KAPÍTULO 20

¿Mbaʼépa ajapokuaa chemboriahúrõ?

Gregory, oikóva Európape, ndorekói ojogua hag̃ua ijao pyahurã ni umi aparáto elektróniko orekóva umi ótro ijavegua. Haʼe noaguantavéima upe situasión, ha upévare ohose oiko Áustriape. ¿Ndépa ere Gregory imboriahuha?

□ Si □ No

Loyiso oiko ihentekuérandi peteĩ chosaʼípe peteĩ aldéa oĩvape Áfricape. Haʼe oenvidia umi oikóvape pe aldéa oĩvape ag̃ui chuguikuéra. Heʼi umi ótro oiko porãitereimaha orekógui lus ha água korriénte. ¿Ndépa ere Loyiso imboriahuha?

□ Si □ No

KÁDA paíspe idiferénte oñentende lája pe palávra “mboriahu”. Por ehémplo, Gregory ikatu opensa ijehe imboriahuha, péro ñakomparáramo isituasión Loyiso situasiónre, haʼe oiko porãiterei. Oimérõ nde nemboriahueterei, nemanduʼa vaʼerã oĩha heta ivaivéva la ipórte. Péro ikatu oime upéva nanekonsolái oimérõ pe ao reipurúva reho hag̃ua koléhiope ndahaʼéi la iporãmbáva, térã ndereguerekóiramo água korriénte.

Oĩ mitãrusu oñamargáva imboriahu haguére, ha oñepyrũ omokõ térã ojedroga hesarái hag̃ua iprovlémagui. Péro upéicha ningo oempeorave la isituasión. Upe rire ohechakuaa  hikuái pe vevída ‘peteĩ mbóicha ñandesuʼu rasy ha ohejaha ñanderehe iponsóña’ (Proverbios 23:32). Peteĩ mitãkuña Sudafricagua hérava María okakuaa vaʼekue isýndi añónte. Haʼekuéra imboriahu, péro haʼe orrekonose: “Rei jadiparáta umi provlémagui. Upéicha noñesolusionamoʼãi upe situasión, oempeoravéta katu”.

Oiméne nde nderejedrogái ni ndereʼurasái vevída nderesarái hag̃ua ne provlemakuéragui, péro ikatu oime repensa ndaikatuiha rejapo mbaʼeve omehora hag̃ua ne situasión. ¿Mbaʼépa rejapokuaa oimérõ ndedesespera upéva? Nemboriahúrõ ikatu reñandu oĩrõguáicha peteĩ kadéna ndepokuáva, péro umi konsého bíblico haʼete peteĩ lláve oipeʼátava ndehegui pe kadéna, pórke nepytyvõta ndepositivove hag̃ua. Jahechamína umi konsého.

Emombaʼe la reguerekóva

Eñehaʼã eñekonsentra umi mbaʼe porã reguerekóvare, ha ani umi ndereguerekóivare. Por ehémplo, jaiko vyʼápe ñane famíliandi iñimportanteve hína pe plátagui. Proverbios 15:17 heʼi voi: “Iporãve jaʼu verduramínte enterove ojoayhuhápe, jaiko rangue jaʼu peteĩ tóro kyra porã roʼo, oĩháme ndochaʼéiva ojuehe”. Umi mitãrusu haʼéva Testígo katu imanduʼa vaʼerã orekoha peteĩ mbaʼe iporãitereíva: heta ermáno siémpre oapojátava chupekuéra (1 Pedro 2:17).

Evalorákena umi mbaʼe reguerekóva. Ikatu oime nde róga michĩ ha ndorekoguasúi komodida, nde ao ojegasta ha oñerremendapa, térã siémpre reʼu la mísma kósa. Péro epensamína, ¿tekotevẽ piko añete ndeao de márka térã nderóga porã Ñandejára ndeguerohory hag̃ua? ¿Umi tembiʼu hepyvévante  piko iñaliménto ha nepytyvõ neresãi hag̃ua? ¡Ajépa ndahaʼeiete upéicha! Apóstol Pablo ohasa vaʼekue opaichagua situasión, sapyʼánte ijakáso la hoʼu vaʼerã ha sapyʼánte hembypa (Filipenses 4:12). ¿Mbaʼépa oaprende upévagui? Haʼe heʼi: “Jarekóma guive jaʼumi vaʼerã ha ñande aorã, javyʼáma vaʼerã koʼã mbaʼére” (1 Timoteo 6:8).

Peteĩ mitãrusu Sudafricagua hérava Eldred okakuaa peteĩ família imboriahúvape. Haʼe heʼi: “Ahechakuaa añekontenta vaʼerãha roguerekomívare, ha ndaikatumoʼãiha areko opa mbaʼe aipotáva”. Haʼe omombeʼu osoro jave pe pantalón ogueraháva eskuélape, isy orremenda jey jeynteha osegi hag̃ua oipuru. Ha heʼi: “Sapyʼánte oĩ oñembohorýva cherehe. Péro che aikuaa ikatuha gueteri aipuru pe ao, ha chéve g̃uarã iñimportanteve pe ao siémpre ipotĩ”.

Ani emboguapyeterei ndejehe ne situasión

Peteĩ mitãʼi hérava James oreko vaʼekue 11 áño oikórõ guare isy ha iñermánandi peteĩ várrio imboriahuetereívape Sudáfricape. Haʼekuéra ndorekoguasúirõ jepe heta mbaʼe, James lomímonte ohechakuaa ikatuha oipytyvõ ótrope oipurúvo mokõi mbaʼe ivaliosoitereíva: itiémpo ha imbaretekue. Káda fin de semána oipytyvõmi umi omopuʼãvape Salón del Reino. Péicha oipuru  porã itiémpo, ha pyaʼeterei ohasa la óra. Ombaʼapopa rire siémpre ovyʼaiterei, pórke oikuaa ojapo hague álgo ideprovéchova. Haʼe heʼi voi: “Avyʼaiterei ambaʼapo rire un diaite umi ermánondi romopuʼã hag̃ua umi Salón”.

Avei ojapo porãitereíta nderehe resẽramo repredika ogahárupi (Mateo 24:14). Heta mitãrusu testígo de Jehová ojapo meme upéva. Péicha ndahaʼéi omeʼẽntéva esperánsa umi héntepe, síno haʼekuéra voi oñeñandu porãiterei oipytyvõgui hapichápe. Añetehápe ndojepagái chupekuéra upévare, péro iporã ñanemanduʼami pe Jesús heʼi vaʼekuére umi kristiáno Esmirnaguápe: “Che aikuaa rehasa asyha ha nemboriahuha, upéicharõ jepe, nde nderríko hína”. ¿Mbaʼérepa Jesús heʼi péicha oikuaáramo jepe haʼekuéra ndoguerekoiha heta mbaʼe? Pórke ohayhueterei hikuái Ñandejárape, ha upéva omborríko chupekuéra. Ha haʼekuéra ojeroviáramo Jesús sakrifísiore, orresivíta  “pe jeikove opaveʼỹva”, upéva heʼise núnka nomanomoʼãiha (Apocalipsis 2:9, 10).

Ani reperde la esperánsa

Tahaʼe jepe nemboriahu térã ndepláta, lomímonte ikatu hína oiko ndehegui Jehová amígo. La Biblia heʼi voi: “Pe persóna ipláta hetáva ha pe imboriahúva ojojogua ko mbaʼépe: Jehová ojapo mokõivévape” (Proverbios 22:2). Heta mitãrusu ohechakuaa rire upéva tuicha ikyreʼỹ imboriahúramo jepe. ¿Mbaʼérepa? Pórke ohechakuaa hikuái nodependeiha umi mbaʼe orekóvare ni pe plátare ovyʼa hag̃ua, síno odepende Ñandejára Jehová amistáre. Haʼe ningo oasepta entéro oservisévape chupe ipyʼaite guive, ha omeʼẽ chupekuéra pe oportunida oikóvo pára siémpre peteĩ múndo pyahúpe, ha upépe ndaiporimoʼãvéima imboriahúva (2 Pedro 3:13; Apocalipsis 21:3, 4).

Péro og̃uahẽ aja upe día, eipuru porã umi mbaʼe reguerekómava ha ani reperde la esperánsa, upéva rangue eñehaʼã embyaty tesóro yvágape (Mateo 6:19-21). ¡Nde ikatu hína revyʼa nemboriahúramo jepe!

TÉXTO OĨVA LA BÍBLIAPE

“Peguerekóramo jepe heta mbaʼe, pende rekove nodependéi umi mbaʼe peguerekóva rehe” (Lucas 12:15).

PETEĨ KONSÉHO

Aníkena epita, ekaʼu ni ehuga umi huégo ojehugáva plátare. Ha nde rogapýpe oĩrõ orekóva koʼãichagua vísio, emoĩ vaʼerã chupekuéra peteĩ ehémplo porã.

¿REIKUAÁPA RAʼE?

Resegíramo umi konsého oĩva la Bíbliape, revyʼáta katuete, oiméramo jepe nemboriahu térã ndepláta (Filipenses 4:12, 13; 1 Timoteo 6:8; Hebreos 13:5).

UMI MBAʼE AJAPÓTAVA

¿Mbaʼe mbaʼépa aguereko? ․․․․․

¿Mbaʼéichapa ikatu aipuru koʼã mbaʼe aipytyvõ hag̃ua che rapichakuérape? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa ikatu jaʼe káda paíspe idiferenteha oñentende lája pe palávra “mboriahu”?

● ¿Mbaʼérepa naiporãi peteĩ mitãrusu okaʼu térã ojedroga hesarái hag̃ua iprovlémagui?

● Oiméramo nemboriahu, ¿mbaʼe mbaʼépa ikatu rejapo omehora hag̃ua ne situasión ha resegi hag̃ua revyʼa?

[Komentário oĩva páhina 168-pe]

“Ndaigústoi ningo ñanemboriahu, péro ahechakuaa mbaʼevetépe ndaideprovechomoʼãiha aike peteĩ pandíllape térã amondáramo. Heta mitãrusu che avegua ojapo vaʼekue upéicha, ha koʼág̃a ikaʼu, oiko chugui drogadíkto, ha oĩ voi katu algúno ohóva kárselpe” (George).

 [Taʼanga ha rrekuádro oĩva páhina 164-pe]

Rekompleta hag̃ua

¿Iporãtapa ava ótro paíspe?

Heta mitãrusu ova ótro paíspe ogana porãve hag̃ua térã oipytyvõ hag̃ua ifamíliape. Oĩ ohóva oaprendeségui ótro idióma, osegi hag̃ua peteĩ karréra térã odipara hag̃ua iprovlemakuéragui. Ha oĩ avei heta kristiáno ohóva ótro país oñekotevẽhápe hetave opredikáva. Tahaʼe haʼéva la rrasón, umi ovaséva ótro paíspe opensa porã vaʼerã odesidi mboyve. Ha oimérõ rejapose hína upéva, elee ha ejepyʼamongetamína umi téxto bíblico oĩvare ko pártepe. Upéi ekontesta umi porandu ha eskrivi peteĩ kuadérnope la rrespuésta. Ha ani nderesarái ejerure hag̃ua Jehovápe tanepytyvõ redesidi porã hag̃ua.

□ Mbaʼe mbaʼépa ojerure pe goviérno che paisgua ha avei pe ótro paispegua? (Romanos 13:1).

□ ¿Mboýpa agasta vaʼerã ava hag̃ua? (Lucas 14:28).

□ ¿Ahechaukápa añemantenekuaamaha cheaño? (Proverbios 13:4).

□ ¿Mbaʼe konséhopa ikatu ajerure umi ermáno iñakãguapýva ohóma vaʼekuépe oiko ótro paíspe? (Proverbios 1:5).

□ ¿Mbaʼépa opensa che túa ha che sy upe ajaposévare? (Proverbios 23:22).

□ ¿Mbaʼérepa ahase ótro paíspe? (Gálatas 6:7, 8).

□ ¿Mbaʼeichagua persónandipa aikóta? ¿Chepytyvõtapa asegi hag̃ua aservi Ñandejárape, térãpa chemomombyrýta chugui? (Proverbios 13:20).

□ ¿Ikatúpa oĩ oapeligráva che rekove, omokangýva che jerovia térã chereityséva tekokyʼápe? (Proverbios 5:3, 4; 27:12; 1 Timoteo 6:9, 10).

□ ¿Mbaʼépepa añetehápe ideprovéchota chéve aváramo ótro paíspe? (Proverbios 14:15).

[Taʼanga oĩva páhina 167-pe]

Umi konsého bíblico haʼete peteĩ lláve oipeʼátava ndehegui pe kadéna ndepokuáva