1, 2. Weyo onna mabasa gani a omaga, nanda mukalelo wa mabasa awo okaleli eni wofuneya?

WEYO onolaba na guru va mabasani a omaga numba. Mabasaya anodhowavi nanda musogorho mabasaya anelege osogorhavi. Mpaka ovanene, mabasaya anorutxa mbwenye anoweeddavi. Peno elobo gani empadduwa, weyo ohigana wila kunakale muwara, peno akala mabasaya baderetu obe babure anela opakela egumi yawo, vina anela opakela musogorho mwawo. Sabwa yani? Sabwani numbaya emmagiwa ddi weyo!

² Namasunza Juda onloga mabasa a omaga abene ankosihu noka. Valibihiliye Akristu wila “kalaniví mukwelani mwa Mulugu,” iyene vina wahiloga va ddimani yakakene eli ya makamakaya okosa ejene: “Libihaní otibela elinyu muroromelani mwenyu wawakwana.” (Juda 20, 21) Bavi makalelo mena a ovilibihana wamwinya, ovaddihaga nroromelo nawo wila okalevi mu okwelani mwa Mulugu? Ndoweni nifwaseyele dhilobo tharu dha omaga omuyani oli vamentoni vawo.

3-5. (a) Satana agaziveliwe wupupurutxa modheela okaana moonelo gani wa magano a Yehova? (b) Ninfanyeela woonaga dhavi magano a Mulugu, nanda onfanyeela opakela dhavi mukalelo onoonihu? Kaladdaniha.

³ Vadhulu va dhotene, ninfuna nilibihe nroromelo nehu mu nlamuloni na Mulugu. Venevo vasunziliwe nivuru nthi,  ohimala woona magano ooligana a Yehova owiwanana na mweeddelo. Weyo onoona dhavi magano aba? Satana agahiziveliwa wupupurutxa modheela woonaga malamulo a Yehova, magano vina meeddelo ninga anukooddiha elobo, vina okalaga ninga a otabala. Iyene onolabihedhaga marhe aba ovenya mudhidhi weeddeleyani deretu mu Edeni. (Wita 3:1-6) Marhe aba anela wupupurutxa? Eji engayela mweeddelo wawo.

⁴ Wila nitagihe: Weyo onoweedda mmunddani mokoddela wa marhuwa, osogorhowa weyo woona nsitho nolapa novadda vaddiddi nubarelaga wila ohivolowe epaddi yina ya munddaya. Epaddi ya mundda eli osogorho wa nsithona ehikoddela vaddiddi. Omaromowa, weyo podi woonaga nsithona ninga nohifuneya nimbarela ofuru wawo. Venevo vanturumeliwe mu nsithonimwa, mpaddi obule onowoonamo enama ya mukokolani yowopiha, poddogoma edelaga yojaye! Ovano onononelamo yawila txibarene nsitho nthi yobarela. Ki ohikala enama yowopiha enuwidela ovanene? Nzu na Mulugu ninolaga: “Kalaní txenjewa, kamugone! Mwiddani wenyu, satana, onowurugunuwani ninga poddogoma ongóroma amutamelaga womuja.”​—1 Pedro 5:8.

⁵ Satana enama yowopiha vaddiddi. Sabwani Yehova kanfuna wila Satana anitakune, Iyene ohimetxa malamulo wila anikubarele mwa “opyaga” wa wabure. (Éfeso 6:11) Noona siku na siku vantanaalelihu malamulo a Mulugu, ninofanyeela woonagamo okwela wa Babi wehu wa odhulu. Nigoona malamulo a Mulugu na mukalelo obu, abaya anokala nipara na muthiddeeleyo vina ohagalala. Namasunza Tiago ohileba: “Mwina onofwaseyela ovuruwana nlamulo nawakwana na Mulugu, ninnidhélana ofuru, onovikómamo, . . . oddu-wene ddinajevo murenddele mwa dhetene dhinireye.”​—Tiago 1:25.

6. Buvi oli mukalelo waderetu wa olibihana nroromelo mmalamuloni vina mmaganoni ooligana a Yehova? Kavaha yotagiha.

⁶ Okalagawo na magano a Mulugu bu mukalelo waderetu vaddiddi wa olibiha nroromelo nehu vamentoni va Namavaha malamulo vina zelu ya malamulo aye. Motagiha, “magano a Kristu” anotaganyihavo na nlamulo na Yezu na wasunziha  athu ena ‘dhilobo dhotene dhurumiliye.’ (Galásia 6:2; Mateu 28:19, 20) Vina Akristu kanvegana nlamulo na otugumanelaga webedha vamodhavi vina magumano a olibihana. (Ahebreu 10:24, 25) Malamulo a Mulugu anotaganyiheya vina na, nlago na olobelaga vamentoni va Yehova mohivumela vina ovenya mmirimani. (Mateu 6:5-8; 1 Tesalónika 5:17) Venevo vankalihuwo na magano aba, ninowoona kakamwe wila aba magano ookwela. Wiwelelaga magano aba ononivaha ohagalala vina oziveliwa esene dhihigafanyilehu mpaddi mwina mwilaboni mpuno mwa mbigiddi. Ninga mumaleliwe otanaalela mukalelo opurilewemo modheela okalagawo mowiwanana na malamulo a Mulugu, nroromelo nawo kaninliba vaddiddi?

7, 8. Nzu na Mulugu ninathiddeela dhavi abale anzuzuma yawila txino kanawodhe okaanavi dila yoligana yaka na yaka?

⁷ Dila dhiina athu ena anotikina, yawila enorutxa wiwelela malamulo a Yehova yaka na yaka. Anova wila siku nimodha anodha ogwa. Akala weyo onoonamo dhaene, kobuwelaga mazu aba: “Miyo ddili Nabuya Mulugu wawo, onuvaha magano ankaliha, onuvelela mudila dhinfwanyela weyo ovira. Weyo Izrayel kovirihamo dhaurumemi, gari yawo egali ninga mwinji, oosanzaya wawo ogantepuwa ninga manebe a mbara.” (Izaiya 48:17, 18) Wahiromaga wimela wila otanaalele mukalelo onlibiha mazu aba?

 ⁸ Apano Yehova onnubutxedha wila ninojavo sabwa ya omwiwelela. Iyene ohiroromeliha mareeliho meeli nigakosa ejene. Nreeliho noroma, murenddele wehu onela okala ninga mwinje​—wofwasa, mwinji, wohigoma. Nreeliho nanawili, oligana wehu onela okala ninga manebe a mbara. Ogemela mu txerereni ya bara nanda bugañgana manebe adhaga vina adhowaga, mohaganyedha onela woona ekalelo yohigoma. Weyo onoziwa yawila manebeya anelege odhavi, amwadheyaga mu txerereni ya baraya mwari mwa vyaka dhohengeseya musogorho. Yehova onloga wila oligana wawo​—dila yawo ya okosaga ejile ekalile​—onela okala wa mukalakala. Venevo vanwarareliwe okala wororomeleya vamentoni vaye, txipo iyene kanothiye ogwa! (Kengesa Masalmo 55:22.) Nlibelo nthi na murima wotene kaninlibiha nroromelo nawo vamentoni va Yehova vamodha na magano aye ooligana?

9, 10. (a) Owarala okaleli eni elobo yaderetu wa Akristu? (b) Moonelo wa omuyani onnikamiha dhavi ohagalala?

⁹ Mwaha wanawili wa mabasa awo a omaga onlagihiwa mmazuni aba owubuwelihiwa: “Nisogorhena masunziho owaralayá.” (Ahebreu 6:1) Owarala eji efunelo yaderetu vaddiddi wa Akristu. Mothiyana na wakwana, okwene ohinwodha ofiyedha athu a omaningoni ovanene, owarala onofiyedheya. Vina, Akristu anofanya ohagalala onddimuwa amulabaga Yehova venevo vanwaralani. Sabwa yani?

¹⁰ Mukristu wowarala iyene muthu wa omuyani. Iyene onowoona dhilobo na mukalelo onoona Yehova. (Joau 4:23) Paulo ohileba: “Abale aneddihiwa na makalelo ovirigana a mwili, anotamela dhinkola mwili; abale aneddihiwa na Muya, anotamela dhinfuna muyayá.” (Roma 8:5) Moonelo wa omaningoni on’hagalaliha vañgonovi, sabwani onfunetxa dhawovi, kundowa wolapa, nanda ontameletxa dhilobo dha omaningoni. Moonelo wa omuyani onohagalaliha, sabwani onnyaalihedhiwa wa Yehova, “Mulugu wothithimeheya.” (1 Timóteo 1:11) Muthu wa omuyani onfunetxa omuhagalaliha Yehova  vina onohagalala agakala mutxiddo mwa makathamiho. Sabwa yani? Makathamiho anonivaha gari ya olagiha wila Satana muthambi vina onotamela wimela, omuhagalalihaga Babi wehu wa odhulu.​—Gano dh’olelana 27:11; kengesa Tiago 1:2, 3.

11, 12. (a) Paulo ologile eni mwaha wa ‘mobuwelo wononelamo’ wa Mukristu, nanda txini entapulela nzu ‘osunzihiwa’? (b) Wila muthu awarale nanda wila asunzihe maningo deretu, osunza gani onfanyeela okosiwana maningoya?

¹¹ Okala muthu wa omuyani vina owarala onda sabwa ya osunza. Katanaalela versikulu eji: ‘Mbwenye, yoja yovadda, ja athu owarala, ja abalene sabwa ya olabihedha anna mobuwelo wononelamo osunzihiwe wila athiyanihe yaderetu na yabure.’ (Ahebreu 5:14, NM) Paulo mulogeliye mobuwelo wehu wononelamo ‘osunzihiwa,’ walabihedhi nzu na Egrego nthene nalabihedhiwetxa mpule mwakosiwa makuruta mu Grésia wa vyaka zana dhoroma, sabwani nzu nthi podi otapuleliwa ‘osunzihiwa ninga nikuruta.’ Ovanene kobuwela ejile entaganyiheya na osunza oku.

¹² Mudhidhi obaaliwehu, maningo ehu kasunzihiwe. Motagiha, nyenye ontagihetxa mweeddihedho wa myono na myeddo dhaye dhiñgono. Dhaene, nyenye onodhudha myono dhaye burebure, mpaka vina oviwataka omentoni, eji enomusilidha vina enomutikiniha mwanaya. Vañgono-vañgono, na olabihedha, maningoya anolemeelela. Nyenyeya onoroma wabadha, vasogorhova weeddaga, osogorhowa onofiyedha othamaga. * Dhaene, akala eji eli dhaene ki okosa nikuruta? Ogamoona muliba makuruta alupaga vina azugunuwaga mudhulu-mudhulu na mukalelo wokoddela vina woligana, mmubuweloni mwawo kamuli waganyedha yawila maningo ali ninga makina ansasanyedhiwa. Thotho dha muliba  makuruta kadhipadduwile woka​—wanfanyeela osunza mawora menjene. Nikuruta na osunziha maningo, Bibilia onoziwa wila “kanimpuriha venjene.” Wa thima vaddiddi ku osunza wehu wa na guru na etanaalelo ya ononelamo omuyani!​—1 Timóteo 4:8.

13. Niwodhe dhavi osunziha mobuwelo wehu wononelamo?

¹³ Mu nivuruni nthi, nihimala osekeserha ejile enokamihe osunziha mobuwelo wawo wononelamo wila okalevi wororomeleya vamentoni va Yehova ninga muthu wa omuyani. Na nlobelo kobuwela magano vina malamulo a Mulugu venevo vansakuliwe dhilobo dha egumi ya siku na siku. Dhosakula dhotene dhingumaniwena, kavivuze: ‘Malamulo gani vina magano gani a Bibilia aniwanana na elobo eji? Ddiwodhe dhavi othiddihedha mabasa? Dila gani enamuhagalalihe Babi waga wa odhulu?’ (Kengesa Gano dh’olelana 3:5, 6; Tiago 1:5.) Dhosakula dhotene dhinkosa weyo na mukalelo obu onelege osunziha thotho yawo ya woona othiyana wa yaderetu na yabure. Osunza oku onela wukamiha okalagavi muthu wa omuyani.

14. Ninfuna nikaane efunelo gani wila nunuwe omuyani, masiki na ejene txini enfanyeeligihu wubuwela na opasopa?

¹⁴ Vowila muthu podi ofiyedha owarala, ohikala ofuneya wa wunuwa omuyani. Wunuwa omaningoni ongayela oja. Vina Paulo ohileba: “Mbwenye, yoja yovadda, ja athu owarala.” Mfugulo wa olibihana nroromelo nawo ku ojaga oja womuyani. Venevo vanthiddihedhiwe mabasa esile dhinsunziwe, eji enokala zelu, nanda Bibilia onologa: “Ononelamo, ondhana opimelela.” Dhaene, ninfuna nikaane dala ya dhibaribari dha thima dhinnivaha Babi wehu. (Gano dh’olelana 4:5-7; 1 Pedro  2:2) Txibarene, wenjedha eziwelo vamodha na mirugu dha Mulugu kayo mwaha wa ovithukulana obe ovirungana. Ninfuna nivipepesege wila nihithiye ovithukula obe dhowobana dhiina osapwa vina wunuwa mmirimani mwehu. Paulo ohileba: “Muvipime mwanya, mone akala munowedda muroromelani; vivuzení mwanya.”​—2 Korinto 13:5.

15. Okwela onfuneyela eni wila nunuwe omuyani?

¹⁵ Omaga numba txino podi opulihiwa, mbwenye mabasaya kangoma. Onofuneya osasanyedha na ovenyihedha, vina wenjedhamo kambirhinyadha podi okala wofuneya venevo vansadduwa mikalelodha. Txini enfunehu wila niwarale vina nikoyevi epaddi yehu ya omuyani? Ya makamakaya ku okwela. Ninofanyeela wunuwihagavi omukwela Yehova vina wakwela Akristu akwehu. Nigahikaane okwela, eziwelo yehu yotene vamodha na mabasaya kagakalile elobo ogakalile ninga onyagula onddimuwa. (1 Korinto 13:1-3) Na okwela, ninowodha ofiyedha owarala wa Okristu nanda banigonuwavi omuyani.

16. Satana onlibiha mukalelo gani wa wubuwela, nanda Yehova onivahile nibarelo gani?

¹⁶ Ndoweni nisekeserhe mwaha mwina wa mabasa awo a omaga. Wila ovilibihe ninga namafara webaribari wa Kristu, onofanyeela wañganela mukalelo onubuwela weyo. Satana, mulamuleli wa elabo ejino, ddwathotho mwa wakosiha athu ogwela mu etanaaleloni yohikala, okoodda okuluvela, waganyedha vina ohikaana njeedhelo. (Éfeso 2:2) Mubuwelo obu bowopiha wa Akristu ninga mukaleli muri womagana numba obwene othubwile. Na osanzaya, Yehova onosasanyedha elobo yofuneya ejene enwodha onibarela​—thi njeedhelo.

17. Nzu na Mulugu ninladdaniha dhavi ofuneya wa njeedhelo?

¹⁷ Bibilia onologa dhipaddi dhothiyana-thiyana dha dhitagano dhehu dha koddo dha omuyani esene dhinihuna sabwa ya koddo yehu momusadduwela Satana vamodha na elabo  yaye. Etagano ya makamaka vaddiddi ddi txapewa wa mujila, ‘njeedhelo na musogorho.’ (1 Tesalónika 5:8) Munyakoddo wa nsaka na Bibilia wanziwa yawila kagagoneeli mu koddoni kohikaana txapewa wa mujila. Wili-wili txapewaya wakosiwana mujila nanda babalelihiwa na napa obe thebe, txapewa wa mujila wanthiddeela wila myoba dhanyaalihedhiwa musorho dhisananguwege s’ohipeyiha vaddiddi. Ninga txapewa wa mujila onkubarela musorho, njeedhelo podi okubarela dhubuwelo dhawo.

18, 19. Yezu wimetxile yotagiha gani ya okaanavi njeedhelo, nanda, niwodhe dhavi omutagiha?

¹⁸ Yezu ohimetxa yotagiha ya makamaka ya okaanavi njeedhelo. Kobuwela esile dhavileliyena omathiyu womariha wa egumi yaye velaboni ya vati. Marho waye wa vamirimani wahimuguliha na kobiri. Mwina wahikoodda ngafuna omuziwavi. Ena ahimunyanyala bamuthawa. Athu a elabo yakakene ahimukoodda, akuwaga wila apiwe na ososiwa mmadani mwa anyakoddo a Roma. Enkala ninga ja txibarene ologa wila Yezu wahigumana na makathamiho manddimuwa ahinagumanihuna. Txini emukamihile? Ahebreu 12:2 onowakula: ‘Iyene orumela okwa va pingirizini, katanaalile manyazo a mukweloyá, vowi wanziwa wi masoso abo agamalá, onofwanya othaba onddimuwa. Ddabuno ogilatile omononi woja wa Mulugu.’ Yezu txipo kanathawiwaga ‘ohagalala wavahiwiye.’

¹⁹ Ohagalala gani wemetxiwe vamentoni va Yezu? Txibarene, iyene wahiziwa wila na ovilelagavi, agahikamihedha okoddeliha nzina nokoddela na Yehova. Iyene wahiperheka onamoona onddimuwa vaddiddi wawila Satana muthambi. Kuli njeedhelo niganvahile Yezu ohagalala onddimuwa! Iyene vina ohiziwa yawila, Yehova agahiliva vaddiddi dila yaye yororomeleya​—ejile yali vasogorho vaye yahimetxa mudhidhi waderetu vaddiddi vagagumaniliye wili na Babi waye. Yezu wannubuwelavi njeedhelo nthile nohagalala mwari mwa midhidhi dhorutxa. Ninfuna nikosege yakakene. Iyo vina nihikaana ohagalala wimetxiwe vamentoni vehu. Yehova onomuthithimiha kadda  muthu wa iyo na gari ya okamiha okoddeliha nzina naye nddimuwa. Iyo podi okosela onamoona wawila Satana muthambi modheela omusakula Yehova ninga Mulamuleli wehu munddimuwa vina okalagavi okoyeyene mu okwelani mwa Babi wehu peno makathamiho gani vina manyengetho gani angumanihuna.

20. Txini enokamihe okaanavi mubuwelo wofanyeela vina wa njeedhelo?

²⁰ Yehova kankalela ofunavi wathuva adhari aye ororomeleya​—iyene onofuna okosa ejene. (Izaiya 30:18; kengesa Malakiya 3:10.) Iyene onoziveliwa wavaha adhari aye dhofuna dhofanyeela dha murima wawa. (Masalmo 37:4) Noona keeka mubuwelo wawo va njeedheloni nthene nili osogorho wawo. Txipo kunyimuwe, kunyoonyeye na mobuwelo wa elabo yovirigana ya Satana. Ogoona yawila muya wa elabo eji onovolowa vañgono-vañgono mmubuweloni vina mmirimani mwawo, kamulobelele Yehova wila ovahe “murenddele wa Mulugu, ompitha thontho ya muthu.” Murenddele obu onvahiwehu na Mulugu onela okubarela murima vina mobuwelo wawo wononelamo.​—Filipi 4:6, 7.

21, 22. (a) Njeedhelo gani nothithimiheya nimbona abale a ‘muthithi munddimuwa’? (b) Mpaddi gani wa njeedhelo na Okristu nintapulela elobo enddimuwa wa weyo, nanda osakulile okosa eni?

²¹ Nthi njeedhelo nohagalaliha ninfanyeeliwe otanaalela!  Akala oli epaddi ya ‘muthithi munddimuwa’ obwene onfuna ‘oviluwa va masosoni manddimuwa,’ katanaalela egumi enfuniwe okaana mohigoneela. (Ovuhulela 7:9, 14) Satana vamodha na adomonyo aye bamalile obuddutxiwavo, weyo onela okaana nifuruleyo nthene ninrutxa ononelamowa ovanene. Bani wa iyo, waromilege okaana egumi yohikaana makathamiho a nipakelo novirigana na Satana? Makathamiho aba bamalile ogoma, onakale ohagalala vaddiddi olaba na efunelo ya osaddula elabo wila ekale Paraizu mutxiddo mwa musogorhelo wa Yezu vamodha na alamuleli akwaye odhulu 144.000! Ninofuna vaddiddi na njeedhelo woona ogoma wa maredda na dhizini dhotene, namoyelaga amudhehu anavenyihiwe mu okwani, okalagawo na mukalelo wafuna Mulugu wila nikalegewo! Venevo vanonuwigihu wila nakwane, vina nlivo nddimuwa vaddiddi ninelege waddamela, nlibelo nivuhuliwe va Roma 8:21​—“ofuru, nthithimiho ninakele ana Mulugu.”

²² Yehova onfuna wila weyo wakele muthengo munddimuwa wa ofuru opitha obule ogawodhiliwe otanaalela. Dila ya wufuruni engayela wiwelela. Eji kinfanyeela guru yotene enawodhe weyo okosa ovanene omwiwelela Yehova siku na siku? Txibarene, kavilibihegevi mu nroromeloni nawo nokoddela, wila okalevi mu okwelani mwa Mulugu na mukalakala!