Para Kadagiti Nagannak

Para kadagiti agtutubo, ti panagbaro wenno panagbalasang ket mayarig iti panagtalaytay iti nairteng a tali. Kasla saan a sigurado ken nakaam-amak pay ketdi ti tunggal addang. Kas nagannak, mabalin a kayatyo no dadduma nga ilisi dagiti annakyo iti daytoy a partikular a kita ti “panagtalaytay.” Siempre, saanyo a maaramid dayta, ngem kabaelanyo ti agserbi kas pannakatekkenda. Dakayo ti ad-adda a makatulong kadagiti annakyo nga agtalinaed iti umiso a dana tapno dumakkelda kas responsable nga adulto.

Naglaka nga ibaga ngem kasla nagrigat nga aramiden, saan kadi? Wen. Kasla idi laeng kalman a nakagargarawigaw ken naglaing a sumao ti anakyo a lalaki ngem ita, nakaul-ulimeken ken saannan a kayat ti makisarita kadakayo. Dayta la kumarkarayo ti ar-aramiden idi ti anakyo a babai, ngem ita, ibainnan ti makikuyog kadakayo iti publiko!

Ngem saanyo koma a panunoten a diyo a kabaelan a sanguen dagitoy a panagbalbaliw. Nalakayo la a magun-odan ti sirib a makaipaay iti natibker a giya agpaay kadakayo ken iti anakyo. Ti gubuayan dayta a sirib ket ti Sao ti Dios, ti Biblia.

Ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo, Tomo 2 ket nairanta a tumulong iti anakyo a makirinnason manipud iti Kasuratan. Kitaenyo Dagiti Linaonna iti panid 4 ken 5 tapno adda pamalatpatanyo maipapan kadagiti nagduduma a topiko a nailawlawag iti daytoy a libro. Ngem daytoy a publikasion ket saan laeng a basta mangidatag iti impormasion. Usigenyo dagiti sumaganad:

(1) Daytoy a libro iramanna ti agbasbasa. Iti intero a libro, adda gundaway ti anakyo a mangisurat kadagiti sungbatna kadagiti nagduduma a saludsod ken sasao. Kas pagarigan, ti “Dagiti Aramidek no Pilitendak Dagiti Kapatadak” iti panid 132 ken 133 tulonganna ti anakyo a mangpanunot kadagiti espesipiko a karit a pakaipaspasanguanna ken no kasanona a sarangten dagita. Malaksid iti dayta, ti tunggal maysa kadagiti  siam a benneg daytoy a libro ket agngudo iti panid a napauluan iti “Ti Notak,” a pangisuratan ti anakyo iti personal a kapanunotan ken riknana maipapan iti impormasion a linaon dagita a benneg.

(2) Ti libro iparegtana ti komunikasion. Kas pagarigan, ti panid 63 ken 64 ket naglaon iti kahon a “Kasanoak a Makisarita Kada Tatang ken Nanang Maipapan iti Sekso?” Kasta met nga iti ngudo ti tunggal kapitulo, adda kahon a napauluan iti “Ania ti Makunam?” Daytoy a kahon ket saan laeng a mausar kas pangrepaso no di ket kas pakaibatayan ti panagsasarita kas pamilia. Malaksid iti dayta, naglaon ti tunggal kapitulo iti “Dagiti Aramidek!” a ti maudi a bennegna ket mangkidkiddaw kadagiti agtutubo a kompletuenda daytoy a sentensia: “Ti kayatko a saludsoden kadagiti dadakkelko maipapan iti daytoy a banag ket . . .” Daytoy ti tumulong kadagiti agtutubo a dumawat kadagiti dadakkelda iti nainsiriban a balakad bayat a talaytayenda ti nairteng a tali ti panagbaro wenno panagbalasang.

Balakad: Saanyo a bibiangan ti libro dagiti agtutubo nga annakyo tapno saanda nga agbain a mangisurat iti pudpudno a karirikna ken kapanunotanda. Inton agangay, mabalin nga ibagadanto met laeng kadakayo ti maipapan kadagiti insuratda.

Mangalakayo iti bukodyo a kopia daytoy a libro ket kabesaduenyo. Bayat a basbasaenyo, ikagumaanyo a lagipen ti dadduma kadagiti parikut, pannakatikaw, ken pakaringgoranyo idi agtutubokayo pay. No maitutop, estoriaenyo iti anakyo dagiti kapadasanyo tapno maparegtada nga agestoria met kadakayo. Dumngegkayo no makisaritada kadakayo! Saankayo a sumuko no kasla awan serserbi ti panangikagumaanyo a makikomunikar. Uray no kasla saanda a mangikaskaso, ad-adda nga ipateg dagiti annak ti balakad dagiti nagannak kadakuada ngem ti balakad dagiti kapatadada.

Pagragsakanmi nga ipaay kadakayo ken kadagiti annakyo daytoy a publikasion a naibatay iti Biblia, ken ikarkararagmi a makagunggona koma daytoy iti pamiliayo.

Dagiti Nangipablaak