Kgaolo 36

Nka Emela Bjang go Dumela ga ka go Modimo?

Ke’ng seo gantši se ka go thibelago go boledišana le motho yo o tsenago le yena ka klaseng ka tumelo ya gago?

□ Go se tsebe Beibele gabotse

□ Go boifa go kwerwa

□ Go se tsebe kamoo nka thomago poledišano

Ke mokgwa ofe wa go bolela ka tumelo ya gago woo o naga-nago gore o ka ba bonolo kudu?

□ Go boledišana le morutwana yo a itšego re lebantše difahlego

□ Go bolela ka pele ga klase ka moka

□ Go ngwala taodišo ka ditumelo tša ka tšeo di theilwego Beibeleng

Ngwala leina la morutwana yo o naganago gore a ka theetša ge o boledišana le yena ka Beibele ge e ba o be o tseba kamoo o ka rotošago taba.

 GA GO pelaelo gore barutwana ba bantši bao o tsenago le bona sekolo ga ba rate go bolela ka Modimo. Ge o ka bolela ka selo le ge e le sefe—dipapadi, diaparo goba batho ba bong bjo bo fapanego—o tla ba o ba gokile. Eupša ge o ka bolela ka Modimo, kapejana go ka ba le setu.

Ga se gore dithaka tša gago ga di dumele go Modimo; ge e le gabotse bafsa ba bantši ba dumela go yena. Eupša ba bangwe ba lešwa dihlong ke go bolela ka taba ye. Ba ka nagana gore: ‘E a tšwafiša.’

Go Thwe’ng ka Wena?

Go a kwagala ge e ba o dikadika go bolela ka Modimo le bao o tsenago le bona sekolo. Ga go na motho yo a ratago go se amogelwe, le gona go kwerwa go bohloko le go feta! Na seo se ka direga ge e ba o ka bolela ka tumelo ya gago? Ee, se ka direga. Ka lehlakoreng le lengwe, dithaka tša gago di ka go makatša. Tše dintši tša tšona di tsomana le dikarabo tša dipotšišo tše bjalo ka tše: Lefase le le lebile kae? Gona ke ka baka la’ng le tletše mathata gakaakaa? Mohlomongwe dithaka tša gago di ka rata go bolela ka ditaba tšeo le thaka ya tšona go e na le go bolela le motho yo mogolo.

Lega go le bjalo, go bolela le dithaka tša gago ka bodumedi go ka bonagala go le thata kudu. Eupša ga go nyakege gore o bonagale eka o fišega kudu goba gore o tshwenyege ka go bolela dilo  tšeo di tlogago di nepagetše. Go bolela ka tumelo ya gago go nyakile go swana le go letša seletšo se itšego sa mmino. Mathomong go thata. Eupša ge o dutše o itlwaetša go ba bonolo gomme o tla kgona go se letša. Lega go le bjalo, o ka thoma bjang poledišano?

Gantši o ka thoma ka selo seo go lego bonolo go bolela ka sona. Ka mohlala, mohlomongwe ge sekolong go bolelwa ka taba yeo e sa tšwago go direga, wena o ka bolela pono ya Mangwalo ka taba yeo. Goba o ka leka go bolela le morutwana o tee feela yoo o tsenago le yena ka klaseng. Bafsa ba bangwe ba Bakriste ba ile ba fo bea kgatišo yeo e theilwego Beibeleng tesekeng ya bona go bona ge e ba e ka tanya kgahlego ya barutwana ba bangwe, e lego mokgwa o mongwe wo o lego bonolo le go feta. Gantši mokgwa wo o a šoma gomme mafelelong go ba le poledišano.

Ke mokgwa ofe go yeo e lego ka mo godimo wo o ka o lekago? ․․․․․

Na o ka nagana ka tsela e nngwe yeo ka yona o ka bolelago ka tumelo ya gago le morutwana yo o tsenago le yena ka klaseng? Ge e ba go le bjalo, e ngwale ka mo tlase.

․․․․․

Ka dinako tše dingwe mošomo wa sekolo o go nea sebaka sa gore o nee bohlatse ka tumelo ya gago. Ka mohlala, o ka dira’ng ge go ahlaahlwa thuto ya tlhagelelo ka klaseng? O ka emela bjang go dumela ga gago tlholong?

 Go Emela Taba ya Tlholo

Mofsa yo a bitšwago Ryan o re: “Ge go be go ahlaahlwa thuto ya tlhagelelo ka klaseng, e be e fapane le dilo ka moka tšeo ke di rutilwego. E be e bolelwa eka ke taba yeo e nago le bohlatse gomme ke ile ka hwetša seo se mpoifiša.” Ngwanenyana yo a bitšwago Raquel o bolela se se swanago. O re: “Ke ile ka tšhoga kudu ge morutiši wa ka wa dithuto tša leago a be a re nakong e tlago re tlo ithuta ka tlhagelelo. Ke be ke tseba gore ke swanetše go tlo hlalosa ka klaseng gore nna ke eme kae tabeng ye yeo go ngangišanwago ka yona.”

Wena o ikwa bjang ge go rotoga thuto ya tlhagelelo ka klaseng? O dumela gore Modimo “o bopile dilo ka moka.” (Kutollo 4:11) Gohle o bona bohlatse bja gore dilo di bopilwe ka bohlale. Eupša dipuku tša sekolo di re bophelo bo bile gona ka mohlolo, le morutiši wa gago o bolela bjalo. O ka ipotšiša gore: Ke nna mang moo nka ngangišanago le batho bao go thwego ke ditsebi?

Kgonthišega gore ga se wena o nnoši yo a sa dumelego thutong ya tlhagelelo. Therešo ke gore gaešita le borathutamahlale ba bangwe ga ba dumele go yona. Le gona barutiši ba bantši le barutwana le bona ga ba e dumele.

Lega go le bjalo, e le gore o emele go dumela ga gago tlholong, o swanetše go tseba seo ge e le gabotse Beibele e se rutago ka taba ye. Ga go hlokagale gore o ngangišane le batho ba bangwe  ka dilo tšeo Beibele e sa bolelego ka tšona ka go lebanya. Ela hloko mehlala e sego kae.

Puku ya ka ya thutamahlale e re lefase, letšatši le dipolanete tšeo di le dikologilego di be di dutše di le gona ka nywaga e dibilione. Beibele e re lefase le legohle ka moka di bile gona pele ga letšatši la pele la tlholo. Ka go re’alo, go ka direga gore lefase, letšatši le dipolanete tšeo di le dikologilego di be di dutše di le gona ka nywaga e dibilione.—Genesi 1:1.

Morutiši wa ka o re ga go kgonege gore lefase le hlodilwe ka matšatši a tshelelago feela. Beibele ga e re botše gore matšatši a tshelelago a tlholo e be e le matšatši a kgonthe a diiri tše 24.

Ka klaseng ya rena re ahlaahlile mehlala e mmalwa ya diphetogo tšeo di diragetšego diphoofolong le bathong ge nako e dutše e tšwela pele. Beibele e re Modimo o bopile diphedi “go ya ka mehuta ya tšona.” (Genesi 1:20, 21) Ga e thekge taba ya gore bophelo bo tšweletše dilong tše di sa phelego goba gore Modimo o thomile mogato wa tlhagelelo ka sele e tee feela. Lega go le bjalo, “mohuta” o mongwe le o mongwe wa diphedi o ka tšweletša diphedi tše di fapafapanego. Ka gona Beibele e dumelelana le taba ya gore go ka ba le phetogo ‘mohuteng’ o mongwe le o mongwe wa diphedi.

Ge o lebelela seo se ahlaahlilwego kgaolong ye, o ka araba  bjang ge e ba morutiši goba morutwana yo o tsenago le yena ka klaseng a ka re:

“Thutamahlale e hlatsetše gore re bile gona ka baka la tlhagelelo.” ․․․․․

“Ga ke dumele go Modimo ka gobane ga ke mmone.” ․․․․․

Kgodišega ka Ditumelo tša Gago!

Ge e ba o godišwa ke batswadi ba Bakriste, o ka dumela tabeng ya tlholo feela ka gobane o rutilwe seo. Lega go le bjalo, ka ge bjale o gola, o nyaka go rapela Modimo ‘ka matla a gago a tlhaologanyo,’ o be le motheo o tiilego wa seo o se dumelago. (Baroma 12:1) Ka baka leo, ipotšiše gore: ‘Ke’ng seo se nkgodišago gore go na le Mmopi?’ Sam wa nywaga e 14 o lebeledišiša mmele wa motho. O re: “O na le dilo ka moka e bile o raragane kudu gomme ditho tša wona ka moka di dirišana gabotse. Ga go kgonege  gore mmele wa motho o bile gona ka mohlolo!” Holly wa nywaga e 16 o dumelelana le seo. O re: “Ga e sa le go tloga ge ke hwetša gore ke na le bolwetši bja swikiri, ke ithutile mo gontši mabapi le kamoo mmele o šomago ka gona. Ka mohlala, go a makatša kamoo pancreas—setho se senyenyane seo se lego ka morago ga mala—e dirago mošomo o mogolo kudu wa gore madi le ditho tše dingwe di šome.”

Ka mo tlase, ngwala dilo tše tharo tšeo di go kgodišago gore go na le Mmopi.

1. ․․․․․

2. ․․․․․

3. ․․․․․

Ga go na lebaka la gore o ikwe o sa lokologa goba o lewa ke dihlong ka gobane o dumela go Modimo le tlholong. Ge re lebelela bohlatse, e tloga e le mo go kwagalago go dumela gore rena batho re bopilwe ka tsela e bohlale.

Mafelelong, ge e le gabotse ke tlhagelelo yeo e nyakago tumelo e kgolo, e sego tlholo—go ba gona, tlhagelelo e nyaka gore o dumele mehlolo yeo e se nago modiri wa yona! Ge o šetše o naganišišitše ka taba ye o diriša matla a gago a tlhaologanyo, o tla ikwa o ikholofela kutšwanyana go ka emela go dumela ga gago go Modimo.

KGAOLONG YA RENA YEO E LATELAGO

O bona tše dingwe tša dithaka tša gago di kolobetšwa. Na o loketše go gata mogato woo?

KEY SCRIPTURE

“Ga ke hlabišwe dihlong ke ditaba tše dibotse; ge e le gabotse, ditaba tše tše dibotse ke tsela e matla ya Modimo ya go phološa yo mongwe le yo mongwe yo a nago le tumelo.”—Baroma 1:16.

KELETŠO

Hlokomela tsela yeo o itshwarago ka yona ge o bolela ka ditumelo tša gago. Ge e ba o bonagala o lewa ke dihlong, o ka ikgokela go kwerwa ke dithaka tša gago. Eupša ge e ba o bolela ka kgodišego—go fo swana le kamoo bao o tsenago le bona sekolo ba tlago go bolela ka gona ka dipono tša bona—go na le kgonagalo e kgolo ya gore ba go hlomphe.

NA O BE O TSEBA . . . ?

Ka dinako tše dingwe ge barutiši ba kgopelwa gore ba nee bohlatse bja gore dilo di bile gona ka tlhagelelo, ba hwetša gore ga ba kgone go dira bjalo, ke moka ya ba gona ba lemogago gore ba amogela thuto yeo feela ka gobane ba rutilwe seo.

KGATO YEO KE TLAGO GO E TŠEA!

E le gore ke thome go boledišana ka Beibele le morutwana yo ke tsenago le yena ka klaseng, nka ․․․․․

Ge e ba ke botšišwa gore ke ka baka la eng ke dumela go Mmopi, ke tla re ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng go le bohlokwa go bolela le ba bangwe ka seo o se dumelago?

● Ke ditsela dife tše dingwe tšeo di ka go nolofaletšago go bolela ka go dumela ga gago tabeng ya tlholo sekolong?

● O ka bontšha bjang gore o leboga Yo a bopilego dilo ka moka?—Ditiro 17:26, 27.

[Ntlhakgolo go letlakala 299]

“Sekolo ke tšhemo yeo e lego rena feela re ka e fihlelelago.’’—Iraida

[Seswantšho go letlakala 298]

Go swana le go letša seletšo se itšego sa mmino, go bolela ka tumelo ya gago go nyaka bokgoni—ka go itlwaetša o tla ba le bokgoni

[Seswantšho go letlakala 300, 301]

O ka fenya go boifa go emela ditumelo tša gago