Kgaolo 29

Nka Kgaotša Bjang go Dula ke Nagana ka Thobalano?

 LESOGANA leo le bitšwago Michael le re: “Ke ikhwetša ke nagana ka banenyana ka dinako tšohle—gaešita le ge ba se gona mo kgauswi. Seo ke bošilo. Ka dinako tše dingwe ga ke kgone le go tsepamiša monagano!”

Go swana le Michael, na le wena o fetša nako e ntši o nagana ka batho ba bong bjo bo fapanego le bja gago? Ge e ba go le bjalo, o ka ikwa eka o lwa le monagano wa gago. Dikgopolo tša mabapi le thobalano di ka hlasela monagano wa gago go swana le mašole a manaba. Michael o re: “Dikgopolo tšeo di ka duma ka hlogong ya gago. Di ka dira gore o tšee ka tsela yeo o bego o se wa rera go sepela ka yona e le feela gore o fete kgauswi le ngwanenyana yo mobotse goba tša dira gore o tsene ka gare ga lebenkele le ge go sa hlokagale e le feela gore o bonele motho yo a itšego kgauswi.”

Lega go le bjalo, gopola gore maikwelo a thobalano ga se sebe. Go ba gona, Modimo o bopile monna le mosadi gore ba kgahlegelane kudu e bile ga se phošo go kgotsofatša kganyogo ya thobalano lenyalong. Ge o sešo wa tsena lenyalong, o ka ba le dikganyogo tše matla tša thobalano. Ge e ba seo se direga, o se ke wa nagana gore ka tlhago ga o na boitshwaro goba gore o ka se kgone go hlweka boitshwarong. O ka kgona go hlweka boitshwarong ge e ba o rata! Eupša gore o atlege boitekong bjoo, go tla nyakega gore o laole dikgopolo tša gago ka batho ba bong bjo bo fapanego le bja gago. O ka dira seo bjang?

Hlahlobišiša batho bao o tlwaelanego le bona. Ge e ba bao o tsenago le bona ka klaseng ba bolela ka thobalano ka tsela e gobogilego, o ka lekega go tšea karolo poledišanong yeo e le feela gore o pheme go ba yo a fapanego. Eupša seo ge e le gabotse se tla fo go thatafaletša go laola dikgopolo tša gago. Na o swanetše go tloga? Ee, e bile ga se wa swanela go lešwa dihlong ke go dira bjalo! Gantši o ka hwetša tsela ya  go tloga moo ntle le gore o bonagale o itira moloki le go dira gore o kwerwe.

Phema boithabišo bjo bo gobogilego. Ke therešo gore ga se mmino goba difilimi ka moka tšeo di gobogilego. Lega go le bjalo, bontši bja boithabišo bja lehono bo hlametšwe go tsoša maikwelo a fošagetšego a thobalano. Beibele e nea keletšo efe ka taba ye? E re: “A re itlhwekišeng ditšhila tšohle tša nama le tša moya, re phethagatša bokgethwa ka go boifa Modimo.” (2 Bakorinthe 7:1) Phema boithabišo le ge e le bofe bjo bo ka tsošago dikganyogo tše di gobogilego tša thobalano. *

Bothata bja go Tsoša Ditho tša Pelego

Bafsa ba bangwe ba leka go kgotsofatša dikganyogo tša bona tša thobalano ka go tsoša ditho tša pelego. Eupša seo se ka baka mathata a magolo. Beibele e kgothaletša Bakriste gore: “Ka gona bolayang mekgwa ya lefase yeo e lego dithong tša mebele ya lena, e lego bootswa, go se hlweke, kganyogo e fošagetšego ya go robala ga monna le mosadi, kganyogo e gobatšago le megabaru.” (Bakolose 3:5) Go tsoša ditho tša pelego go fapane kudu le go ‘bolaya kganyogo e fošagetšego ya go robala ga monna le mosadi.’ Ge e le gabotse, go dira bjalo go tsoša kganyogo yeo le go e gakatša!

Go tsoša ditho tša pelego go ka go dira lekgoba la  dikganyogo tša gago. (Tito 3:3) Tsela e nngwe yeo o ka thomago go fenya mokgwa wo ka yona ke ka go ntšhetša motho yo mongwe sa mafahleng. Mokriste yo mongwe yo a kilego a lwa le mokgwa wo ka nywaga e mmalwa o re: “Ruri ke duma ge nkabe ke ile ka beta pelo gomme ka bolela le motho yo mongwe ka taba ye ge ke be ke sa le mofsa! Maikwelo a go ipona molato a ile a ntlhasela ka nywaga e mentši moo a ilego a tloga a kgoma tswalano ya ka le ba bangwe gampe, e bile go feta moo a ile a kgoma tswalano ya ka le Jehofa gampe.”

O swanetše go bolela le mang? Gantši go kaone kudu go boledišana le motswadi wa gago. Goba mohlomongwe motho yo mongwe yo a godilego tsebong ka phuthegong ya Bokriste a ka thuša. O ka thoma ka gore: “Ke rata go bolela le wena ka bothata bjo bo ntshwenyago kudu.”

André o ile a bolela le mogolo wa Mokriste gomme o thabela gore o ile a dira bjalo. André o re: “Ge mogolo yoo a be a ntheeditše, mahlo a gagwe a ile a tlala megokgo. Ge ke feditše go bolela, o ile a nkgonthišetša gore Jehofa o a nthata. O ile a mpotša gore bothata bja ka ke bjo bo tlwaelegilego. O ile a nkholofetša gore o tla hlokomela tšwelopele ya ka le gore o tla ntlišetša tsebišo e oketšegilego e tšwago dithušong tša go ithuta Beibele. Ka morago ga gore ke bolele le  yena, ke ile ka ikemišetša go tšwela pele ke elwa—gaešita le ge nka fela ke boela mokgweng woo.”

Mário o ile a kgetha go bolela le tatagwe, yoo a ilego a mo kwela bohloko kudu le go ba yo a kwešišago. O ile a ba a botša Mário gore le yena o ile a hwetša go le thata go fenya mokgwa woo ge e be e sa le mofsa. Mário o re: “Potego ya tate le go bolela ga gagwe ka go tšwa pelong go ile gwa nkgothatša kudu. Ke ile ka ipotša gore ge e le gore o ile a kgona go fenya bothata bjo, le nna nka bo fenya. Boemo bja tate bja kgopolo bo ile bja nkgoma kudu moo ke ilego ka ba ka lla.”

Ka go swana le André le Mário, o ka hwetša thušo maitekong a gago a go fenya mokgwa wa go tsoša ditho tša pelego. Gaešita le ge o ka fela o boela mokgweng wo, o se ke wa lahlela toulo! Kgonthišega gore o ka fenya ntweng ye. *

Kamoo o ka Laolago Dikgopolo tša Gago

Moapostola Paulo o itše: “Ke tula mmele wa ka gomme ka o  laola bjalo ka lekgoba.” (1 Bakorinthe 9:27) Ka mo go swanago, o ka swanelwa ke go itaya ge go bonagala dikgopolo tše di fošagetšego ka batho ba bong bjo bo fapanego le bja gago di go hlasela monagano. Ge e ba dikgopolo tšeo di tšwela pele, leka go itšhidulla. Beibele e re: “Go tlwaetša mmele go hola ganyenyane.” (1 Timotheo 4:8) Go sepela ka go akgofa goba go itšhidulla ka metsotso e sego kae e ka ba sohle seo o se hlokago go go thuša go lwantšha dikgopolo tšeo di fošagetšego.

Go feta tšohle, o se ke wa hlokomologa thušo yeo e hwetšagalago go Tatago wa legodimong. Mokriste yo mongwe yo a sego a nyala o re: “Ge ke thoma go kganyoga go ba le thobalano, ke rapela ka go tšwa pelong.” O se ke wa nagana gore Modimo o tla dira gore o se sa hlwa o kgahlegela batho ba bong bjo bo fapanego le bja gago. Eupša ka thušo ya gagwe, o ka hwetša gore go na le dilo tše dingwe tše dintši tšeo o ka naganago ka tšona.

[Mengwalo ya tlase]

KEY SCRIPTURE

“Dilo le ge e le dife tša bokwala le dilo le ge e le dife tše di tumišegago, tšwelang pele le naganišiša ka dilo tše.”—Bafilipi 4:8.

KELETŠO

Ge e ba o boetše mokgweng wa go tsoša ditho tša pelego, o se ke wa lahlela toulo! Ipotšiše gore ke eng seo se dirilego gore o boele mokgweng woo gomme o leke gore o se ke wa se boeletša.

NA O BE O TSEBA . . . ?

Selo seo o dulago o nagana ka sona se ka bopa semelo sa gago gomme sa kgoma ditiro tša gago.—Jakobo 1:14, 15.

KGATO YEO KE TLAGO GO E TŠEA!

Ge ke nyaka go kgaotša go dula ke nagana ka batho ba bong bjo bo fapanego le bja ka, ke tla ․․․․․

Ge e ba poledišano ya ka le bao ke tsenago le bona ka klaseng e thoma go tšwa tseleng goba go goboga, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng e se ka mehla moo maikwelo a thobalano a sa swanelwago ke go lebelelwa e le a fošagetšego ka tlhago?

● Ke ka baka la’ng o swanetše go laola dikganyogo tša gago tša thobalano?

● Ke mehuta efe ya boithabišo yeo e ka dirago gore o dule o nagana ka batho ba bong bjo bo fapanego le bja gago?

● Ke ka baka la’ng go le bohlokwa go tloga ge poledišano e thoma go tšwa tseleng goba go goboga?

[Ntlhakgolo go letlakala 240]

“Seo se nthušago ke gore ke nagane ka selo se sengwe se itšego—ke kgaotše go nagana ka dilo tšeo di dirago gore ke tsogelwe maikwelong. Ke ikgopotša gore mafelelong maikwelo ao goba dikganyogo tšeo di tla fela.”—Scott

[Seswantšho go letlakala 239]

Na o be o ka dumelela virus ya khomphutha e hlasela khomphutha ya gago? Bjale ke ka baka la’ng o dumelela dikgopolo tše di gobogilego di tsena ka monaganong wa gago?