1, 2. Сен нени тудадыҥ ла канайып тудуп јатканыҥ нениҥ учун јаан учурлу болот?

СЕН баш кӧдӱрбестеҥ тура тудуп јадыҥ. Тудуп баштаганыҥнаҥ бери канча да кире ӧй ӧдӧ берген, је бу ижиҥ оноҥ до ары улалар. Бу иш кӱч, је сен оны јакшызынып эдедиҥ. Нениҥ учун дезе бу ишти канайып бӱдӱргениҥнеҥ бастыра јӱрӱмиҥ камаанду, оныҥ учун колыҥды бош салып, јайымжыырга да сананбай јадыҥ. Нениҥ учун? Нениҥ учун дезе тудулып јаткан тура — сен бойыҥ болодыҥ!

² Иисустыҥ ӱренчиги Иуда, бойысты тӱзединетенине јаан ајару эткен. Ол христиандарды бойлорын Кудайдыҥ сӱӱжинде чеберлезин деп кӱӱнзедип турарда, оны канайып эдерин база айдып салган: «Агару бӱдӱмјигерди тыҥыдыгар» (Иуданыҥ самаразы 20, 21). Кудайдыҥ сӱӱжинде артарга, сен бойыҥды ла бойыҥныҥ бӱдериҥди канайып тыҥыдарыҥ? Кӧгӱс јанысты тыҥыдатан ӱч эп-арганы кӧрӱп ийеектер.

3—5. а) Сатана сени Иегованыҥ некелтелери керегинде кандый јастыра кӧрӱмдӱ болзын деп албаданат? б) Бис Кудайдыҥ некелтелерине кандый кӧрӱмдӱ болор учурлу ла мынаҥ улам бисте кандый сезимдер болор керек? Тем куучындап беригер.

³ Озо ло баштап бис Кудайдыҥ јасагына бӱдӱп турганысты тыҥыдар учурлу. Бу бичикти ӱренип тура,  бистиҥ кылык-јаҥысты тӱзедетен Иегованыҥ чындык некелтелерин кӧргӧҥ. Бу некелтелерге сениҥ кӧрӱмиҥ кандый? Сатана сени тӧгӱндеп, Иегованыҥ јасактары, принциптери ле нормалары ӧйинеҥ ӧткӱре кату ла кӱч деп сананарына кӱӱнзедет. Ол бу эп-аргала Эдем садтаҥ бери једимдӱ тузаланып јат (Башталганы 3:1—6). Эмди ол сени де тӧгӱндеп болор бо? Кӧп неме сениҥ кӧрӱмиҥнеҥ камаанду.

⁴ Темдектезе, сен сӱреен јараш јерде амырап јӱргеҥ, је оноҥ бийик чеденди кӧрӱп ийдиҥ. Чеденниҥ ары јанында оноҥ јараш јерлерди кӧрӱп, ары барарга кӱӱнзейдиҥ. Је бу чеден сеге јайым јӱрерге чаптык эдип турган деп сананадыҥ. Кенетийин, јазап кӧрӧриҥде, чеденниҥ ары јанында бойыныҥ јемине ӧҥӧлӧп келеткен казыр каракула јӱрӱ! Бу чеден сени корулап турган деп, сен эмди оҥдоп јадыҥ. А сени казыр каракула истежип турган ба? Кудайдыҥ Сӧзи: «Эрӱӱл, сергек болыгар! Слердиҥ ӧштӱгер, кӧрмӧс, кемди јуда салайын деп бедиреп, ыркыранган каракула чылап базып јӱрӱ» — деп, биске озодоҥ айдат (Петрдыҥ 1-кы самаразы 5:8).

⁵ Сатана — казыр каракула. Оныҥ учун Иегова бисти Сатанага јем болуп калбазын деп, оныҥ куурмакту керектеринеҥ корулап турган јасактар берген (Ефестегилерге 6:11). Кудайдыҥ јасактарын кажы ла шӱӱп сананган ӧйдӧ, бис олордоҥ теҥеридеги Адабыстыҥ сӱӱжин кӧрӧргӧ албаданар учурлу. Бис андый кӧрӱмдӱ болзоос, Кудайдыҥ јасактары бисти корулаар ла сӱӱнчи экелер. «Кем јайым берип турган сыраҥай јакшы јасакты оҥдоп аларга кичеенип, ондо болуп јӱрзе... бойыныҥ керегинде кежиктӱ болор» — деп, Иаков бичиген (Иаковтыҥ самаразы 1:25).

6. Кудайдыҥ чындык јасактарына ла принциптерине бӱдӱп турганысты тыҥыдатан кандый эп-арга эҥ јакшы? Тем куучындап беригер.

⁶ Кудайдыҥ јакылталарыла јӱрери — Јасакбереечиге ле Оныҥ ойгор јасактарына бӱдӱп турганысты  тыҥыдатан эҥ јакшы эп-арга. Темдектезе, «Христостыҥ Јасагы» бисти Иисустыҥ «јакарганыныҥ ончозын бӱдӱрерге» улусты ӱретсин деп јакарат (Галаттарга 6:2; Матфей 28:19, 20). Анайда ок христиандар Кудайга бажырарга ла кӱӱн кӧдӱретен куучынга јуулышсын дегенин кыйалта јогынаҥ бӱдӱредилер (Еврейлерге 10:24, 25). Кудайдыҥ база бир јакылтазы — Иеговага јаантайын акту јӱректеҥ мӱргӱӱри (Матфей 6:5—8; 1 Фессалоникадагыларга 5:17). Бис бу јакылталарды бӱдӱрип турзаас, олордоҥ Кудайдыҥ сӱӱжин там ла јарт кӧрӱп јадыс. Олор биске, бу шакпыртту телекейдеҥ качан да таппайтан, сӱӱнчини ле токуналды берет. Кудайдыҥ јасактарын бӱдӱргенистеҥ улам кандый туза болуп турганын шӱӱп сананзаҥ, бӱдӱп турганыҥ там тыҥыыр эмес пе?

7, 8. Кудайдыҥ јасактарыла бастыра јӱрӱмине јӱрерге кӱч болор деп санааркап тургандарды Кудайдыҥ сӧзи канайып бӱдӱмјилейт?

⁷ Кезик улус бастыра јӱрӱмине Иегованыҥ јасактарыла јӱрӱп болбос деп санааркайдылар. Сен база анайып сананып турган болзоҥ, бу сӧстӧрди ундыбай јӱр: «Мен Иегова, — сениҥ Кудайыҥ. Мен сени тузалу немеге ӱредип, баратан чын јолло апарып јадым. Је сен мениҥ јасактарымды лаптап уккан болзоҥ! Ол тушта сениҥ  амырыҥ агын суудый болор, чындыгыҥ талайдыҥ толкуларындый болор эди» (Исаия 48:17, 18). Бу сӧстӧр сеге неде бӱдӱмјилӱ болорго болужат деп санангаҥ ба?

⁸ Бу ӱлгерде Иеговага сӧсуккур болгоны тузалу болот деп кӧргӱзилип јат. Иегова, бу јакаруны бӱдӱрзебис, бисти эки алкыш сакыйт деп бӱдӱмјилейт. Баштапкызы, бистиҥ амырыс агыны тӱгенбес јаан, тымык суудый болор. Экинчизи, бистиҥ чындыгыс талайдыҥ толкуларындый болор. Сен талайдыҥ јарадында туруп, толкулардыҥ ээчий-деечий келип турганын кӧрӱп јадыҥ. Олор качан бирде келбей барар деп сананбай да турган болорыҥ. Толкулар јаантайын јаратка келип согулар. Сениҥ чындыгыҥ — чын јӱрерге албаданып турганыҥ — мындый толкулардый ок болор аргалу деп, Иегова бӱдӱмјилейт. Сен Иеговага чындык болзоҥ, Ол сеге јаантайын болужар. (Сарын 55:22 кычыр.) Бу сӧстӧр Кудайга ла Оныҥ чындык некелтелерине бӱдӱп турганыҥды тыҥыдар эмес пе?

9, 10. а) Нениҥ учун кажы ла христиан кижи тереҥ кӧгӱстӱ болорго амадайт? б) Сӱӱнчилӱ болорго, кӧгӱс кӧрӱм канайып болужат?

⁹ Кӧгӱс јанысты тыҥыдатан база бир эп-арга бу сӧстӧрдӧ бичилип калган: «Тереҥ кӧгӱстӱ болорго јӱткӱйли» (Еврейлерге 6:1, ЈТ). Тереҥ кӧгӱсту болоры — кажы ла христиан кижиниҥ сӱреен јакшы амадузы болот. Улус эм тургуза толо кемине једип болбос, је тереҥ кӧгӱстӱ болор аргалу. Анайып, кӧгӱзи тыҥыган сайын христиандар Иеговага иштееринде јаан сӱӱнчи аладылар. Нениҥ учун?

¹⁰ Тереҥ кӧгӱстӱ кижи ӱзе немеге Иегованыҥ кӧзиле кӧрӧт (Иоанн 4:23). Павел: «Эт-канга башкартып јӱрген улус эт-канныҥ кӱӱнин бӱдӱрейин деп, Тынга башкартып јӱрген улус Тынныҥ кӱӱнин бӱдӱрейин деп, сананып јадылар» — деп бичиген (Римдегилерге 8:5). Эт-канныҥ кӱӱнин бӱдӱрип јӱргендер јаан сӱӱнчи албай јат,  нениҥ учун дезе олор јаҥыс бойын сананат, немени озодоҥ сананбай јат ла јаҥыс ла акча-јӧӧжӧгӧ тартылат. Је тынга башкартып јӱрген улус сӱӱнчилӱ јӱрет, нениҥ учун дезе олор «алкышту [ырысту, ЈТ] Кудайдыҥ» табын бӱдӱрет (1 Тимофейге 1:11). Кӧгӱзи тереҥ кижи Иеговага јараарга кӱӱнзейт ле ченелтелерде де сӱӱнчизин јылыйтпай јат. Нениҥ учун дезе ченелтелерде, Сатана — тӧгӱнчи деп кӧргӱзетен ле јек јок болуп артатан арга ачылат, анайып теҥеридеги Адабыс сӱӱнет (Укаа сӧстӧр 27:11; Иаковтыҥ самаразы 1:2, 3 кычыр).

11, 12. а) Павел христиан кижиниҥ «јакшыны јаманнаҥ ылгаштырар аргазы» керегинде нени айткан ла бу сӧстӧрди канайып кӧчӱрерге јараар? б) Бистиҥ эди-каныс канайып тазыктырынып јат?

¹¹ Тереҥ кӧгӱстӱ болорго, сӱрлеп айтса, тазыктырынар керек. Мындый ӱлгер кӧрӱп ийеек: «Кату курсак дезе толо кемдӱ [кӧгӱзи тереҥ, ЈТ] улуска учурлалган. Олор ченемелдӱ болуп, јакшыны јаманнаҥ ылгаштырар аргалу» (Еврейлерге 5:14). Павел кӧгӱзи тереҥ христиандар јакшыны јаманнаҥ «ылгаштырар аргалу» деп айдып тура, грек сӧс тузаланган. Бу грек сӧс б. э. озо I чакта Грецияныҥ тазыктырынатан залдарында телкем тузаланылган болор, анайда ок бу сӧсти «гимнаст чылап тазыктырынган» деп кӧчӱрерге јараар. Је эмди мынайып тазыктырынып аларга нени эдерин кӧрӱп ийеектер.

¹² Энедеҥ чыкканда, бистиҥ эди-каныс неге де тазыктырынбаган болот. Темдектезе, јаш бала колы-будын тудуп билбес. Оныҥ учун ол кезикте колдорыла бойыныҥ јӱзине согунып, чочый берердеҥ айабас. Је чыдаган сайын ол арайынаҥ тазыктырынып баштайт. Озо баштап ол эҥмектеп јӱрет, оноҥ базып ла јӱгӱрип баштайт *. Је гимнаст керегинде нени айдарга јараар? Гимнаст  бийик калып, кейде бир јик јок јараш айланып јат. Сен оны кӧрӱп, оныҥ эди-каны бир де јастырбай иштейтен механизмге тӱҥей деп оҥдоп јадыҥ. Мынайып эдерге, узак ӧйгӧ тазыктырынар керек. Је Агару Бичикте айдылганыла: «Эт-канды тазыктыратанныҥ тузазы ас». Оныҥ учун кӧгӱс кӧрӱмди тазыктыратанныҥ тузазы канча катапка кӧп болот (1 Тимофейге 4:8).

13. Бис јакшыны јаманнаҥ ылгаштырарга, канайып ӱренип алар аргалу?

¹³ Бу бичикте Иеговага чындык ла тереҥ кӧгӱстӱ кижи болуп артарга ла јакшыны јаманнаҥ ылгаштырарга болужатан кӧп шӱӱлтелер кӧргӧнис. Кандый бир керек эдерге турган болзоҥ, мӱргӱп, Кудайдыҥ принциптерин ле јасактарын шӱӱп санан. Кажы ла учуралда: «Бу суракка кандый библиялык принциптер ле јасактар келижет? Олорды канайып тузаланарга јараар? Кандый шӱӱлтеге келзем, теҥеридеги Адамды сӱӱндирерим?» — деп сананып тур. (Укаа сӧстӧр 3:5, 6; Иаковтыҥ самаразы 1:5 кычыр.) Мынайып эдип турзаҥ, оноҥ ары јакшыны јаманнаҥ ылгаштырып ӱренип аларыҥ. Мындый ӱредӱ сеге тереҥ кӧгӱстӱ кижи болуп артарга болужар.

14. Кӧгӱс ӧзӱм алынарга, бис нени тыҥ кӱӱнзеер учурлу, је нени ундыбас керек?

¹⁴ Бис тереҥ кӧгӱстӱ болуп та калзаас, оноҥ ло ары кӧгӱзисти тыҥыдатан аргалар бар. Је ӧзӱм болзын деп курсак јиир керек. Оныҥ учун элчи Павел: «Кату курсак дезе толо кемдӱ [кӧгӱзи тереҥ, ЈТ], улуска учурлалган» — деп айткан. Бӱдерин тыҥыдарыныҥ эҥ  керектӱзи — кату кӧгӱс курсакла ажанары. Билип алганын чын тузаланып турганды ойгор кижи деп айдарга јараар. Агару Бичикте: «Эҥ керектӱзи — ойгор болоры» — деп айдылат. Оныҥ учун бис Адабыстыҥ берип турган кӧгӱс эрјинелерин билерге тыҥ кӱӱнзеер учурлу (Укаа сӧстӧр 4:5—7; Петрдыҥ 1-кы самаразы 2:2). Је билгириҥ кӧптӧп, Кудайдыҥ ойгорыла јӱрӱп турган болзоҥ, бийиркенип, улуркабас керек. Јӱрегисте мындый кылык јаҥ тазылданбазын деп, бойысты јаантайын шиҥдеер керек. Павел бичиген: «Бӱдӱп турганыгар ба деп, бойыгарды бойыгар ченегер, бойыгарды бойыгар шиҥдегер» (2 Коринфтегилерге 13:5).

15. Тереҥ ич-кӧгӱстӱ болорго, нениҥ учун сӱӱш керек?

¹⁵ Тура тудулып та калза, оныҥ ижи оноҥ ло ары улалып јат. Тураны кичеер, јазаар, керек болзо, кып улаштырар керек. Је тереҥ кӧгӱстӱ болорго ло ич-кӧгӱзисти кичееп турарга не керек? Элдеҥ озо сӱӱш керек. Бис Иегованы ла ака-эјелеристи оноҥ ло ары тыҥ сӱӱр учурлу. Оноҥ ӧскӧ, бисте сӱӱш болбозо, ончо билгирлерис ле керектерис калас болор (1 Коринфтегилерге 13:1—3). Сӱӱштеҥ улам бистиҥ ич-кӧгӱзис тереҥ болуп, оноҥ ло ары ӧзӱм алынар.

16. Сатана улусты кандый кӧрӱм-санаалу эдип салат, је Иегова биске кандый кору берет?

¹⁶ Эмди, кӧгӱс јанысты тыҥыдатан ӱчинчи эп-арганы кӧрӱп ийеектер. Христостыҥ чындык ӱренчиги болорго, чын кӧрӱм-санаалу болуп артар керек. Бу телекейдиҥ башчызы, Сатана, улусты јастыра кӧрӱмдӱ болуп, неге де бӱтпес, ижемји јок болзын деп ӱреп салат (Ефестегилерге 2:2). Андый санаа христиан кижиге агаш тураныҥ чиригени чилеп, каршулу болот. Је карын Иегова биске ижемји берген, ол коруланатан јепселдердиҥ бирӱзи болот.

17. Кудайдыҥ Сӧзинде айдылганыла ижемји кандый туза берет?

 ¹⁷ Агару Бичикте Сатанала, анайда ок бу телекейле тартыжарга керектӱ кӧгӱс јепселдер керегинде бичилген. Јепселдердиҥ бирӱзи — јуучыл бӧрӱк, ол эмезе «аргадаларыс деп... ижемји» (1 Фессалоникадагыларга 5:8). Библиялык ӧйлӧрдӧ јуучыл мындый бӧрӱк јокко узак јуулажып болбозын билер болгон. Андый бӧрӱкти кӧп сабада темирдеҥ эткен ле оныҥ алдынаҥ кийис эмезе тере бӧрӱк кийетен. Бу бӧрӱк табарулардаҥ улам каршу болбозын деп, башты корулап јат, анайып ла ижемји сениҥ кӧрӱм-санааҥды корулаар аргалу.

18, 19. Иисус ижемјини ундыбай јӱрериниҥ кандый темин артыргызып салган, бис Оноҥ неге ӱренер аргалу?

¹⁸ Ижемјини канайып ундыбайтаныныҥ эҥ јакшы темин Иисус кӧргӱскен. Јердеги јӱрӱминиҥ калганчы тӱнинде Ол кандый ченелте ӧткӧнин сананып ийзеҥ. Јуук најызы Оны акчага болуп садып ийген. База бирӱзи билбеечи болуп, Иисустаҥ јана баскан. Арткандары Иисусты артыргызып, кача берген. Јерлештери Ого удура туруп, римниҥ черӱчилдери Оны кыйнап, ӧлтӱрип салзын деп некеген. Бисте Иисустыҥ ченелтелериндий ченелтелер болбос деп айдарга јараар. Ого не болушкан? Карууны Еврейлерге 12:2 берет: «Ого темдектелген сӱӱнчиниҥ ордына Ол уйатка каларын керекке албай, керӱ агашта кыйынды чыдажып ӧдӱп, Кудайдыҥ ширеезиниҥ оҥ јанына отурып алган». Иисус «темдектелген сӱӱнчини» бир де ундыбаган.

¹⁹ Иисусты кандый сӱӱнчи сакыган? Ол учына јетире чыдашканыла Кудайдыҥ агару адын агарулаар ла Сатананы — тӧгӱнчи деп керелеерин билер болгон. Иисуска кандый да ӧскӧ ижемји мындый сӱӱнчи экелбеген! Анайда ок Иисус Иеговага чындык јӱргенинеҥ кайрал аларын ла удабас ойто Адазыла кожо болорын билген. Иисус бу сӱӱнчилӱ ижемјини эҥ ле кӱч ӧйлӧрдӧ ундыбаган. Биске база анайып ла эдер керек. Бисти  база сӱӱнчи сакып јат. Иегова бистиҥ кажыбыска ла Оныҥ улу адын агарулаар ишке туружарына арга берип, кӱндӱ эткен. Бис Иегованы бойыстыҥ Бийис деп талдазаас, кандый ла ченелтелерде бойысты теҥеридеги Адабыстыҥ сӱӱжинде чеберлезеес, Сатана — тӧгӱнчи деп кере берер аргалу болорыс.

20. Сеге чын кӧрӱм-санаалу болорго ло ижемјини ундыбаска не болужар?

²⁰ Иегова Бойыныҥ чындык ишчилерин кайралдаарга тыҥ кӱӱнзейт (Исаия 30:18; Малахия 3:10 кычыр). Ол олордыҥ јӱрегиниҥ чын кӱӱнин јакшызынып бӱдӱрет (Сарын 37:4). Оныҥ учун сени сакып јаткан ижемјини ундыба. Сатананыҥ эски телекейиниҥ јастыра, балыр ла быјарсыган кӧрӱм-санаазыла качан да јӱрбе. Је бу телекейдиҥ кӧрӱм-санаазы сениҥ јӱрегиҥе ле санааҥга кирип турган болзо, Иеговага «Кудайдыҥ не ле сагыштаҥ бийик амырын» сурап, тыҥ мӱргӱ. Ол тушта Кудайдыҥ амыры сениҥ јӱрегиҥди ле санааҥды корулаар (Филиппыдагыларга 4:6, 7).

21, 22. а) «Кара-бајырт» улуста кандый ижемји бар? б) Бу христиан ижемјиде сеге эҥ тыҥ не јарайт ла нени эдерге шӱӱп алдыҥ?

²¹ Бисте шӱӱп сананатан кандый јакшы ижемји бар! Сен «улу тӱбекти, ЈТ» ӧдӱп чыгатан «кара-бајырт»  улустыҥ тоозына кирип турган болзоҥ, сениҥ јӱрӱмиҥ удабас кандый болор деп сананып ийзеҥ (Ачылта 7:9, 14). Иегова Кудай Сатананы ла оныҥ калју кӧрмӧстӧрин јоголтып салган тушта кандый амыр болорын сен билбей де турган болорыҥ. Сатананыҥ быјарсыдып турган салтарына кирбей јӱрген кижи бар ба? Удабас Сатананыҥ салтары јоголып калза, бис Иисустыҥ ла Оныҥ теҥеридеги 144 000 башкараачыларыныҥ болужыла јерди рай эдип јарандырарына сӱӱнип туружарыс! Бир де оору-јобол болбойтон ӧйди, тирилген јуук улузысты уткыыр сӱӱнчини ле Кудайдыҥ биске озодоҥ бери амадап салган јӱрӱмди энчикпей сакып јадыбыс! Толо кемдӱ болотон ӧй јууктаган сайын бис Римдегилерге 8:21-де бичилген «Кудайдыҥ балдарыныҥ јайымын ла магын» алатан эҥ јаан кайралга јууктап јадыбыс.

²² Иегова Кудайдыҥ берерге турган јайымын сен эм тургуза јетире аайлабай турган болорыҥ. Бу јайымды јӱк ле сӧсуккур болуп артсабыс аларыс. Оныҥ учун Иегова Кудайдыҥ сӧзин кӱнӱҥ сайын угуп јӱрерге албаданып турганыс калас болбос. Айдарда, Кудайдыҥ сӱӱжинде ӱргӱлјиге артарга турган болзогор, агару бӱдӱмјигерди оноҥ ары тыҥыдыгар!