1, 2. Ésaé melôñ évé wo bo, a amu jé é ne mfi na ô bo ésaé éte nya mboone?

WO VE ngule na ô lôñe jôm éziñ. Ô tatéya ésaé éte ôbe nté, a é ngenan é kele’e ôsu. Ésaé éte é nji bo tyi’ibi, ve ja ve wo ava’a nlem. To’o jé ja kui, wo sili ki mo si amu wo yeme na, ésaé éte ja nambe ényiñe jôé ataté éyoñe ji, akekui melu ma zu. Amu jé bia jô nalé? Amu ésaé bia jôô je, a ne ésaé wo bo be womien.

² Ñyé’é Jude a nga kobô ajô ésaé melôñ bia bo be biabebien. Éyoñ a nga lebe Bekristene na be ‘ba’ale bebien nye’ane Zambe été,’ a nga liti fe be avale be ne kui na be bo de. A nga jô be na: “Vôm mi alôñ miabebien mbamba mbunan a dañedañ yôp.” (Jude 20, 21) Mam mevé me ne volô wo na ô lôñeban, nge ke na ô yemete mbunane wôé mfa’a ya ke ôsu a ba’ale womien nye’ane Zambe été? Bi tame zu yene mam melal me ne volô na ésaé melôñ wo bo be womien é yemete mbunane wôé.

3-5. (a) Satan a yi na bi yen metiñ me Yéhôva aya? (b) Jé bia yiane bo éyoñ bia bindi metiñe me Yéhôva, a amu jé? Va’ak éve’an.

³ Jam ôsu bia yiane bo é ne na, bi tu’a futi ndi nleme jangane metiñe me Yéhôva. Nté ôse bia te yé’é kalate nyi, wo te yene mbamba mefulu a yi na bi bi. Ô lôô mefulu  mete aya? Satan a yi na bi yen miñye’elan, memvinda, a metiñe me Yéhôva adit a njet. Ôlam ôte ô nga wulu afub Éden, a ngenane fe a belane wô den. (Metata’a 3:1-6) Ye wo fe wo ye bili ôlam ôte nga? Mimboone miôé mmie mia ye liti nge wo ye bili nge momo.

⁴ Bi tame nyoñ éve’an: Wo wulu parc; éyoñ éte wo yene beta nka’ale a kamane wo na ô nyiine ngum afôla ya parc. Éyoñ wo bôt nka’ale yat, ô lôô na afôla ete e ne angôndô ya abeñ. Ô ne taté buni na nka’ale ôte wo ndeñele zezé. Ve, éyoñ wo tu’a bôt été wôé, ô lôô ngbwengbwem é landé’é tit! Éyoñ éte nje ñhe wo zu yemelane na, nka’ale ôte ô ne valé na wo kamane wo. Ye wo yem ngbwengbwem ja jeñe na é nyose wo dene nga? Kalate a Zambe a bemene bia na: “Mi taba’an nkôman, mi momba’an: nsiñe wônan diable a ke a wulu’ aval ane ñgbweñgbwem je abam, a jeñe nyô a ne ngule ya bi.”—1 Pierre 5:8.

⁵ Satan a jeñ a ngul ése na a bi bôt. Ve Yéhôva a nji yi na bi bili melam me Satan, jôm ete nje a ve bia metiñ ma volô na bi bo te ku “atyeñe medu’ane” me mbia môt ate. (Beéphésien 6:11) Éyoñ bia bindi metiñ me Yéhôva, bia yiane jeñe na bi yen avale nye’ane wé wo yené metiñ mete. Nge ôsimesan ôte ñwô bi bili, bia ye yene metiñe me Yéhôva ane jôme ja kamane bia, a ji ja soo bia mevak. Ñyé’é Jacques a nga tili na: “Ve nyô a tu’a fombô benya metiñ été, metiñ ya éto [fili], a bo mbane ya bo nalé, . . . môt ate a ye nyoñ ébotan a mboane wé.”—Jacques 1:25.

6. Mbamba zene ya yemete mbunane wongan a ne mbé? Va’ak éve’an.

⁶ Mbamba zene ya yemete mbunan wongan be Mvee metiñ, a tabe fe’e jé ndi, a ne na bi tôñe metiñe mé. Bia tôñ atiñe da ya “metiñe me Krist” éyoñ bia ye’ele bôte bevo’o “mejô mese [a nga] jô.” (Begalate 6:2; Matthieu  28:19, 20) Bia tôñe fe atiñe da jô na bi bo mbane bisulan, a na bi veane ngule nyul. (Behébreu 10:24, 25) Bia yiane fe ye’elan éyoñ ése a kate nye mam mese me ne bia minlem. (Matthieu 6:5-8; 1 Bethessalonicien 5:17) Nté bia tôñe metiñe mete, bia tu’a yene na me ne asu mfi wongan. Bi vo’o vek bibotan bia bi éyoñ bia tôñe metiñe me Yéhôva a jôm éfe mbia émo Satan nyi. Éyoñ wo fas bibotan wo bi ényiñe jôé amu wo tôñe metiñe me Yéhôva, nga womien ô lôô na nalé a yemete mbunane wôé?

7, 8. Aval avé Kalate Zambe a volô bôte ba buni na be vo’o ke ôsu a tôñe metiñe me Yéhôva?

⁷ Bôte béziñ ba sili bebien nge ba ye fo’o ke ôsu a tôñe metiñ me Yéhôva. Ba ko woñe ya tyam atiñ éziñ. Nge wo fe ô biya aval asimesan ete, ba’ale’e mejô ma: “Me ne Yéhôva Zambe wôé, nyô a ye’ele wo ane wo ye yen mvolan, nyô a wulu wo zen wo yiane ke. Ngo’o nge ô nga vô’ôlô metiñe mam! Éyoñ éte mvo’é jôé é nga ye bo aval ane ôsôé, a zôsô wôé aval ane mintyôa mi mañ.” (Ésaïe 48:17, 18) Ye ô kômeya fo’o nyoñ éyoñe ya fas mbamba mejô ma?

 ⁸ Yéhôva a ba’alane bia valé na bia bo nye mewôk asu mfi wongan. A ka’ale bia bibotane bibaé. Ji ôsu, mvo’é jangan ja ye bo ane ôsôé, nalé a tinane na nlem wo ye bômbô bia si, a na, bia ye bu’uban a abui mvo’é. Ji baa, zôsôô wongan a ye bo ane mintyôa mi mañ. Nge wo ke mfôme mañ, a fombô ane mintyôa mi mañ mia bo mi kele’e mi so’ok, wo ye yene na mam méziñ me ne teke man. Wo yeme na mintyôa mi mañ mia ye ke ôsu a bo nalé akekui nnôm éto. Yéhôva a jô na zôsôô wôé a ne bo ane mintyôa mi mañ. Nté wo ke ôsu a ba’ale mbunane wôé, a ye ke li’i wo étam môs éziñ. (Lañe’e Besam 55:22.) Nga avale bengaka’a ete da yemete ndi nleme jôé be Yéhôva, a bo na ô tabe metiñe mé mebun?

9, 10. (a) Amu jé é ne mfi na Bekristen be bo benya bôtô? (b) Amu jé môt a simesane mame ya nsisim a bili benya mevak?

⁹ Bia koone jame baa bia yiane bo asu na bi lôñeban e mejô ya Kalate Zambe ma: “Nkelan ôsu a tôñe ñye’elan wo yiane benya bôtô.” (Behébreu 6:1) Bekristen ba yiane jeñe na be bo benya bôtô. É ne été na, bi vo’o bo zôsôô ne tiliñ amu bi nga bialé abé été, ve bi ne bo benya bôtô. Bekristen ba bi fulu éte be bili abui meva’a ya bo Yéhôva ésaé. Amu jé bia jô nalé?

¹⁰ Kristen é ne nya môtô é ne étôtôlô nsisim. Ja yene mam ane Yéhôva. (Jean 4:23) Paul a nga tili na: “Ba be ne ba ya minsôn, be asimesane mame ya minsôn; ve ba be ne ba ya nsisim, mame ya nsisim.” (Beromain 8:5) Môt a simesan mame ya minsôn a nji bi abui avak, amu a ne ôkôlôt, a simesane ve zezé mam, a ne fe ôzañ akum. Ve môt a simesane mame ya nsisim a bili benya mevak, amu a bem ôsimesane wé ôse be Yéhôva, “Zambe ya mevak.” (1 Timothée 1:11, MN.) Môt a ne étôtôlô nsisim a  jeñe na a ve Yéhôva nlem avak, ja’a éyoñ a tele meve’ele été. Amu jé? Amu a yeme na, meve’ele mete ma ve nye fane ya liti Satan na, a ne nya nlaa minsos, ma volô fe na a yemete mbunane wé, a na, a ve Ésa wé ya yôp été nlem avak.—Minkana 27:11; lañe’e Jacques 1:2, 3.

11, 12. (a) Paul a nga kobô ajô “mefe’e ya yemelan” a jô’ô aya, a éfia “nkômesan” ja tinan aya? (b) Aval ésaé avé da sili asu na nyul é tabe nkômesan?

¹¹ Asu na bi bo benya bôtô a étôtôlô nsisim, bia yiane ve abui ngul. Tame yen éfuse ya Kalate Zambe ji: “Ayete bidi e ne jôme ya benya bôtô, e ne na, ba, amu be maneya yemban, be ntoo [nkômesan, MN] a mefe’e ya yemelan mvaé a abé.” (Behébreu 5:14) Éyoñe Paul a kobô ajô bôt be ntoo “nkômesan,” a belan éfia ya nkobô Grek be mbe be dañe’e wôk minseñe mi gymnastique ya Grèce, ntete mimbu ôsu. Ajô te, be ne fe kôñelan éfia éte na, ‘nkômesan ane môt a bo gymnastique.’ Tame ve’ele simesan jôme nalé a tinan.

¹² Éyoñ bia bialé, nyôle jangan é ngenan te bo nkômesan. Mon a ndeme bialé a nji yeme belane bibu’a ya nyule jé. Jôm ete nje bi wô’ô yen a kele a vuñ a mo mé afôla ése; e wô’ô kui kui na a teme na, a bibiya émien abaé. Ve ôte’ete’e ôte’etek, nté a ye’ele nyule jé, nde fe ja tabe nkômesane nalé. Éyoñ a ngenane ntyen a ya’é, mvuse ya valé a taté na a wulu; éyoñ a ntoo ôbe nya môtô, a taté na a mate mbil. * Ye bi ne fe jô nalé asu môt a bo gymnastique? Éyoñ wo yen ane môt a bo gymnastique a ke a tyiñelane yôbe yôp, a aval a ke a vulekane  nyule jé si si, ô wô’ô yiane kam a sili womien nge nyule jé é ne minsini. Ve môt ate a nji bialé a yeme’e bo gymnastique, e nga sili nye abui éyoñ asu na a kômesane nyule jé nalé. Kalate Zambe a jô na “mboane mame ya ve ngule nyul wo volô abim éziñ.” Tame ñhe ve’ele simesan abime mfi bi ne bi nge bia jeñ na bi bo benya bôtô mfa’a ya nsisim!—1 Timothée 4:8.

13. Aval avé bi ne bo nkômesan asu na bi yemelan mvaé a abé?

¹³ E kalate nyi, bia te yene jôm é ne volô bia na bi bo nkômesan asu na bi ke ôsu a wulu ba’aba’a a Yéhôva, a na, bi bo étôtôlô nsisim. Ye’ela’ane Yéhôva môs ôse na a volô wo na ô yemelan miñye’elane mié, a metiñe mé me ne volô wo na ô nyoñ mbamba mintyi’an. Éyoñ ése wo nyoñ ntyi’an, sili’i womiene na: ‘Miñye’elan mivé ya Kalate Zambe mia fombô été jam? Aval avé me ne tôñ miñye’elane mite? Jé me ne bo asu na me ve Yéhôva nlem avak?’ (Lañe’e Minkana 3:5, 6; Jacques 1:5.) Nge nne wo bo nalé éyoñ ése wo nyoñ mintyi’an, wo ye bo nkômesan mfa’a ya yemelan jé é ne abé a jé é ne mvaé. Avale ngômôtô ete da ye volô wo na ô bo nya môtô, a na, ô ke ôsu a bo étôtôlô nsisim.

14. Nge bia kômbô yaé nsisim bia yiane bi nkômban ôvé, ve jé nje bia yiane tabe je ntyel?

¹⁴ To’o bi ntoo benya bôtô, bia yiane ke ôsu a ve ngul asu na bi bo étôtôlô nsisim. Asu na bi yaé bia yiane di. Paul a nga jô na: “Ayete bidi e ne jôme ya benya bôtô.”  Asu na ô yemete mbunane wôé, wo yiane ke ôsu a di benya bidi ya nsisim. Wo ye kui na ô bo fek nge wo tôñe mame wo yé’é, jôm ete nje Kalate Zambe a jô na ‘fek é ne jame ya ôsu.’ Da sili ñhe na bi kôme bi nkômbane ya yem miñye’elan Ésa wongan a ve bia. (Minkana 4:5-7; 1 Pierre 2:2) Ve, môt a bi ñyeman a fe’e ja so be Zambe a yiane tabe ntyele na a bo te bete émiene yôp. Bia yiane bo mbane ya fas biabebien, asu na bi yemelan nge mebun, a mefulu mefe me ne abé, me ngenane teke taté na ma yaé bia nlem. Paul a nga tili na: “Fomba’ane miabebien, nge mi ne mbunan été, ve’ela’ane miabebien.”—2 Becorinthien 13:5.

15. Amu jé nye’an ô ne mfi nge bia kômbô yaé nsisim?

¹⁵ Asu na nda é tu’a bo abeñ, môt a yiane kee bon bisaé bife ôsu, ja’a melôñ me maneya. Da ye sili na a yeme ba’ale je, a na a bo a kôme’e je; é ne fe kui kui na a nene je. Jé é ne volô bia na bi bo benya bôtô, a na bi ke ôsu a bo étôtôlô nsisim? Nye’an. Bia yiane ke ôsu a yaé mfa’a ya nye’e Yéhôva a bobejañe bangane ya nsisim. Nge bi nji bi nye’an, wônaa ñyemane wongan, a mam mese bia bo bi ne momo. (1 Becorinthien 13:1-3) Nye’an wo volô bia na bi bo benya bôtô, a na bi ke ôsu a yaé nsisim.

16. Aval asimesan avé Satan a tindi bia na bi bi, a jé Yéhôva a ve bia asu na a kamane bia?

¹⁶ Bi tame zu kobô ajô afe e ne volô bia na bi lôñe biabebien. Nge bia kômbô bo benya beyé’é be Krist, bia yiane tabe ntyel a asimesane dangan. Satan, njôô ya émo ji, a ne ngule ya bo na bôte be bi mbia b’asimesan, na be yen mam mese abé, na be yene bebiene zezé, a na, be bo teke bi ndi nlem éziñ. (Beéphésien 2:2) Aval asimesan ete e ne abé; Kristen é bili de é ne ane nda mebam é tatéya  na ja boé. Nte’e na Yéhôva a ve bia beta ékpwelé a ne kamane bia: Ndi nlem.

17. Aval avé Kalate Zambe a liti mfi ya ndi nlem?

¹⁷ Kalate Zambe a liti bia biôme mewosane ya nsisim bia yiane bi asu na bi wosane Satan a émo jé. Jôme ja dañe mfi été é ne afô’ôlô, afô’ôlô ete e ne “ndi nleme nyian.” (1 Bethessalonicien 5:8, Mfefé Nkôñelan.) Mone bezimbi ya melu mvus a mbe a yeme’e na, a ne ji’a wu nge a ke bita teke afô’ôlô. Be mbe be taté’é bo éve’ela ntôm a éyé, nge ke a ékôbe tit, éyoñ éte ba some je afô’ôlô étyé été, afô’ôlô ete e mbe e kama’ane na mekoñe me tulane mone bezimbi nlô. Aval afô’ôlô da ba’ale nlô, nde fe ndi nlem ja ba’ale asimesane dangan.

18, 19. Éve’ela évé Yésus a ve bia mfa’a ya ba’ale ndi nleme jangan, a aval avé bi ne vu nye?

¹⁸ Yésus a ve mbamba éve’ela mfa’a ya ba’ale ndi nlem. Tame simesan mam a nga tôbane me alu a nga kandane lôte si va. Mvôé jé éziñ é nga koñe nye étome moné. Mvôé jé fe é nga kate nye. Bemvôé bé bevo’o ke be nga tup a li’i nye a tele étam. Bôte ya nlame wé be nga ke nye ngame yat, a yôtane yôp été na a yian awu, akekui be nga jô’é nye mo Beromain na be tibili nye, a wôé nye. Bi nji beté ôdo’é nge bia jô na Yésus a nga tôban avale minju’u bi vo’o tôbane de môs éziñ. Jé é nga volô nye? Behébreu 12:2 a jô na: “Bi lôbô’ Yésus, ntaté a mbo nya mvo’é ya mbunane wongan, nnye ate, amu meva’a me mbe nye ôsu, a nga jibi [élé], a biasé ôson, a a tabeya si mbo nnôme ya éto njôane ya Zambe.” Ôwé Yésus a nji vuane “meva’a me mbe nye ôsu” môs éziñ.

¹⁹ Meva’a mevé me mbe nye ôsu? A mbe a yeme’e na nge a jibi minjuk, a ye fubu éyôlé Yéhôva. A ye fe liti na Satan a ne nlaa minsos. Teke jam afe é mbe ngule ya ve Yésus mevak ane ndi nlem éte! A mbe fe a yeme’e na,  nge a ba’ale élate jé a Yéhôva, a ye bi abui bibotan; a mbe a yeme’e na éyoñe ya ke koon Ésaa é nto bebé. Yésus a nga ke ôsu a ba’ale ndi nlem éte éyoñ a nga tôbane minju’u mia dañ. Bia fe bia yiane bo avale da. Amu meva’a me tele fe bia ôsu. Yéhôva a ve môt ase ya be bia beta ma’a ya bo ésaé ja fubu éyôlé jé. Bi ne liti na Satan a ne nlaa minsos éyoñe bia tobe Yéhôva ane Njôô wongan, a éyoñe bia ke ôsu a ba’ale biabebien nye’ane Zambe été, ja’a bia tôban avale meve’ele avé.

20. Jé é ne volô wo na ô bi mbamba b’asimesan, a na ô ba’ale ndi nleme jôé?

²⁰ Yéhôva a nji yi ve na a botane bebo bisaé bé ba ba’ale élate jap a nye, a ne fe ôjeja’a ya bo de. (Ésaïe 30:18; lañe’e Malachie 3:10.) Éyoñ bebo bisaé bé be bili minkômbane miziñ, nge minkômbane mite mia yian, a wô’ô mvaé ya jalé mie. (Besam 37:4) Ajô te, kele’ ôsu a ba’ale ndi nleme na Yéhôva a tôé bengaka’a bé bese. Te jô’é na mbia émo Satan nyi a bo na ô bi mbia b’asimesan. Nge ô yene na nsisime ya émo ô tatéya na wo nyiine wo ôsimesan nge nlem, ye’elane Yéhôva a nlem ôse na a ve wo “mvo’é Zambe . . . je adañe fe’ ése.” Mvo’é Zambe éte nje ja ye ba’ale nleme wôé a ôsimesane wôé.—Bephilippien 4:6, 7.

21, 22. (a) Mbamba ndi nleme mbé “bizu’u bi bôt” bia nyane nye? (b) Ngaka’a fé ô ne ôjeja’a ya yen é tôéban, a ô nyoñeya ntyi’an ôvé?

 ²¹ Za avale beta ndi nlem bi bili di! Nge ô ne môte wua ya “bizu’u bi bôt” bia ye “so beta nju’ été,” tame simesan mbamba ényiñ a yange wo ana’ana. (Nlitan 7:9, 14) Mbôle Satan a mimbia minsisime mié mia ye bo momo éyoñ éte, bia ye wô’ôtan avale mvo’é da dañ ôsimesane wongan. Za ya be bia a ne ngule ya tu’a yem aval ényiñ ja ye bo éyoñ émo ja ye kôlô éjôé Satan si? Abime meva’a bia ye wô’ô éyoñe éte, nté bia ye saé na si é bo paradis, éjôé Yésus a bôte 144 000 si! Bi ne njalan a mevak éyoñ bia simesane na, ana’ana, akon ése a aval éyem ése bia ye man, na bôte bangan be nga wu ba ye wômô, a na bia ye nyiñ avale Yéhôva a nga yi atata’a. Nté bia ye ke bia bo bezôsôô, nalé fe bia ke bia subu “eto [fili] ya étôto’o ya bon be Zambe” bebé, avale kalate Beromain 8:21 a jô.

²² Yéhôva a yi na bi bi nya éto filii. Ve asu na bi bi éto fili éte, bia yiane nye bo mewôk. Nga nalé a yiane na ô ve ngul ése na ô bo Yéhôva mewô’ô môs ane môs? Ajô te, kelek ôsu a lôñe womien mbamba mbunan a dañedañe yôp, asu na ô ba’ale womien nye’ane Zambe été nnôm éto a nnôm éto!