1, 2. An be se ka mun lo kɛ walisa ka to kɛnɛya la ani ka fanga sɔrɔ? Mun na o kɔrɔtanin lo do?

AN BƐƐ b’a fɛ ka kɛ kɛnɛya la ani ka fanga sɔrɔ. Nka, walisa an ka se ka bonya ka kɛ kɛnɛya la ani ka fanga sɔrɔ, fɔɔ an ka dumuni ɲanaman kɛ, an ka farikoloɲanagwɛ kɛ koɲuman, ani an k’an janto an ka kɛnɛyako la tuma bɛɛ. O koo tɛ ɲɛ jijali kɔ. Nka, komi an ka ɲɛnamaya n’an ka siniɲasigi koo be bɔ o lo la, o kama an t’an fari faga. An ka kan k’an janto ka bonya koo wɛrɛ ta fan fɛ fana. O ye juman lo ye?

² Zude kumana o lo koo la tuma min na a ye kerecɛnw jija ko: “A’ ye to Ala ka kanuya la.” O vɛrisew kɔnɔ, a y’a yira fana fɛɛn min be se k’an dɛmɛ k’o kɛ. A ko: “Aw ka to ka taa ɲɛ aw ka dannaya senuma la.” (Zude 20, 21, ABM ). I be se ka mun lo kɛ k’i ka limaniya barika bonya walisa i ka to Ala ka kanuya la? Koo saba kɔrɔtanin lo. An k’u lajɛ.

3. A bena diya Sutana ye k’i nɛgɛ i ka Jehova ka saratiw jati cogo di?

³ Fɔlɔ, an ka kan k’an ka limaniya barika bonya Ala ka sariya koo la. Gafe nin kalantɔ, i ye Jehova ka sarati tilennin dɔw lajɛ minw ɲɛsinna tagamacogo koo ma. I be mun lo miiri u koo la do? A bena diya Sutana ye k’i nɛgɛ ko Jehova ka sariyaw n’a ka saratiw be mɔgɔ jɛn koo caaman na ani ko u be mɔgɔ niin tɔɔrɔ. A be baara kɛ n’o fɛɛrɛ ye sabu a ɲɛna  a bolo Edɛn nankɔtu kɔnɔ (Zɛnɛsi 3:1-6). Yala a bena e fana sɔrɔ n’o fɛɛrɛ ye wa? O fanba be bɔ i ka koow jaticogo lo la.

4, 5. An ka kan ka Ala ka saratiw jati cogo di, ani o bena mun lo kɛ an na? Tɛmɛ ɲɛyirali dɔ fɛ k’o ɲɛfɔ.

⁴ An ka ɲɛyirali dɔ ta: K’i to yaala la zaradɛn ɲuman dɔ kɔnɔ, i ɲɛɛ be giriyasi jamanjan barikaman dɔ la min be i bali ka taga ɲɛ. Zaradɛn yɔrɔ min be giriyasi kɔfɛ, o cɛ ka ɲi kosɔbɛ. A daminɛ na, i be se k’a jati k’o giriyasi b’i bali gwansan. Nka, filɛri kɛtɔ giriyasi kɔfɛ, i ɲɛɛ be jara fariman dɔ la a be kongosogo dɔ gwɛnna! Sisan, i b’a faamu k’o giriyasi bilakun ye ka mɔgɔ tanga. Yala wara fariman dɔ b’i nɔfɛ sisan yɛrɛ wa? Ala ka Kuma b’an lasɔmi ko: “Aw k’aw yɛrɛ kɔlɔsi dɛ! Aw labɛnnin ka to. Bari aw jugu Sutana be munumununa i n’a fɔ jara, a b’a fɛ ka dɔ le minɛ k’a ɲimi.”—1 Piyɛri 5:8.

⁵ Sutana ye mɔgɔfagala fariman ye. Komi Jehova t’a fɛ an ka ben a bolo, a ye sariyaw sigi walisa k’an tanga o mɔgɔ jugu Sutana ka ‘namara’ caaman ma (Efɛzikaw 6:11). O kama, n’an be miiri Ala ka sariyaw kan tuma o tuma, an ka kan k’a jati ko an sankolola Faa y’u di an ma kanuya kosɔn. N’an be Ala ka sariyaw jati o cogo la, u be kɛ sababu ye k’an latanga ani k’an ninsɔndiya. Zaki y’a sɛbɛ ko: “Nka sariya dafalen, hɔrɔnya sariya kɔni, ni mɔgɔ ye o filɛ ni kɔlɔsili ye ka to a kan, . . . [ani] a bɛ taama ka kɛɲɛ n’a ye, o tigi ye dubaden ye.”—Zaki 1:25, ABM.

6. Koo fisaman juman be se k’an dɛmɛ ka limaniya barikaman sɔrɔ Ala ka sariyaw koo la? Ɲɛyirali dɔ fɔ.

⁶ Koo fisaman min be se k’an dɛmɛ ka limaniya barikaman sɔrɔ sariya Sigibaga Jehova koo la ani ka la a la ko hakilitigiya be sɔrɔ a ka sariyaw kɔnɔ, o ye ka Ala ka cikanw labato an ka ɲɛnamaya kɔnɔ. Ɲɛyirali fɛ, “Krista ka sariya” ɲɛsinna fana Yezu ka cikan nin ma: “Ne ye ci minw fɔ aw ye, aw ka [mɔgɔw] kalan ko u ka tugu o kow bɛɛ la.” (Galatikaw 6:2; Matiyo 28:19, 20, ABM ). Cikan min dira an ma ko an  ka to ka ɲɔgɔn lajɛn walisa ka Jehova bato ani ka ɲɔgɔn jija, kerecɛnw b’o ta sɔbɛ la fana (Eburuw 10:24, 25). Bibulu b’an jija ko an ka Jehova deli tuma o tuma n’an dusukun bɛɛ ye. O fana ye Ala ka cikan dɔ ye (Matiyo 6:5-8; 1 Tesalonikaw 5:17). N’an b’o cikanw labato, an b’a faamu ka ɲɛ k’u dira an ma kanuya kosɔn. U sira tagamani b’an ninsɔndiya ani k’an wasa cogo dɔ la an tɛ se ka min ɲɔgɔn sɔrɔ yɔrɔ si duniɲa ɲagaminin nin kɔnɔ. N’i be miiri k’a filɛ Ala ka sariyaw sira tagamani ye i nafa cogo min na, yala dɔ tɛ fara i ka limaniya barika kan o sariyaw koo la wa?

7, 8. Minw lanin t’a la ko u bena se ka Jehova ka sariyaw labato saan o saan, Ala ka Kuma b’olu hakili sigi cogo di?

⁷ Tuma dɔw la, dɔw b’u yɛrɛ ɲininga n’u bena se ka Jehova ka sariyaw labato saan o saan. U be siran ko u kana na fili cogo dɔ la. N’i delila ka miiri o cogo la, i ka kuma nunu to i hakili la: “Masaba [Jehova], aw kunmabɔbaga, Isirayɛli ka Ala ko: ‘Ne Masaba ye aw ka Ala ye. Ne b’aw kalan aw ka nafa kama. Ne b’aw bila sira, aw taayɔrɔw la. Hun! N’aw tun ye mɛnni kɛ n ka ladiliw la, aw ka hɛrɛ tun bena kɛ i ko baji, aw ka tilenninya tun bena kɛ i ko kɔgɔji [kuruw].” (Ezayi 48:17, 18). Yala i delila ka wagati ta ka miiri k’a filɛ o kumaw be mɔgɔ hakili sigi cogo min na wa?

 ⁸ Yan, Jehova b’an hakili jigi ko n’an be mɛnni kɛ ale fɛ, o b’an yɛrɛ lo nafa. A ye layidu ta ko an bena tɔnɔ fila sɔrɔ o la. Fɔlɔ, an ka hɛɛrɛ bena kɛ i ko baji min ɲɛmalɔnin lo, a fanin lo ani a tɛ ja. Filanan, an ka tilenninya bena kɛ i ko kɔgɔji kuruw. N’i lɔra kɔgɔjida la ka jikuruw filɛ u be taga ka na, ka taga ka na, i b’a faamu ko banta tɛ. I b’a lɔn ko jikuruw bena to ka lamaga ani ka na ben kɔgɔjida la furututu. Jehova b’a fɔ ko i ka tilenninya, o kɔrɔ, i tagamacogo ɲuman be se ka kɛ furututuko ye n’i be mɛnni kɛ ale fɛ. N’i kɔni b’i jija ka kantigiya kɛ Jehova ye, a tɛna i bila fewu! (Zaburuw 55:23). Nin ye layidu ye min be mɔgɔ dusu diya dɛ! Yala o tɛ i ka limaniya barika bonya Jehova n’a ka sarati tilenninw koo la wa?

9, 10. a) Ka kɔgɔ Alako ta fan fɛ, mun na o ye laɲinita ɲuman ye kerecɛnw fɛ? b) N’an be koow jati ka kɛɲɛ ni hakili senu ye, mun na o b’an ninsɔndiya?

⁹ Filanan, an ka kan ka Ala ka kuma nunu labato: “An ka taga ɲɛ ka kɛ [kerecɛn] kɔgɔninw ye.” (Eburuw 6:1, NW). Ka kɔgɔ Alako ta fan fɛ, o ye laɲinita ɲuman ye kerecɛn fɛ. Adamaden si tɛ se ka kɛ mɔgɔ dafanin ye sisan, nka an kɔni be se ka kɛ kerecɛn kɔgɔninw ye. An mana kɛ kerecɛn kɔgɔnin ye, dɔ be fara an ka ninsɔndiya kan Jehova ka baara la. Mun na do?

¹⁰ Kerecɛn kɔgɔnin ye mɔgɔ ye min ni Jehova ka koow filɛcogo ye kelen ye (Zan 4:23). Pol y’a sɛbɛ ko: “Mɔgɔ min be taama ka kɛɲɛ ni farisogo sago ye, o tigi ka miiriya be to o le kan, nga min be taama ka kɛɲɛ ni Nii Senuman sago ye, o tigi ka miiriya be to Ala ka koo le kan.” (Ɔrɔmukaw 8:5). Mɔgɔ min be koow jati ka kɛɲɛ ni farisogo sago ye, o tigi tɛ ninsɔndiya bɛrɛ sɔrɔ sabu a be hami a yɛrɛ dama le koo la, a tɛ koow sɛgɛsɛgɛ ka dunya, ani bololafɛnw lo ka di a ye. Mɔgɔ min be koow jati ka kɛɲɛ ni hakili senu ye, o tigi be ninsɔndiya sabu a ka miiriyaw be to Jehova lo kan o  min ye “dubatigi Ala” ye (1 Timote 1:11, ABM). Jɛnɲɔgɔnya ɲuman be Jehova ni kerecɛn min cɛ, o kerecɛn b’a ɲini k’a yɛrɛ koo diya Jehova ye ani a ninsɔndiyanin lo tuma bɛɛ hali ni gwɛlɛyaw b’a kan. Mun na do? Gwɛlɛyaw be sababu di a ma a k’a yira ko Sutana ye ngalontigɛla ye. U fana be sababu di a ma a k’a ka kantigiya barika bonya ani k’a sankolola Faa dusu diya.—Talenw 27:11; Zaki 1:2, 3.

11, 12. a) Pol ko kerecɛn hakili “delila” a la ka “ko ɲuman ni ko jugu faranfasi.” “Delila” nin kɔrɔ ko di? b) Denɲɛnin ni farikoloɲanagwɛla ka kan k’u yɛrɛ degi mun lo la?

¹¹ Ka jɛnɲɔgɔnya ɲuman kɛ ni Jehova ye ani ka kɛ kerecɛn kɔgɔnin ye, o tɛ ɲɛ degeli kɔ. A filɛ vɛrise nin be min fɔ: “Dumuni gɛlɛnma ye mɔgɔ mɔlenw ta ye, olu minnu hakili sera ka ko ɲuman ni ko jugu faranfasi, k’a masɔrɔ u delila o la.” (Eburuw 5:14, ABM). Pol ko u hakili “delila” a la ka “ko ɲuman ni ko jugu faranfasi.” Kumaden min ko “delila,” o tun lɔnnin lo Grɛkiw ka farikoloɲanagwɛ yɔrɔw la saan kɛmɛkulu fɔlɔ wagati la sabu a kɔrɔ wɛrɛ tun ko ‘k’i yɛrɛ degi koo la i n’a fɔ farikoloɲanagwɛla.’ Sisan, an k’a filɛ o degeli be kɛ cogo min na.

¹² An wolotuma na, an fari ma degi foyi la fɔlɔ. Ɲɛyirali fɛ, denɲɛnin t’a bolow n’a seenw yɛlɛmacogo lɔn. O kama, a b’a bolow fifafifa a kunfɛ, ani a be se k’a yɛrɛ fata ka bari a yɛrɛ la. Nka dɔɔni dɔɔni, a fari be degi koow kɛcogo la. A b’a daminɛ ka ŋunuma, ka tagama, ani ka boliboli. * Nka, farikoloɲanagwɛla do? N’i y’a ye ko a be pan ka munumunu sanfɛ ani ka koo tigitigi dɔw kɛ a sago la, i b’a faamu ko a y’a fari degi o la wagati caaman kɔnɔ. Farikoloɲanagwɛla ŋana tɛ se koo la a kunfɛ, a ye lɛri caamanba lo kɛ k’a yɛrɛ degi o la. Bibulu b’a fɔ ko “nafa dɔɔni” be farikolo degeli la. Nka, k’i  hakili degi koo ɲuman ni koo jugu faranfasili la, o nafa ka bon ka tɛmɛ fɛɛn bɛɛ kan!—1 Timote 4:8.

13. An be se k’an yɛrɛ degi cogo di ka koo ɲuman ni koo jugu faranfasi ka lɔn?

¹³ Gafe nin kɔnɔ, an ye koo caaman kalan minw bena i dɛmɛ i k’i yɛrɛ degi ka koo ɲuman ni koo jugu faranfasi ka lɔn. O la, i bena se ka jɛnɲɔgɔnya ɲuman kɛ ni Jehova ye kantigiya la. Loon o loon, i ka miiri koɲuman Ala ka sariyaw ni Bibulu kɔnɔ miiriya jɔnjɔnw koo la ani i ka delili kɛ ka sɔrɔ ka koow latigɛ. N’i b’a fɛ ka koo o koo latigɛ, i k’i yɛrɛ ɲininga ko: ‘Sariya wala miiriya jɔnjɔn juman be Bibulu kɔnɔ ka ɲɛsin o koo ma? Ne be se k’u sira tagama cogo di? Kɛcogo juman lo bena diya n’ sankolola Faa ye?’ (Talenw 3:5, 6; Zaki 1:5). I mana koo o koo latigɛ o cogo la, o bena a to i hakili be degi koo ɲuman ni koo jugu faranfasili la ka ɲɛ. N’i ye i yɛrɛ degi o la, jɛnɲɔgɔnya ɲuman bena kɛ e ni Jehova cɛ fɔɔ abada.

14. N’an b’a fɛ ka bonya Alako ta fan fɛ, dumuni sifa juman koo ka kan ka diya an ye, nka an ka kan k’an janto mun lo la?

¹⁴ Hali n’an kɛra kerecɛn kɔgɔnin ye, an bele be se ka to ka bonya Alako ta fan fɛ. Nka i tɛ se ka bonya n’i tɛ dumuni kɛ. O kama, Pol y’a fɔ ko: “Dumuni gɛlɛnma ye mɔgɔ mɔlenw ta ye.” N’i b’a fɛ dɔ ka fara i ka limaniya barika kan, fɔɔ i ka to ka hakilimaya dumuni gwiliman kɛ. I ye kalan min sɔrɔ, n’i y’o sira tagama ka ɲɛ, o ye hakilitigiyako ye sabu Bibulu b’a fɔ ko: “Hakilitigiya ka fisa ni kɔnɔnkisɛ sɔngɔ gɛlɛn ye.” O kama, an Faa be tiɲɛnko nafaman minw yira an na, an ka kan k’a to u koo ka diya an ye kosɔbɛ (Talenw 8:10, 11, ABM;  1 Piyɛri 2:2). Ayiwa, hali n’i ye lɔnniya ni Ala ka hakilitigiya sɔrɔ, o tɛ joo di i ma ka waso wala ka kuncɛbaya kɛ. An ka kan k’an yɛrɛ sɛgɛsɛgɛ tuma o tuma walisa kuncɛbaya wala fiyɛn wɛrɛ kana donyɔrɔ sɔrɔ an dusukun na ani ka bonya yen. Pol y’a sɛbɛ ko: “Aw k’aw yɛrɛ sɛgɛsɛgɛ k’a filɛ yala n’aw lanin be Yezu Krista la sɔbɛ la.”—2 Korɛntikaw 13:5.

15. Mun na an tɛ se ka bonya Alako ta fan fɛ ni kanuya t’an na?

¹⁵ Mɔgɔ be se ka kɛ kɛnɛya la ani ka fanga sɔrɔ, nka a bele ka kan k’a yɛrɛ balo ani k’a yɛrɛ ladon. An mako be mun lo la tugun walisa ka kɛ kerecɛn kɔgɔnin ye ani k’an yɛrɛ ladon Alako ta fan fɛ? An mako be kanuya lo la fɔlɔ. An ka kanuya ka kan ka to ka bonya Jehova n’an kerecɛnɲɔgɔnw ta fan fɛ. Ni kanuya t’an na, an ka lɔnniya n’an ka baara bɛɛ bena kɛ gwansan ye: a bena kɛ komi an ye mankan caaman kɛ fuu (1 Korɛntikaw 13:1-3). Nka, kanuya be se k’a to an be kɛ kerecɛn kɔgɔnin ye ani ka to ka bonya Alako ta fan fɛ.

16. Sutana be mɔgɔw lasun u ka miiri cogo juman na, nka Jehova b’an tanga cogo di?

¹⁶ Sabanan, Jehova ye jigiya min di an ma, an ka kan k’an hakili to o kan. Walisa ka se ka bonya Alako ta fan fɛ ani ka kɛ Krista ka kalanden sɔbɛ ye, fɔɔ an k’an miiricogo kɔrɔsi. Duniɲa nin kuntigi Sutana ka baara ye ka miiriya juguw don mɔgɔw kuun na, k’u fari faga, k’u jigi tigɛ ani k’a to u be tigɛ u yɛrɛ la (Efɛzikaw 2:2). O miiricogo ka jugu kerecɛn ma sabu a be i n’a fɔ bagabagaw ye yiribon minɛ. Nka, Jehova be fɛɛn dɔ di an ma min b’an tanga: o ye jigiya ye. O ye hɛɛrɛko ye an fɛ dɛ!

17. Ala ka Kuma be tɛmɛ mun lo fɛ k’a yira ko jigiya nafa ka bon kosɔbɛ?

¹⁷ Bibulu b’a yira an mako be Alako kɛlɛkɛminan minw na walisa ka se ka Sutana ni duniɲa nin kɛlɛ. Nɛgɛfugulan  ye kɛlɛkɛminan dɔ ye min nafa ka bon kosɔbɛ o kɛlɛ la. O nɛgɛfugulan ye “kisili jigi ye.” (1 Tesalonikaw 5:8, ABM ). Bibulu sɛbɛwagati la, sɔrɔdasiw tun b’a lɔn k’u tɛ se ka kisi kɛlɛ la n’u ka nɛgɛfugulan tɛ u kuun na. A kɔkana tun ye nɛgɛ ye. Nka u tun b’a kɔnɔna dilan ni golo ye wala fɛɛn wɛrɛ ye i n’a fɔ lɛni. Biɲɛ minw tun be se sɔrɔdasi kuun ma, u tun be gosi nɛgɛfugulan na ka taga ben yɔrɔ wɛrɛ ani a tigi tun tɛ mandimi kojugu. I ko nɛgɛfugulan be mɔgɔ kuun tanga cogo min na, o cogo kelen na, jigiya be se k’i tanga miiriya juguw ma.

18, 19. Yezu ye ɲɛyirali juman di jigiya marali koo la, ani an be se k’a ladegi cogo di?

¹⁸ Mɔgɔ minw y’u ka jigiya mara, Yezu ye olu bɛɛ la fɔlɔ lo ye. I ka miiri k’a filɛ a ye tɔɔrɔ min muɲu a ka suu laban na dugukolo kan. A teri sɔbɛ dɔ y’a janfa wari kosɔn. Dɔ wɛrɛ yɛrɛ y’a fɔ ko a t’a lɔn. Tɔɔw bolila k’a to yen. A fasodenw banna a la, ani u y’a ɲini Ɔrɔmu sɔrɔdasiw fɛ u k’a tɔɔrɔ k’a faga. Siga t’a la, an be se k’a fɔ ko tɔɔrɔ minw be se k’an sɔrɔ, u si tɛ se Yezu ta ɲɔgɔn ma. Mun lo y’a dɛmɛ do? Eburuw 12:2 b’a fɔ ko: “A sɔnna ka tɔɔrɔ gwengwenlɔgɔ kan, a ma maloya yɛrɛ jati, bari nisɔndiya min tun b’a kɔnɔna, a ɲaa tun b’o la. Sisan, a siginin be Ala kinibolo la.” “Nisɔndiya min tun [be Yezu] kɔnɔna,” a m’a ɲɛɛ bɔ o kan abada.

¹⁹ Ninsɔndiya juman lo tun be Yezu kɔnɔna? A tun b’a lɔn ko n’a ye muɲuli kɛ, o bena kɛ sababu ye ale fana ka Jehova tɔgɔ senuman saniya. A tun bena daliluw bɛɛ la fisaman di k’a yira ko Sutana ye ngalontigɛla ye. Jigiya wɛrɛ si tun tɛ se k’o ninsɔndiyaba ɲɔgɔn di Yezu ma! A tun b’a lɔn fana ko Jehova bena a duga kosɔbɛ a ka kantigiya kosɔn ani ko yanni dɔɔni, a bena ninsɔndiyaba sɔrɔ ka kɛ a Faa gɛrɛfɛ. Nin tun ye jigiya ye min ye Yezu ninsɔndiya. A ka tɔɔrɔba wagati la, a y’a hakili to o kan. An ka kan k’o ɲɔgɔn lo kɛ. Ninsɔndiya dɔ b’an fana  kɔnɔna. Jehova ye danbe la an kelen kelen bɛɛ kan: a ye nɛɛma kɛ an ye walisa an fana ka kɛ sababu ye a tɔgɔba ka saniya. An be se k’a yira ko Sutana ye ngalontigɛla ye n’an be Jehova kɛ an ka Masaba ye ani n’an be to an Faa Jehova ka kanuya la gwɛlɛyaw ni kɔrɔbɔli sifaw bɛɛ n’a ta.

20. Mun lo be se k’i dɛmɛ ka koow filɛ ni ɲɛɛ ɲuman ye ani i jigi kana tigɛ?

²⁰ Jehova b’a fɛ k’a sagokɛla kantigimanw sara, ani a yɛrɛ kɔrɔtɔnin lo k’o kɛ (Ezayi 30:18; Malasi 3:10). A sagokɛlaw mako be min o min na, n’a daganin lo, a ka di a ye k’o di u ma (Zaburuw 37:4). O kama, jigiya min dira i ma, i banba k’i hakili to o kan. Sutana ka duniɲa nin be koow filɛ a ɲɛɛ jugu kan. A ka miiriyaw nɔgɔnin lo ani u tilennin tɛ. Kana a to abada u ka don i kuun na. N’i y’a ye ko duniɲa nin ka miiriyaw be donna i kuun na wala i dusukun na, i ka Jehova deli n’i dusukun bɛɛ ye ko “Ala ka hɛrɛ min bɛ tɛmɛn mɔgɔw ka miiriliw bɛɛ kan,” a k’o di i ma. O la, Ala ka hɛɛrɛ bena i dusukun n’i ka miiriliw tanga.—Filipikaw 4:6, 7, ABM.

21, 22. a) “Jamaba” mɔgɔw be ni jigiya kabakoman juman lo ye? b) Kerecɛnw jigi be koo minw na, u la juman ka di i ye ka tɛmɛ tɔɔw bɛɛ kan? E cɛsirinin lo ka mun kɛ?

²¹ I be ni jigiya kabakoman min ye, i ka miiri o kan!  “Jamaba” min bena ‘bɔ tɔɔrɔba la,’ n’i y’o jamaba mɔgɔ dɔ ye, i ka miiri k’a filɛ i bena ɲɛnamaya sifa min kɛ yanni dɔɔni (Yirali 7:9, 14). Komi Sutana n’a ka jinaw tɛna kɛ yen tugun, i bena a ye ko i lafiyanin lo cogo dɔ la i tɛ se ka min faamuya sisan. Tiɲɛn na, anw cɛ, jɔn lo delila ka ɲɛnamaya kɛ yɔrɔ min na Sutana ka degun jugu tɛ yen? O degun bena bɔ an kan. Ani, a bena kɛ ninsɔndiya ye an fɛ Yezu n’a ka marakɛɲɔgɔn 144 000 k’an ɲɛminɛ ka baara kɛ walisa ka dugukolo yɛlɛma k’a kɛ alijɛnɛ ye! An ɲagalinin lo k’a lɔn ko banaw ni barikantanya si tɛna kɛ yen tugun. An ɲagalinin lo fana k’a lɔn ko an bena an ka mɔgɔ sɔbɛw kunbɛn tuma min na u bena kunu ka bɔ kaburuw kɔnɔ, ani an bena se ka ɲɛnamaya kɛ i n’a fɔ Ala tun b’a fɛ cogo min na! Dɔɔni dɔɔni, an bena kɛ mɔgɔ dafaninw ye ani an bena surunya saraba dɔ sɔrɔwagati ma. O ye “Ala denw ta hɔrɔnya nɔɔrɔ” ye, min kofɔra Ɔrɔmukaw 8:21 kɔnɔ.

²² Jehova b’a fɛ i ka hɔɔrɔnya min sɔrɔ, o be tɛmɛ e ka miirili daan kan. O hɔɔrɔnya ɲɔgɔn tɛ sɔrɔ kanminɛli kɔ. O la do, yala a bɛnnin tɛ i k’i seko bɛɛ kɛ sisan ka kolo Jehova ye loon o loon wa? O kama, i ka koow bɛɛ lajɛnnin kɛ ka to ka taga ɲɛ i ka dannaya senuman la walisa i ka to Ala ka kanuya la fɔɔ abada!