33 YATICHÄWI

¿Pornografía uñchʼukiñax kunatsa jan walïki?

¿Qhawqha kutis ukham jan walinakax uñsttamxa?

□ Janiw mä kutisa

□ Mä qhawqhaki

□ Walja kuti

¿Kawkinsa uñjta?

□ Internetana

□ Yatiqañ utana

□ Televisionana

□ Yaqha chiqana

¿Ukat kuns lurta?

□ Jankʼakiw maysar uñtta

□ Mä jukʼaki yatiñ layku uñjta

□ Jayaw uñchʼukta, ukat jukʼamp thaqtxa

 KUNAPACHATÏ awk taykamax jumjam wayn tawaqüsipkäna ukhaxa, qʼañu luräwinak jan ukax jan isininakar uñjañ munir jaqinakax jayanakaruw thaqhir sarapxirïna. Ukampis jichhax janiw ukhamäxiti, uka jan walinakax kawkinsa utjaskakiwa, jiwasarus utasan thaqkistaspa ukhama. Ukat 19 marani mä tawaqux akham siwa: “Awisax kun thaqhiris jan ukax qullqix bancon kunjamäski uk yatxatañatakis Internetar mantta ukhax mä akatjamat uka jan walinakax uñstani” sasa. Chiqansa walja kutiw ukax pasi. Mä kutix 8 maranit 16 maranakani waynitunakaruw uka tuqit jisktʼapxatayna, ukat sapa tunkatxa, maynikiw jan uñjkataynati ukat niya taqiniw tareanak lurkasa uka qʼañu luräwinak uñjapxatayna.

Chiqansa, ukanakax kawkinsa utjaskakiwa, ukhamax inas jumax akham jisktʼasta: “¿Ukanak uñchʼukiñax sinti jan walipunïpachati?” sasa. Jïsa ukhamawa. Ukanakax jan walipuniwa. Khitinakatix jan isini ukat qʼañunak lurasipki ukanakax wali phinqʼaw ukanak lurapxi, ukat uñchʼukirinakas ukham jan wali jaqitwa uñtʼayasipxaraki. Ukatxa wachuq jucharuw wiytistaspa. Ukampis yaqha jan walinakaw utjaraki.

Yaqhipax ukar wali yatintatäpxiwa, janiw jaytirjamäpkiti, ukat kunayman jan walinakan uñjasipxi. Juliot amuytʼañäni, jupax 14 marawa uk jaytañatakix wal chʼamachasitayna, ukat akham siwa: “Janis uka jan walinak uñtañ munxstxa, ukampis kunanaktï uñjkta ukanakax chuymar jutaskakiwa. Ukat ukanak uñjañ munatajasa janirakiw chhaqkiti... Uk armañatakix sapüruw chʼamachasta. ¡Uka jan wali axtaskañanak qalltatpach jan uñjiriskayäta ukhaxa, walipunïspänwa! Walikïskaspas ukham amuyirïta... ¡Ukampis, akham jan amuytʼasirïtsti!  Inas yaqhipatakix uka luräwinakarux qʼañu, axtaskaña, jan wali, juchaw sapxchi, chiqansa ukham jan waliwa. Janiw kuna askis utjkiti. Janiw mä jukʼas askis utjkiti” sasa.

Juma pachpat amuytʼasiñamawa

Mä akatjamatsa awisax uka jan walinakax uñstiristam ukham amuytʼañäni. ¿Jan mayampi uñstaniñapatakix kuns lurasma? Nayraqatxa, kunjamatsa ukat kunapachas uñsti uk amuytʼañamawa. Ukhamax aka tuqinakat amuytʼañamawa.

¿Masinakat celularamar jan ukax Internetan utjki uka correomar ukham fotonak apayanipxi? Ukhamächi ukhaxa, jan uñjasa apsxañamawa.

¿Internetar mantta ukhaxa, uka kasta wakichäwinakat uñstani? Jan mayampi uñstaniñapatakix kuna arunaksa thaqañatakix qillqantta ukxa wal amuyasiñamawa.

¿Kunjamatsa jan ukax kawkinsa jan isininaksa, qʼañu luraskirinaksa uñjta?

․․․․․

¿Jan mayampi uñjañatakix kun lurañas wakisispa? Kun lurañsa amtta uk akar qillqtʼasïta.

․․․․․

 Ukanakar yatintatäxasaxa, ¿kuns lurasma?

Jan munkasa akatjamat ukham jan walinak uñjañax mayäspawa, ukampis sapakuti jan ukax uñjañ munasapuni thaqhañax janipuniw walïkiti. Ukanak uñchʼukipunsta ukhaxa, armañax wali chʼamäniwa. ¿Kunatsa wali chʼamaxa? Amuytʼañäni, mä juchʼus chʼankhampi amparat chinuntapxiristam ukhaxa, janiw tʼaqjañax chʼamäkaspati; may jiytʼasakiw tʼaqjasma. Ukampis ¿walja kuti muyuntayapxiristam ukhax tʼaqjañjamäspati? Chiqansa, tʼaqjañax wali chʼamäspawa. Jan isininak jan ukax qʼañu luraskirinak uñchʼukiñax niya ukhamarakiwa. Walja kuti uñchʼukïta ukhaxa, walja kutis ukham juchʼus chʼankhampi muyuntayapkiristam ukhamäspawa. Ukampis kunjamatsa uka jan walit jararasisma uk jichhax amuytʼañäni.

Ukanak uñchʼukiñax jan walipuniwa. Chacha warmi munasiñax Jehová Diosan mä suma churäwipawa,  ukampis Supayax jan waliruw ukanakxa uñtayi. Ukanak amuyañax kunatix jan walïki ukanak ‘uñisiñ’ yanaptʼätamxa (Salmo 97:10).

Kuna jan walirus puriyistaspa. Ukham jan walinak uñchʼukir chacha warminakas jaljtañaruw puripxi. Jan isini uñstanipki jan ukax qʼañunak lurasin uñstanipki uka jaqinakax phinqʼaw ukanak lurapxi, ukat uñchʼukirinakas phinqʼarakiw uñchʼukipxi. Kuntï Bibliax “chʼikhi jaqix jan waltʼaña uñjasinxa jaltxiwa” siski ukax chiqäskapuniwa (Proverbios 22:3). Ukham jan walinak uñjasaxa, kuna jan walinakarus purisma uk aka chiqar qillqtʼasïta.

․․․․․

Jan mayampsa uñtxañatak amtañamawa. Job sat suma chuyman jaqit yatiqasiñamawa, jupax akham sänwa: “Nayax maya amtasta [...]: Janipuni soltera tawaqunakarusa [munapayaña]” sasa (Job 31:1). ¿Jumax ukham amtarakismati? Ukatakiw aka mä qhawqha amuytʼanakax yanaptʼätamxa:

Janiw sapakïkasinxa Internetar mantañamäkiti.

Jan walinakax uñstani ukhaxa jankʼakiw jiwtʼayañama.

Mayampi ukar purisax amuytʼasir mä amigompiw parltʼasma.

 ¿Kunjamatsa uka jan walinakat jarkʼaqasirakisma?

․․․․․

Diosat yanap mayisma. Mä Salmo qillqirix akham sataynawa: “Janikiy inamay yänakar uñtayistati” sasa (Salmo 119:37). Chiqansa Jehová Diosaw yanaptʼañ muntamxa, ukat atipañamatakiw chʼam churätamxa (Filipenses 4:13).

Yaqhar yatiyañaw wakisispa. Uka jan wal armañatakix amuytʼasir mä jilïr amigompi parltʼañaw askirakïspa (Proverbios 17:17). Khitirus yatiyasma uk aka chiqar qillqtʼasïta.

․․․․․

Ukampis janipuniw payachasiñamäkiti, jumax uka jan walir atipasmawa, mä arunxa armasmawa. Ukat mä kuti jan uñchʼukkäta ukhaxa, mä nuwasïwinsa atipkasma ukhamäniwa. Ukhamasti atipasax Jehová Diosaruw jumar yanaptʼatapatxa yuspärañama. Ukat uka jan walinak jan uñchʼukxäta ukhaxa, Jehová Diosaw wal kusisini, uk amtañamarakiwa (Proverbios 27:11).

BIBLIAX KAMSISA

“Aka uraqin jucha lurañanakax [...] jan utjxpanti: jan khitis yaqhampi wachuqa juchan sarnaqpati, janirak qʼañu luräwinaksa lurpati, janirak jañchipan munañanakapsa, ni jan wali amtatanakapsa lurpati, [...] (ukasti idolonakarus yupaychksna ukhamarakikiwa).” (Colosenses 3:5)

AKHAM LURASMAXA

Uka jan walinaka jan uñstaniñapatakix computadoramaruw jarkʼaqirinak uchañama. Ukat ukham jan wali correonak apayanipxätam ukhaxa, janiw jistʼarañamäkiti.

¿YATIYÄTATI?

Uka jan wali luräwinak uñchʼukirinakaxa, Noé tiempon alaxpachat saraqanir ñanqha angelanakjamaw lurapxaraki, ukanakax uka jan walinakaki munasipkäna (Génesis 6:2).

¡AKANAK LURÄ!

Jan isininak jan ukax qʼañu luraskirinak jan uñchʼukiñatakix akanak lurä: ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● Pornografiax askinakxa jan waliruw tukuyi, ¿kunatsa ukham sasma?

● Sullkamax ukham jan walinak uñchʼukiskaspa ukhaxa, ¿kunjamsa yanaptʼasma?

[278 janan qhanañchäwipa]

“Janïr Bibliat yatiqkasax uñtʼat taqi kasta droganak malltʼta. Ukampis ukanakat sipansa nayatakix jan isininak uñchʼukiña, qʼañu luraskirinak uñchʼukiñ armañax wali chʼamapunïnwa. Jan Jehová Diosan yanapapampix janiw armiriskätti.” (Julio)

[276 janan fotopa]

Pornografía uñchʼukiñax jukʼat jukʼatsa ñachʼantkiristam ukhamawa, walja kuti uñchʼukïta ukhaxa, jararasiñax wali chʼamäspawa