KAPÍTULO 36

¿Mbaʼéicha ikatu adefende che jerovia?

¿Mbaʼe mbaʼépa ikatu jepi ndejoko ani hag̃ua repredika ne kompañerokuérape?

□ Ndereikuaaporãi la Biblia omboʼéva

□ Rekyhyje oñembohorýrõ g̃uarã nderehe

□ Ndereikuaái mbaʼépa eréta eñepyrũ hag̃ua reñemongeta hendivekuéra

¿Mbaʼéichapa ifasilve ndéve repredika hag̃ua chupekuéra?

□ Reñemongetáramo neañoháme peteĩvandi

□ Rejapóramo peteĩ exposisión nde kláse renondépe

□ Rejapóramo peteĩ rredaksión ha upépe reexplika umi mbaʼe regueroviáva

Eskrivimína koʼápe mávapa ne kompañerokuéra apytépe ikatu hína nerendu porã: ․․․․․

 OIMÉNE ne kompañerokuéra ndojepokuaái oñeʼẽ Ñandejárare. Ikatu oime oñemongetase oimeraẽ mbaʼére rei, por ehémplo umi depórte, umi ao iporãva, mitãkuña, mitãkuimbaʼére, ha umícha. Péro oĩrõ peteĩ oñeʼẽva Ñandejárare katu provávlemente enterovetéva opytáta okirirĩete.

Upéva ndeʼiséi katuete ndogueroviaiha Ñandejára oexistiha. Péro oiméne otĩ oñemongeta hag̃ua hese. Ikatu voi oĩ opensáva ndaigustoiha upéva.

¿Mbaʼépa nde repensa?

Ani rejepyʼapy ijetuʼúrõ ndéve reñemongeta Ñandejárare ne kompañerokuérandi. Ndaigústoi voínte ndaipórirõ ñanerenduséva, ha koʼýte oĩrõ oñembohorýva nderehe. Ha repredikárõ chupekuéra ikatu oiko upéva, péro ikatu avei nahániri. Ikatu voi nesorprende rehechávo heta ne kompañéro oñeporanduha: “¿Mbaʼére ivaiete la situasión? ¿Ikatúne piko okambia?”. Ikatu chupekuéra ifasilve oñemongeta koʼã témare peteĩ ijaveguándi, ha ndahaʼéi katuete peteĩ kakuaándi.

Ani rekyhyje reñemongeta hag̃ua hendivekuéra rrelihión rehe, natekotevẽi rejapo mbaʼeve omopensátava chupekuéra nde haʼeha peteĩ fanátiko, térã rekyhyjeterei rejavýrõ g̃uarã peteĩ mbaʼe erévape. Repredikaséramo ne kompañerokuérape ikatu ñambojoja reaprendeséramo rembopu peteĩ instruménto musikál. Primerorã ikatu  ijetuʼu, péro reñehaʼãramo katuete ifasilve ha osẽ porãvéta ohóvo ndéve. ¿Mbaʼépa rejapokuaa reñemongeta hag̃ua ne kompañerokuérandi?

Rejapokuaa heta mbaʼe ndahaʼéiva la hasyetereíva. Por ehémplo, ne kompañerokuéra oñemongetárõ peteĩ notísiare, ikatu ereko enkuénta mbaʼépa heʼi la Biblia upe témare ha ere chupekuéra mbaʼépa nde repensa hese. Térã opyta porãvérõ ndéve, remombeʼukuaa upe repensáva peteĩvapente. Heta ermáno ha ermána imitãva ojapo peteĩ mbaʼe ifasilvéntemava: omoĩ isílla ári peteĩ puvlikasión ojehecha hag̃ua, ha oĩrõ omañáva térã oporandúva hese oaprovecháma oñemongeta hag̃ua hendive.

¿Mbaʼépa retantease reñemongeta hag̃ua ne kompañerokuérandi? ․․․․․

¿Mbaʼépa rejapokuaa avei repredika hag̃ua ne kompañerokuérape?

․․․․․

Avei reaprovechakuaa repredika hag̃ua peteĩ téma ojestudiáva pe klásepe. Por ehémplo, oñeñeʼẽrõ pe evolusiónre, ¿mbaʼéichapa ikatu redefende pe kreasión?

Edefende umi mbaʼe regueroviáva pe kreasiónre

Ryan heʼi: “Che aaprende vaʼekue Ñandejára okrea hague  opa mbaʼe, péro peteĩ vuéltape che kompañerokuéra oñepyrũ oñeʼẽ pe evolusiónre, ha oñeʼẽ lájare hese haʼete voi siertoha la heʼíva hikuái”. Ha Raquel katu heʼi: “Akyhyjeterei kuri che profesóra heʼírõ guare roñeʼẽtaha pe evolusiónre. Oĩ ningo heta odiskutisetereíva ko téma, ha aikuaa kuri tekotevẽta hague aexplika enterovévape mbaʼépa che aguerovia”.

¿Mbaʼéicha reñeñandu oñeñeʼẽrõ pe evolusiónre nde klásepe? Nde reguerovia Ñandejára ojapo hague opa mbaʼe (Apocalipsis 4:11). Avei rehecha opa mbaʼe oĩva ñande jerére ohechaukaha oexistiha ñande Apohare ha iñaranduetereiha. Péro nde profesór ha heta lívro de siénsia heʼi oiko hague pe evolusión. Ikatu oime repensa haʼekuéra oikuaaha hetave mbaʼe ndehegui, ha upévare ndaikatumoʼãiha redefende la regueroviáva.

Ani rejepyʼapy, ndahaʼéi nde añónte la ndereaseptáiva pe evolusión. Oĩ heta estudiánte, profesór, ha sientífiko jepe ndoaseptáiva.

Péro rehechaukasérõ oexistiha ñande Apohare, reikuaa porã vaʼerã la Biblia omboʼéva ko témare. Ha upearã natekotevẽmoʼãi reexplika ni rediskuti umi mbaʼe la Biblia ndeʼíriva. ¿Mbaʼe mbaʼépa umíva? Jahechami unos kuánto ehémplo.

Heta lívro de siénsia heʼi ko yvy ha pe sistéma solár orekoha hetaiterei millones de áño. La Biblia ohechauka Ñandejára ojapo hague ko yvy ha pe univérso hetaiterei tiémpo oñepyrũ mboyve pe primer día haʼe okrea hague umi mbaʼe oĩva ko yvy ape  ári. Upéicharõ ikatu oime ko yvy ha pe sistéma solár oreko umi áño ojekalkuláva hese (Génesis 1:1).

Che profesór heʼi ko yvy ha umi mbaʼe oĩva ndaikatúi hague ojekrea 6 díapente. La Biblia moõve ndeʼíri umi 6 día odura hague 24 órante.

Pe klásepe rostudia oĩha ehémplo ohechaukáva umi animál ha ñande yvypóra ñakambiaʼimiha kon el tiémpo. La Biblia heʼi porã Ñandejára okrea hague opa mbaʼe “asegún ivarieda” (Génesis 1:20, 21). Oĩ ningo heta heʼíva opa mbaʼe oexistíva oevolusiona hague umi mbaʼe ndorekóivagui vída. Ha oĩ avei heʼíva Ñandejára okrea hague peteĩ sélula añónte, ha upe rire upévaguintema ouha entéro animál, plánta ha opa mbaʼe oikovéva. Péro jahechaháicha, la Biblia nomboʼéi upéva. Upéicharõ jepe, káda variedápe oike hína hetaiterei kláse de animál térã plánta, ha la Biblia ndeʼíri ndaikatuiha oiko mimi umi kámbio káda variedápe.

Erekórõ enkuénta umi mbaʼe jahecha vaʼekue, ¿mbaʼépa eréta nde profesór térã ne kompañerokuérape heʼírõ ndéve koʼã mbaʼe?

“Pe siénsia ohechauka oiko hague pe evolusión”. ․․․․․

 “Ndagueroviái Ñandejára oexistiha ndaikatúigui ahecha chupe”. ․․․․․

Ikatu reime segúro siertoha umi mbaʼe regueroviáva

Nde tuakuéra haʼérõ Testígo, katuete nemboʼe Ñandejára okrea hague opa mbaʼe. Péro rekakuaávo rehóvo tekotevẽ rentende porã mbaʼérepa reimekuaa segúro siertoha umi mbaʼe regueroviáva. Upearã jaadoráva guive Jehovápe jaipurúmante vaʼerã ‘ñane akã ha ñane pensamiénto’ (Romanos 12:1). Upévare, ejepyʼamongetákena ko porandúre: “¿Mbaʼére che aime segúro Ñandejára okrea hague opa mbaʼe?”. Sam, orekóva 14 áño ojapo upéva opensávo ñande retére. Haʼe heʼi: “Ñande rete oreko hetaiterei párte, ha chesorprendeterei mbaʼéichapa enterovéva ombaʼapo oñondive. ¡Ndaikatúi voínte jaju pe evolusióngui!”. Ha María orekóva 16 áño katu heʼi: “Che ningo che ruguy asuka, ha  ojeʼe guive chéve arekoha ko mbaʼasy, astudia heta mbaʼe aikuaaségui mbaʼéichapa ombaʼapo ñande rete. Ha heta mbaʼe chesorprendeterei. Por ehémplo, pe pánkreas haʼe peteĩ órgano ndatuicháiva oĩva ñande pyʼa atukupépe, péro iñimportanteterei ombaʼapo porã hag̃ua ñande ruguy ha umi ótro órgano jaguerekóva”.

Eskrivi koʼápe 3 mbaʼe ohechaukáva ndéve oexistiha ñande Apohare:

1. ․․․․․

2. ․․․․․

3. ․․․․․

Jahechaháicha, natekotevẽi reñeñandu vai ni retĩ regueroviágui Ñandejára okrea hague opa mbaʼe. Añetehápe, oĩva guive ñande jerére ohechauka oĩha peteĩ persóna iñaranduetereíva ñandeapo vaʼekue.

Añetehápe umi ogueroviáva pe evolusión la ipyʼaguasúva ojerovia hag̃ua peteĩ mbaʼe ndaikatúivare oñekomprova. Haʼete heʼíva peteĩ milágro tuichaitereíva oiko hague ijeheguínte. Repensa porã ha rejepyʼamongetárõ ko témare, reiméta trankílo ha segúro otoka vove ndéve edefende nde jerovia.

MBAʼÉPA JAHECHÁTA PE ÓTRO KAPÍTULOPE

Oĩ heta nde avegua ojevautisámava, ¿ndépa reĩma preparádo upearã?

TÉXTO OĨVA LA BÍBLIAPE

“Chéngo natĩri amombeʼu hag̃ua umi notísia porã. Ñandejára ohechauka ipodér umi notísia porã rupive, ha koʼã notísia ikatu osalva enterove persóna ojeroviávape” (Romanos 1:16).

PETEĨ KONSÉHO

Repredikáta jave ne kompañerokuérape ojekuaa vaʼerã reimeha segúro umi mbaʼe regueroviávare. Ojehecháramo retĩ lentoha, katuete oñembohorýta nderehe. Haʼekuéra heʼi jave peteĩ mbaʼe ndéve oiméne ojekuaa oĩha segúro la heʼívare, nde avei rejapóramo upéicha, katuete nderrespetáta hikuái.

¿REIKUAÁPA RAʼE?

Ojejerure jave umi profesórpe toexplika mbaʼére oguerovia pe evolusión, ndoikuaái jepi mbaʼéicha ojapóta upéva. Upépe ohechakuaa hikuái oguerovia hague peteĩ mbaʼe oñemboʼéva chupekuéra okomprovaʼỹre siértopa.

UMI MBAʼE AJAPÓTAVA

¿Mbaʼépa ikatu ajapo añepyrũ hag̃ua añemongeta peteĩ che kompañérondi la Bíbliare? ․․․․․

¿Mbaʼépa ikatu haʼe oñeporandúramo chéve mbaʼérepa aguerovia ñande Apohare oexistiha? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa iñimportánte remombeʼu ótrope umi mbaʼe regueroviáva?

● ¿Mbaʼéichapa ikatu reexplika ne kompañéro térã profesorkuérape mbaʼérepa reguerovia oexistiha ñande Apohare?

● ¿Mbaʼéichapa ikatu rehechauka reagradeseha ñande Apoharépe opaite mbaʼére? (Hechos 17:26, 27).

[Komentário oĩva páhina 299-pe]

“Pe eskuéla ha koléhio ningo haʼe peteĩ território ñande añoite ikatúva japredika” (Iraida).

[Taʼanga oĩva páhina 298-pe]

Repredikávo ne kompañerokuérape haʼete hína reaprendéva rembopu peteĩ instruménto musikál, amáske repraktika osẽ porãvéta ndéve

[Taʼanga oĩva páhina 300 ha 301-pe]

Nde ikatu ndepyʼaguasu ha redefende umi mbaʼe regueroviáva