Kgaolo 16

Ke Mang yo a Swanetšego go Tseba Gore o Phela Maphelo a Mabedi?

▪ Go nwa bjala

▪ Go gwerana le batho bao batswadi ba gago ba ba lebelelago e le bagwera ba babe

▪ Go theetša mmino o sa lokago

▪ Go ya meletlwaneng e sa laolegego

▪ Go beana mabaka ka sephiring

▪ Go bogela difilimi tša bošoro goba tše di gobogilego goba go bapala dipapadi tša bidio tšeo di nago le bošoro

▪ Go diriša polelo e sa hlwekago

 LEBELELA lelokelelo leo le lego ka go le letshadi. Na o dira se sengwe sa dilo tšeo batswadi ba gago ba sa tsebe? Ge e ba go le bjalo, ga go na pelaelo gore o a tseba gore seo o se dirago se fošagetše. O ka ba wa tlaišwa ke letswalo le molato. (Baroma 2:15) Lega go le bjalo, go ka ba thata go nagana ka go utollela batswadi ba gago dilo tše mpe tšeo o di dirago. Le gona ge o nagana kamoo batswadi ba gago ba ka arabelago ka gona, o ka bona e le mo go kwagalago go ipotša gore: “Motho a ka se ke a bolawa ke seo a sego a se ja.” Eupša na o kile wa nagana gore tsela ya gago ya bophelo e ka ba e bolela gore o phela maphelo a mabedi? Ke ka baka la’ng o ile wa leka go uta ditiro tša gago tše mpe?

Go Nyaka Tokologo

Beibele e re mafelelong ‘monna o tla tlogela tatagwe le mmagwe.’ (Genesi 2:24) Ke therešo gore go ka bolelwa se se swanago le ka mosadi. Ke ga tlhago gore o nyake go gola, go inaganela le go itirela diphetho. Eupša bafsa ba bangwe ba a rabela ge batswadi ba bona ba gana go ba dumelela go dira dilo tšeo ba naganago gore ke tša bošilo goba di fošagetše.

Ke therešo gore batswadi ba bangwe ba ka bonagala ba na le dithibelo tše dintši. Ngwanenyana yo a bitšwago Kim o belaela ka gore: “Batswadi ba rena ga ba ke ba re dumelela go bogela difilimi le ge e le dife.” O oketša ka gore: “Tate o re ileditše go theetša mo e ka bago mmino le ge e le ofe!” Ge bafsa ba bangwe ba lebeletšane le seo ba naganago gore ke dithibelo tše thata, ba thoma go duma dithaka tša bona tšeo di bonagalago di na le tokologo e kgolwanyana.

Kgarebe yeo e bitšwago Tammy e bontšha lebaka le lengwe leo ka lona ba bangwe ba ka phelago maphelo a mabedi, o re ba dira seo e le gore ba amogelwe ke bao ba tsenago le bona sekolo. O gopola ka gore: “Ke thomile go phela maphelo a mabedi ka go diriša polelo e sa hlwekago sekolong. Se se ile sa ntira gore ke ikwe ke swana kudu le barutwana ba bangwe. Ka morago ke ile ka leka go kgoga. Le gona ke be ke enwa go fihlela ke tagwa. Ke moka ke ile ka thoma go beana mabaka ka sephiring ka gobane batswadi ba ka ba be ba na le dithibelo gomme ba sa ntumelele go beana mabaka.”

 Mošemane yo a lego mahlalagading yo a bitšwago Pete o bile le phihlelo e swanago. O re: “Ke godišitšwe ke le yo mongwe wa Dihlatse tša Jehofa. Eupša ke be ke tloga ke boifa go kwerwa ke barutwana ba bangwe.” Pete o ile a lebeletšana bjang le poifo yeo? O re: “Ke ile ka leka go nyaka go amogelwa. Ke be ke tla bolela maaka le go nyaka sehlare sa ntšhirela mabapi le lebaka leo ka lona ke sa amogelago dimpho nakong ya matšatši a maikhutšo a bodumedi.” Ge Pete a thomile go kwanantšha dilong tše dinyenyane, go se go ye kae o ile a thoma go dira dibe tše dikgolo.

Ga go na Selo Seo se Utegilego go Jehofa

Go phela maphelo a mabedi ga se selo se sefsa. Baisiraele ba bangwe ba bogologolo le bona ba ile ba leka go phela maphelo a mabedi ba nagana gore ga go na yo a ba bonago. Lega go le bjalo, moporofeta Jesaya o ile a ba lemoša ka gore: “Go madimabe bao ba iphihlago ge ba utela Jehofa morero wa bona, bao ditiro tša bona di bonalago leswiswing, mola ba re: ‘Ke mang yo a re bonago, ke mang yo a tsebago ka rena?’” (Jesaya 29:15) Baisiraele ba ile ba lebala gore Modimo o bone ditiro tša bona. Ka nako e swanetšego, o ile a ba otla ka baka la dibe tša bona.

Go a swana le lehono. Gaešita le ge o ka atlega go utela batswadi boitshwaro bja gago bjo bobe, o ka se kgone go uta ditiro tša gago mahlong a Jehofa Modimo. Baheberu 4:13 e re: “Ga go na sebopiwa se se utamego mahlong a gagwe, eupša dilo ka moka di hlobotše e bile di molaleng mahlong a yo re ikarabelago go yena.” Ka gona, go thuša’ng go hlwa o uta ditiro tša gago? Gopola gore o ka se phohliše bogale bja Modimo ka go fo itira tše ekego o a mo rapela ka go ba gona dibokeng tša bodumedi. Jehofa o a tseba  ge batho ‘ba mo godiša ka melomo, eupša dipelo tša bona di le kgole le yena.’—Mareka 7:6.

Na o be o tseba gore batho bao ba phelago maphelo a mabedi ba kweša Jehofa bohloko? Na ruri seo se a kgonega? Se a kgonega e le ruri! Ge batho ba Isiraele ya bogologolo ba be ba hlokomologa Molao wa Modimo, ba ile “ba kweša yena Mokgethwa wa Isiraele bohloko.” (Psalme 78:41) O swanetše go ba a ekwa bohloko gakaakang lehono ge bafsa bao ba godišitšwego “ka tayo le temošo ya Jehofa” ba dira dilo tše di fošagetšego ka sephiring!—Baefeso 6:4.

Lokiša Ditaba

Ge e le gabotse, o kolota Modimo, batswadi ba gago le wena ka noši gore o ipobole seo o bego o dutše o se dira ka sephiring. Ke therešo gore se se ka dira gore o lewe ke dihlong e bile mohlomongwe sa ba le ditlamorago tše di sa kgahlišego. (Baheberu 12:11) Ka mohlala, ge e ba o itlwaeditše go bolela maaka le go ba moradia, o dirile gore batswadi ba gago ba se sa go bota kutšwanyana. Ka gona, o se ke wa makala ge ka nakwana ba go beela dithibelo go feta pele ga ge o ka ba botša seo o bego o dutše o se dira. Lega go le bjalo, go ipobola dibe tša gago ke tsela e kaonekaone. Ka baka la’ng?

Ela hloko papišo ye: Akanya wena le lapa leno le itshepelela kua nageng. Ge batswadi ba gago ba sa lebeletše thoko, o hlokomologa taelo ya bona ya gore o dule o le kgauswi le bona, o tšea  ka tsela ya gago gomme o feleletša o timetše. Gateetee o ikhwetša o sobelela lešabašabeng. Na o be o tla lewa ke dihlong kudu gore o nyake thušo? Na o be o tla tshwenyega ka gore batswadi ba gago ba tla go otla ka ge o hlokomologile ditemošo tša bona? Aowa! O be o tla hlaba mokgoši ka go hlaboša ka mo o ka kgonago ka gona.

Ka mo go swanago, ge e ba o phela maphelo a mabedi, o hloka thušo ka bjako. Gopola gore o ka se boele morago gomme wa dirolla dilo tšeo o di dirilego. Eupša o ka kgona go fetoša bokamoso. Go sa šetšwe gore go tla ba thata le go ba bohloko gakaakang go botša batswadi ba gago le go kgaotša go phela maphelo a mabedi, ke gabohlale go nyaka thušo pele ga ge o ka dira selo seo se tlago go kweša wena goba ba lapa leno bohloko bjo bongwe.  Ge e ba o tloga o itshola ka seo o bego o se dira, Jehofa o tla go gaugela.—Jesaya 1:18; Luka 6:36.

Ka gona, botša batswadi ba gago therešo. Kwešiša gore ba kwele bohloko. Amogela tayo ya bona. Ge e ba o dira bjalo, o tla thabiša batswadi ba gago le Jehofa Modimo. Le gona o tla ikwa o imologile ka go boela o eba le letswalo le lebotse.—Diema 27:11; 2 Bakorinthe 4:2.

KGAOLONG YA RENA YEO E LATELAGO

O na le dilo tše dintši tšeo o swanago ka tšona le bao o tsenago le bona ka klaseng. Eupša ke’ng seo o swanetšego go se tseba ka go dira segwera sekolong?

KEY SCRIPTURE

“Yo a bipago dikarogo tša gagwe a ka se atlege, eupša yo a ipobolago tšona gomme a di tlogela o tla gaugelwa.”—Diema 28:13.

KELETŠO

O se ke wa bebofatša diphošo tša gago, eupša phema go ipona molato go feta tekanyo. Gopola gore Jehofa o ikemiše-ditše go lebalela.—Psalme 86:5.

NA O BE O TSEBA . . . ?

Maikwelo a go ba molato a ka hola; a ka tutuetša motho gore a lokiše tsela ya gagwe e fošagetšego. Eupša motho yo a phegelelago go dira sebe o senya letswalo la gagwe. Le a retela, go swana le letlalo leo le fselego ke moka la omelela.—1 Timotheo 4:2.

KGATO YEO KE TLAGO GO E TŠEA!

Ge e ba ke be ke dutše ke phela maphelo a mabedi, ke tla boledišana le ․․․․․

Nka lebeletšana le tayo le ge e le efe yeo ke e newago ka go ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke’ng seo se dirago gore bafsa ba bangwe ba phele maphelo a mabedi?

● Tše dingwe tša ditlamorago tša go phela maphelo a mabedi ke dife?

● Ke ka baka la’ng e le mo go holago go kgaotša go phela bophelo bjo bo bjalo?

[Ntlhakgolo go letlakala 140]

“Ke nagana gore bafsa ba swanetše go ipolela gore ke Bakriste bao ba nago le ditekanyetšo tše di pha-gamego tša boitshwaro. Ba swanetše go dira se ka pela ka mo go kgonegago. Ge ba ka tšea nako e telele ba sa itsebiše gore ke Bakriste, ke moo ba tlago go thatafalelwa kudu ke go dira bjalo.”​—Linda

[Seswantšho go letlakala 141]

Ge e ba o sobelela tseleng ya go phela maphelo a mabedi bjalo ka ge eka o sobelela lešabašabeng, o swanetše go nyaka thušo