Ibuot 16

Mmanie ke N̄kpanam Ẹfiọk ke Ndu Uwem Esịt Iba?

□ Ndin̄wọn̄ ọkpọsọn̄ mmịn

□ Ndidụk ndụk ye mbon emi ete ye eka fo ẹkerede ke ẹdi ndiọi nsan̄a

□ Ndibre oburobụt ikwọ

□ Ndika idat idat usọrọ

□ Ndidedịbe ntọn̄ọ uyomima

□ Ndise afai afai m̀mê oburobụt fim m̀mê ndibre afai afai mbre vidio

□ Nditịn̄ oburobụt ikọ

 SE MME n̄kpọ oro ẹbatde ke page ubọk ufien emi. Ndi emesinam ekededi ke otu mmọ, edi uyakke ete ye eka fo ẹdiọn̄ọ? Edieke edide emesinam, anaedi ọmọfiọk ke edinam emi ifọnke. Akam ekeme ndidi esịt esibiom fi. (Rome 2:15) Kpa ye oro, isimemke fi nditịn̄ se akanamde nnọ ete ye eka fo. Ndien ke ini ekerede adan̄a nte n̄kpọ oro edibiakde mmọ iketre, emekeme ndikere ke ufọn idụhe ndisian mmọ mbak idibiak mmọ. Edi ndi ọmọfiọk ke ekeme ndidi uwem esịt iba ke afo odu oro? Nso ikpanam fi odu utọ uwem oro?

Ndi Oyom Nda-ke-Idem?

Bible ọdọhọ ke ebebịghi awawara, “erenowo [ọyọkpọn̄] ete ye eka esie.” (Genesis 2:24) Ekeme nditịn̄ ukem oro n̄ko mban̄a n̄wan. Idụhe owo oro mîyomke ndikọri n̄wọrọ owo, ndikere n̄kpọ ke idemesie, ndinyụn̄ mbiere n̄kpọ nnọ idemesie. Edi ke ini ete ye eka mînyịmeke eyen mmọ anam n̄kpọ emi mmọ ẹfiọkde ke ifọnke, ndusụk uyen ẹsisọn̄ ibuot.

Imọfiọk ke ndusụk ete ye eka ẹkeme nditie ukpan ukpan n̄kaha. Ekpri n̄kaiferi kiet emi ekerede Kim ọdọhọ ete: “Ete ye eka mi isinyịmeke nnyịn ise fim ndomokiet. Ete mi isiyakke nnyịn ibre ikwọ ekededi!” Mme utọ ukpan emi esinam ndusụk uyen ẹkere ke ete ye eka mmimọ ẹtie ukpan ukpan ẹkaha, ẹnyụn̄ ẹtọn̄ọ ndifịbe mme uke mmọ emi etiede nte ẹnyene ifụre ẹkan mmọ.

Ekpri n̄kaiferi kiet emi ekerede Tammy etịn̄ n̄kpọ en̄wen emi esinamde ndusụk uyen ẹdu uwem esịt iba, oro edi, man nditọ ufọkn̄wed mmọ ẹma mmọ. Enye ọdọhọ ete: “N̄kọtọn̄ọ ndidu uwem esịt iba ke ndisitiene ntịn̄ oburobụt ikọ ke ufọkn̄wed. Nditịn̄ ikọ ke usụn̄ emi ama esinam etie mi ke idem nte ke mmodụk otu. Nte ini akakade, mma ntọn̄ọ ndin̄wọn̄ sika. Mma nsin̄wọn̄ mmịn mbe ubọk n̄ko. Ekem mma ntọn̄ọ ndidedịbe nnyene ufan irenowo ke ntak emi ete ye eka mi ẹkesọn̄de ido ẹkaha mîkonyụn̄ inyịmeke mi nsiwọrọ an̄wa ye erenowo.”

 Ekpri akparawa kiet emi ekerede Pete ama anam ukem n̄kpọ emi. Enye ọdọhọ ete: “Ẹkebọk mi nte kiet ke otu Mme Ntiense Jehovah. Edi n̄koyomke ẹsak mi.” Nso ke Pete akanam? Enye ọdọhọ ete: “Mma ndomo ndinam n̄kpọ man n̄wọrọ etop. Mma nsisu nsu nnyụn̄ ntịbi ikọ ntịn̄ ke ini ẹbụpde mi ntak emi owo mîkọnọhọ mi enọ ndomokiet ke mme ini usọrọ ido ukpono.” Ke ndondo oro Pete ọkọtọn̄ọde ndinam n̄kpri n̄kpọ ifan̄ oro mîfọnke, ikebịghike enye ama ọtọn̄ọ ndinam ata ikpọ idiọkn̄kpọ.

Idụhe Se Idịbede

Uwem esịt iba itọn̄ọke mfịn. Ndusụk nditọ Israel ẹma ẹdu uwem esịt iba ẹnyụn̄ ẹkere ke owo ididiọn̄ọke. Edi prọfet Isaiah ama odụri mmọ utọn̄ ete: “Mbọm mbon oro ẹsịnde idem ẹdịp item emi otode Jehovah, emi ẹnamde edinam mmọ ke n̄kịmn̄kịm ebiet, ke adan̄aemi mmọ ẹdọhọde ẹte: ‘Anie owo okụt nnyịn, anie owo onyụn̄ ọfiọk se nnyịn inamde?’” (Isaiah 29:15) Nditọ Israel ẹma ẹfre ke Abasi ama okụt se mmọ ẹkenamde. Ke edikem ini, enye ama anam mmọ ẹdinam ibat ẹban̄a ndiọi edinam mmọ.

Ukem oro ke edi mfịn. Kpa ye oro ekemede ndidịp ete ye eka fo idiọkn̄kpọ oro akanamde, ukemeke ndidịp Jehovah Abasi. Mme Hebrew 4:13 ọdọhọ ete: “Idụhe baba n̄kpọ kiet oro Abasi obotde eke edịbede enye ke enyịn, edi kpukpru n̄kpọ ẹna iferi ẹnyụn̄ ẹna in̄wan̄-in̄wan̄ ke enyịn enye emi nnyịn inyenede ndinam ibat nnọ.” Ufọn ndien ndidedịbe nnam se mîfọnke? Ti ete ke ukemeke ndibian̄a Abasi ke ndinam nte inam n̄kpọ esie  n̄kukụre ke ini akade mbono esop. Jehovah ọfiọk ini emi mme owo ‘ẹkponode enye ke n̄kpọkinua mmọ, edi esịt mmọ ada nsannsan ye enye.’—Mark 7:6.

Ndi ọmọfiọk ke esibiak Jehovah ndikụt mme owo ẹdude uwem esịt iba? Ndi utọ n̄kpọ oro ekeme nditịbe? Ke akpanikọ, ekeme nditịbe! Ke ini nditọ Israel eset mîkenịmke Ibet Abasi aba, mmọ ẹma “ẹnam Edisana Abasi Israel okop ubiak.” (Psalm 78:41) Esinen̄ede abiak enye n̄ko mfịn ke ini mme uyen oro ẹkebọkde “ke ntụnọ ye ke item Jehovah” ẹdịbede ẹnam idiọkn̄kpọ!—Ephesus 6:4.

Nen̄ede Se Ikwan̄ade

Ke ntak Abasi ye ete ye eka fo, ye ke ufọn fo, oyom ayarade se akanamde. Imọfiọk ke emi ekeme ndinam fi bụt, onyụn̄ ekeme ndinam ẹtụnọ fi. (Mme Hebrew 12:11) Ke uwụtn̄kpọ, edieke edide ebịghi ọkọtọn̄ọ ndisisu nsu, amanam ete ye eka fo etre ndinyene mbuọtidem ke idem fo. Ntre kûyak idem akpa fi edieke emi anamde mmọ ẹdori fi ukpan ke ndusụk ini ẹkan nte ẹkesidoride. Kpa ye oro, ndiyarade se akanamde ọfọn akan. Ntak-a?

Kere ban̄a uwụtn̄kpọ emi: Yak idọhọ ke asan̄a ye mbonubon mbufo ọbọ ofụm. Ete ye eka fo ẹdọhọ kpukpru mbufo ẹsan̄a ikpat kiet, edi ke ini mmọ mîsehe, afo adaha ọkpọn̄ mmọ onyụn̄ osop  usụn̄. Etise, afo ọduọ odụk okpụk. Ndi bụt akpanam fi etre ndifiori ẹdi ẹdin̄wam fi? Ndi ekpetre ndiyom un̄wam ete ye eka fo sia ekerede ke mmọ ẹkeme nditụnọ fi ke ntak emi mûkokopke uyo mmọ? Baba! Okpofiori adan̄a nte ekekeme.

Ukem ntre, edieke edide odu uwem esịt iba, oyom ẹsọsọp ẹn̄wam fi. Ti ete ke ukemeke ndikpụhọde se ima ikebebe. Edi emekeme ndinam n̄kpọ mbak udûfiak udu utọ uwem oro ke ini iso. Ọkpọkọm ọsọn̄ onyụn̄ abiak fi didie, nnennen n̄kpọ oro akpanamde ekpedi ndiyom un̄wam mbemiso se ikam idiọkde ikan emi etịbede ọnọ fi onyụn̄ adade mfụhọ ọsọk ubon mbufo. Edieke enen̄erede atua  n̄kpọfiọk aban̄a se akanamde, Jehovah ayatua fi mbọm.—Isaiah 1:18; Luke 6:36.

Mmọdo, tịn̄ akpanikọ nọ ete ye eka fo. Wụt ke ọmọfiọk ke se akanamde abiak mmọ. Bọ ntụnọ oro mmọ ẹnọde fi. Edieke anamde ntre, ayanam esịt enem ete ye eka fo ọkọrọ ye Jehovah Abasi. Oyokụt n̄ko nte idem edinemde fi ke ini esịt mîbiomke fi aba.—Mme N̄ke 27:11; 2 Corinth 4:2.

KE IBUOTIKỌ ORO ETIENEDE

Enyene ediwak n̄kpọ emi afo ye nditọ ufọkn̄wed mbufo ẹsinamde. Edi nso ke ọkpọfiọk aban̄a mme ufan oro afo ekpenyenede ke ufọkn̄wed?

AKPAN ITIE N̄WED ABASI

“Owo eke edịpde idiọkn̄kpọ esie idikwe unen, edi owo eke ayararede onyụn̄ ọkpọn̄de mmọ, ẹyetua enye mbọm.”—Mme N̄ke 28:13.

ITEM

Kûse idiọk edinam fo ke usụhọde, kûnyụn̄ ubiom idem ikpe ukaha. Ti ke Jehovah eben̄e idem ndifen nnọ fi.—Psalm 86:5.

NDI AMA ỌFIỌK . . . ?

Esịt ndibiom owo esinyene ufọn sia enye ekeme ndinam owo etre idiọk edinam. Edi owo oro akade iso anam idiọkn̄kpọ esibiat ubieresịt esie. Ubieresịt esidoro ufiọn, okpụp nte ubọk owo emi esimụmde ufiop eso tutu ikopke aba ubiak.—1 Timothy 4:2.

SE NDINAMDE

Edieke ndude uwem esịt iba, nyenyene nneme ye ․․․․․

Man n̄keme ndibọ ntụnọ ekededi oro ẹnọde mi, se ndinamde edi ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Nso isinam ndusụk uyen ẹdu uwem esịt iba?

● Nso isidi utịp ke ini owo odude uwem esịt iba?

● Ntak emi ukeme oro owo esịnde man etre ndidu uwem esịt iba mîtakke-tak?

[Se ẹwetde ke ikpọ abisi ke page 140]

“N̄kere ke akpana mme uyen ẹnam mme owo ẹdiọn̄ọ ke mmimọ idi Christian emi ẹdude uwem nte Bible etemede. Ikpanaha mmọ ẹbiat ini ndinam emi. Adan̄a nte mmọ ẹbiatde ini, ntre ke edisọn̄ ndinam emi.”​—Linda

[Ndise ke page 141]

Edieke uwem esịt iba emende fi emen nte okpụk, ana ofiori oyom un̄wam