1, 2. ¿Chuqui miʼ mejlel lac mel chaʼan cʼocʼ mi la cajñel yicʼot chaʼan pʼʌtʌlonla, i chucoch ñuc i cʼʌjñibal mi lac mel jiñi?

TI LAC pejtelel la com ajñel ti laj cʼocʼlel yicʼot chaʼan pʼʌtʌlonla. Pero chaʼan mi lac mejlel ti ajñel bajcheʼ jiñi, yom wen mi lac chaʼlen uchʼel, mi lac mel ejercicio i mi laj cʌntan lac bʌ tiʼ pejtelel ora chaʼan maʼañic mi laj cʼamʼan. Ili wersa yom mi lac mel, come laj cujil chaʼan ti wiʼil miʼ mejlel i ticʼlan laj cuxtʌlel, jin chaʼan mij cʌntan lac bʌ. Pero an yambʌ yom bʌ mi laj cʌntan. ¿Baqui bʌ?

² Jiñi xcʌntʼan Judas tsiʼ yʌlʌ chuqui jiñi yom bʌ mi laj cʌntan cheʼ bʌ tsiʼ sube jiñi xñoptʼañob: «Chʌn ajñenla tiʼ cʼuxbiya Dios». Cheʼ jaʼel, tsiʼ yʌlʌ chaʼan yom mi lac ‹xucʼchocon lac bʌ ti jiñi chʼujul bʌ tʼan woli bʌ lac ñop› (Judas 20, 21). Pero ¿bajcheʼ miʼ mejlel lac pʼʌtʼesan jiñi lac ñopoñel (chʼujbiya) yicʼot chaʼan mi lac chʌn ajñel tiʼ cʼuxbiya Dios? Laʼ laj qʼuel uxchajp bajcheʼ yom mi laj cʌntan lac bʌ.

3-5. a) ¿Baqui tac bʌ lot yom Satanás chaʼan mi lac ñop tiʼ tojlel i mandar Jehová? b) Tsictesan yicʼot jumpʼejl ejemplo chaʼan bajcheʼ yom mi laj qʼuelben i mandar Dios, i bajcheʼ yubil mi caj la cubin mi cheʼʌch mi laj qʼuel bajcheʼ jiñi.

³ Jiñi yom bʌ mi lac ñaxan mel chaʼan pʼʌtʌl mi la cajñel tiʼ chaʼan bʌ Jehová jiñʌch mi lac chʌn pʼʌtʼesan jiñi ñopol bʌ lac chaʼan tiʼ mandar tac. Ti ili libro cabʌl tsaʼ laj cʌñʌ toj bʌ i mandar Dios yom bʌ mi lac pʌs. Pero jiñi cʼajtiya jiñʌch: ¿Bajcheʼ  yilal mi laj qʼuel jiñi ticʼojel tac? Satanás yom i yʌqʼueñonla lac ñaʼtan chaʼan tiʼ pejtelel i mandar yicʼot i principio tac Jehová ñupʼul i chaʼañonla yubil yicʼot chaʼan maʼañic chuqui miʼ wis mejlel lac mel. Ti jiñi i tʼojol jax bʌ pʌcʼʌbʌl Edén tsaʼʌch mejli i cʼʌn jiñi yac, jin chaʼan woli (choncol) i chʌn cʼʌn ti ili ora (Génesis 3:1-6). Pero ¿muʼ ba caj i mejlel i cʼʌn ti lac tojlel jaʼel? Yaʼʌch mi caj lac ñaʼtan ti bajcheʼ yilal woli laj qʼuel jiñi toj bʌ i mandar Dios.

⁴ Laʼ lac ñaʼtan chaʼan woliyonla (yʌquelonla) ti xʌmbal ti jumpʼejl parque wen i tʼojol jax bʌ i miʼ cʼotel lac taj baqui joy ñupʼulix i maʼañix miʼ chʌn acʼonla ti ñumel yaʼ baqui wen i tʼojol jax bʌ yilal. Cheʼ bʌ mi lac taj laj qʼuel miʼ michʼesañonla come miʼ mʌctan lac bijlel. Pero cheʼ bʌ mi lac ñumen lʌcʼtesan lac bʌ, mi lac taj laj qʼuel chaʼan yaʼ joy ñupʼul juncojt bajlum wen jontol bʌ yicʼot woli bʌ i chijtañonla. Wʌle la cujilix chucoch ñupʼul: Chaʼañʌch laj cʌntʌntel. Pero laʼ laj cʌl woli bʌ ti ujtel ti ili ora. ¿Am ba juntiquil wen jontol bʌ laj contra woli bʌ i chijtañonla? Añʌch, jiñi i Tʼan Dios miʼ wʌn subeñonla: «Ñaʼtanla pañimil. Chʌcʌ qʼuele laʼ bʌ, come jiñi xiba, jiñi laʼ contra, woli ti pam ñumel cheʼ bajcheʼ colem bajlum woli bʌ ti jujuj tʼan. Woliʼ chijtan i colojm chaʼan miʼ cʼux» (1 Pedro 5:8).

⁵ Tiʼ sujm, Satanás jiñʌch jontol bʌ laj contra. Chaʼan maʼañic mi lac yajlel tiʼ lotiya tac, Jehová miʼ yʌqʼueñonla mandar tac muʼ bʌ i cʌntañonla (Efesios 6:11). Cheʼ bʌ mi lac wen ñaʼtan tiʼ pejtelel i mandar, yom mi laj qʼuel bajcheʼ ñucʼ bʌ i cʼuxbiya ti lac tojlel jiñi lac Tat am bʌ ti panchan. Mi cheʼʌch mi laj qʼuel bajcheʼ jiñi, mi caj lac ñaʼtan chaʼan laj cʌntʌntelʌch yicʼot chaʼañʌch lac tijicñʌyel. Jin chaʼan, jiñi xcʌntʼan Santiago tiʼ tsʼijbu: «Jiñi muʼ bʌ i wen qʼuel jiñi wen bʌ mandar, come jiñi mandar miʼ yʌcʼ ti colel jiñi ñupʼuloʼ bʌ. Majqui jach miʼ wen qʼuel, [...] miʼ taj i wenlel ti Dios ti pejtelel chuqui miʼ mel» (Santiago 1:25).

6. ¿Bajcheʼ miʼ mejlel lac pʼʌtʼesan jiñi ñopol bʌ lac chaʼan tiʼ mandar tac yicʼot tiʼ principio tac Dios? Tsictesan yicʼot jumpʼejl ejemplo.

⁶ Chaʼan mi lac ñumen pʼʌtʼesan jiñi ñopol bʌ lac chaʼan tiʼ tojlel jiñi Ñuc bʌ xʼAcʼ mandar, Jehová, yom mi laj cʼʌn ti laj cuxtʌlel ti jujumpʼejl qʼuin jiñi mandar tac. Yaʼ ochem jaʼel i jacʼol «i mandar Cristo», ili yom i yʌl cheʼ mi lac mel jiñi tsaʼ bʌ i  yʌlʌ chaʼan mi la cʌcʼ ti cʌñol tiʼ ‹pejtelel chuqui tsaʼ bʌ subentiyonla› (Gálatas 6:2; Mateo 28:19, 20). Jiñi xñoptʼañonbʌla mi lac chʼʌm ti ñuc muʼ bʌ i yʌl jiñi Biblia chaʼan mi lac tempan lac bʌ tiʼ chʼujutesʌntel Dios yicʼot chaʼan tijicña mi lac tem ajñel (Hebreos 10:24, 25). Yambʌ mandar jiñʌch cheʼ mi lac mel oración loqʼuem bʌ ti lac pusicʼal ti baqui jach ora (Mateo 6:5-8; 1 Tesalonicenses 5:17). Cheʼ mi lac jacʼ ili mandar tac, miʼ cʼotel lac ñumen ñaʼtan chaʼan laj cʼuxbintelʌch. Cheʼ jaʼel, miʼ cʼotel laj cʌn chaʼan miʼ ñumen aqʼueñonla lac tijicñʌyel yicʼot lac ñʌchʼtʌlel mach bʌ añic mi lac taj ti ili jontol bʌ pañimil (mulawil). Chaʼan miʼ ñumen pʼʌtʼan lac ñopoñel tiʼ mandar tac Dios, yom mi lac wen ñaʼtan chaʼan an cabʌl bajcheʼ miʼ mejlel i coltañonla cheʼ mucʼʌch lac jacʼ.

7, 8. ¿Chuqui ti ñʌchʼtʌlel miʼ yʌqʼuentelob ti i Tʼan Dios jiñi muʼ bʌ i bʌcʼñañob yajlel ti wocol cheʼ bʌ miʼ ñumel majlel jiñi jabil tac?

⁷ An muʼ bʌ i wen cʼojoʼtañob chaʼan mach cʼuñic ti jacʼol i mandar Jehová ti jujumpʼejl jab, i miʼ bʌcʼñañob chaʼan miʼ yajlelob ti wocol. Mi cheʼ mi laj cubin, yom mi laj cʼajtesan ili tʼan: «Joñon a Yumon, a Dioson muʼ bʌ j cʌntesañet chaʼan maʼ taj chuqui wen. Joñon mic tojʼesañet ti a bijlel baʼ yom maʼ chaʼlen xʌmbal. Tsaʼic a jacʼʌ c mandar, cabʌlix i ñʌchʼtilel a pusicʼal cheʼ bajcheʼ colem jaʼ woli bʌ ti ajñel. Añʌch toj bʌ a pusicʼal yicʼot  cabʌl a pʼʌtʌlel cheʼ bajcheʼ wetsʼecña bʌ jaʼ» (Isaías 48:17, 18). ¿Am ba lac wen ñaʼta bajcheʼ miʼ yʌqʼueñonla lac ñʌchʼtʌlel ili texto?

⁸ Jehová miʼ subeñonla chaʼan mi mucʼʌch lac jacʼben i tʼan, mi caj lac taj chaʼpʼejl lac wenlel. Ñaxam bʌ, jiñi lac ñʌchʼtilel mi caj i yajñel bajcheʼ sʌmʌcña bʌ colem jaʼ, wen on bʌ yicʼot mach bʌ añic miʼ jilel. I chaʼpʼejlel, jiñi lac tojel mi caj i sujtel bajcheʼ wetsʼecña bʌ jaʼ. ¿Bajcheʼ an jiñi? Cheʼ muqʼuic lac waʼtʌl laj qʼuel bajcheʼ yilal miʼ ñijcan tilel i bʌ jiñi wetsʼecña bʌ jaʼ, miʼ yʌqʼueñonla lac ñaʼtan chaʼan chʌn cuxul mi caj i yajñel i tiʼ pejtelel ora mi caj i chʌn ñijcan i bʌ anquese miʼ ñumel cabʌl siglo. Jin chaʼan, ili texto mi yʌl chaʼan jiñi lac tojel mi caj i jalʼan mi tojʌch bajcheʼ chumulonla. Mi mucʼʌch lac chaʼlen wersa chaʼan xucʼul mi la cajñel tiʼ tojlel Dios, maʼañic mi caj i wis cʌyonla chaʼan mi lac yajlel ti wocol (pejcan Salmo 55:22). Cheʼ mi lac wen tsajin chuqui miʼ wʌn subeñonla Jehová, mi caj i pʼʌtʼesan jiñi ñopol bʌ lac chaʼan yicʼot ti jiñi toj bʌ i mandar tac.

9, 10. a) ¿Chucoch ti lac pejtelel yom mi lac ñumen colel tiʼ chaʼan bʌ Jehová? b) ¿Bajcheʼ miʼ coltañonla lac taj lac tijicñʌyel cheʼ bʌ mi lac ñaʼtan cheʼ bajcheʼ Jehová?

⁹ I chaʼchajplel yom bʌ mi lac mel jiñʌch mi lac chʌn jacʼ ili ticʼojel am bʌ tiʼ Tʼan Dios: «Yom mi lac bej cʌn majlel i tʼan Dios» (Hebreos 6:1, Jini wen bʌ tʼan). La cujil chaʼan xmulilonla ti lac pejtelel, pero mucʼʌch i mejlel lac ñumen taj lac ñaʼtʌbal tiʼ chaʼan bʌ Jehová. I cheʼ woli lac taj majlel lac ñaʼtʌbal, mi caj i ñumen colel majlel jiñi lac tijicñʌyel tiʼ melol i yeʼtel. ¿Chucoch?

¹⁰ Jiñi xñoptʼan tsaʼix bʌ i taja i colel tiʼ chaʼan bʌ Jehová miʼ chaʼlen wersa i melben i yeʼtel yicʼot miʼ qʼuel tiʼ pejtelel cheʼ bajcheʼ miʼ qʼuel (Juan 4:23). Pablo tiʼ tsictesa chaʼan «jiñi muʼ bʌ i jacʼbeñob i tsucul pusicʼal miʼ chʌn ñaʼtañob chuqui yom i tsucul pusicʼal. Jiñi muʼ bʌ i jacʼbeñob jiñi Espíritu miʼ chʌn ñaʼtañob chuqui yom jiñi Espíritu» (Romanos 8:5). Jiñi muʼ bʌ i bajñel ñaʼtañob chuqui jach yomob, maʼañic mi caj i tajob i  tijicñʌyel come miʼ pʌsob chaʼan miʼ bajñel cʼuxbiñob i bʌ, maʼañic miʼ cʌñob baqui bʌ jiñi i sujmlel yicʼot miʼ cʼuxbiñob chubʌʼañʌl tac. Pero jiñi muʼ bʌ i melbeñob i yeʼtel Dios miʼ tajob cabʌl i tijicñʌyel, come tiʼ pejtelel ora yaʼ chuculob i cuxtʌlel ti Jehová, jiñi tijicña bʌ Dios. Miʼ melob chuqui miʼ mulan Dios yicʼot miʼ tajob i tijicñʌyel cheʼ bʌ miʼ ñusañob wocol ti jiñi ñopol bʌ i chaʼañob. ¿Chucoch tijicñayob? Come yujilob mi xucʼul miʼ yajñelob mi caj i pʌsob chaʼan Satanás jiñʌch juntiquil xlot, i mi caj i yʌqʼueñob i tijicñʌyel jiñi i Tat am bʌ ti panchan (Proverbios 27:11; pejcan Santiago 1:2, 3).

11, 12. a) Tsictesan chuqui yom mi lac mel yicʼot jiñi lac ‹ñaʼtʌbal› tsaʼ bʌ i yʌlʌ Pablo, i chuqui yom i yʌl jiñi tʼan ‹chajpan› am bʌ ti griego. b) ¿Chuqui ti chajpʌntel an i cʼʌjñibal mi la cʌqʼuen lac bʌcʼtal chaʼan miʼ colel yicʼot miʼ taj i pʼʌtʌlel?

¹¹ Chaʼan mi lac taj lac ñaʼtʌbal tiʼ chaʼan bʌ Jehová yom mi lac wen chajpan lac bʌ. Qʼuele bajcheʼ mi yʌl ili versículo: ‹Mi laj cʼux waj cheʼ tsaʼix lac taja laj colel, [«cheʼ bʌ chajpʌbilix lac ñaʼtʌbal», TNM] chaʼan mi laj cʌn chuqui wem bʌ yicʼot chuqui mach bʌ weñic› (Hebreos 5:14). Cheʼ bʌ jiñi apóstol Pablo tsiʼ yʌlʌ chaʼan yom mi lac ‹chajpan› lac ñaʼtʌbal chaʼan mi laj cʌn chuqui wem bʌ yicʼot mach bʌ weñic, tsiʼ cʼʌñʌ jumpʼejl tʼan am bʌ ti griego muʼ bʌ i yʌcʼ ti ñaʼtʌntel cheʼ bʌ miʼ chajpañob i bʌ jiñi xʼalasob. Laʼ laj qʼuel chuqui yom miʼ melob chaʼan miʼ chajpañob i bʌ.

¹² Cheʼ bʌ mi la quilan pañimil (chʼocʼan) mach la cujilic bajcheʼ mi lac ñijcan lac bʌcʼtal. Jumpʼejl ejemplo, jiñi alʌlob maxto wen i cʌñʌyobic añoʼ bʌ i chaʼan tiʼ bʌcʼtal, maxto yujilobic cʼʌñol ti wen i cʼʌb i miʼ taj i jatsʼob i ñiʼ i wut i cheʼ jiñi toj sajtelob i pusicʼal yicʼot miʼ michʼañob. Pero xucʼu xucʼul miʼ tech i cʼʌñob ti wen: Ñaxan miʼ jexpañob i bʌ ti lum, cheʼ jiñi miʼ techob xʌmbal i ti wiʼil muqʼuix i chaʼleñob ajñel. * Pero ¿chuqui miʼ mejlel la cʌl jaʼel tiʼ tojlel juntiquil yujil bʌ alas?  Jumpʼejl ejemplo, cheʼ bʌ maʼ qʼuel juntiquil muʼ bʌ i chaʼlen alas futbol i wen utsʼat bʌ miʼ yʌsin jiñi pelota, mi caj a ñaʼtan chaʼan wen chajpʌbil. Jiñi wen yujil bʌ mach cheʼic jach tsiʼ toʼol cʌñʌ, tsiʼ wen ñusa cabʌl ora chaʼan miʼ mejlel i cʌn. Jiñi Biblia mi yʌl chaʼan «tsʼitaʼ [jach] lac wenlel» mi lac taj cheʼ bʌ mi lac wen chajpan lac bʌ ti alas. Pero cheʼ mi lac chajpan lac ñaʼtʌbal tiʼ chaʼan bʌ Dios ñumen i cʼʌjñibal, i mach cheʼ bajcheʼ jiñi alas (1 Timoteo 4:8).

13. ¿Bajcheʼ miʼ mejlel lac chajpan lac ñaʼtʌbal?

¹³ Ti ili libro tsaʼ laj qʼuele cabʌl cʌntesʌntel muʼ bʌ caj i coltañonla chaʼan mi lac ñumen cʌn majlel chuqui wen yicʼot chaʼan chʌn xucʼul mi la cajñel ti Jehová. Ti jujumpʼejl qʼuin, cheʼ bʌ an chuqui mi caj lac mel, yom mi lac ñaxan wen tsajin ti oración jiñi principio tac yicʼot i mandar tac Dios. Laʼ laj cʼajtiben lac bʌ: «¿Baqui bʌ mandar o principio tac loqʼuem bʌ ti Biblia miʼ taj ti tʼan iliyi? ¿Bajcheʼ miʼ mejlel j cʼʌn? ¿Muʼ ba i mulan jiñi c Tat am bʌ ti panchan jiñi woli bʌ c ñaʼtan c mel?» (pejcan Proverbios 3:5, 6; Santiago 1:5). Mi mucʼʌch lac melben lac bʌ ili cʼajtiya tac, mi caj lac ñumen cʌn baqui bʌ jiñi wem bʌ yicʼot mach bʌ weñic. Cheʼ bajcheʼ jiñi, mi caj lac taj lac ñaʼtʌbal yicʼot mi caj lac pʌs wen tac bʌ lac melbal tilem bʌ ti Dios.

14. Chaʼan mi laj colel majlel tiʼ chaʼan bʌ Jehová, ¿chuqui jiñi yom bʌ mi lac mel yicʼot baqui bʌ melbalʌl mach bʌ yomic mi lac mel?

¹⁴ Anquese tsaʼix lac taja laj colel tiʼ chaʼan bʌ Jehová, pero yom mi lac ñumen colel majlel. Chaʼan mach yaʼic jach mi laj cʌytʌl, yom mi laj qʼuel jaʼel mi woliyʌch lac pʼʌtʼesan lac bʌ tiʼ chaʼan bʌ Dios. Tsaʼix laj qʼuele tsaʼ bʌ i yʌlʌ Pablo, chaʼan ‹mi laj cʼux waj cheʼ tsaʼix lac taja laj colel›. Chaʼan mi lac pʼʌtʼesan jiñi lac chʼujbiya, yom utsʼat mi lac weʼsan lac bʌ tiʼ chaʼan bʌ Dios.  Cheʼ jaʼel, yom mi lac taj lac ñaʼtʌbal, yom i yʌl chaʼan mi lac pʌs ti lac melbal jiñi cʌmbil bʌ lac chaʼan. Jiñi wen ñuc i cʼʌjñibal, come jiñi Biblia mi yʌl chaʼan «jiñi ñaxam bʌ yom jiñʌch wen bʌ [lac] ñaʼtʌbal». Jin chaʼan, yom mi lac mulan jiñi wen utsʼatax bʌ i sujmlel muʼ bʌ i cʌntesañonla jiñi lac Tat (Proverbios 4:5-7; 1 Pedro 2:2). Anquese añʌch cabʌl lac ñaʼtʌbal yicʼot chuqui cʌmbil lac chaʼan, pero mach yomic mi laj qʼuel lac bʌ ti ñuc yicʼot mi la cʌl chaʼan ñumen la cujil bajcheʼ yambʌlob. Tiʼ pejtelel ora yom mi lac tsajin mi maʼañic woli laj qʼuel lac bʌ ti ñuc o mi an yan tac bʌ laj cʼunlel muʼ bʌ i mejlel ti colel ti lac pusicʼal. Pablo tsiʼ yʌlʌ chaʼan yom mi lac ‹ñaʼtan lac bʌ mi woli lac ñop Cristo ti isujm› yicʼot yom mi lac ‹ñaʼtan bajcheʼ añonla› (2 Corintios 13:5).

15. ¿Chucoch wen ñucʌch i cʼʌjñibal jiñi cʼuxbiya chaʼan mi lac bej colel majlel tiʼ chaʼan bʌ Jehová?

¹⁵ Tajol an juntiquil wen pʼʌtʌl bʌ yicʼot wen cʼocʼ bʌ, pero yom miʼ chʌn cʌntan i bʌ yicʼot yom miʼ chaʼlen uchʼel tiʼ pejtelel ora. Cheʼʌch miʼ yujtel jaʼel ti chaʼan bʌ Dios. ¿Chuqui jiñi yom bʌ mi lac wen cʌntan yicʼot jiñi yom bʌ mi la cʌcʼ ti colel? Jiñʌch jiñi laj cʼuxbiya tiʼ tojlel Jehová yicʼot ti la quermañojob yom bʌ miʼ ñumen pʼʌtʼan ti jujumpʼejl qʼuin. Mi maʼañic lac chaʼan iliyi, jiñi lac ñaʼtʌbal yicʼot lac melbal lajal cheʼ bajcheʼ jiñi muʼ bʌ ti cʌlʌx tʼan pero tsʼitaʼ jach i melbal (1 Corintios 13:1-3). Jin chaʼan, jiñi cʼuxbiya jiñʌch muʼ bʌ i pʌs chaʼan añix lac ñaʼtʌbal yicʼot chaʼan woliyʌch laj colel majlel tiʼ chaʼan bʌ Dios.

16. ¿Chuqui ti melbalʌl miʼ yotsan ti lac pensar Satanás, i chuqui ti coltaya miʼ yʌqʼueñonla Jehová?

¹⁶ I yuxchajplel, jiñi lac pensar yom yaʼan ti lac pijtaya muʼ bʌ caj i yʌqʼueñonla Jehová. Chaʼan miʼ mejlel lac mel, yom mi laj cʌntan bajcheʼ mucʼonla ti pensar. Satanás, i yum ili pañimil, wen yujil i yotsʌntel ti lac pensar melbalʌl tac mach bʌ weñic chaʼan mach weñic mi laj qʼuel jiñi i sujmlel bʌ, chaʼan maʼañic mi lac pʌs wem bʌ lac ñopoñel yicʼot chaʼan ora mi lac michʼan  (Efesios 2:2). Jiñi melbalʌl tac tsaʼ bʌ ujti la cʌl, wen wocol chaʼañonla come lajal cheʼ bajcheʼ miʼ jochʼan jumpʼejl otot melbil bʌ ti teʼ. Pero wocolix i yʌlʌ Jehová come an jumpʼejl isujm bʌ laj coltʌntel, jiñʌch lac pijtaya.

17. ¿Baqui bʌ lajiya miʼ cʼʌn jiñi Biblia chaʼan mi laj qʼuel ti ñuc jiñi lac pijtaya?

¹⁷ Jiñi Biblia mi yʌl chaʼan yom mi lac «pijtyan laj coltyʌntyel» chaʼan miʼ mejlel laj contrajin Satanás yicʼot i pañimil. Jiñi laj coltʌntel miʼ lajintel cheʼ bajcheʼ i mʌctʌjib i jol juntiquil soldado (1 Tesalonicenses 5:8, Jini wen bʌ tʼan). Jiñi soldado ti wajali miʼ cʼʌn jumpʼejl i pixol melbil bʌ ti tsucul taqʼuin bʌcʼbil bʌ yicʼot pʌchi tiʼ malil, ili i cʼʌjñibal chaʼan maʼañic chuqui miʼ chaʼlen cheʼ bʌ an chuqui miʼ jatsʼ tiʼ jol, mi maʼañic miʼ lʌp i pixol cheʼ bʌ miʼ majlel ti guerra, yujil chaʼan tsicbil jach i yorajlel i cuxtʌlel. Jiñi lac pijtaya jaʼel miʼ cʌntan jiñi lac pensar, lajal bajcheʼ i pixol jiñi soldado muʼ bʌ i cʌntʌben i jol.

18, 19. ¿Bajcheʼ tsiʼ pʌsʌ Jesús chaʼan yomʌch mi lac chʌn pʌs chaʼan añʌch lac pijtaya, i bajcheʼ miʼ mejlel lac lajin?

¹⁸ Jesús tsiʼ pʌsʌ ti wen chuqui i sujmlel cheʼ mi lac chʌn pʌs chaʼan añʌch lac pijtaya. Laʼ laj cʼajtesan jiñi wocol tac tsaʼ bʌ i ñusa cheʼ ti cojix bʌ acʼʌlel wʌʼ ti Pañimil. Juntiquil i yamigo wen ñʌmʌl bʌ yicʼot tsiʼ choño tiʼ caj taqʼuin. Yambʌ tsiʼ yʌlʌ tiʼ tojlel wiñicob xʼixicob (quixtañujob) chaʼan mach i cʌñʌyic. Jiñi yambʌlob tsiʼ bajñel cʌyʌyob i tsaʼ putsʼiyob majlel. Jiñi lajaloʼ bʌ i pijtaya yicʼotob tsaʼ sujtiyob tiʼ contra, i tsaʼ cʼoti i yʌlob chaʼan miʼ jajtsʼel yicʼot chaʼan miʼ tsʌnsʌntel tiʼ cʼʌb jiñi soldado romanojoʼ bʌ. Miʼ mejlel la cʌl chaʼan tsiʼ ñusa tsʌts tac bʌ wocol mach bʌ lajalic bajcheʼ muʼ bʌ caj lac ñusan joñonla. ¿Chuqui tsiʼ colta chaʼan miʼ lʌtʼ jiñi wocol tac? Hebreos 12:2 miʼ jacʼ: «Come tsiʼ qʼuele jiñi tijicña bʌ woli bʌ i pijtan. Jiñi chaʼan tsiʼ yʌcʼʌ i bʌ ti quisin cheʼ bʌ tsaʼ chʌmi ti cruz [«teʼ», TNM]. Tsaʼ buchle tiʼ ñoj Dios yaʼ tiʼ yumʌntel». Cheʼ bajcheʼ mi laj qʼuel, maʼañic ba ora tsiʼ sʌtʌ «jiñi tijicña bʌ woli bʌ i pijtan».

¹⁹ Pero ¿baqui bʌ jiñi i tijicñʌyel? Jiñʌch cheʼ tsiʼ ñaʼta chuqui mi caj i taj mi xucʼulʌch miʼ yajñel: Tsiʼ chaʼle coltaya chaʼan miʼ sʌqʼuesʌntel jiñi chʼujul bʌ i cʼabaʼ Dios yicʼot tsiʼ pʌsʌ chaʼan  juntiquilʌch xlot jiñi Satanás. ¡Maʼañic yambʌ pijtaya tsaʼ bʌ mejli i yʌqʼuen i tijicñʌyel Jesús! Cheʼ jaʼel, yujil chaʼan mach jalic miʼ caj ti ñumel ora chaʼan jiñi i Tat miʼ yʌqʼuen i chobejtʌbal yicʼot chaʼan tijicña miʼ mejlel ti chaʼ ajñel tiʼ tʼejl i Tat. Cheʼ bʌ wen an ti wocol Jesús tsiʼ chʌn ñaʼta tiʼ pejtelel ora jiñi tijicña bʌ i pijtaya. I cheʼʌch yom mi lac mel jaʼel. Mach yomic miʼ ñajʌyel jiñi tijicñʌyel am bʌ lac chaʼan cheʼ bajcheʼ Jesús, chaʼan mi lac chaʼlen coltaya tiʼ sʌqʼuesʌntel i cʼabaʼ Jehová yicʼot chaʼan mi lac pʌs chaʼan jiñʌch juntiquil xlot jiñi Satanás. ¿Bajcheʼ miʼ mejlel lac mel jiñi? Jiñʌch cheʼ mi lac chʌn acʼ lac bʌ tiʼ tojlel lac Tat, jiñi Cojach bʌ yom bʌ miʼ chaʼlen Yumʌntel i mi lac chʌn ajñel tiʼ cʼuxbiya, anquese chuqui jach miʼ tilel ti lac tojlel.

20. ¿Chuqui mi caj i coltañonla chaʼan mi lac taj wem bʌ lac melbal yicʼot chaʼan maʼañic mi lac sʌt jiñi lac pijtaya?

²⁰ Jehová mach cojach yom i yʌqʼueñonla i bendición chaʼan lac xucʼtilel, come ti isujm mucʼʌch caj i tsʼʌctesan (Isaías 30:18; pejcan Malaquías 3:10). Miʼ mulan i yʌqʼuen i wiñicob tiʼ pejtelel chuqui toj bʌ (Salmo 37:4). Jin chaʼan, laʼ laj cʌcʼ ti lac pensar jiñi lac pijtaya ti talto bʌ qʼuin. Mach yomic mi lac lajiben i melbal ili jontol bʌ i pañimil Satanás, cheʼ bajcheʼ jiñi melbalʌl tac mach bʌ weñic yicʼot i melol jontolil tac. Mi cheʼ woli lac mel, laʼ laj cʼajtiben Jehová ti wocol tʼan chaʼan miʼ yʌqʼueñonla ‹i ñʌchʼtʌlel lac pusicʼal yicʼot lac ñaʼtʌbal›, ili mi caj i cʌntan lac pusicʼal yicʼot lac ñaʼtʌbal (Filipenses 4:6, 7).

21, 22. a) ¿Baqui bʌ pijtaya wen utsʼatax bʌ an i chaʼan jiñi «wiñicob xʼixicob»? b) ¿Baqui bʌ a pijtaya maʼ ñumen qʼuel ti ñuc yicʼot chuqui yom maʼ mel?

 ²¹ ¡Wen utsʼatax jiñi pijtaya am bʌ lac chaʼan! Mi yaʼ ochemonla yicʼot jiñi «wiñicob xʼixicob» muʼ bʌ caj i loqʼuelob ti jiñi «ñuc bʌ wocol», laʼ lac ñaʼtan tiʼ pejtelel jiñi lac chobejtʌbal muʼ bʌ caj lac taj (Apocalipsis 7:9, 14). Wocol ti ñaʼtʌntel yubil cheʼ ba ora librejix añonla tiʼ tojlel Satanás yicʼot i xibajob. Pero ¿majqui libre an tiʼ lotiya tac jiñi Diablo? Cheʼ bʌ miʼ lajmel jiñi wocol tac muʼ bʌ i chʼʌm tilel jiñi Satanás, jiñʌch wen utsʼatax bʌ cheʼ bʌ mi caj i sujtel ili Pañimil ti jumpʼejl paraíso muʼ bʌ caj i yuman Cristo yicʼot jiñi 144,000 wiñicob xʼixicob mi caj i coltañob tiʼ Yumʌntel yaʼ ti panchan. ¡I wen la com laj qʼuel cheʼ baqui ora miʼ jisʌntel jiñi cʼamʌjel tac, cheʼ bʌ miʼ chaʼ tejchelob jiñi muʼ bʌ lac wen cʼuxbiñob yicʼot cheʼ mi lac chaʼ taj laj cuxtʌlel yicʼot lac tijicñʌyel bajcheʼ yom Dios ti ñaxan! Cheʼ lʌcʼʌlix chaʼan mi lac sujtel ti mach bʌ chʌn xmulilic, mi caj lac taj ili ñuc bʌ bendición: ‹Mi la cochel ti libre chaʼan tijicña mi la cajñel yicʼot i ñuclel i yalobilob Dios› (Romanos 8:21).

²² Jehová yom chaʼan libre maʼ wajñel. I jiñi i sujmlel bʌ librejlel jiñʌch i jacʼol jiñi tʼan. ¿Ñomach wen ñucʌch i cʼʌjñibal cheʼ mi lac chaʼlen wersa lac jacʼben i tʼan Jehová ti jujumpʼejl qʼuin? Jin chaʼan, ¡chʌn xucʼchocon a bʌ ti jiñi chʼujul bʌ tʼan woli bʌ a ñop chaʼan maʼ chʌn ajñel tiʼ cʼuxbiya Dios tiʼ pejtelel ora!