Tuakuérape g̃uarã:

Umi mitãrusu ha mitãkuñáme heta vése ijetuʼu umi mbaʼe ohasáva oĩ rupi heta mbaʼe ndoikuaáiva ha omongyhyjéva chupekuéra. Haʼete oipurúva hikuái peteĩ puénte poʼimínte okrusa hag̃ua peteĩ arrójo ipypukúva. Katuete hiʼãiterei peẽme peipytyvõ pene familiakuérape pono ijetuʼueterei chupekuéra ko etápa. Ha ndaikatúirõ jepe peipeʼaite chuguikuéra umi provléma ombohováiva, peipytyvõkuaa chupekuéra pono ojedesespera ha hoʼa pe puéntegui. Peẽ tuakuéra peipytyvõkuaa pene famíliape okakuaa ha osẽ porã hag̃ua, ndaipóri ótro ojapo porãvétava upéva pendehegui.

Heta vése ifásil jaʼe peteĩ mbaʼe, péro ijetuʼueterei la jajapo. Oiméne nemanduʼa nde raʼy térã ne membykuimbaʼe michĩvérõ guare oikómi hague pérupi ohuga ha iñeʼẽngatu. Péro pyaʼe ohasa la tiémpo, koʼág̃a haʼete voi ni noñeʼẽséiva penendive. Oiméne nemanduʼa avei nde rajy térã ne membykuña michĩrõ guare siémpre ohómi hague penendive opárupi, péro koʼág̃a tuichave rire haʼete ndoipotavéima ni ojehecha chupe ituakuérandi.

Péro ani pepensa ndaikatumoʼãiha peipytyvõ chupekuéra. ¿Mbaʼére? Pórke Ñandejára Ñeʼẽme petopáta umi konsého iporãvéva oĩva peẽ tuakuérape g̃uarã, ha pene familiakuérape g̃uarã.

Ko lívro oipuru la Biblia ikatu hag̃uáicha omopensa umi mitãrusu ha mitãkuñáme, ha remañárõ pe índise oĩvare páhina 4 ha 5-pe rehecháta umi téma oñeanalisáva pype. Péro ko lívro ndahaʼéi orekónteva informasión, síno ojeprepara voi oipytyvõ porã hag̃uáicha chupekuéra. Jahechamína mbaʼe mbaʼépa oreko.

1) Ojeprepara umi mitãrusu ha mitãkuña oskrivi hag̃ua pype umi mbaʼe opensáva. Por ehémplo, pe rrekuádro hérava “Ne kompañerokuéra ndejopýramo”, oĩva páhina 132 ha 133-pe, oipytyvõta chupekuéra opensa hag̃ua mbaʼépa ikatu oñepresenta chupekuéra eskuéla térã koléhiope, ha mbaʼéichapa orreaksionáta hikuái. Ko lívro oreko 9 seksión, ha opakuévo káda uno oĩ peteĩ párte hérava “Rejepyʼamongeta hag̃ua”.  Upépe oskrivikuaa mbaʼépa opensa ha oñandu umi mbaʼe oñehesaʼỹijo vaʼekuére pe seksiónpe.

2) Omokyreʼỹ umi mitãrusu ha mitãkuñáme oñemongeta hag̃ua ituakuérandi. Por ehémplo, páhina 63 ha 64-pe oĩ pe rrekuádro hérava “¿Mbaʼéichapa ikatu añeʼẽ che tuakuérandi pe séxore?”. Ha opakuévo umi kapítulo oĩ peteĩ rrekuádro hérava “¿Ndépa mbaʼe ere?”. Ko rrekuádro ndahaʼéi peteĩ rrepásonte, upéva rangue, peipurukuaa pe informasión peñemongeta hag̃ua pene familiakuérandi. Káda kapítulo oreko avei peteĩ párte hérava “Umi mbaʼe ajapótava”, ha pe último porandu oĩva upépe heʼi: “¿Mbaʼépa aporanduse che túa térã che sýpe ko témare?”. Upéva omokyreʼỹ umi mitãrusu ha mitãkuñáme ojerure hag̃ua konsého ituakuérape.

Péro penemanduʼákena: peipotárõ pene familiakuéra oskrivi umi mbaʼe añetehápe opensa ha oñandúva, ndovaléi pehecha térã pelee chuguikuéra umíva. Péicha pehechaukárõ perrespetaha chupekuéra, upéi haʼekuéra voi omombeʼúta peẽme mbaʼépa opensa.

Iporãta peẽ voi ikatúrõ pereko avei pende lívro ha pestudia porã. Pejapo aja upéva, penemanduʼákena mbaʼeichaitépa ijetuʼu vaʼekue avei peẽme heta mbaʼe penemitãrõ guare. Opyta porã jave, ikatu pemombeʼu pene familiakuérape umi mbaʼe pehasa ha pendepyʼapy vaʼekue, upéva tuicha oipytyvõta chupekuéra ojeroviave hag̃ua penderehe. ¡Pejapysaka porãkena hesekuéra omombeʼu jave peẽme oimeraẽ mbaʼe! Ha sapyʼánte ndaikatúirõ peñemongeta hendivekuéra peñehaʼãvéramo jepe, aníkena peñentrega. Haʼetérõ jepe napenerenduséiva, normálmente umi mitãrusu ha mitãkuñáre opokoitereive peteĩ mbaʼe heʼíva chupekuéra ituakuéra, ha ndahaʼéi umi ijavegua.

Oréve g̃uarã haʼe peteĩ priviléhio romeʼẽ peẽme ha pene familiakuérape ko lívro orekóva konsého bíblico iporãitéva. Hiʼãiterei ideprovécho peẽme, ha rojerure voi taupéicha ore ñemboʼépe.

Umi oskrivi vaʼekue ko lívro