Ibuot 29

N̄kpanam Didie Ntre Ndisikere Mban̄a Idan̄?

 AKPARAWA kiet emi ekerede Michael ọdọhọ ete: “Nsikere mban̄a iban kpukpru ini—idem ke ini mmọ mîdụhe ikpere mi. N̄kpenịmke! Ndusụk ini, emi isikam iyakke n̄wụk ekikere ke se nnamde!”

Ukem nte Michael, ndi emesida ediwak hour ke usen ekere aban̄a owo isio uduot? Edieke edide ntre, ekikere ekeme ndisiaha fi iba. Utọ ekikere oro ekeme ndidụk fi esịt nte emi udịmekọn̄ mme asua ẹbụn̄ọde ẹdụk obio. Michael ọdọhọ ete: “Ekikere emi idiyakke ekeme ndikere n̄kpọ en̄wen aba. Enye ekeme ndinam fi ọkpọn̄ ebiet emi akpasan̄ade okodụk moto fo, aka akasan̄a anyan isan̄ n̄kukụre man ekebe ediye n̄kaiferi, mîdịghe ekeme ndinam fi asan̄a usụn̄ emi mûkpusan̄ake uka urua n̄kukụre man enen̄ede ese owo.”

Edi ti ke owo ndinyene udọn̄ idan̄ idiọkke. Kamse, Abasi okobot erenowo ye n̄wan man mmọ ẹnen̄ede ẹnyene udọn̄ ke idem kiet eken, ẹnyụn̄ ẹyụhọ udọn̄ idan̄ mmọ nte ebe ye n̄wan. Idem ekeme ndinen̄ede ndaha fi okposụkedi mûdọhọ ndọ kan̄a. Edieke oro etịbede, kûkere ke afo edi idiọk owo, m̀mê nte ke udukemeke ndidu edisana uwem. Emekeme ndidu edisana uwem edieke emekde! Edi oyoyom ekpeme se ekerede aban̄a owo isio uduot man ekeme ndidu orụk uwem emi. Didie ke ekeme ndinam oro?

Kpeme mbon oro odụkde nsan̄a. Ke ini nditọ ufọkn̄wed mbufo ẹtọn̄ọde ndineme mban̄a idan̄, ekeme ndidọn̄ fi ndisịn uyo ke nneme oro mbak editie nte udụkke otu. Edi emi idiyakke ekpeme se ekerede. Nso ke akpanam? Ndi ọkpọfọn ndidaha wap n̄kpọn̄ ebiet oro? Ih, se akpanamde edi oro. Kûdedei uyak bụt anam fi osụhọde etie do! Yom usụn̄ kpọn̄ ebiet oro, edi kûnam nte edi eti owo mbak nditọ ufọkn̄wed mbufo ẹdisak fi.

 Sọn oburobụt edinam unọ idem inemesịt. Imọfiọk ke idịghe kpukpru fim ye ikwọ ẹdiọk. Edi ẹtịm ediwak edinam unọ idem inemesịt mfịn man ẹdemede owo idiọk udọn̄ idan̄. Bible eteme ete ẹnam nso? Enye eteme ete: “Ẹyak nnyịn iyet kpukpru se isabarede obụkidem ye spirit ifep ke idem nnyịn, inam edisana idaha nnyịn ọfọn ama ke edibak Abasi.” (2 Corinth 7:1) Nen̄ede sọn edinam unọ idem inemesịt ekededi oro ekemede ndidemede owo idiọk udọn̄ idan̄. a

Mfịna Edifiọn̄ọ Ndido Idan̄ N̄kop Uyụhọ

Ndusụk uyen ẹsidomo ndisụhọde udọn̄ idan̄ mmọ ke ndifiọn̄ọ ndido idan̄ mmọ n̄kop uyụhọ. Edi emi ekeme ndida ikpọ mfịna ndi. Bible eteme mme Christian ete: “Ẹwot mme ndido idem mbufo emi ẹdude ke isọn̄ man ẹtre use, mbubiam ido, ọkpọsọn̄ udọn̄ idan̄, idiọk udọn̄, ye edisịn esịt ke n̄kpọ owo.” (Colossae 3:5) Edifiọn̄ọ ndido idan̄ n̄kop uyụhọ ‘iwotke ọkpọsọn̄ udọn̄ idan̄.’ Ke nditịm ntịn̄, enye esikam ededemede onyụn̄ anam udọn̄ oro enen̄ede ọsọn̄ ubọk!

Edifiọn̄ọ ndido idan̄ n̄kop uyụhọ ekeme ndinam fi odụk ufụn ọnọ udọn̄ idemfo. (Titus 3:3) N̄kpọ kiet emi afo ekemede ndinam  man etre edinam emi edi nditịn̄ nnọ owo. Christian kiet emi akan̄wanade nditre edifiọn̄ọ ndido idan̄ n̄kop uyụhọ ke ediwak isua ọdọhọ ete: “Ubaha nte n̄kpekenyenede esịt ntịn̄ nnọ owo ke ini n̄kedide uyen! Esịt ama obiom mi ke ediwak isua, etịmede itie ebuana mi ye mbon en̄wen, ndien ke akande kpukpru, iyakke n̄kpere Jehovah.”

Anie ke ekpetịn̄ ọnọ? Ekpenen̄ede ọfọn etịn̄ ọnọ ete m̀mê eka fo. Mîdịghe, tịn̄ nọ akwa owo emi ekemede ndin̄wam fi ke esop Christian. Emekeme nditọn̄ọ ke ndidọhọ enye, “N̄kpama ndisian fi n̄kpọ kiet emi enen̄erede afịna mi.”

André eketịn̄ esie ọnọ ebiowo Christian, ndien esịt enem enye ke ndiketịn̄. André ọdọhọ ete: “Mmọn̄eyet ama asiaha ebiowo oro nte enye akakpan̄de utọn̄ ọnọ mi. Ke mma n̄ketịn̄ mfịna mi mma, enye ama anam mfiọk ke Jehovah osụk amama mi. Enye ama asian mi ke idịghe ami ikpọn̄ nnyene orụk mfịna emi. Enye ama ọdọhọ ke iyesise nte n̄n̄wanade nditre mfịna emi ye nte ke iyada ntọt efen efen ke mme n̄wed emi ẹsidade ẹkpep Bible isọk mi. Ke mma n̄ketịn̄ mfịna mi nnọ enye, mma mbiere ndisịn ofụri ukeme ntre edinam emi—idem ọkpọkọm mfafiak nnam nte ini akade.”

 Mário eketịn̄ esie ọnọ ete esie emi ekenen̄erede okop enye mbọm onyụn̄ owụtde ke se enye etịn̄de an̄wan̄a imọ. Enye ama akam ọdọhọ Mário ke ikememke inọ imọ ke idem imọ nditre edinam emi ke ini ikedide uyen. Mário ọdọhọ ete: “Ete mi ndiketịn̄ ofụri akpanikọ nnọ mi ama enen̄ede esịn udọn̄ ọnọ mi. Mma n̄kere ke edieke enye ekekemede nditre edinam emi, ke ami n̄ko nyetre. Nte ete mi akanamde n̄kpọ ye ami ama enen̄ede otụk mi tutu ntọn̄ọ nditua.”

Ukem nte André ye Mário, ẹkeme ndin̄wam fi etre ndifiọn̄ọ ndido idan̄ n̄kop uyụhọ. Idem edieke afiakde anam, kûyak idem emem fi! Fiọk ete ke emekeme nditre edinam emi. b

Kpeme Se Ekerede

Apostle Paul ọkọdọhọ ete: “Ntọn̄ọ idem mi ita, nnam enye odụk ufụn.” (1 Corinth 9:27) Ukem nte Paul, ekeme  ndiyom otụnọ idemfo ke ini idiọk ekikere odụkde fi esịt aban̄a owo isio uduot. Edieke mûkemeke ndisio ekikere emi mfep ke esịt fo, domo ndisịn̄ede idem. Bible ọdọhọ ete: “Edisịn̄ede idem enyene esisịt ufọn.” (1 Timothy 4:8) Ndiwọrọ nsan̄a, m̀mê ndinam n̄kpọ en̄wen ke minịt ifan̄ nda nsịn̄ede idem ekeme ndin̄wam fi ebịn idiọk ekikere emi efep ke esịt fo.

Ke akande kpukpru, kûse un̄wam oro Ete fo eke heaven ọnọde fi ke usụhọde. Christian kiet ọdọhọ ete: “Ini ekededi oro idem adahade mi, mmesinen̄ede mbọn̄ akam.” Kûkere ke Abasi ayanam etre ndinyene udọn̄ ke idem owo isio uduot. Edi enye ayan̄wam fi okụt ediwak n̄kpọ efen oro ekpekerede aban̄a.

[Mme Ikọ Idakisọn̄]

AKPAN ITIE N̄WED ABASI

“N̄kpọ ekededi eke esịnede eti ido ye n̄kpọ ekededi eke odotde itoro, ẹka iso ẹkere mme n̄kpọ emi.”​—Philippi 4:8.

ITEM

Edieke afiakde ọfiọn̄ọ ndido idan̄ fo okop uyụhọ, kûyak oro anam fi ekere ke udukemeke nditre edinam emi! Dụn̄ọde se ikanamde fi afiak anam, nyụn̄ kụt ete ke ufiakke unam ukem n̄kpọ oro.

NDI AMA ỌFIỌK . . . ?

Se afo etiede ekere kpukpru ini oyotụk nte anamde n̄kpọ.—James 1:14, 15.

SE NDINAMDE

Se ndinamde man ntre ndikere mban̄a owo isio uduot edi ․․․․․

Ke ini nditọ ufọkn̄wed nnyịn ẹtọn̄ọde oburobụt nneme, se ndinamde edi ․․․․․

Se ndibụpde ete m̀mê eka mi mban̄a n̄kpọ emi edi ․․․․․

AFO EKERE DIDIE?

● Edieke idem adahade fi, ntak emi mûkpukereke ke amanam idiọkn̄kpọ?

● Ntak emi okpodomode ndimụm idem n̄kama ini ekededi oro idem adahade fi?

● Mme orụk unọ idem inemesịt ewe ẹkeme ndinam idem adaha fi?

● Ntak emi ọfọnde adaha ke ebiet oro ẹnemede oburobụt nneme?

[Se ẹwetde ke ikpọ abisi ke page 240]

“Mmesikere n̄kpọ en̄wen ke ini ekikere oro anamde idem adaha mi odụkde mi esịt. Mmesifiọk ke udọn̄ emi ididịghe ke nsinsi.”​—Scott

[Ndise ke page 239]

Ndi akpayak idiọk ndutịm kọmputa oro ẹkotde virus abiat kọmputa fo? Ntak ndien emi akpayakde oburobụt ekikere odụk fi esịt?