1, 2. Koj tabtom ua lub tsev zoo li cas, thiab vim li cas tseem ceeb rau koj ua haujlwm kom zoo?

KOJ tabtom phwb teg tsog tsim tsa ib lub tsev. Koj twb ua txog tog lawm, tiamsis tseem tshuav ntau yam tsis tau tiav. Txawm tsis yoojyim los, koj yeej txaus siab ua. Koj yeej tau hau ntsoov ua kom tiav, rau qhov koj xav tsa ib lub tsev ruaj khov. Lub tsev zoo uas ruaj khov yuav kav mus tas koj lub neej. Lub tsev no piv txwv txog dabtsi tiag? Lub tsev no twb yog piv txog koj tus kheej ntag!

² Yuda kuj qhia tias tseem ceeb heev rau peb tsim tsa peb tus kheej. Nws qhia tias: “Tsim tsa kom nej nyob ruaj saum nej txojkev ntseeg uas dawb huv kawg nkaus.” (Yuda 20, 21) Qhov uas cov Khixatia ua li ntawd yuav pab lawv “nyob hauv Vajtswv txojkev hlub.” Niaj hnub no, peb yuav “tsim tsa” peb tus kheej li cas, peb thiaj muaj kev ntseeg ruaj khov? Cia peb kawm txog peb txojkev uas yuav pab peb ua tau li ntawd.

3-5. (1) Xatas xav ntxias kom koj xav yuam kev li cas txog Yehauvas tej kevcai? (2) Peb yuav tsum saib Vajtswv tej kevcai zoo li cas? Piav seb.

³ Thawj txojkev, peb yuav tsum tso siab tias Yehauvas tej kevcai yeej pab tau peb tiag tiag. Hauv phau ntawv no peb twb kawm txog Yehauvas tej kevcai ncaj ncees uas  nws xav kom peb coj. Koj xav li cas txog tej kevcai ntawd? Xatas xav ntxias kom peb ntseeg tias Yehauvas tej hauv paus ntsiab lus thiab nws tej kevcai nruj dhau lawm. Thaum ub nws twb siv lub tswvyim no los haub ntxias tau Eva hauv lub vaj Edee. (Chiv Keeb 3:1-6) Ua li koj puas yuav qaug rau Xatas lub tswvyim phem no? Yog tias koj muab Yehauvas tej kevcai xav rau qhov zoo xwb, ces Xatas yeej yuav ntxeev ntxias tsis tau koj.

⁴ Muab ua piv txwv li no: Koj tabtom mus rau hauv ib lub vaj uas zoo nkauj heev. Thaum koj mus txog ntawd, ua cas koj pom ib koog zoov hauv lub vaj ntawd, uas luag xov laj kab puag ncig. Koog zoov ntawd zoo nkauj kawg li thiab. Tej zaum koj yuav xav tias, twb tsis tsim nyog muab xov li ntawd es txwv tsis pub neeg nkag rau hauv los sav. Tiamsis thaum koj ua tib zoo xauj, ua cas muaj ib tug tsov ntxhuav nyooj laws nrhiav tsiaj noj nyob hauv! Thaum koj pom li ntawd, koj mam li paub tias tus ntsa laj kab twb yog tsa los tiv thaiv koj ntag. Puas yog muaj ib tug tabtom soj ntshis koj tamsim no thiab? Vajtswv Txojlus ceeb toom li no: “Cia li feeb meej thiab ceev faj zov tos. Nej tus yeeb ncuab uas yog Ntxwg Nyoog ncig mus ncig los zoo yam nkaus li tus tsov ntxhuav nyooj laws nrhiav tus uas yuav tom tau noj.”​—1 Petus 5:8.

⁵ Xatas zoo li tus tsov ntxhuav nyaum heev, uas xav nrhiav tsiaj tom noj. Yehauvas tsis xav kom peb poob rau Xatas lub xib teg, Yehauvas thiaj tsa kevcai los tiv thaiv peb ntawm tus uas limhiam ntawd tej “tswvyim phem.” (Efexau 6:11) Thaum peb ua tib zoo xav txog Vajtswv tej kevcai, peb yuav pom peb Leej Txiv txojkev hlub rau peb. Peb yuav pom tias Vajtswv tsa kevcai los tiv thaiv peb xwb, thiab yog peb coj li nws qhia peb yuav muaj kev zoo siab tiag. Tus thwjtim Yakaunpau sau li no: “Tus uas tshuaj saib txoj kevcai uas zoo kawg nkaus, yog txoj kevcai uas pub kev thaj yeeb, thiab nws nyob ruaj hauv txoj  kevcai ntawd . . . yuav tau txojkev kaj siab lug hauv txhua yam uas nws ua.”​—Yakaunpau 1:25.

6. Peb yuav ua li cas peb thiaj tso siab tau rau Vajtswv tej kevcai ncaj ncees thiab nws tej hauv paus ntsiab lus? Piav seb.

⁶ Yog tias peb coj peb lub neej raws li Vajtswv tej kevcai, peb yuav pom tias Yehauvas tej kevcai yeej pab tau peb tiag, thiab peb yuav hajyam tso siab rau nws. Xav txog cov lus sam hwm no: Hauv “Khetos txoj kevcai,” Yexus sam hwm tias peb yuav tsum qhia kom lwm tus “tuav rawv txhua yam uas [nws] tau qhia.” (Kalatia 6:2; Mathai 28:19, 20) Tsis tas li ntawd xwb, muaj lus sam hwm tias tseem ceeb rau cov Khixatia tuaj txoos ua ke sib txhawb zog pe hawm Vajtswv. (Henplais 10:24, 25) Vajtswv kuj sam hwm kom peb thov nws tsis tu ncua tawm hauv nruab siab tuaj. (Mathai 6:5-8; 1 Thexalaunika 5:17) Thaum peb coj raws nraim li cov lus sam hwm zoo li hais no, ces peb yuav pom tseeb tias tej lus ntawd coj tau peb txoj hau kev mus rau qhov zoo xwb. Peb yuav ua neej txaus siab hlo thiab muaj txojkev zoo siab uas nrhiav tsis tau lwm qhov los li. Thaum koj ua tib zoo xav txog Vajtswv txoj kevcai seb pab tau koj li cas, koj yimhuab tso siab rau Vajtswv tej kevcai, puas yog?

7, 8. Ib txhia txhawj tsam lawv yuav coj tsis tau Yehauvas tej kevcai mus li, tiamsis Vajtswv Txojlus txhawb tau lawv li cas?

⁷ Ib txhia txhawj tsam lawv ho ua txhaum Vajtswv txoj kevcai, thiab xav tias xyov lawv puas yuav coj tau Yehauvas tej kevcai mus li. Yog tias koj xav li ntawd, ces nco ntsoov cov lus no: “Kuv yog [Yehauvas], yog nej tus Vajtswv, kuv qhuab qhia tej uas muaj nuj nqes rau nej thiab coj nej taug txojkev uas tsim nyog mus. Au, yog nej tau mloog kuv tej lus nkaw, mas nej lub siab yuav tus yees yam nkaus li tus niag dej puv ntug nkaus, thiab nej txojkev ncaj ncees yuav zoo li tej nthwv dej hiavtxwv ntas.” (Yaxaya 48:17, 18) Koj puas tau muab tej  lus no coj los xav ib zaug li? Tej lus no yeej txhawb zog heev.

⁸ Hauv nqe no, Yehauvas qhia peb tias yog peb mloog nws lus peb yuav tau zoo. Nws muaj ob lo lus cog tseg rau peb. Ib, Yehauvas cog lus tias peb lub siab yuav tus yees yam nkaus li tus dej puv ntug nkaus. Ob, Yehauvas cog lus tias peb txojkev ncaj ncees yuav zoo li dej hiavtxwv ntas. Yog tias koj sawv ntawm ntug hiavtxwv, koj yuav pom dej hiavtxwv ntas ib nthw tas ib nthw tuaj. Koj yeej paub tias hiavtxwv yuav ntas li ntawd mus ib txhiab ib txhis li, puas yog? Yehauvas cog lus tias koj txojkev ncaj ncees yuav zoo ib yam li dej hiavtxwv ntas. Yog tias koj muab siab npuab Vajtswv tiag, nws yeej yuav tsis cia koj ua zog kais! (Nyeem Ntawv Nkauj 55:22.) Tej lus cog tseg no yeej pab tau koj tso siab rau Yehauvas thiab nws tej kevcai ncaj ncees.

9, 10. (1) Vim li cas zoo rau cov Khixatia npaj hom phiaj kom ua neeg paub tab? (2) Ua li cas thaum peb muaj Yehauvas txojkev xav, peb ho zoo siab?

⁹ Yuav kom peb tsim tsa tau peb tus kheej ntxiv, peb yuav tsum ua dabtsi thiab? Henplais 6:1 qhia tias: “Cia li mus txog qhov uas hlob tiav.” Peb yog neeg txhaum, peb xyaum tsis tau kom peb zoo rau txhua fab tamsim no. Tiamsis peb yeej xyaum tau kom peb hlob tiav lossis paub tab. Zoo rau cov Khixatia muaj lub hom phiaj ntawd. Peb yimhuab paub tab, ces peb yimhuab zoo siab teev tiam Yehauvas. Vim li cas ho hais li no?

¹⁰ Tus Khixatia uas paub tab yog tus uas paub Yehauvas zoo. Nws muaj Yehauvas txojkev xav. (Yauhas 4:23) Povlauj sau tias: “Cov uas ua lub neej raws li nqaij tawv kuj kub siab rau tej uas yog nqaij tawv li xwb.” (Loos 8:5) Tus  uas coj lub neej raws li nws cev nqaij tawv ntshaw xwb, yuav tsis muaj kev zoo siab. Nws yuav xam pom nws tus kheej xwb, tsis xam pom lwm tus. Nws yuav pom qhov nqaim xwb, tsis pom qhov dav. Thiab nws yuav coj lub neej ntshaw nyiaj txiag qhov txhia chaw xwb. Tiamsis tus uas muaj Vajtswv txojkev xav, yuav muaj kev xyiv fab. Nws yuav xav ntsoov rau Yehauvas, tus Vajtswv uas muaj kev zoo siab. (1 Timaute 1:11, NW) Nws yuav rau siab ntso ua raws li Vajtswv lub siab nyiam, txawm nws raug tsim txom li cas los xij. Nws suav tias, qhov uas nws thev taus ua pov thawj tias Xatas yog tus uas dag xwb. Tej uas nws raug ntawd, yuav hajyam pab kom nws muab siab npuab Vajtswv Yehauvas.​—Paj Lug 27:11; nyeem Yakaunpau 1:2, 3.

11, 12. (1) Povlauj hais tias peb yuav tsum ua li cas peb thiaj paub cais qhov zoo ntawm qhov phem, thiab lo lus “xyaum kawm” txhais tau li cas? (2) Tibneeg yuav tsum xyaum li cas lawv thiaj hlob tiav thiab muaj zog?

¹¹ Peb yuav tsum xyaum tiag, peb thiaj yuav paub tab  thiab paub Yehauvas zoo. Xav txog nqe Vajlugkub no: “Tej zaub mov tawv yog muab rau cov uas hlob lawd noj, yog cov uas twb xyaum kawm lawm thiaj txawj cais tias yam twg zoo yam twg phem.” (Henplais 5:14) Lo lus “xyaum kawm” txhais li cas? Thaum Povlauj sau nqe no, nws siv ib lo lus Kili uas txhais tau tias ‘xyaum ib yam li tus neeg txawj dhia nrig nphau.’ Cia peb kawm seb qhov ntawd yog li cas tiag.

¹² Thaum peb yug los, peb tsis txawj siv peb tej tes taw. Muab ua piv txwv li no: Tus menyuam mos liab yeej ntxeev tsis taus cev, nti cuj ca xwb. Tej zaum nws yoj tes raug nws lub plhu, ua rau nws tau ib plhaw thiab. Tiamsis thaum nws hlob zuj zus, nws mam li xyaum ntxeev cev, xyaum nkag, xyaum mus kev, thiab xyaum dhia rau ub rau no. * Nws xyaum ib qho zuj zus tuaj, nws mam kawm tau. Ib tug neeg uas txawj dhia nrig nphau, ho xyaum dhia li cas? Thaum koj saib ib tug neeg dhia nrig nphau, ua rau koj xav tsis thoob li! Nws ntswj ntxeev cev li cas los tau raws nkaus li nws lub siab xav. Puas yog nyob nyob, es nws lam txawj ua li ntawd? Tsis yog! Nws yeej xyaum tas zog nws thiaj txawj. Phau Vajlugkub qhia tias thaum tibneeg xyaum tej ntawd kuj zoo thiab, tiamsis tsuas “muaj qabhau mentsis” xwb. Yog li ntawd, yeej tsim nyog peb yimhuab siv sijhawm los xyaum tej yam uas muaj qabhau rau peb dua, puas yog? Cia peb xyaum kom peb txawj cais tias yam twg zoo thiab yam twg phem!​—1 Timaute 4:8.

13. Peb yuav xyaum li cas peb thiaj txawj cais tias yam twg zoo thiab yam twg phem?

 ¹³ Hauv phau ntawv no, peb twb kawm lawm tias koj yuav xyaum li cas koj thiaj txawj cais tias yam twg zoo thiab yam twg phem, xwv koj thiaj muab siab npuab Yehauvas thiab paub xav li nws lub siab nyiam. Ua ntej koj yuav txiav txim siab ua ib yam dabtsi twg, koj yuav tsum thov Yehauvas kom koj paub coj raws li nws tej hauv paus ntsiab lus thiab nws tej kevcai. Nug koj tus kheej li no: ‘Phau Vajlugkub tej hauv paus ntsiab lus thiab tej kevcai qhia li cas txog tej uas kuv yuav ua no? Kuv yuav muab cov lus ntawd coj los siv li cas? Kuv yuav txiav txim li cas thiaj haum Yehauvas siab?’ (Nyeem Paj Lug 3:5, 6; Yakaunpau 1:5.) Yog tias koj xav txog tej lus nug no ua ntej koj txiav txim siab ua ib yam twg, ces twb yog koj xyaum cais tias yam twg zoo thiab yam twg phem. Yog tias koj xyaum cais li no, koj yuav muaj Yehauvas txojkev xav. Qhov no yuav pab kom koj hajyam muaj kev sib raug zoo nrog Yehauvas.

14. Yuav kom peb loj hlob ntawm sab kev ntseeg, peb yuav tsum muaj lub siab ntshaw dabtsi, tiamsis peb yuav tsum ceev faj li cas thiab?

¹⁴ Yog tias peb xyaum tiag, muaj ib hnub peb yeej yuav paub tab; tiamsis yeej tsis muaj ib hnub uas peb yuav kawm txhij kawm txhua txog Yehauvas. Peb yuav tsum nrhiav kev tas zog los tsav peb txojkev ntseeg kom loj hlob mus xwb. Yuav kom yus hlob taus, yus yuav tsum kheev noj. Povlauj thiaj qhia tias: “Tej zaub mov tawv yog muab rau cov uas hlob lawd noj.” Yog tias koj xav kom koj txojkev ntseeg hlob ntxiv, ces koj yuav tsum noj tej zaub mov ntawm sab kev ntseeg. Muab tej uas koj kawm ntawd coj los pab kom koj txiav txim tau zoo. Qhov uas koj ua li ntawd yuav qhia tias koj muaj tswvyim tiag. Phau Vajlugkub qhia tias: “Tsis muaj ib  yam zoo cuag li tswvyim.” Yog li ntawd, peb yuav tsum cob kom peb lub siab txawj ntshaw peb Leej Txiv Yehauvas tej lus qhuab qhia. (Paj Lug 8:11; 1 Petus 2:2) Tiamsis thaum peb kawm tau tej no lawm, peb yuav tsum tsis txhob khav theeb. Peb yuav tsum ua tib zoo tshuaj peb lub siab. Tsis txhob cia txojkev khav theeb nrhau cag rau hauv peb lub siab. Povlauj sau tias: “Cia li tshuaj nej tus kheej saib nej nyob hauv txojkev ntseeg los tsis nyob.”​—2 Khaulee 13:5.

15. Yuav kom peb loj hlob ntawm sab kev ntseeg, vim li cas peb yuav tsum muaj kev hlub?

¹⁵ Thaum ua tau ib lub tsev tiav lawm los, tseem ceeb rau ib tug neeg tu thiab kho lub tsev ntawd mus li. Tej zaum tseem yuav txuas ib chav ntxiv los muaj thiab. Ib yam li ntawd, peb yuav tsum xyaum tiag kom peb thiaj paub tab thiab muaj kev ntseeg ruaj khov mus ntxiv. Dabtsi thiaj yuav pab peb ua li ntawd? Tsis muaj ib yam tseem ceeb npaum li qhov uas peb muaj kev hlub. Peb txojkev hlub rau Yehauvas thiab rau peb cov kwvtij nkauj muam yuav tsum loj hlob zuj zus. Yog tias peb tsis muaj kev hlub, ces txawm peb ua tau haujlwm zoo thiab txawj ntse npaum li cas los tsis muaj qab hau dabtsi li. Tsuas zoo li tej suab tswb uas nrov ua nqaj ua nqug xwb. (1 Khaulee 13:1-3) Tiamsis yog tias peb muaj kev hlub, peb yeej yuav paub tab thiab yuav loj hlob ntxiv ntawm sab kev ntseeg.

16. Xatas txhawb kom peb xav li cas, thiab Yehauvas pub dabtsi los pab peb?

¹⁶ Cia peb kawm txog ib yam ntxiv uas yuav pab tsim tsa peb tus kheej. Yuav kom peb ua tau Yexus Khetos ib tug thwjtim tiag tiag, peb yuav tsum ceev faj lub qab ntuj no txojkev xav. Xatas yog tus kav lub qab ntuj no. Nws txawj ntxias kom tibneeg xav txog qhov phem ntau tshaj qhov zoo, kom lawv muaj kev txhawj xeeb, tsis tso siab rau leejtwg, thiab ua kom lawv tas kev cia siab. (Efexau 2:2) Txojkev xav ntawd yuav laum tau cov Khixatia, ib yam li lub tsev uas pib tuaj pwm thiab lwj zuj zus. Tiamsis, zoo siab heev uas Yehauvas tau npaj ib txojkev pab rau peb. Nws pub peb muaj kev cia siab rau yav tom hauv ntej, xwv peb thiaj sawv ruaj khov.

17. Raws li Vajtswv Txojlus qhia, qhov uas peb muaj kev cia siab tseem ceeb npaum li cas?

¹⁷ Phau Vajlugkub qhia tias peb yuav tsum muab tej cuab yeej ntawm sab kev ntseeg coj los hnav, peb thiaj tawm tsam yeej Xatas thiab lub qab ntuj no. Phau Vajlugkub qhia tias peb yuav tsum “muab txojkev vam tias yuav dim los ua lub mom hlau ntoo.” Lub kaus mom hlau ntawd tseem ceeb kawg li. (1 Thexalaunika 5:8) Yav thaum ub, yog tias ib tug tub rog tsis ntoo kaus mom mus ntaus rog, nws yuav kav tsis ntev. Tej kaus mom hlau uas cov tub rog ntoo muaj ib txheej ntaub mos mos lossis tawv nyuj thiv sab hauv, thaum luag ntaus tuaj tsuas txhuam lub kaus mom hlau xwb, tsis raug nws sab. Ib yam li lub kaus mom hlau tiv thaiv tau koj lub taubhau, yog tias koj cia siab ntsoov rau Vajtswv ces yuav tiv thaiv tau koj txojkev xav thiab.

18, 19. Ua li cas Yexus thiaj tsis tas kev cia siab, thiab peb xyaum Yexus li cas?

¹⁸ Yexus tseg ib tug qauv zoo kawg li rau peb. Nws cia  siab ntsoov rau tej lus cog tseg tom hauv ntej. Koj puas nco qab Yexus raug tsim txom npaum li cas hmo ua ntej nws tuag? Nws ib tug phoojywg zoo ntxeev siab muab nws muag rau nws cov yeeb ncuab. Muaj dua ib tug phoojywg tsis lees paub nws. Lwm cov cia li tso nws tseg khiav tas. Nws haiv neeg kiag rov ntxeev siab rau nws thiab quaj qw thov kom cov Loos muab nws tsim txom thiab tua pov tseg. Yog li ntawd, peb yeej hais tau tias, Yexus raug tej kev nyuaj siab uas peb tsis tau raug dua ib zaug li. Dabtsi pab kom Yexus thev dhau tej ntawd? Henplais 12:2 qhia tias: “Nws tiv thev [ntawm] tus . . . ntoo kom thiaj tau txojkev zoo siab uas nyob tom nws hauv ntej. Nws tsis quav ntsej qhov uas raug txaj muag, thiab nws twb zaum ntawm Vajtswv lub zwm txwv sab xis lawm.” Yexus ntsia ntsoov rau txojkev “zoo siab uas nyob tom nws hauv ntej.”

¹⁹ Txojkev zoo siab uas nyob ntawm Yexus hauv ntej yog dabtsi? Yexus yeej paub tias yog nws ua siab ntev nyiaj tiag, nws yuav txhawb tau Yehauvas lub npe kom dawb huv. Nws yuav ua pov thawj qhia rau sawvdaws tias, Xatas yog tus uas hais lus dag. Tsis muaj ib yam uas Yexus yuav vam tshaj ntawd! Nws paub tias Yehauvas yuav pub nqe zog zoo kawg rau nws thiab. Nws paub tias tshuav tsis ntev, nws yuav rov qab pom nws Leej Txiv. Yexus yeej nco ntsoov txojkev vam no rau hauv nruab siab, nws thiaj tiv dhau lub sijhawm phem kawg nkaus. Peb yuav tsum tau ua tib yam li ntawd thiab. Peb kuj muaj ib txojkev cia siab zoo kawg li ntawm peb hauv ntej thiab. Peb muaj txoj koob hmoov los txhawb kom Yehauvas lub npe dawb huv. Yog tias peb nyiaj dhau tej kev tsim txom thiab kev sim siab uas peb raug, thiab yog tias peb tuaj Yehauvas tog, tej no yuav ua pov thawj tias Xatas yog tus uas dag.

20. Dabtsi yuav pab koj xav txog tej yam zoo thiab muaj kev cia siab?

 ²⁰ Tsis yog Yehauvas lam foom koob hmoov rau nws cov tub qhe kom tas kevcai xwb; tiamsis nws yeej muaj lub siab uas xav pub nqe zog heev rau lawv. (Yaxaya 30:18; nyeem Malakhi 3:10.) Yehauvas yeej zoo siab hlo pub rau nws cov tub qhe raws li tej yam zoo uas lawv ntshaw. (Ntawv Nkauj 37:4) Yog li ntawd, cia li xav ntsoov rau txojkev cia siab uas Vajtswv pub rau koj. Xatas nyiam thaum koj muab txhua yam los xav rau qhov phem, thiab kom peb xav txog tej yam qias vuab tsuab. Tsis txhob qaug rau Xatas lub qab ntuj phem no txojkev xav. Yog tias lub qab ntuj no txojkev xav pib laum koj lub siab, ces rau siab ntso thov Yehauvas pab. Vajtswv “txojkev siab tus uas ntau dhau li neeg nkag siab tau” yuav tsom kwm koj lub siab thiab koj txojkev xav.​—Filipi 4:6, 7.

21, 22. (1) “Pab neeg coob coob” muaj kev cia siab dabtsi? (2) Koj vam ntsoov dabtsi tshaj, thiab koj yuav txiav txim siab ua dabtsi?

²¹ Koj muaj ib txojkev cia siab uas zoo kawg nkaus li! Yog tias koj muaj feem nrog “pab neeg coob coob” uas yuav dim lub caij muaj kev ceeblaj txom nyem loj kawg li, xav txog lub neej uas koj yuav tau txais. (Qhia Tshwm 7:9, 14) Xatas thiab nws cov dab yuav tsis muaj nyob qhovtwg li lawm. Koj yuav dim plaws tej kev nyuaj siab  uas koj muaj tamsim no. Tej no ua rau peb xav tsis thoob li, rau qhov peb tsis tau muaj ib tug twg pom lub neej zoo kawg nkaus uas peb hais no. Thaum tsis muaj Xatas thiab nws cov dab txojkev quab yuam lawm, peb yuav kaj siab lug kho lub ntiajteb ua ib lub vaj kaj siab. Yexus thiab cov 144,000 leej uas nrog nws kav saum ntuj ceeb tsheej yuav coj peb txoj hau kev! Yuav tsis muaj kev mob kev nkeeg lawm thiab peb yuav pom cov laus rov qab hluas tuaj. Peb yuav tos txais cov neeg uas peb hlub, uas Vajtswv tsa sawv hauv qhov tuag rov qab los. Thiab peb yuav tau txais lub neej uas Vajtswv ib txwm xav kom peb muaj thaum ntuj tsim teb raug los! Thaum peb hloov zuj zus, ua neeg zoo kawg nkaus, tsis muaj txim lawm, peb yuav pom cov lus cog tseg ntawm Loos 8:21 muaj tiav: Peb yuav muaj kev ywj pheej thiab yuav yog “Vajtswv cov menyuam” tiag tiag li.

²² Yehauvas xav kom koj muaj txojkev ywj pheej tiag tiag. Yuav kom peb tau txojkev ywj pheej ntawd, peb yuav tsum mloog Vajtswv lus. Yeej tsim nyog peb muab siab rau mloog Yehauvas lus txhua txhua hnub, puas yog? Cia li tsim tsa koj tus kheej, es txhawb koj txojkev ntseeg kom ruaj khov, xwv koj thiaj nyob ruaj hauv Vajtswv txojkev hlub mus ib txhiab ib txhis tsis kawg!