1, 2. ?Wanem fasin blong kam strong moa we yumi mas tingbaot, mo from wanem fasin ya i impoten?

YUMI evriwan i wantem we bodi blong yumi i strong mo yumi gat gud helt. Blong kam strong long bodi, oltaem yumi mas kakae gud, wokbaot plante, mo lukaot gud long helt blong yumi. Hemia i hadwok, be from we yumi wantem stap laef mo harem gud long ol yia we oli kam, yumi stap traehad. Be i gat wan narafala fasin blong kam strong moa we yumi mas tingbaot tu. ?Wanem fasin ya?

² Disaepol Jud i talemaot fasin ya taem hem i givim advaes ya long ol Kristin se: “Yufala i mas stap long laef ya we oltaem yufala i save se God i stap lavem yufala.” Mo vas ya i gohed, i talem olsem wanem oli save mekem olsem, i se: “Yufala i mas wok strong blong mekem bilif blong yufala i kam strong moa.” (Jud 20, 21) ?Olsem wanem yu save mekem bilif blong yu i kam strong moa, blong yu save stap oltaem long laef ya we God i lavem yu? Bambae yumi tokbaot tri samting we yumi mas mekem.

3-5. (a) ?Setan i wantem trikim yu blong yu gat wanem tingting long saed blong ol loa blong Jeova? (b) ?Wanem tingting we yumi mas gat long ol loa blong God, mo tingting ya bambae i mekem se yumi harem olsem wanem? Talem wan pijatok.

³ Fastaem, yumi mas mekem bilif blong yumi long ol loa blong God i kam strong moa. Long stadi blong yu long buk ya, yu lanem plante samting we Jeova i wantem yu blong mekem, long saed blong ol fasin blong yu. ?Wanem tingting blong yu long ol samting ya? Bambae Setan i glad sipos hem i save trikim yu blong yu ting se ol loa blong Jeova, mo ol tingting blong hem, mo ol samting we  hem i wantem, oli strong tumas, mo oli blokem yu tumas. Long garen blong Iden, trik ya i wokgud, taswe Setan i gohed blong yusum trik ya kam kasem taem blong yumi. (Jenesis 3:1-6) ?Hem i save trikim yu long rod ya? Ansa blong kwestin ya i dipen long tingting we yu yu gat.

⁴ Traem tingbaot pijatok ya: Yu yu stap wokbaot long wan naesfala ples blong spel, nao yu luk wan bigfala fenis i raonem wan haf blong open ples ya. Yu lukluk i gotru long fenis ya, mo yu luk se ples i naes long narasaed. Ating bambae yu ting se, ‘?From wanem ol man oli putum fenis ya? ?From wanem oli wantem blokem ol man, blong oli no wokbaot long naesfala ples ya?’ Be taem yu stap lukluk i go long narasaed, yu sek long wan bigfala laeon we i stap wokbaot sloslo, i stap rere blong jam long wan anamol blong kakae hem. Naoia yu jes luksave from wanem fenis ya i stap. Hem i stap blong protektem yu. ?Olsem wanem? ?I gat wan nogud enemi blong yu we i stap wokbaot sloslo biaen long yu, i stap rere blong jam long yu blong kakae yu? Yes i gat. Tok blong God i givim woning se: “Yufala i mas lukaot gud. Yufala i mas rere, from we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae.”—1 Pita 5:8.

⁵ Setan i olsem wan wael anamol we i nogud we i nogud, i stap rere blong kakae man. Jeova i no wantem we yumi foldaon i go long han blong Setan. Taswe hem i putum sam loa blong protektem yumi long “ol giaman trik” blong rabis man ya. (Efesas 6:11) Taem yumi stap tingting dip long ol loa blong God, yumi mas luksave se ol loa ya oli soemaot we Papa blong yumi long heven i lavem yumi. Sipos yumi gat tingting olsem long saed blong ol loa blong God, bambae yumi glad long ol loa ya mo bambae yumi harem se yumi sef taem yumi obei long olgeta. Disaepol Jemes i raetem se: “Loa ya we i save mekem man i fri, i stret olgeta. Mo man we i stap luklukgud long hem, mo i stap tingbaot oltaem, . . . God i stap mekem hem i harem gud.”—Jemes 1:25.

6. ?Wanem beswan rod blong mekem bilif blong yu long ol loa mo tok blong God i kam strong moa? Givim wan eksampol.

⁶ Beswan rod blong mekem bilif blong yumi i kam strong moa long God we i putum ol loa ya, mo blong bilif moa se ol loa ya oli waes, hemia blong folem ol loa ya long laef blong yumi. Olsem nao, yumi mas folem “loa blong Kraes” we i talem se yumi mas go tijim ol man long ‘olgeta tok we hem i askem olgeta blong folem.’  (Galesia 6:2; Matiu 28:19, 20) Mo tu, ol Kristin oli tinghevi long loa ya blong joen wanples blong wosipim God mo blong harem gud long kampani blong ol narafala Kristin. (Hibrus 10:24, 25) Wan narafala loa blong God, i blong prea long Jeova oltaem wetem fulhat blong yumi. (Matiu 6:5-8; 1 Tesalonaeka 5:17) Taem yumi folem ol loa ya, yumi luksave moa klia se ol loa ya oli lidim yumi long fasin we i soemaot klia se Jeova i lavem yumi. Yumi glad mo yumi harem gud taem yumi obei long olgeta. I no gat wan narafala samting long rabis wol ya we i save mekem yumi harem gud olsem. Taem yu tingting dip olsem wanem ol loa blong God oli givhan finis long laef blong yu, bilif blong yu long ol loa ya i mas kam strong moa.

7, 8. ?Baebol i talem wanem blong givhan long olgeta we oli wari se maet bambae oli no save gohed plante yia blong folem ol loa blong Jeova?

⁷ Samfala oli wari se, bambae i had blong gohed plante yia blong folem ol loa blong Jeova. Oli fraet se bambae oli foldaon. Sipos yu yu gat tingting ya, traem rimemba ol tok ya: ‘Mi, Jeova, mi mi God blong yu, God ya we i stap tijim yu blong karem gudfala frut long laef blong yu. Mi mi stap mekem yu yu wokbaot long rod we i stret. Sipos yu mekem olsem, bambae pis blong yu i kam olsem wan bigfala reva, mo stret fasin blong yu bambae i kam olsem ol wef blong solwota.’ (Aesea 48:17, 18, NW) I gud yu tekem taem blong tingbaot ol tok ya we oli save leftemap tingting blong yu bigwan.

⁸ Long ples ya Jeova i mekem yumi tingbaot se sipos yumi obei long hem, yumi mekem i gud long yumi wan bakegen. Hem i promes blong givim tu blesing. Faswan se, pis blong yumi bambae i kam olsem  wan reva, i min se tingting blong yumi bambae i kwaet, pis we yumi gat bambae i fulap mo bambae i gohed olwe. Namba tu blesing se, stret fasin blong yumi bambae i kam olsem ol wef blong solwota. Sipos yu stanap klosap long solwota mo yu lukluk ol wef we oli stap kam brok oltaem long sanbij mo rif, yu no save ting se ol wef ya bambae oli finis samtaem. Yu save se long ol yia we oli kam, ol wef ya bambae oli gohed nomo, bambae oli kamkam kasem we oli brok long sanbij mo rif. Jeova i talem se stret fasin blong yu i save gohed olwe olsem ol wef ya. !Sipos yu traehad oltaem blong holemstrong long hem, hem i no save lego yu! (Ol Sam 55:22) Ol promes ya we oli mekem yumi harem gud tumas, oli mas mekem bilif blong yu long Jeova mo ol stret fasin we hem i wantem yu blong folem, i kam strong moa.

9, 10. (a) ?From wanem wan nambawan mak blong ol Kristin oli traehad blong kasem, hemia blong kam bigman long Kraes? (b) ?Olsem wanem yumi glad moa taem yumi gat tingting blong God?

⁹ Tok blong God i soemaot wan narafala samting we bambae i givhan long yumi blong kam strong moa long bilif. Hem i talem se: “I gud yumi . . . kam bigman long Kraes.” (Hibrus 6:1) Hemia wan nambawan mak we ol Kristin oli mas traehad blong kasem. Ol man oli no naf blong kasem mak ya we oli stretgud olgeta, be oli naf blong kasem mak ya we oli kam bigman long Kraes. Mo tu, taem ol Kristin oli stap traehad blong kam bigman long Kraes, samting ya bambae i mekem se oli glad moa long wok blong Jeova. ?From wanem?

¹⁰ Wan Kristin we i bigman long Kraes, hem i gat tingting olsem Jeova long evri samting. (Jon 4:23) Pol i raetem se: “Olgeta we oli gat tingting blong man, oli putum tingting blong olgeta long ol samting we man nomo i wantem. Be olgeta we oli gat tingting blong God, oli putum tingting blong olgeta long ol samting we tabu spirit i wantem.” (Rom 8:5, NW) Olgeta we oli gat tingting blong man oli no glad, from we oli tingbaot olgeta nomo, oli tingbaot blong harem gud naoia nomo, mo oli putum tingting blong olgeta long ol sas samting mo mane. Olgeta we oli gat tingting blong God oli glad, from we oli tingbaot Jeova nomo, God ya we “i stap harem gud oltaem.” (1 Timoti 1:11) Man we i gat tingting blong God i wantem tumas blong mekem Jeova i glad. Nating se ol samting oli kam blong traem hem, be hem i harem gud nomo. ?From wanem? From we taem ol samting oli kam blong traem hem, hem i luk olgeta olsem janis blong pruvum se  Setan i wan man blong giaman, mo blong wokem fasin ya blong holemstrong long Jeova, we i save mekem Papa blong hem long heven i glad tumas.—Ol Proveb 27:11; Jemes 1:2, 3.

11, 12. (a) ?Pol i talem wanem long saed blong ‘tingting we Kristin i trenem blong luksave wanem i stret,’ mo wanem mining blong tok ya “trenem”? (b) ?Wanem trening we bodi i mas kasem blong kam strong mo mekem spot?

¹¹ Blong kam bigman long Kraes mo blong gat tingting olsem God, yumi mas trenem yumi. Tingbaot vas ya: “Strong kakae i blong olgeta we oli kam bigman finis, hemia olgeta we oli yusum mo trenem tingting blong olgeta gogo oli kam naf blong luksave mo jusumaot wanem i stret mo wanem i no stret.” (Hibrus 5:14, NW) Taem Pol i talem se yumi mas “trenem” tingting blong yumi, hem i yusum wan tok we ol man Gris oli yusum long faswan handred yia blong tokbaot ol man blong spot we oli ‘trengud olsem jimnas.’ * Tingbaot trening we oli mas mekem blong kamgud long spot ya.

¹² Taem yumi bon, yumi no tren nating yet. Wan bebi, hem i no haremsave se ol han mo leg blong hem oli stap weples long bodi blong hem. Taswe hem i saksakem ol han blong hem olbaot, mo sam samtaem hem i sek se i kilim fes blong hem wan bakegen. Be sloslo, hem i yusum ol han mo leg blong hem gogo hem i trenem bodi blong hem. Fastaem, hem i wokbaot fo leg. Taem hem i kam bigwan moa, hem i wokbaot tu leg, mo biaen bakegen hem i ronron olbaot. * ?Be olsem wanem long wan jimnas? Taem yu luk wan man blong spot we i save jam i go antap, twistim bodi blong hem, mo kamdaon bakegen long graon we i no kafsaed nating, i luk olsem se samting ya i isi nomo long hem. Yu yu luksave klia se man ya i trenem bodi blong hem longtaem finis, blong ol masel blong hem oli wok long nambawan fasin. Hem i no kam wan jampion blong spot olsem nomo. Hem i spenem plante plante aoa blong tren from. Baebol i talem se sipos yumi tren smol blong mekem bodi blong yumi i strong, “hemia i gud.” !Be bambae yumi kasem frut we i moagud sipos yumi trenem tingting blong yumi blong luksave wanem samting i stret mo wanem  samting i no stret long lukluk blong God!—1 Timoti 4:8.

13. ?Olsem wanem yumi save trenem tingting blong yumi blong luksave samting we i stret mo samting we i no stret?

¹³ Long buk ya, yumi tokbaot plante samting we bambae oli givhan long yu blong trenem tingting blong yu, nao bambae yu save gat tingting olsem Jeova mo holemstrong long hem. Taem yu stap mekem ol desisen evri dei, yu mas tingting dip long ol loa mo tingting blong Jeova, mo yu mas prea long saed ya. Long evri desisen we yu mekem, traem tingbaot: ‘?Wanem ol loa mo tingting blong God long Baebol we oli save halpem mi blong mekem desisen ya? ?Olsem wanem mi save folem olgeta? Wanem desisen we bambae i mekem Papa blong mi long heven i glad?’ (Ol Proveb 3:5, 6; Jemes 1:5) Evri taem we yu skelem ol loa mo tingting blong God blong mekem wan desisen, yu stap trenem tingting blong yu blong luksave mo jusumaot samting we i stret. Trening ya bambae i givhan long yu blong gat tingting blong God mo holemtaet tingting ya.

14. ?Blong kam strong moa long bilif, yumi mas hanggri from wanem? ?Be yumi mas lukaotgud long wanem samting?

¹⁴ Yumi naf blong kasem mak ya we yumi kam bigman long Kraes, be yumi no mas stop long ples ya. Oltaem yumi save gohed blong kam strong moa. Blong kam strong moa, yumi nidim kakae. Taswe Pol i talem se: “Strong kakae i blong olgeta we oli kam bigman finis.” Wan impoten samting we i save givhan long yu blong mekem bilif blong yu i kam strong moa, hemia se yu mas gohed blong tekem strong kakae long Tok blong God. Taem yu mekem samting we yu lanem i wok long laef blong yu, hemia fasin waes. Mo Baebol i talem se: “Fasin waes, hemia i nambawan samting.” (Ol Proveb 4:5-7, NW; 1 Pita 2:2) Be yumi mas lukaotgud long wan samting. Taem yumi kasem moa save mo waes blong God, yumi no mas kam flas from. Yumi mas jekem yumi oltaem blong meksua se flas fasin no wan narafala slak fasin i no stap gru long hat blong yumi. Pol i raetem se: “I gud yufala nomo i traem luklukgud long laef blong yufala, yufala nomo i jajem yufala.”—2 Korin 13:5.

15. ?From wanem yumi nidim lav, sipos yumi wantem we tingting blong yumi i laenap oltaem wetem tingting blong Jeova?

 ¹⁵ Maet bodi blong wan man i kam strong mo hem i gat gud helt, be hem i no mas stop long ples ya. Hem i mas gohed blong kakae gud mo lukaotgud long bodi blong hem. ?Yumi nidim wanem blong yumi save kam bigman long Kraes mo gat tingting blong God oltaem? Nambawan samting we yumi nidim, hemia lav. Yumi mas kam strong moa blong lavem Jeova mo ol Kristin brata sista blong yumi. Sipos yumi no gat lav, olgeta save we yumi gat mo olgeta wok we yumi mekem oli blong nating nomo. Bambae oli olsem noes nomo we i no mekem wan gudfala samting nating. (1 Korin 13:1-3) Sipos yumi gat lav, yumi save kasem mak ya we yumi kam bigman long Kraes, mo yumi save gohed oltaem blong mekem tingting blong yumi i laenap moa wetem tingting blong Jeova.

16. ?Setan i pulum man blong gat wanem kaen tingting? ?Jeova i givim wanem long yumi blong halpem yumi blong faet agensem tingting ya?

¹⁶ Bambae yumi tokbaot wan moa samting we i save givhan long yumi blong kam strong moa blong folem Kraes. Yumi mas lukaotgud long tingting blong yumi. Setan we i masta blong wol ya, i waesgud blong pulum man blong lukluk long nogud saed blong evri samting, mo blong mekem tingting i foldaon, mo blong pulum man blong i no trastem narafala, mo blong mekem man i ting se i no gat wan gudfala samting long fiuja. (Efesas 2:2) Tingting ya i denja long ol Kristin, olsem wud we i roten i denja long wan haos. Yumi glad we Jeova i givim wan samting blong halpem yumi blong faet agensem tingting ya, hemia ol nambawan promes blong fiuja we yumi save putum tingting blong yumi i stap long olgeta.

17. ?Olsem wanem Baebol i soemaot se i impoten blong putum tingting blong yumi long God blong hem i sevem yumi?

¹⁷ Baebol i talem ol klos blong faet we God i givim long yumi blong yumi save agensem Setan mo wol ya. Wan long ol klos ya we i impoten tumas, hemia hat blong faet, we i min se, yumi “putum tingting blong yumi long God blong hem i sevem yumi.” (1 Tesalonaeka 5:8) Wan soldia long taem bifo, hem i save se bambae hem i ded hareap long wan faet sipos hem i no werem hat blong hem. Plante taem oli wokem ol hat ya long skin blong anamol mo oli kavremap wetem aean, nao sipos wan ara i kasem hed blong soldia, bambae i  glis nomo i go, i no save givim kil long soldia ya. Sipos yumi putum tingting blong yumi long God blong hem i sevem yumi, samting ya i save protektem tingting blong yumi, olsem we aean hat i protektem hed blong soldia.

18, 19. ?Wanem eksampol we Jisas i givim long yumi, blong yumi save putum tingting blong yumi long God blong hem i sevem yumi? ?Olsem wanem yumi save folem fasin ya blong Jisas?

¹⁸ Jisas i givim nambawan eksampol olsem wanem blong putum tingting blong yumi i stap long God blong hem i sevem yumi. Tingbaot olsem wanem hem i safa long laswan naet blong laef blong hem long wol ya. Wan gudfala fren blong hem i putum hem i go long han blong ol enemi blong hem, blong kasem mane. Wan narafala fren blong hem i giaman se hem i no save hem nating. Ol narafala fren oli lego hem mo oli ronwe long hem. Ol manples blong hem oli no moa wantem save hem, oli singaot strong se ol soldia blong Rom oli mas mekem hem i harem nogud long bodi blong hem gogo hem i ded. Ating i stret blong talem se: i no gat wan long yumi we bambae i fesem ol bigfala trabol olsem Jisas i fesem. ?Wanem i givhan long Jisas? Hibrus 12:2 i ansa se: “Taem hem i go blong i ded long kros [“pos,” NW], hem i luksave finis we bambae i save harem gud. Nao from samting ya, hem i no moa tingbaot se kros [“pos,” NW] ya bambae i mekem bigfala sem long hem, hem i gohed nomo. Mo naoia, hem i stap sidaon long raet saed blong God we hem i King, i stap sidaon long bigfala jea blong hem long heven.” Yes, Jisas i neva fogetem se ‘bambae hem i save harem gud.’

¹⁹ ?Wanem i mekem Jisas i harem gud? Hem i save se sipos i stanap strong, bambae hem i save givhan blong leftemap tabu nem blong Jeova i go antap moa. Long fasin we i bigwan moa i bitim ol narafala man, bambae hem i pruvum se Setan i man blong giaman. !Hemia i mekem Jisas i harem gud moa i bitim olgeta narafala samting we hem i save putum tingting blong hem long olgeta! Hem i save se Jeova bambae i givim bigfala blesing long hem sipos i holemstrong long hem. Hem i save se wan nambawan taem i stap jes long fored blong hem, we bambae hem i go joen bakegen wetem Papa blong hem. Long ol bigfala hadtaem we Jisas i kasem, hem i tingbaot ol samting ya we oli mekem hem i harem gud. Yumi mas mekem sem mak. Yumi tu yumi save harem gud long plante samting long fiuja. Jeova i leftemap yumi wanwan, taem hem i givim janis long yumi blong givhan blong soem se nambawan nem blong hem i tabu tumas. Nomata  wanem samting i kam blong traem yumi mo pulum yumi, yumi save soemaot se Setan i wan man blong giaman. Yumi save mekem olsem sipos yumi jusum Jeova olsem King blong yumi, mo sipos yumi stap sef oltaem long laef ya we Papa blong yumi i lavem yumi.

20. ?Wanem i save halpem yu blong no letem tingting blong yu i foldaon, mo blong putum tingting blong yu long ol gudfala promes blong fiuja?

²⁰ Jeova i stap rere blong givim blesing long ol man we oli holemstrong long hem. Mo hem i wantem tumas blong mekem samting ya. (Aesea 30:18; Malakae 3:10) Hem i harem gud tumas blong givim ol samting we ol man blong hem oli wantem, sipos ol samting ya oli stret mo gud. (Ol Sam 37:4) Taswe yu mas putum tingting blong yu i stap strong long ol nambawan promes blong God we bambae oli kamtru i no longtaem. Yu no mas tingting long nogud saed blong evri samting, mo yu no mas tekem ol rabis tingting blong olfala wol ya, ol tingting we Setan i twistim finis. Sipos yu haremsave se sloslo tingting blong wol ya i stap kam insaed long tingting mo hat blong yu, yu mas prea wetem fulhat blong yu long Jeova blong askem “pis we hem i givim, we i bigfala moa, i bitim save blong yumi.” Pis ya we God i givim, bambae i lukaotgud long hat mo tingting blong yu.—Filipae 4:6, 7.

21, 22. (a) ?Wanem nambawan blesing we olgeta long “bigfala kampani” oli putum tingting blong olgeta i stap strong long hem? (b) ?Long olgeta blesing we ol Kristin oli tingting blong kasem, yu yu laekem weswan moa? ?Yu yu gat strong tingting blong mekem wanem?

²¹ !I gat ol nambawan blesing long fiuja we yu save tingbaot! Sipos  yu yu wan man blong “bigfala kampani” we i no longtaem bambae i “pastru long bigfala trabol,” tingbaot laef blong yu afta long taem ya. (Revelesen 7:9, 14, NW) Setan mo ol rabis enjel blong hem bambae oli no moa stap. Ating i had blong yu yu kasem save long pis we bambae yu haremsave long tingting blong yu. Yes, i no gat wan long yumi we i bin stap laef long wan taem we i no gat Setan nating blong spolem yumi. Taem hem i no moa stap, bambae yumi glad tumas blong wok aninit long han blong Jisas mo ol 144,000 we oli rul wetem hem long heven, blong mekem wol ya i kam wan paradaes. Yumi harem gud tumas blong tingbaot se yumi gat janis blong luk taem ya we ol sik mo trabol long saed blong bodi bambae oli finis, yumi save welkamem ol fren mo famle blong yumi taem oli laef bakegen, mo yumi save laef long fasin we God i wantem fastaem finis. Taem yumi stap kam stret olgeta, wan blesing we i bigwan moa bambae i stap fored long yumi. Rom 8:21 i mekem promes ya se, ‘bambae yumi fri olgeta olsem ol pikinini blong God.’

²² Jeova i wantem se bambae yu kam fri olgeta. Samting ya bambae i gud tumas, i bitim samting we yu yu naf blong tingbaot. Be blong kam fri olsem, yu mas obei long Jeova. ?Olsem wanem? ?I strong tumas blong traehad fulwan evri dei blong obei long Jeova, blong yumi save kasem bigfala blesing ya? !Nogat! Ale, yu mas wok strong blong mekem bilif blong yu i kam strong moa. !Olsem nao, bambae yu yu save stap gogo i no save finis, long laef ya we oltaem God i lavem yu!