1, 2. Ka wadagimanu lánina ábunaguni wadügübei, ani ka uagu súdini lubéi wadügüni buidu?

BERESEGUÑADÜN lidan tábunawagun aban óunwenbu muna. Lǘhadün lidan wadagimanu le ani gíbegili hubaroun. Hénrenguti, gama lumoun barüti saragu ugundani hun. Ka lan yebe asusereda, masaminaruntün hígiruni ni lun hadügüni lau magúali. Busentün hadügün aban wadagimanu buiti, lugundun gánibei igaburi le aubei hadügei efekütu lidan hibagari. Gama lumoun, háfuga hálügüdagun hungua: “Ka san muna to uáguboun wayanuha?”. Wayanuhaña huagu.

² Ayanuhati disipulu Húdasi luagu wadagimanu le ladügübei kada aban wádangiñe luougua. Lidan bérusu le ñein lubéi lariñaga houn kristiánugu lun “[herederun] lidan línsiñehabu Bungiu”, ariñaga lumuti giñe furumiñeti katei le lunbei líderaguniwa adügei, ariñagati lunti lan deregüdagumeme wamá lidan wafiñen le harumabei (Húdasi 20, 21). Ida luba wederebudagüdüni wafiñen lun gayara lan werederun lidan línsiñehabu Bungiu? Akutiha wamá ǘrüwa katei le lunbei líderaguniwa.

3-5. a) Ka burí iyeeni libügürü lilurudun Heowá labusenrubei Satanási lun wafiñerun? b) Ru humá aban hénpulu luagu ida luba lan warihini lilurudun Bungiu luma ida luba lan wasandiragun woungua dan le warihini ítara.

³ Le furumiñeti, wederebudagüdüni wafiñen luagu lilurudun  Heowá. Tidan líburu to, akutihaadiwa saragu lídangiñe usa o igaburi le lamuriahabei Heowá wámagiñe. Ida luba warihini katei le? Hínsiñeti hamuga lun Satanási wasaminarun mígirun lániwa lilurudun Heowá luma burí inarüni méiniti le tídanbei Lererun, lun wadügün ni kata ni lun wawaragun. Kei larihini buidu lan lidin lun tau sádara to lidan fuluri-agei Edén, anihamemegua ayusuroun (Agumesehani 3:1-6). Gama lumoun, wéiguaduba giñe san tidoun? Segunme ligaburi warihini lilurudun Bungiu.

⁴ Ru wamá aban hénpulu. Lun hamuga woudin asariñaha lidan aban lubuidun párüke, ábati warihin anihein lan aban óunwenbu baríeiru wagibugiñe le adourubalin üma lidoun aban fulasu buiti lidan párüke. Furumiñe saminatün ladarasahañein lan hémeri. Danti le harihin buidu aba híchugun fe anihein lan aban liñún gáñiti luéigiñe le aban oubaü aranseñu lun lábürühan huagun. Anati guentó gunfuranda humaali huuti lan baríeiru ligía luéi hasufurirun damichi. Guentó samina wamá: anihein funa somu gürigia aranseñu lun ladügün dañu woun? Anha, lugundun wéridi tumutiwa Bíbülia: “Agagudúañu humá, ragüguañu humá hungua, lugundun éibugañahadügü liña Mafia le hágani keisi liñún gáñiti áluaha kaba lan lagünrinchagua” (1 Féduru 5:8).

⁵ Ítara liña Satanási kei aban agaliruhati le gáñiti. Ani lun méiguadun wamá tidoun lisadaran o lidoun sun luwuyeri ‘liyeeni’, ruti Heowá lúrudu burí woun (Éfesuna 6:11). Ligíati, danme le wasaminarun luagun lúrudu burí ligía, áfaagua wamá lun warihini kei ligaburi larufuduni Wáguchi le siélubei weiri lan wínsiñe lun. Dan le warihini ítara, gunfuranda wamuti lunti lan lóunigiruniwa luma lun gunda wamá. Ligía labürühanbei disipulu Santiagu: “Ánheinti gürigia le héchubei aturiahoun Lererun Bungiu to úabei mégeiti tidan, ani furigüda tawa lídangiñe figóu, [...] gúndaati le tímatimaati” dan le ladügüni le tariñagubei (Santiagu 1:25).

6. Ka manera buítimabei lun wederebudagüdüni wafiñen luagu lilurudun Bungiu le richabei luma luagu inarüni méiniti le tídanbei Lererun? Ru humá aban hénpulu.

⁶ Wawinwanduni lilurudun Bungiu ligía manera buítimabei  lun wederebudagüdüni wafiñen luagu Heowá luma lilurudun. Mosu giñe gaganbadi wamá lun “lilurudun Kristu”, kéiburi le ñein lubéi líchigei gumadi lun larufudahóun ‘sun le uágubei lariñaga woun’ (Galasiana 6:2; Matéu 28:19, 20). Kei kristiánugu gaganbaditiwa giñe lun gumadi lun wadamuridagun lun wáhuduragun lun Bungiu ani gunda wagíame hama wíbirigu (Ebüréu 10:24, 25). Ruti giñe Bungiu gumadi lun wafurieidun lun súnwandan tídangiñe wanigi (Matéu 6:5-8; 1 Tesalónikana 5:17). Dan le gaganbadi wamá lun gumadi burí le, ábatima wachoururuni hínsiñehabu lan Bungiu. Gunfuranda wamuti ru lan gumadi burí le aban ugundani woun le siñabei líchuguni ubóu le buinbei lau turóbuli. Chóuruti ábatima lan lederebugudun wafiñen luagu lilurudun Bungiu dan le wasaminarun luagu sun buiti le ibiha wamaalibei dan le gaganbadi wamá lun.

7, 8. Ida liña tíchugun Lererun Bungiu dǘgüdaguaü houn ha hanufudebaña luéi siñabei lan úaragua hamá lun Bungiu lau lásügürün dan?

⁷ Añahein gürigia nidiheritiña ladüga saminatiña hénrengubei lan gaganbadi hamá lun lilurudun Heowá lau lásügürün dan, hanufudetiña hachararun. Anhein asusereda ligíameme woun, haritagua waméi dimurei burí le: “Au Heowá, au Bubungiutebei, le arufudahabei bun lun buidu lan lidin bun, le adundehabadibu luéigiñe üma le lunbei bafalaruni. Adügaadibu  hamuga gasu lau nugumadin! Ítara liña hamuga bidarangilan kei duna éibaaguati, ítara liña hamuga biricha kei lugudi barana” (Isaíasi 48:17, 18, TNM). Raramaguaadiwa san asaminara luagu dǘgüdaguaü le líchugubei dimurei burí le?

⁸ Füramaseti Heowá lidan bérusu burí le, ánhawa lan gaganbadi lun, wibihiba lan biama abiniruni. Furumiñe, ítara luba lan wadarangilan kei duna éibaaguati: gíbebei ani magumuchadibei. Libiaman, ítara luba waricha kei lugudi barana. Ánhawa eredera béyabu aríaguei liabin lugudi barana aban lárigi aban, aba wasandirun magumuchadibei lan: subudi wamuti lasigiruba lan abounha gumugua dan. Arufudati bérusu le, ítara luba lan giñe waricha o ligaburi wawinwandun adügei le buídubei, laduraruba lun súnwandan. Ánhawa áfaagua lun úaragua wamá lun Bungiu, mígirunbei lun wéiguadun (aliiha huméi Sálumu 55:22). Sagü waliihani füramasei burí le aba lederebugudun wafiñen luagu Heowá luma lilurudun le richabei.

9, 10. a) Ka uagu buidu lubéi wáfaagun lun wawanserun lidan wasubudin tuagu Lererun Bungiu? b)  Dan le derebugu wamá lidan wafiñen, ida liña líderaguniwa lun gunda wamá?

⁹ Le libiaman, darí wamuti lidan dimurei le: “Wabaruaguóun wamá [...] lidan wasubudin tuagu Lererun Bungiu” (Ebüréu 6:1). Uguñe weyu siñati macharabadiwa lan, gama lumoun gayarati wáfaagun lun wabaruaguóun wamá lidan wasubudin tuagu Bíbülia. Eibume wawanserun, wéiritimabei wagundan lidan weseriwidun lun Heowá. Ka uagu?

¹⁰ Kristiánu le derebuguhali lidan lafiñen ariha lumuti katei kei larihini Heowá (Huan 4:23). Ariñagati Pábulu: “Ha abagaridubaña según igaburi lánina figóu, luágunrügüñein katei le lánina ubóu haritagua; ánhaña ha abagaridubaña keisi lugundan [s]ífiri [s]andu, luagun katei le lánina sífiri haritagua” (Rómana 8:5). Ha abagaridubaña según ligaburi ubóu murusunrügüñein ugundani hasandirun, hawouguounrügüñein haritagua, úati furangu lan harihin ani hanarimeti háfaagun  lun hibihin umegeguni. Gama lumoun, ha derebuguhañabaña lidan hafiñen, wéiriti hagundan, lugundun ru hamuti habagari luma sun hemenigin luagu Heowá. Busentiña hagundaaragüdüni ani gúndaatiña íbini dan le lóuchawagun hafiñen, lugundun subudi hamuti ánhaña lan úaragua harufudubei ye lan Satanási ani hagundaaragüdübei Háguchi le siélubei (Ariñawagúni 27:11; aliiha huméi Santiagu 1:2, 3).

11, 12. a) Ka lariñagubei Pábulu luagu iarani le wawagubei lun wasubudiruni le buídubei lumoun le wuribabei ani ka mini lubéi dimurei le ásügürawagüdübei kei ‘échudagüdei’? b) Ka lemegeirubei wágubu lun gayara lan wánhingichuni kei auti wabusenra?

¹¹ Lun derebugu wamá lidan wafiñen mosu wayusuruni sun wani sentidu. Ítara liña lariñaguni bérusu le: “Éigini le dǘgüdati hounti gürigia ha derebuguhaña lidan hafiñen, ha ayusurubalin iarani le hawagubei lun hasubudiruni le buídubei lumoun le wuribabei lun héchudagüdüni lun ítarameme lan asubudiragüdei houn (Hebreos 5:14, TNM). Dan le lariñagunbei Pábulu mosu lan wéchudagüdüni iarani le, yúsuti aban dimurei Güriegu le meha ayusurúbei lidan burí fulasu le ñein lubéi meha hadüga gürigia ehersísiu lidan furumiñeti sígulu, ani mini lan ‘aransera kei aban himnasta’. Ariha waméi ka lan mini lubéi aranseruni le.

¹² Úati gürigia asubudiruti ida luba lan ladundehani lúgubu lúmagiñe lágurahoun. Dan le málügili nasirua hamá irahüñü, siñati hánhingichuni lumegegun hágubu buidu, kéiburi harüna luma hayada, ligía habuleseirunbalin irahüñü hagibu lau háhabu lárigiñe aba hasafaragun. Gama lumoun, murusun murusun dan le hayusuruni lumegegun hágubu, aba gayara hamaali lan ánhingicha ñeinhin lumuti habusenra: furumiñe aba hawarihan, lárigiñe aba híchuguni furumiñeti pasu, lárigiñe aba héibaagun. * Arihúati hawagu ha adügübaña ehersísiu halía lan lébeda aban gürigia. Dan le warihiniña  achubaha o agarabaha garabalirugu sin hachugeragun. Chouru wamuti murusunrügaali lan habá lun ítara hamá kei aban máhina to machararaditu. Gama lumoun, mama ítaraguarügüti lira: mégeitiña hásügürün saragu dan adüga ehersísiu. Arufudatu Bíbülia “ídeha lan ehersísiu lun buidu lan átuadi”, arufudatu giñe huutimati lan wánhingichagun woungua lidan wagunfulirun luma Bungiu (1 Timotéu 4:8, Traducción en lenguaje actual).

13. Ida luba wéchudagüdüni iarani le wawagubei lun wasubudiruni le buídubei lumoun le wuribabei?

¹³ Tidan líburu to, akutihaadiwa saragu katei le íderagubadiwa ayusurei iarani le wawagubei lun wasubudiruni le buídubei lumoun le wuribabei lun gürigia wamá ha derebugutiña lidan hafiñen ani seriwi wagíame lun Heowá lau úaraguni. Sagü weyu, lubaragiñe desidírü wamá luagu somu katei lunti wakutihani sun lilurudun Bungiu lábugiñe furíei. Álügüdagua wamá woungua: “Ka burí san lúrudu o inarüni méiniti gayarabei líderagunina lidan katei le? Ida luba nayusuruni? Gundaabei san Heowá lau le nasaminarubei nadügün?” (aliiha huméi Ariñawagúni 3:5, 6; Santiagu 1:5). Ánhawa akutihei le tariñagubei Lererun Bungiu lubaragiñe desidírü wamá, wéchudagüdübei iarani le wawagubei lun ítarameme lan asubudiragüdei woun ka lan buídubei lumoun le wuribabei. Ítarati, gürigiabadiwa ha derebugutiña lidan hafiñen.

14. Lun wederebugudun lidan wafiñen, ka lunbei wadügüni ani ka igaburi lunbei wadisedun luéi?

¹⁴ Íbini derebuguhali lan wafiñen ani buiti wamadagua luma Bungiu, mosu wawanserun wabaruaguóun. Lun merederun wamá lidan ligiaméme, mosu wéigin buidu.  Lugundun kei lariñaguni Pábulu, “éigini le dǘgüdati hounti ha wéinamuhañabaña lidan hafiñen”. Ligíati, lun derebugu lan wafiñen súnwandan, mosu wéigin éigini le dǘgüdati tídangiñe Lererun Bungiu. Mosu wafurendeirun awinwandei le wafurendeirubei, súdiniti katei le, lugundun kei tariñaguni Bíbülia, ‘lichú aau lubaragiñebei furumiñeguarügü katei’. Ligíati, lunti lubéi wasandirun aban lanarime ilamaü luagu inarüni le larufudahabei Wáguchi woun (Ariñawagúni 4:5-7; 1 Féduru 2:2). Gama lumoun ka lan yebe libe wasubudin luma lichú wau, mama aban resun lira lun wabulofuhan ni lun íñugu lan wanaagun woungua. Dan luagun dan, mosu wachoururuni mama lan lanügüña íñuguni luma amu luriban igaburi fulasu tidan wanigi. Abürühati Pábulu: “Aríagua humá hungua anhein derebuguñu hiña lubéi lidan hafiñen; hóuchagua humá hungua” (2 Korintuna 13:5).

15. Ka uagu mégeiwa lubéi ínsiñeni lun wasigirun awansera lidan wamadagua luma Bungiu?

¹⁵ Lárigiñe tábunawagun aban muna, mosu letenirúniwa tun ani anihein dan gayarati lichugún tanwoun lun wéiritima tan. Ligíameme asuseredubei lun wamadagua luma Bungiu. Ka wemegeirubei lun wakipuruni ani awanse ligíame? Lóugiñe sun katei, ínsiñeni luagu Heowá luma hawagu wíbirigu. Lun hamuga ua lan ínsiñeni mahuudunti hamuga sun le wasubudirubei luma le wadügübei lun ni kata (1 Korintuna 13:1-3). Anhein hínsiñehabu wabéi lederebuguduba wafiñen luma wamadagua luma Heowá.

16. Ka saminaü ládahabei Satanási lidoun hachügü gürigia, ani ka líchugubei Heowá lun lóunigiruniwa?

¹⁶ Akutiha waméi lǘrüwan katei le lunbei líderaguniwa lidan wamadagua luma Bungiu. Lun wóuserun kei aban kristiánu le inarüniti, mosu waríaahani ka lan lídanbei wasaminan. Satanási le agumadihabei ubouagu, buiti lidan ládahoun luriban saminaü lidoun hachügü gürigia, adügati lun hasaminarun  siñá habéi lan somu katei adüga, lun mafiñen hamá luagu ni kata luma lun magurabaguadi hamá (Éfesuna 2:2). Ani peliguruti igaburi burí le woun kei hamutiri tun aban muna lautu fulansu. Gama lumoun ruti Heowá aban katei le chóuruti woun lun lóunigiruniwa: emenigini.

17. Ka hénpulu tayusurubei Bíbülia lun tarufuduni súdini lan emenigini?

¹⁷ Ariñagatu Bíbülia ítara liña lan ‘emenigini lánina asalbaruni’ kei aban katei le lunbei líderaguniwa lidan wageindagun kóntüra Satanási luma ubóu le lábugiñebei lugumadin. Konpararü tumuti luma bunidi le aubei ladouragua súdaara lau lichügü (1 Tesalónikana 5:8). Lidan tidaani Bíbülia, héchutiña meha súdaragu adaüra aban bunidi le lauti gürabu ligibuagun aban le lauti gueru, lun maweirin lan habuleseirun; subudi hamuti anhein lan madaü hamá lubá háfuridun ageindagua hóunweguba lan. Ítara kei ladouragun bunidi lau lichügü súdaara, ítara liña giñe ladouragun wemenigin lau wasaminan.

18, 19. Ida liña larufuduni Hesusu ka lan mini lubéi wakipuruni wemenigin, ani ida luba wáyeihani?

¹⁸ Arufuda lumuti Hesusu buidu ka lan mini lubéi lakipurúniwa emenigini. Haritagua waméi sun le lasufurirubei lagumuhóun guñoun le ya lubéi ubouagu. Aban hádangiñe lumadagu ha hínsiñetimabaña lun, alugura lumuti luagu seinsu. Le aban ariñagati ibidiñe lan lun. Ha híbiri aba hanurahan. Íbini lílana lageira garabaguatiña lun, amuriahatiña lun lasufurirun háhaburugu súdara rómana ani áfara hameime hilagubei. Chóuruti súfuri lan óuchawaguni le hénrengutimati luéi le lunbei wasufuriruni. Ka íderagubalin lun lawandun? Ariñagatu Bíbülia: “Súfuriti Hesusu luagu wagabu, meberesenga ligía lau nibusigarídüna lan luwuyeri óunweni ligía, lugundun subudi lani luagu lásurun lanme lasufurirun, lagundaaruba lan” (Ebüréu 12:2, TNM). Mabulieidun lumuti Hesusu “lagundaaruba lan” lárigiñe sun katei.

¹⁹ Ka san lébunabei ugundani ligía? Lasubudiruni le lunbei meha libihini ladüga úaragua lan: lídehan lidan ladügǘn liri Bungiu sándume luma larufuduni ye lan Satanási. Úati  emenigini wéiritimati lun lagundaaragüdüni Hesusu! Subudi lumuti meha giñe wéiribei lan lafayeiruaha lúmagiñe Lúguchi le siélubei ani lanügayabei lan awinwanda lúmagua sielu. Kipu lumuti Hesusu emenigini le lidan lisaminan lidan dan le hénrengutimabei. Ani ligía giñe lunbei wadügüni. Maweiyasun wamá abulieidei ugundani le füramase lubéi Heowá woun kei ladüga Hesusu. Arufudati Heowá gebegi wamá lun lau líchuguni chansi woun lun wídehan lidan ladügǘn liri sándume ani arufuda wameime ye lan Satanási. Ida? Mosu wárügüdün luagu Wáguchi le Suntigabafu, redei wagíame lidan línsiñehabu ka lan yebe óuchawaguni ñübuinti.

20. Kaba íderaguawa akipura aban lubuidun igaburi luma lun meferidirun wamani wemenigin?

²⁰ Aranseñu liña Heowá lun líchuguni wafayeiruaha woun ladüga weseriwidun lun lau úaraguni ani busenhali ladügüni (Isaíasi 30:18; aliiha huméi Malakíasi 3:10). Hínsiñeti lun Heowá líchuguni le tayumahabei hanigi lubúeingu houn (Sálumu 37:4). Ligía lunti lubéi wíchuguni warihin luagun emenigini le lunbei wibihini. Maweiyasun wamá áyeihei igaburi wuribati, wíyeti ani múaranti le lídanbei binadu ubóu lani Satanási. Ánhawa asandira luagu labadüleruña lan igaburi ligía wawagu, amuriaha wamá luma Heowá tídangiñe sun wanigi lun “líchuguni [...] lidarangilan [woun] le wéiritimabei luéi sun subudi”, lugundun ligíaba óunigiroun wanigi luma wasaminan (Filipuna 4:6, 7).

21, 22. a) Ka óunwenbu emenigini hawagubei “saragu gürigia”? b) Ka katei gebegitimabei hun lídangiñe hemenigin keisi kristiánu, ani ka lunbei hadügüni?

 ²¹ Ma lubuidun wemenigin! Anhein hádangiñetiwa lubéi “saragu gürigia” ha lunbaña háfuridun lídangiñe “óunwenbu asufuriruni”, samina wamá luagu sun le agurabubadiwa (Arufudúni 7:9, 14). Hénrenguti gunfuranda wamani awalidaguni le lunbei wasandiruni danme le gumuguagüdawaali Satanási hama lumafianu, lugundun úagili ni aban wádangiñe awinwanduti líbüreñu luéi lóuchaguni Mafia. Danme le úaali óuchawaguni burí le, gúndaabadiwa lau wawadigimaridun lidan ladügǘn Ubóu paraísume lábugiñe ladundehan Kristu hama 144,000 ha lunbaña harúeihan luma siélugiñe. Wéiriti wayumahan warihini lagumuchagun sandi, weresibiruniña waduheñu danme le háguyugun ani wínwan wagíame aban ibagari le buiti kei labusenruni Bungiu lúmagiñe furumiñeti dan! Danme le yarafaali wibihini ibagari sin figóu, yarafatimahadiwame lun wibihin aban afayeiruahaü le wéiritimati: aban “esefuruni wéiriguti houn lirahüñü Bungiu” (Rómana 8:21, TNM).

²² Busenti Heowá lun wibihiba lan aban esefuruni le marihinwañahagili. Ánhawa gaganbadi ligíaba wibihini esefuruni le inarüniti. Ma buiti wáfaagun weyu luagu weyu lun gaganbadi wamá lun Heowá? Deregüdagumeme humá lubeiti lidan hafiñen le harumabei redei humaamuga lidan línsiñehabu Bungiu lun súnwandan!