ Jan wali fiestanakar saraña
□ Jamasat mä yuqallamp mistuña jan ukax mä imillamp mistuña
□ Wachuq juch lurasipki jan ukax nuwarasisipki uka peliculanak uñchʼukiña ukat ukham videojuegos satäkis ukanak anataña
□ Jan wali arunak parlaña
AKA uñkatasin jikxataski uka lista liytʼma. ¿Awk taykamar jan yatiyasa ukanak lurirïtati? Ukhamächi ukaxa, jan walïtapxa amuyasiskpachätawa ukat inas chuymamaxa, mä arunxa, concienciamax janiw luratamax walïkiti sisstma (Romanos 2:15). Ukhamäkipansa, awk taykamar arsusmaxa, kunjamakis jikxatasipxaspa uk amuytʼasax wal axsarayaspachätaxa. Inas jan arsusiñ munksta ukat inas akham chuymaman saraksta “jan yatisax janiw llakisipkanisa” sasa. Ukampis pä jakäwinïkasmas ukham sarnaqtaxa, ¿janit uk amuyaskta? ¿Kunanakas ukhamar purtʼasiypachätamxa?
Janiw sinti jarkʼatäñ munkti
Jilsxasax “chachax awkipsa, taykapsa jaytxaniwa” siw Bibliaxa (Génesis 2:24). Warminakas ukhamarakiwa. Ukhamasti, wayn tawaqunakax jilïrïxañsa, jupanak pachpat amuyasxañsa ukat amtxañsa munapxapuniwa. Ukatwa sinti jarkʼatäpkaspasa ukham amuyasax yaqhip wayn tawaqunakax awkip taykap contrax saytʼapxi, kunattix awk taykax janiw jan amuytʼasisa luräwinakxa luraykiti, janirakiw jan cristianonakatakjamäki ukanaksa luraykiti.
Ukat yaqhip wayn tawaqunakax awkip taykapax sinti qhurüpkaspa ukham amuyapxaraki. Kim sat mä tawaqitax akham sasaw säna: “Janipuniw mä peliculsa uñtayapkituti. Ukat niya taqpach musicanak istʼañwa jarkʼapxitu” sasa. Jan wakiskipan jarkʼatjam amuyasisaxa, masinakapjam sarnaqañ munapxi, kunattix jupanakax jan kunakiw sarnaqapxi.
Mayninakamp iyawsatäñ laykuw jamasat jan walinak lurapxi ukwa Tammy sat tawaqux amuytʼayarakistu. “Yatiqir masinakajjamarakiw jan wali arunak arsuñ qallttxa. Ukhamatwa jupanakjam amuyasiyäta. Ukat fumañ qalltta, ukxarux machañaruw purirakta. Ukat jamasatwa yuqallanakampi misturakta, kunattix awk taykajax sintiw jarkʼapxitäna, janiw uñtʼatanïñajsa munapkänti” siw Tammy sat tawaquxa.
Niya ukhamarakiw Pete sat wayniturux pasatayna, jupasti Jehová Diosan Qhanañchirinakapan yatichäwinakaparjam yatichatänwa. “Janiw nayat larusipxañap munkayätti” siwa. ¿Kunarus ukham axsarayasiñapax aptʼänxa? “Taqininsa wali uñtʼatäñwa munayäta, ukhamaxa, kʼari yupaychäwinakan uñstayat fiestanakanxa, regalo jan katuqañatakix kunaymanwa parliriyäta” siwa. Qalltanxa jan wakiskirinak tuqitsa pantjchïnxa, ukampis tiempompix jukʼamp jachʼa juchanakaruw purtʼasïna.
Taqi kunas janiw imantatäkiti
Jan wali luräwinakap imantasa sarnaqir jaqinakax nayra pachanakatpachsa utjapunirïnwa. Bibliarjamax ukhamwa yaqhip israelitanakax jan wali luräwinakapxa imxatapxirïna. Ukampis Isaías profetax akham sasaw amuyasipxañapatakix iwxirïna: “¡Ay, kunakïkani khitinakatix Tatitut imantasipxi ukanakatakixa, jupanakax amtäwinakap Tatitut imantapxi, aruma chʼamakanakanwa ñanqhanak lurapxaraki, sapxarakiwa: ‘Janiw khitis uñjkistuti, janiw khitis amuykiti’ sasa” (Isaías 29:15). Jan wali luratanakapxa Jehová Diosaw uñjaskäna ukat horasaparuw cuenta mayini taqi ukanakwa israelitanakax jan amuyasipkänti.
Ukhamarakikiw jichhürunakanxa. Luratanakamxa awk taykamat imantkchïtasa, janiw Jehová Dios nayraqatat imantkasmati. “Janiw kunas Diosan luratanakapatxa jupat imantaskaspati, taqi kunaw qhanstayata, ukhamarak jistʼarata khitirutix [cuenta] churkañäni ukan nayraqatapanxa” siw Hebreos 4:13 qillqataxa. Ukhamasti, inamayaw luratanakamxa imantaskasma. Inamayaw cristiano tantachäwinakanxa Dios chuymax tukusksna, juchax juchakipunïniwa. Chiqpachansa, khitinakatix Jehová Diosar ‘lakampik yupaychki’ uka jaqinakan chuymapax jayankit janich uk Jupax sum yati (Marcos 7:6).
Ukhamaraki, jamasat jan wal sarnaqasaxa Jehová Diosan chuymap ustʼaytaxa, ¿uk amuyastati? “¿Kunjamata? ¿Chuym ustʼayaristti?” sasin inas jisktʼassta. Chiqpachansa, llakisiyasmawa. Israelitanakat amuytʼañäni: sapa kuti Diosan Leyinakap pʼakintasaxa, “Israelan Qullanaparuw llakisiyapxäna” (Salmo 78:41). Ukhamasti, ‘chiqapar yatichasina Tatitur iyawsañapatak suma uywatäpki’ uka wayn tawaqunakax jan walinak jamasat lurapki ukhaxa, Jehová Diosax wali llakitapuniw jikxataspacha (Efesios 6:4).
Jan ukham sarnaqxamti
Jehová Diosaru ukat awk taykamar respet uñachtʼayañ layku, ukhamaraki juma pachpa respetasitam laykuxa, kunanaktï jamasat lurkayäta ukanakxa qhanstayxañamawa. Inas phinqʼachat uñjaschïta jan ukax jan wali luratamat kunsa katuqchïta (Hebreos 12:11). Sañäni, awk taykamax ukham kʼarisisa sarnaqatam laykuxa, inas mayanakanx jan confiaxapxchïtamti. Ukhamasti, jichhax mä qhawqha tiempox jukʼamp jarkʼxapxätamxa. Ukampis taqi kunat sipansa, suma conciencianïñaw jukʼamp wakiskirixa. ¿Kunatsa ukham sistanxa?
Amuytʼañataki, familiamampi paseytʼir sarapxasma. Awk taykamax janiw jayar sarätati sasin iwxapxiristma, ukampis jan uñjkataki jumax jaya chiqar saranukuwayxasma. Ukat akatjamat chʼalla chʼallar jithintasma ukhaxa, ¿kamachasmasa? ¿Yanaptʼa mayiñxa axsarayasismati? ¿“Jan kuns siskäti, tuqipxitaspawa” sasmati? ¡Janiwa! Chiqpachansa, taqi chʼamamampiw yanap mayismaxa.
Niya ukhamarakikiwa, jamasat jan walinak luraskstaxa, yanapaw jankʼak jumatak wakisi. Chiqpachansa, janisay luratanakam chhaqtaykchismaxa, ukampis jakäwimxa askichxasmawa. Wali chʼamäkchisa, yanaptʼxa mayiñamawa, jan ukasti jukʼamp jan walinakanwa uñjasisma ukat familiamarus jan walinwa uñjasiyarakisma. Taqi chuyma arrepentisïtaxa, Jehová Diosax khuyaptʼayätamwa (Isaías 1:18; Lucas 6:36).
Ukhamasti, awk taykamarux kunatix chiqäki uk yatiyma. Kunjamsa jikxatasipxani uksa amuyarakim ukat iyaw sasa chiqañchayasirakma. Tiempompixa Jehová Diosarusa awk taykamarusa kusisiyarakïtawa. Ukat jumasa, janis juchanïkasma ukham amuyasirakïta (Proverbios 27:11; 2 Corintios 4:2).
¿Jumjamtï yatiqir masinakamax amuyapxaraki? Ukampis ¿amigomäspati?
BIBLIAX KAMSISA
“Khititix juchap imantaskani ukaxa, janiw nayrar sarkaniti, ukampis khititix juchap arsusisina jaytanukxani, ukasti perdonatäxaniwa.” (Proverbios 28:13)
AKHAM LURASMAXA
Jan wali luratanakamax walïskaspas ukham jan uñjamti, janirak añchsa juchañchasimti. Amtasipunma, Jehová Diosax juch pampacharakiwa (Salmo 86:5).
¿YATIYÄTATI?
Maynix juchanïtapat amuyaskani ukhax wali askïspawa, kunattix ukaw jan wali luräwinakapat kuttʼayaspa. Ukampisa, maynitï jan walinak luraskakini ukhaxa, concienciaparuw jan waltʼayaspa. Ukat chuymanakapax janiw kuns amuykxiti, parintat fierrompis naksutäkaspa ukhamäxiwa (1 Timoteo 4:2).
¡AKANAK LURÄ!
Jamasat jan walinak luraskstxa, ¿khitimpis parliristxa? ․․․․
Akanakaw chiqañchäwi katuqañatakix yanaptʼitani: ․․․․
Awkijarus jan ukax taykajarusa, ¿kuns aka tuqit jisktʼañ muntxa? ․․․․
JUMASTI, ¿KAMSASMASA?
● ¿Kunatsa yaqhip wayn tawaqunakax jamasat jan walinak lurapxi?
● Ukham jamasat sarnaqasaxa, ¿kuna jan walinakansa jikxatasisma?
● ¿Kunatsa jan wali sarnaqäwi jaytañax wali wakiskirixa?
[140 janan qhanañchäwipa]
“Janïr kun paskipanwa cristianüpxtwa sasax sañäspa ukat cristianjamax kunjamsa sarnaqañäni uksa qhanañchañarakïspawa uk nayax sirista. Jan suyasa jankʼak sañäni ukhaxa, janiw chʼamäkaniti.” (Linda)
[141 janan fotopa]
Jamasat jan walinak lurasa sarnaqaskstaxa, chʼalla chʼallarus jithintaskasma ukamp sasiwa, ukhamasti jankʼakiw yanap mayiñama
