KAPÍTULO 33

¿Mbaʼérepa amboykete vaʼerã pe pornografía?

¿Mboy vésepa reipotaʼỹre osẽ ndéve pe pornografía?

□ Núnka

□ Sapyʼánte

□ Heta vése

¿Moõpa oiko nderehe upéva?

□ Internétpe

□ Eskuélape

□ Télepe

□ Ótro hendápe

¿Ha mbaʼépa rejapo raʼe?

□ Pyaʼe porã remaña ótro ládo

□ Nembokurióso ha remañaʼimi

□ Repyta remaña hese ha upéi rehekave

 NDE tuakuéra oguerekórõ guare nde eda umi hénte ohechaséva pornografía oho vaʼerã oheka, péro koʼág̃arupi haʼete voi pe pornografía ohekáva umi héntepe. Peteĩ mitãkuña orekóva 19 áño omombeʼu: “Aike jepi umi páhina oĩva Internétpe, tahaʼe ajogua hag̃ua peteĩ mbaʼe térã ahecha hag̃ua pe kuénta oĩva vánkope, péro peichaháguinte osẽ sapyʼa peteĩ propagánda osẽhápe pornografía”. Upéva ningo hetárema oiko. Peteĩ investigasión ojejapóvape ojehecha umi orekóva éntre 8 ha 16 áño apytépe, el 90 por ciento heʼi oipotaʼỹre osẽ hague chupekuéra pornografía, la majoría ojapohápe jepi umi taréa eskuelapegua.

Koʼág̃arupi ikonosidoiterei pe pornografía ha upévare ikatu oime reñeporandu: “¿Añetehápe piko pe pornografía ivaieterei?”. Si, añetehápe ivaieterei. Pe pornografía ningo operhudika ha oheja vai umi osẽvape umi taʼangápe ha avei umi ohechávape, hiʼarive upéva káusare oĩ heta hoʼáva tekovaípe. Péro ikatu avei ndeperhudika hetave hendáicha.

Umi persóna ohecháva pornografía ningo ikatu oñenvisia hese ha upéva káusare heta ohasa asy. Peteĩ mitãkariaʼy hérava Julio, omombeʼu ojapomaha 14 áño ndohechavéi hague pornografía, upéicharõ jepe haʼe heʼi: “Ndahaʼéiramo jepe yma guaréicha, koʼag̃aite peve chestira gueteri. Hiʼarive ndaikatúi cheresarái umi mbaʼe ahecha vaʼekuégui, ha káda día añehaʼã vaʼerã ani hag̃ua haʼa jey ko ñuhãme. Pe pornografía ningo ikyʼaiterei ha ambyasyeterei ahecha haguére. Che ningo apensa vaʼekue ndaipeligrosoiha, péro tuichaiterei ajavy. ¡Ajépa chevyroite! Umi heʼíva pe pornografía ndojapoiha mbaʼeve ñanderehe tuichaiterei ijapu. Pe pornografía ivai, ikyʼa ha oheja vai enterovépe. Naiporãiete voi ni michĩmi”.

 Epensa ne situasiónre

Ñamoĩmi chupe rehekaʼỹre retopa hague peteĩ taʼanga tieʼỹ, ¿mbaʼépa ikatu rejapo ani hag̃ua oiko jey nderehe upéva? Primero tekotevẽ rehecha mbaʼéicha rupípa oiko raʼe upéva. Epensamína koʼã situasiónre:

¿Reguerekópa peteĩ ne kompañéro orahakáva jepi ndéve umichagua taʼanga por teléfono térã Internet rupive? Upéicharõ ikuentavéta evorra imensáhe releeʼỹre.

¿Osẽntepa ndéve umi páhina orekóva pornografía reipuru jave Internet? Ani hag̃ua oiko upéva reñatende porã vaʼerã umi palávra reskrivíva reheka jave álgo.

¿Mbaʼéicha javépa rehekaʼỹre retopa raʼe pornografía?

․․․․․

¿Mbaʼépa ikatu rejapo pono oiko jey upéva nderehe? Eskrivi koʼápe umi mbaʼe rejapótava.

․․․․․

¿Mbaʼépa ikatu rejapo oiméramo reñenvisiáma pe pornografíare?

Ikatu hína retopa raʼe rehekaʼỹre pe pornografía. ¿Péro mbaʼépa oikóta oiméramo nde voi reheka, térã rehecháramo heta vésema? Oiméramo rejepokuaáma rehecha pornografía, upéicharõ ereko vaʼerã enkuénta tekotevẽtaha heta reñehaʼã reheja hag̃ua. ¿Mbaʼérepa? Eñeimahinami  oñeñapytĩha nde po peteĩ ílo ipoʼívape, ¿ijetuʼútapa ndéve reipeʼa hag̃ua? Nahániri, eitiraʼimínte ha ikatútama remondoho. Péro ijetuʼuvétama ndéve reipeʼa hag̃ua oimérõ heta vésema ojelia nde póre pe ílo. Pe pornografía ojogua upe ílope, amáske rehecha ijetuʼuvéta ndéve reheja hag̃ua. Upévare jahechamína koʼág̃a mbaʼe mbaʼépa ikatu nepytyvõ reheja hag̃ua ko vísio.

Rentende vaʼerã mbaʼérepa ivaiete pe pornografía. Umi rrelasión sexuál ningo peteĩ rregálo oúva Jehovágui, péro Satanás oipuru pe pornografía omongyʼa hag̃ua ko rregálo porãite. Jahechakuaáramo upeichaha, upéva ñanepytyvõta ndajachaʼéi hag̃ua pe pornografíare haʼe rupi peteĩ mbaʼe ivaietereíva (Salmo 97:10).

Epensa mbaʼépa oikóta rehecháramo pornografía. Péva káusare oñembyai heta matrimónio. Pe pornografía omongyʼa umi persóna osẽvape  upépe ha avei umi ohechávape. La Biblia heʼi: “Pe iñentendídova ohechakuaa pe pelígro ha ojere chugui” (Proverbios 22:3). Eskrivimi koʼápe mbaʼe mbaʼépa ikatu oiko reñenvisiáramo pe pornografíare.

․․․․․

Ejedesidi. Ikatu rejedesidi Job ojapo haguéicha, haʼe heʼi: “Che ajapo peteĩ kompromíso umi che resándi ¿mbaʼéicha piko upéicharõ aikóta amañaiterei peteĩ kuñataĩ rehe?” (Job 31:1). ¿Oĩpa avei peteĩ kompromíso nde ikatúva rejapo? Koʼápe retopáta unas kuánta suherénsia:

Ndaipurumoʼãi Internet aĩ jave cheaño.

Osẽramo peteĩ páhina oĩháme pornografía pyaʼe porã ambotýta upéva.

Ahecha jeýramo pornografía añeʼẽta peteĩ che amígo ikatúvandi chepytyvõ.

¿Mbaʼe mbaʼépa ikatu avei nepytyvõ rejehekyiete hag̃ua pe pornografíagui?

․․․․․

Eñeʼẽ upéva rehe ne ñemboʼépe. Peteĩ salmísta ningo ojerure vaʼekue: “Chepytyvõ anive hag̃ua amaña umi mbaʼe  vaíre, ndovaléiva mbaʼeverã. Chegia aguata hag̃ua nde rapére ikatu hag̃uáicha aikove” (Salmo 119:37). Jehová ningo oipota resẽ porã, upévare nemombaretese ha nepytyvõseterei (Filipenses 4:13).

Emombeʼu ótrope. Tuichaiterei nepytyvõta reñeʼẽrõ peteĩ ne amígo rekonfiávandi ha iñakãguapývandi (Proverbios 17:17). Eskrivi mávandipa eñeñandu porãta reñeʼẽ hag̃ua:

․․․․․

Aníkena reduda ni michĩmi nde ikatuha remboykete pe pornografía. Umi mbaʼe rejapóva ndepuʼaka hag̃ua ko vísiore ningo ojogua peteĩ gérrape, ha regana hína rehóvo remboyke vove káda oportunida oñepresentáva ndéve rehecha jey hag̃ua. Emombeʼúkena Jehovápe oiko jave upéva, ha eagradese chupe nemombarete haguére. Pe pornografía ningo haʼe peteĩ plága, ha nde ikatu hína rembovyʼa Jehová korasõ remboykévo ko mbaʼe vaiete (Proverbios 27:11).

TÉXTO OĨVA LA BÍBLIAPE

“Pejukáke umi mbaʼe vai oĩva pende pype, ani hag̃ua penderekovai, penderekokyʼa, peneakãraku vai ha ndapejejokokuaavéi, ani pepensa umi mbaʼe vaíre, ha ani peipotaiterei mbaʼe ahéno, upéva haʼe hína avei taʼanga jeadora” (Colosenses 3:5).

PETEĨ KONSÉHO

Ekonfigura ne komputadóra pono oavri umi sítio orekóva pornografía. Ani reike umi korréo orekóvape peteĩ direksión de Internet ndereikuaáiva.

¿REIKUAÁPA RAʼE?

Noé tiémpope umi demónio iñakãraku umi rrelasión sexuálre. Ha ndoikuaáirõ jepe, umi oñenvisiáva pornografíare osegi iñehemplokuéra (Génesis 6:2).

UMI MBAʼE AJAPÓTAVA

¿Mbaʼépa ikatu ajapo ani hag̃ua ahecha mbaʼeveichagua pornografía? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa ikatu jaʼe pe pornografía omongyʼaha umi rrelasión sexuál?

● ¿Mbaʼéichapa ikatu reipytyvõ ne ermáno térã ne ermánape repilláramo ohechaha pornografía?

[Komentário oĩva páhina 278-pe]

”Astudia mboyve la Biblia ningo aipuru vaʼekue hetaiterei dróga. Péro pe vísio ijetuʼuve vaʼekue chéve aheja hag̃ua haʼe kuri pe pornografía. Jehová chepytyvõ rupi añoite ikatu kuri chepuʼaka hese” (Julio).

[Taʼanga oĩva páhina 276-pe]

Amáske peteĩ persóna ohecha pornografía, ijetuʼuetereivéta chupe oheja hag̃ua pe vísio