29 YATICHÄWI

¿Kunjamatsa imillanak tuqit jan lupʼxiristxa?

 “JURNÄLAS imillanak tuqitak lupʼiskta. Jupanakat lupʼiñajatakix janiw ni uñjañajas wakiskiti. Janiw armañjamäkiti. ¡Awisax janiw kunas suma lurañjamäkiti!” siw Michael sat waynaxa.

¿Ukhamarakit jumax jikxatasta? Imillanak tuqit lupʼiñas aynachtʼayañ munapkiristam ukham inas amuyassta. Michael waynax akham sasaw arsusi: “Ukhamanak lupʼisax jan amuytʼasir jaqjamaw sarnaqsna. Awisax suma uñnaqtʼani tawaqu jakʼat uñjañatakixa wasitampiw auto sayañanakansa qhatunakansa muyttxa” sasa.

Pareja munañax janiw jan walïkiti. Diosaw chacha warmirux munasipxañapatakix aka Uraqir uskuwayatayna, jupaw wawanïpxañapatak ikthapiñsa uchawayatayna, ukampis chacha warmjam jaqichatanakakiw ukxa lurapxañapäna. Ukhamasti, sapäski uka waynax jan ukax tawaqux ukham munañanakanïchi ukaxa, janiw jan wali jaqïkaspas ukham sañ munkiti, ukat jupax jucharuw purini sasax janirakiw sisksnati. Jumatix suma qʼuma sarnaqañ amtäta ukhax amtatamax phuqasiniwa. Ukampis ukham sum sarnaqañatakix jañchin munañanakapxa jumaw apnaqañamaxa, janiw apnaqayasiñamäkiti. ¿Kunjamatsa?

Suma amigonakanïñamawa. Yatiqañ utan yatiqir masinakamatix imillanak tuqit jan ukax yuqallanak tuqit parlañ qalltapxani ukhaxa, jan mayjat uñtʼayasiñatakix inas jupanakamp parlañatak ukankaskakchisma. Ukham lurañax janiw askïkiti, jukʼamp chʼamäspaw amuyunak armañaxa. Inas akham jisktʼaschisma: “¿Ukhamax kamachañajäspasa? ¿Sarxañajäspati?” sasa. Jïsa. ¡Janiw axsarayasiñamäkiti! Wali walis tukkasma ukham jan amuyapxañapatakisa ukat jan larusipxañapatakisa, kunayman tuqitwa jithiqxasmaxa.

 Kawkïr peliculanakatix ukat kawkïr musicanakatakix wachuq juchar wiytki ukat jithiqtañamawa. Musicanakatsa peliculanakatsa janiw taqpachax jan walïkiti. Ukampis jichha tiemp uñstaski ukanakax jan walirupuniw chiqpachans wiytaski. ¿Ukat Bibliax kamsistusa? “Ukatpï taqi kunatix qʼañuchkistaspa ukatxa jithiqtañasaxa, ukatsti qʼuma sarnaqañasawa jañchisansa, ukhamaraki ajayusansa. Diosar axsarasarakiw juparux taqi katuyasxañasaxa.” (2 Corintios 7:1.) Ukhamasti, kuna lartʼañanakatix jan wali tuqir wiytki ukanakxa apanukuñamawa. *

Masturbaciñax kunatsa jan walïkixa

Yaqhip wayn tawaqunakax masturbacisawa, mä arunxa, chhuxurasiñap llawqʼjasisaw jañchin munañanakap tʼakuyasiñ munapxi. Ukampis ukham lurañax jukʼamp jachʼa juchanakaruw puriyaspa. Bibliaxa, jan janchin munañapamp atipjayasipxañapatakixa akham sasaw cristianonakarux iwxi: “Jan khitis yaqhampi wachuqa juchan sarnaqpati, janirak qʼañu luräwinaksa lurpati, janirak jañchipan munañanakapsa, ni jan wali amtatanakapsa lurpati” siwa (Colosenses 3:5). Chiqpachansa, ukham llawqʼjasisaxa tʼakuyañat sipansa jukʼampiw ‘janchipan munañanakapxa’ jilxattayapxi.

 Ukhamaraki, jañchin munañapan esclavopäkasmas ukhamaw masturbacisax tukusma (Tito 3:3). Ukhamasti, ¿kunjamatsa ukham lurañxa armasma? Nayraqatxa, mayniruw awistʼañama. Walja maranak ukham luräwi jan lurañatak chʼamachasiri mä cristianox akham siwa: “Waynäskayät ukhaxa, janiw khitirus uka jan wali luratajat yatiyañ munkayätti. ¡Kunatakpunsa jan awistʼasirïkpachäta uk walpun amtasta! Uka juchajatxa walja maranakaw concienciajax juchañchitäna, ukatx janiw jaqi masinakajampis sum apasirïkti, janirakiw Jehová Diosampis sum apaskayätti” siwa.

¿Janit khitimpis parltʼañjamäki? ¿Janit tatamamp jan ukax mamamamp parltʼañax askïkaspa? Jan ukax tama taypin yatxattʼat cristianompiw parltʼasma. “Mä llakijaw utjitu uk awistʼañ munsma” sasaw qalltasma.

Andrés sat mä waynituxa tam uñjir mä jilatampiw parltʼapxatayna, ukat “askpun parltʼapxtxa” siwa. “Awistʼaskayäta ukhaxa, jachas nayranakapanx jalthapïnwa —siw Andresaxa—. Ukat awistʼañ tukuyta ukhaxa, ‘Jehová Diosax wal munastam’ sasaw situ. Ukat ‘janiw jumakïktati’ sarakituwa. Ukat ‘jan lurañatak amtamarux phuqasktat janich ukxa awistʼitätawa ukat Bibliat apstʼat qillqatanaksa thaqhanirapïmaw’ sasaw sitäna. Ukat  jupamp parltʼasaxa, awisax jalantäsa, janipuniw jañchin munañapampix atipayaskäti sasaw amtawayta” siwa

Mariosti tatapampiw parlarakitayna, ukat tatapax sum istʼatayna ukat “waynitükasax nayax ukham jan walinwa uñjasirakirïta, ukampis armañax chʼamirïnwa” sasaw sarakitayna. Mariox siwa: “Tatajax qhan awistʼasax wal chʼamachtʼitäna. Jupatix jaytawaychixa, nayax jaytarakiristwa sasaw amuytʼasirakta. Kunjamsa istʼitu uk uñjasax chuymaj chʼallxtayasta ukat wal jachaqtʼasta” siwa.

Janiw Andresamp Mariompikix ukhaman uñjasipkänti. Ukhamasti, jupanakax ukham lurasiñxa armapxänwa, jumax armarakismawa. Wasitampsa jalantaskam jumax chʼamachasiskakim atipjaskätawa. *

Jan jan wali amuyunakampix apnaqayasimti

Apóstol Pablox akham sänwa: “Nayax janchixan munañaparux tʼaqhisiytwa jaysayasiraktwa [ jan ukax  munañajaruwa apnaqarakta]” sasa (1 Corintios 9:27). Jan wali amuyunak jutätam ukhaxa, ¿janit Pablot yatiqasisa jañchin munañapar esclavjam apnaqañax askïkaspa? Ukhamäkipansa, jan wali amuyunakax jutaskakïtam ukhaxa, ejercicio lurañaw yanaptʼiristamxa. “Janchin ejercicio lurañax kunatakis askiwa” siw Bibliaxa (1 Timoteo 4:8). Inas jan sinti tʼijusa sarnaqañax askïchispa jan ukax yaqha ejercicionaks lurarakismawa.

Chiqpachansa, alaxpachankir Awkisaw yanaptʼiristamxa, jupat janipun armtʼasimti. “Kunapachatix jan wali munañanakax jutitu ukhaxa, Diosaruw yanap mayista” siw mä waynaxa. Chiqasa, janiw Diosax mä milagrükaspas ukham ukanak armtʼasiykätamti. Ukampis yanaptʼapampixa, yaqha tuqinakatwa lupʼxarakismaxa.

[Qhanañchäwinaka]

BIBLIAX KAMSISA

“Lupʼipxam, taqi kunatix sumäki yupaychañatakïki ukanakata.” (Filipenses 4:8)

AKHAM LURASMAXA

Jan masturbaciñatak chʼamachasisksta ukat wasitamp jalantsta ukhaxa, ¡jan aynañchtʼamti! Kunas ukham jan walirux puriytamxa uk amuykiptʼasim ukat jan wasitamp lurañatakix chʼamachasiskakma.

¿YATIYÄTATI?

Kunanakxay wal lupʼisksta ukham jaqïrakiyätawa ukat ukarjamarakiw kuns luräta (Santiago 1:14, 15).

¡AKANAK LURÄ!

Imill tuqitak jan ukax yuqall tuqitak lupʼiskataj amuyasï ukhaxa, ak luräxa ․․․․․

Kunapachatix yatiqir masinakajax jan wali chuymamp kunsa parlapxani jan ukax jan wali arunak parlapxani ukhaxa, ak lurä: ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● Tawaq munañasa jan ukax wayn munañasa, ¿kunatsa walïskixa?

● ¿Kunatsa jañchin munañanakapxa apnaqañama?

● ¿Kuna kast kusistʼäwinakas janchin jan wali munañanakap lupʼiyiristamxa?

● Kunapachatix yatiqir masinakamax jan wali chuymampi parlapxi jan ukax jan walinak parlapxi ukhaxa, ¿kunatsa sarxañamaxa?

[240 janan qhanañchäwipa]

“Kunapachatix jan wali munañanak lupʼiñ qalltta ukhaxa, yaqha tuqit lupʼiñaruw uchasta ukat jañchin munañanakapax pasxaniw sasaw wasitat wasita nayapach sasta.” (Scott)

[239 janan fotopa]

¿Venenat manqʼa manqʼasmati? Ukhamax janirakiw wachuq juchar wiytir amuyunakxa pʼiqimar apantañamäkiti