Kapitulo 28

Unsay Akong Himoon Aron Makalikay Ako sa Homoseksuwalidad?

“Sa tin-edyer pa ko, maibog kog pareho nako nga lalaki. Nahibalo ko nga dili kini normal.”​—Olef.

“Ako ug ang akong amiga kaduha nga naghalok. Pero naglibog ko kay maibog man pod kog mga lalaki.”​—Sarah.

WALA nay lipodlipod nga ginahisgotan karon ang homoseksuwalidad o ang pagkabayot ug pagkatomboy. Ug sulay konog supak niana, di ba bombardiyohan gyod kag saway! Ang 16-anyos nga si Amy miingon, “Giingnan ko sa usa ka batan-ong babaye nga ubos kono kog panglantaw sa mga tawong lahig rasa tungod kay ubos kog panglantaw sa mga bayot ug tomboy!”

Sanglit ang mga tawo karon matinugoton na man kaayo, daghang batan-on naaghat sa pagsulay sa pagpakigrelasyon sa pareho nilag sekso. “Daghang babaye sa akong eskuylahan nag-ingon nga sila tomboy, ug ang pipila kanila makigrelasyon sa lalaki ug babaye, samtang ang uban gusto lang mosulay sa pagpakigrelasyon sa lalaki ug babaye,” miingon ang 15-anyos nga si Becky. Ingon usab niini ang kahimtang diha sa eskuylahan sa 18-anyos nga si Christa. “Duha ko ka klasmet nga babaye nanghagad sa pagpakigsekso kanako,” siya miingon. “Gisulatan ako sa usa kanila ug nangutana kon gusto ko bang mosulay sa pagpakigsekso sa pareho nakong babaye.”

Sanglit dili na ikaulaw karon ang pagpakigrelasyon sa pareho nga sekso, tingali ikaw makapangutana: ‘Daotan ba gayod  ang homoseksuwalidad? Kon maibog ko sa pareho nakog sekso, nagpasabot ba kana nga bayot o tomboy ko?’

Unsay Panglantaw sa Diyos sa Homoseksuwalidad?

Ang homoseksuwalidad karon dili na dakong isyu alang sa daghang tawo​—bisan sa ubang mga lider sa relihiyon. Apan tin-aw kaayo ang gisulti sa Bibliya bahin niini. Kini nag-ingon kanato nga gilalang ni Jehova nga Diyos ang lalaki ug babaye ug iyang gimbut-an nga para lang sa magtiayon ang pagpakigsekso. (Genesis 1:27, 28; 2:24) Busa dulumtanan gayod sa Bibliya ang pagpakigsekso sa parehong lalaki o babaye.​—Roma 1:26, 27.

Ang uban moingon nga karaan na ang impormasyon nga mabasa diha sa Bibliya. Apan nganong makaingon man sila niini? Dili kaha kay nagkasumpaki ang ilang hunahuna sa gisulti sa Bibliya? Daghan kanila dili motuo sa Pulong sa Diyos tungod kay ang gitudlo niini lahi sa ilang gusto nga tuohan. Apan sayop kana nga kaisipan, ug dili gayod kita angay magpaimpluwensiya niana!

Apan unsa kaha kon maibog ka sa pareho nimog sekso? Nagpasabot ba kini nga bayot o tomboy ka? Dili. Hinumdomi, ‘nagbuswak ka pa sa pagkabatan-on,’ diin dili nimo tuyoon nga mapukaw lag kalit ang imong gana sa pagpakigsekso. (1 Corinto 7:36) May panahong makagusto ka sa pareho nimog sekso, apan wala kini magpasabot nga bayot o tomboy ka. Kini sagad mawala ra paglabay sa panahon. Apan kinahanglang magpalayo ka sa mga buhat nga iya sa mga bayot o tomboy. Sa unsang paagi?

Iampo kini. Pangamuyo kang Jehova sama kang David: ‘Oh Diyos, susiha ako ug tugkara ang akong kasingkasing. Susiha ako ug hibaloi ang akong hunahuna nga puno sa kabalaka, ug tan-awa kon aduna bay daotan  kanako, ug tultoli ako sa dalan nga walay kataposan.’ (Salmo 139:23, 24) Si Jehova mohatag kanimo ug kalinaw nga “labaw sa tanang panghunahuna.” Kini ‘magbantay sa imong kasingkasing ug sa imong gahom sa pangisip’ ug mohatag kanimog “gahom nga labaw sa kasarangan” aron dili ka makahimog malaw-ayng mga buhat.​—Filipos 4:6, 7; 2 Corinto 4:7.

Paghunahuna kanunay ug makapalig-ong mga butang. (Filipos 4:8) Basaha ang Bibliya adlaw-adlaw. Kini gamhanan kaayo nga makaimpluwensiya sa imong hunahuna ug kasingkasing alang sa imong kaayohan. (Hebreohanon 4:12) Ang batan-ong si Jason miingon: “Ang Bibliya​—lakip sa mga teksto sama sa 1 Corinto 6:9, 10 ug Efeso 5:3—​nakatabang kaayo nako. Akong basahon kining mga tekstoha kon mapukaw ang akong gana sa sekso.”

Dumti gayod ang pornograpiya ug ang bisan unsang mga propaganda bahin sa pagkabayot o pagkatomboy. (Colosas 3:5) Likayi ang bisan unsa nga makapukaw sa gana sa sekso. Lakip niini ang pornograpiya, pipila ka programa sa TV ug mga pelikula, ug tingali mga magasin sa usong mga sinina o mga magasin nga dunay letrato sa mga modelo nga nagladlad sa ilang lawas. Ayaw paghunahunag malaw-ay, hinunoa, paghunahunag maayong mga butang. “Kon mapukaw gani ang  akong gana sa pagpakigrelasyon sa lalaki,” miingon ang usa ka tin-edyer nga lalaki, “mamalandong ko sa akong paboritong teksto sa Bibliya.”

Tinuod, ang uban moingon nga dili na kinahanglang suklan nimo ang imong pagbati, kondili panungtan na lang nimo ang imong gusto ug dawaton na lang nimo kon unsa ka. Apan ang Bibliya nag-ingon nga mabuntog nimo kining daotang tendensiya! Pananglitan, kini nag-ingon nga nagbag-o ang ubang unang mga Kristohanon nga naghimo kaniadto sa mga buhat nga iya sa mga bayot ug tomboy. (1 Corinto 6:9-11) Ikaw usab makahimo sa pagbuntog niini​—bisan diha pa lang sa imong hunahuna.

Komosta kon maibog gihapon ka sa pareho nimog sekso? Ayaw padaog! Dulumtanan kang Jehova ang mga buhat nga iya sa mga bayot ug tomboy. Ang usa nga nakigbisog niini nga kailibgon makahimo sa pagbuntog niini.

Aniay ilustrasyon: Ang usa ka tawo tingali “maaligutgoton.” (Proverbio 29:22) Tingali kaniadto mosilaob dayon siya sa kasuko. Apan human makatuon sa Bibliya, iyang nahibaloan nga kinahanglang magpugong siya sa iyang kaugalingon. Nagpasabot ba kana nga dili na gayod siya masuko? Wala. Apan kay nahibalo man siya sa giingon sa Bibliya bahin sa kasuko, maningkamot gayod siya nga dili magpadala sa iyang pagbati.

Ingon usab niana ang tawo nga maibog sa pareho niyag sekso apan nakakat-on na kon unsay  panglantaw sa Bibliya bahin sa mga buhat nga iya sa mga bayot ug tomboy. May mga panahon nga mapukaw ang iyang kailibgon. Apan kon lantawon niya ang homoseksuwalidad sama sa panglantaw ni Jehova, siya makahimo sa pagbuntog niana nga gana.

Ayawg Surender!

Kon nakigbisog ka sa pagkaibog sa pareho nimog sekso, tingali sama kag gibati sa usa ka batan-ong lalaki, kinsa miingon: “Naningkamot ko sa pagwala niining pagbatia. Nangayo kog tabang kang Jehova pinaagi sa pag-ampo. Nagbasa kog Bibliya. Namati kog mga pakigpulong bahin niini. Apan naglibog gihapon ko kon unsay akong himoon.”

Dili lalim kon sama niini ang imong situwasyon kay dili kini sayon sulbaron. Apan ang tanan nga gustong magpahimuot sa Diyos kinahanglang mosunod sa Iyang mga sukdanan sa moralidad ug maglikay sa imoral nga paggawi bisan pag lisod kaayo kining sundon. Hinumdomi nga ang Diyos nakasabot sa imong  pagpakigbisog ug nga siya may kahingawa niadtong nag-alagad kaniya. * (1 Juan 3:19, 20) Kon mosunod ka sa mga sugo sa Diyos, mapanalanginan ka gayod. Gani, “adunay dakong ganti” ang pagsunod sa mga sugo sa Diyos. (Salmo 19:11) Bisan karon pa lang mahimong magmalipayon ka niining punog problema nga kalibotan.

Busa salig sa Diyos ug buntoga ang sayop nga mga kailibgon. (Galacia 6:9) “Kasilagi ang daotan” ug “hawiri ang maayo.” (Roma 12:9) Kon maningkamot ka, mawala ra ang imong daotang kailibgon. Labaw sa tanan, kon maglikay ka sa mga buhat nga iya sa mga homoseksuwal, mahimo kang mabuhi sa walay kataposan diha sa matarong nga bag-ong kalibotan sa Diyos.

SA SUNOD NGA KAPITULO

Sa unsang paagi imong makontrolar ang imong kaibog sa kaatbang nga sekso?

[Footnote]

TEKSTO

‘Susiha ako ug hibaloi ang akong hunahuna nga puno sa kabalaka, ug tan-awa kon aduna bay daotan kanako.’​—Salmo 139:23, 24.

SUGYOT

Aron makabaton kag hustong panglantaw kon unsa ang pagkalalaki, tun-i ang panig-ingnan ni Jesus. (1 Pedro 2:21) Siya maoy hingpit nga panig-ingnan sa pagkalalaki ug pagkabuotan.

NAHIBALO KA BA . . . ?

Tingali lisod kontrolahon ang imong kailibgon apan pwede nimong makontrolar ang imong kaugalingon aron dili ka madala sa imong kailibgon.

ANG AKONG PLANONG HIMOON!

Kini ang akong isulti kon dunay mangutana nako kon nganong gihukman sa Bibliya ang homoseksuwalidad ․․․․․

Kini ang akong ipangatarongan kon dunay moingon nga hiktin ug panglantaw ang Bibliya ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Nganong supak ang Diyos sa homoseksuwalidad?

● Unsay imong himoon aron dili ka mahimong bayot o tomboy?

● Ang pagbaton bag samang panglantaw sa Diyos bahin sa homoseksuwalidad nagpasabot nga mapihigon ka sa mga bayot ug tomboy?

[Blurb sa panid 236]

“Ang balikong panglantaw sa kalibotan nakaimpluwensiya sa akong hunahuna ug nakapalibog nakog samot kon ako ba tomboy o dili. Gilikayan na nako karon ang bisan unsa o ang bisan kinsa nga nagpasiugdag homoseksuwalidad.”​—Anna

[Hulagway sa panid 233]

Tanang batan-on dunay kapilian​—sila makapili sa baliko nga panglantaw sa kalibotan bahin sa sekso o sa hataas nga sukdanan sa moralidad nga gipadayag diha sa Pulong sa Diyos