1, 2. Anni nga trabahu nga pappataddag i kukukuammu? Ngatta mawag tu siguraduammu nga maladda yatun?

MAPPUPPURSIGI ka nga mappataddag tu balay. Nabayag ngana nga pinegafanammu yatun ngem ari paga nabalin. Mariga yaw ngem makapagayayà. Maski anni mesimmu, determinado ka nga ari magimmang onu mattalaka-talakag megafu ta afektan na kalidad na trabahum i pattolem, kunne na gapa i pappangetammu. Ngatta? Megafu ta i baggim mismu i paddaggunammu nga pataddaggan!

² Nakagi na disipulo nga si Judas i meyannung ta pappataddag anna pamakaladda ta baggi tam. Turi ta nepagaramna ta Cristiano ira nga “ari kamu umarayyu ta aya na Dios,” nekagina gapa nu kunnasi nga makua yatun: “Pakaladdan nu i kuruga masanto nga angngurug nu.” (Judas 20, 21) Kunnasim nga makua yaw tapenu mas massikan i pangurugmu anna makapattalupaddiakka ta ayâ na Dios? Gigiammuattam i tallu nga makoffun tape mapaladda tam i pangurug tam.

3. Anni i kayà ni Satanas nga nonopammu tape melogò ka?

³ Ollu, mawag tu paladdattam i pangurug tam ta bilin na Dios. Aru ngana i nagigiammum taw nga libru nga matunung nga bilin ni Jehova meyannung ta kondukta. Anni i makagim tatun nga bilin? Kayà ni Satanas nga melogò ka anna nonopammu nga sobra ka-istrikto na bili-bilin, prinsipio, anna  na estandarte ira ni Jehova. Ari yaya nagimmang ta pangiyusa taw nga taktika megafu ta efektibo yatun gari ta Eden. (Genesis 3:1-6) Efektibo kari gapa nikaw i taktikana? Nakadepende yatun ta pagimammàmu.

4, 5. Anni nakuan i pagimamma tam ta bili-bilin na Dios? Anni i nekegittanna?

⁴ Kunnaw i nekegittanna: Durante nga mappasa-pasiar ka ta parke, nasingammu nga egga nagibawan nga partena, maladda anna atannang yatun. Makakkasta yatun nga parte na parke. Ta ollu, baka manonòmu nga ari nakuan nga nagibawan yatun ta fugaddannaka nga mattallung. Ngem durante nga iripi-ripàmu i unag, egga gabba kananassing nga leon nga agga-paran nga mangatake! Yari tu nanonòmu nu ngatta nagibawan yatun​—masserbi nga proteksion. Ngem egga kari gapa kananassing nga leon nga agga-paran nga mangatake nikaw? Nanabarang i Biblia: “Tangngallan nu i appana-panono nu anna magalerto kamu! Ta i Demonio nga kontra nu ay mallelevu nga kagitta na mangngana-nganangngar nga leon nga magaleg ta kanan na.”​—1 Pedro 5:8.

⁵ Kananassing nga minangnganù si Satanas. Megafu ta ari kayà ni Jehova nga mabiktima ittam ni Satanas, nangiyawà yaya tu bili-bilin tape maprotektan ittam kontra ta napakaru nga ‘pangilogona.’ (Efeso 6:11) Yatutta, kada nonopattam i bili-bilin na Dios, masingattam nakuan tatun i ayâ na Yama tam ta langì. Magayayà tam anna egga seguridad tam nu kunnatun i pagimamma tam. Netura na disipulo nga si Santiago: “I mamatalatto ta awan tu pakkurangan na nga dob nga mamalubbang ta totolay, anna arian na nga kattaman i ginnan na ngem kuan na, yatun nga tolay ay bendisionan na Dios ta anni laman nga kuan na.”​—Santiago 1:25.

6. Anni i kapianan nga kuan tape mapaladda i pangurug tam ta bili-bilin anna prinsipio ira na Dios? Mangiyawà tu angngarigan.

⁶ I pattolay mekunnay ta bili-bilin na Dios i kapianan nga kuan tape mapaladda i pangurug tam ta Nangiyawà ta Dob anna ta sirib na bili-bilinna. Angngariganna, kasali ta “dob ni Cristo” i bilin nga: “Tudduan nu ira tu parulattad-da ngamin i  bili-bilik-ku nikamu.” (Galacia 6:2; Mateo 28:19, 20) Tuttuppalan gapa na Cristiano ira i bilin nga ariadda immangan i paggarammammung tape maddayarayaw anna makkapasa-pasikan. (Hebreo 10:24, 25) Nebilin gapa na Dios nga kanayun nga napafutuan nga makimallò tam sa. (Mateo 6:5-8; 1 Tesalonica 5:17) Durante nga mattolay ittam mekunnay tatun nga bili-bilin, mas masingattam nga kurug tu meddu nga giya yatun ira. Paggafuan na pagayayà anna pakkakontento yatun, nga ariattam vuluvuga malegan taw ta magulu nga mundo. Durante nga nononopammu nu kunnasi ka nga mabenefisiowan ta pattolay mekunnay ta bili-bilin na Dios, mas malladda i pangurugmu!

7, 8. Kunnasi nga pinagaram na Biblia danuri mavurung nga baka ariadda mawayya tuttulan i bili-bilin ni Jehova ta pappasa na daga-ragun?

⁷ Mavurung i karuan nu matuttulda paga i bili-bilin ni Jehova ta pappasa na daga-ragun. Maganassing ira nga makkamali. Nu matagenòmu yatun, daddammammu yaw: “Sakan, si Jehova, i Diosmu, i manuttuddu nikaw tape mabenefisiowakka, i mangigiggiya nikaw ta dalan nga mawag tu lakarammu. Nu tuppalammu laman nakuan i bili-bilikku! Ay siguradu tu mabbalin tu kagitta na bannag i imammòmu anna kagitta na  palung na bebay i kinatunung mu.” (Isaias 48:17, 18) Ari kari tu makapagaram yatun ira nga uvovug?

⁸ Iperaddam ni Jehova nga mabenefisiowattam nu mattuppal tam sa. Egga dua nga nepromesana nga bendision nu kuattam yatun. Ollu, mabbalin tu kagitta na bannag i imammo tam​—kalmadu, abundansia, anna tulu-tuloy. Mekadua, mabbalin tu kagitta na pala-palung ta bebay i kinatunung tam. Nu agga-taddagka ta pipì na bebay tapus girawammu nu kunnasi nga manotoli i pala-palung, siguradu nga manonòmu nga tulu-tuloy yatun. Ammum nga ari vuluvuga nga magimmang yatun nga pala-palung. Kinagi ni Jehova nga mabbalin tu kunnatun i kinatunung mu​—awan tu immanna. Yari tu nu mappursigi ka nga mattalò sa, ari na vuluvuga itulù nga maffù ka. (Bibbigammu i Salmo 55:22.) Ari kari nga mapaladdana yatun nga makapagaram nga promesa i pangurugmu kani Jehova anna ta matunung nga bili-bilinna?

9, 10. (a) Ngatta makasta nu mannakam ta espiritual i Cristiano? (b) Kunnasi nga makoffun i espiritual nga pagimamma tape magayayà tam?

⁹ “Ta annonopan ay manakam kamu ngana nakuan.” Yatun i mekadua nga mawag nga kuan tape mapaladdam i kuruga masanto nga pangurugmu. (1 Corinto 14:20) Makasta nu addetan na kada Cristiano i pammanakam. Posible nga maddè yaw, ari tu kagitta na kinaperfekto nga imposible nga maddè na totolay. Mas makapagayayà paga i passerbi na Cristiano kani Jehova durante nga mammanakam ira. Kunnasi?

¹⁰ Nespirituan i appana-panonò na manakam nga Cristiano. Imammatanna i ganna-gannug segun ta pagimamma ni Jehova. (Juan 4:23) Netura ni Pablo: “Ta danuri i mattolay segun ta kata-katolay da nga neravvunan, ay nonopad-da laman i ikaya na baggida. Ngem danuri i mattolay segun ta Espiritu, ay nonopad-da i ikaya na Espiritu.” (Roma 8:5) Temporario laman nga pagayayà i irattal na neravvunan nga pagimamma megafu ta pabbalinannaka tu makasarili, saradu i nonòmu,  anna materialistiko. Makapagayayà i espiritual nga pagimamma megafu ta nakafokus yatun kani Jehova, i magayayà nga Dios. (1 Timoteo 1:11) Kakayà na nespirituan nga tolay nga mapagayayà si Jehova anna magayayà lagapa maski nu magattam yaya tu ziga-riga. Ngatta? Megafu ta tiansana yatun nga pakurugan nga laddug si Satanas anna mepasinganna i pattalò kani Jehova.​—Proverbio 27:11; bibbigammu i Santiago 1:2, 3.

11, 12. (a) Anni i nekagi ni Pablo meyannung ta pakawayya na Cristiano nga “maningan ta mapia anna marakay,” anna anni i kebalinan na termino nga netransleyt tu “napenam”? (b) Anni nga passanay i mawag nga makua ta baggi tape mapenam?

¹¹ Mawag tu sanayammu i baggim tape mammanakam ka ta espiritual. Nonopammu yaw: “I matagga nga kanan ay para ta manakam ngana, nga napenam ngana nga maningan ta nadduman na mapia anna marakay.” (Hebreo 5:14) Turi ta nakagi ni Pablo i meyannung ta passanay ta pakawayya nga maningan ta nadduman na mapia anna marakay, neyusana i Griego nga termino nga “napenam” nga maruddu nga meyusa ta gymnasium ta Grecia turi ta ollu-siglo megafu ta awayyana gapa nga metransleyt yatun tu ‘napenam nga kagitta na gymnast.’ Anni panò i kasali tatun nga passanay?

¹² Turi ta neyanà tam, ari paga nga nasanay i baggi tam. Angngariganna, ari paga nga kontroladu na piga vulan paga laman nga abbing i babaraddi nga lima anna takkina. Yari tu, nu iguyuna i limana, awayyana tu makannana i mismu nga mukàna yatutta, makaddag tapus tumangì. Ngem sesenù nga masanay i baggina nu kanayunna nga iguyu. Ta pappasa na piga vulan, mamegafu ngana nga makkarekay i abbing, tapus lumakag, adde ta makakarela ngana. * Ngem kunnasi gapa ta gymnast? Nu makasingakka tu atleta nga mappattu tapus malalaki anna awan tu mintisna nga massirku-sirku ta utun, siguradu nga manonòmu nga nasanay ngana  tu mapia i baggina. Ari laman tu babbasta nga nabbalin tu malalaki i gymnast, aru nga oras nga nassanay yaya. Segun ta Biblia, “egga i mapia nga iyawa” na kunnatun nga passanay ta baggi. Siguradu nga mas aru i pammakapianattam ta passanay ta espiritual nga pakalippawà tam nga maningan ta nadduman na mapia anna marakay!​—1 Timoteo 4:8.

13. Kunnasi tam nga mapenam i pakawayya tam nga mangalippawa?

¹³ Aru i nagigiammu tam taw nga libru nga makoffun nikaw nga masanay i pakawayyam nga mangalippawa tape makapattalupaddiakka nga matalò kani Jehova bilang nespirituan nga tolay. Nonopammu tu mapia anna ipakimallòmu i prinsipio anna bili-bilin na Dios ta inaggaw nga desisiommu. Kada maddesisiokka, iyavùmu ta baggim: ‘Anni nga bilin onu prinsipio ta Biblia i makoffun niakan? Kunnasì nga meyaplika yatun? Anni i mamagayayà ta nelangitan nga Yamà?’ (Bibbigammu i Proverbio 3:5, 6; Santiago 1:5.) Mas mapenam i pakalippawa tam nu kanayun nga tuttulattam i bili-bilin anna prinsipio na Biblia kada maddesisiottam. Yatun nga pakkapenam i makoffun nikaw nga mabbalin anna mattalupaddian nga nespirituan nga tolay.

14. Anni i mawag nga kanattam tape mammanakam ittam ta nespirituan, ngem mawag nga magimmugug tam ta anni?

¹⁴ Maski nu awayya na tadday i makaddè ta pammanakam, tulu-tuloy lagapa i papprogresona ta espiritual. Nakadepende ta makan i papprogreso onu pammanakam. Nekagi ni Pablo: “I matagga nga kanan ay para ta manakam ngana.” Importante i tulu-tuloy nga pakkakan tu matagga nga espiritual nga makan tape malladda i pangurugmu. Mabbalikka tu masirib nu fustu i pangiyaplikam ta nagigiammum. Kagian na Biblia:  “Sirib i pinaka-importante nga gannug.” Yatutta mawag tu kurug nga mangipasingan ittam tu pabbisin ta nabala-balor nga kinakurug nga iyawa na Yama tam. (Proverbio 4:5-7; 1 Pedro 2:2) Siempre, ari tu rason i aru nga pakannammu anna i makadios nga sirib tape mappalagopog. Mawag tu regular nga usitakkan i baggi tam tapenu ari maggamù anna dumakal ta futu tam i papparayag onu i tanakuan paga nga pakkafian. Netura ni Pablo: “Usitakkan nu ta mapia i baggi nu, tapenu kannammuan nu nu giminafu kamu ta angngurug.”​—2 Corinto 13:5.

15. Ngatta importante i ayâ ta espiritual nga pammanakam?

¹⁵ Maski nu nabaling ngana nga napataddag i balay, tulu-tuloy lagapa i trabahu. Kawagan nga mamentena anna mapakappian onu mapinarù. Ta pappasa na piga ragun, baka kawagan ngana paga nga mamungan tu kuarto. Anni i kawagattam tape mammanakam ittam ta espiritual anna mapattalupaddiattam yatun? I pinaka-importante ta ngamin​—ayâ. Mawag tu ariattam magimmang nga pagatangngan i ayâtam kani Jehova anna ta kapangngurug tam. Nu awan tu ayâtam, awan lagapa tu sesserbi na pakannammu anna na kukukuattam​—megitta yatun ta kallitang nga guni. (1 Corinto 13:1-3) Gukaban na ayâ, maddetattam i pammanakam anna mattulu-tuloy yatun.

16. Anni i kayà ni Satanas nga mesimmu nittam, anna anni i proteksion nga neyawa nittam ni Jehova?

¹⁶ Gigiammuattam i tadday paga nga aspeto tape mapaladda i pangurugmu. Tapenu mapaladdam i baggim bilang aripan ni Cristo, mawag tu immugurammu i appana-panonòmu. Bilang mammaguray na mundo, malalaki si Satanas nga manginfluwensia ta totolay tape makkafi i nonòda, mannegatibo, madduda, anna mawanan tu iddanama. (Efeso 2:2) Delikadu yatun nga appana-panonò, kagitta na vuvvù nga manaral ta balay nga napadday ta kayu. Mapia ngana laman ta  nangiyawà si Jehova tu uffun tape maprotektattam​—i iddanama.

17. Kunnasi nga nepasingan na Biblia i importansia na iddanama?

¹⁷ Sinaggi-tadday na Biblia i kawagattam ira nga armas tape malabanattam si Satanas anna i mundo nga pammagurayanna. I tadday nga importante nga iyusa tam ay i helmet, “i pagiddanama ta kapaliag.” (1 Tesalonica 5:8) Ammu na suddalu turi ta tiempo na Biblia nga mappeligro yaya nu awan tu helmetna. Maruddu nga metal i meyusa ta pamadday tu helmet nga nasapinan tu tabbì, onu tela. Meyusa yatun tapenu ari nga madannal i ulu. Nu maprotektan na helmet i ulu, maprotektan gapa na iddanama i nonòmu.

18, 19. Kunnasi nga nangipasingan si Jesus tu makasta nga ehemplo na pagiddanama? Kunnasi tam yaya maparigan?

¹⁸ Si Jesus i kapianan nga ehemplo tam ta kanayun nga pangiddanama. Daddammammu i inattammanna turi ta ultimo nga pattolena ta davvun. Tinaraidor yaya na madukkò nga kofunna katali na kuartu. Tadday gapa nira i nangilimag nga ammammuna yaya. Pinanawan anna ziniha gapa yaya na karuan. Kinontra yaya na Judio ira nga kagittana, anna nekiddaw da paga nga patayan yaya na Romano ira nga suddalu. Siguradu nga mas mariga i inarubang ni Jesus nga pazziga-riga. Anni i nakoffun sa? “Megafu ta pagayaya nga maginnennag sa, inattamman na anna arian na nga ninonono i kappasiran nga kapapatay,” kagian na Hebreo 12:2, “Ay sangoye, agga-itubang ngana yaya ta ziwanan na trono na Dios.” Ari vuluvuga nga nawawan ta nonò ni Jesus i “pagayaya nga maginnennag sa.”

¹⁹ Anni nga pagayayà i maginnennag kani Jesus? Bueno, ammuna nga makoffun yaya nga mapakasanto i ngagan ni Jehova nu magattattam yaya. Makeyawà yaya tu kapianan nga pamakurug nga laddug si Satanas. Awan ngana tu tanakuan nga makeyawà kani Jesus tu daka-dakal nga pagayayà! Ammuna gapa nga bendisionan ni Jehova i kinamatalòna​—nga aranni ngana nga makavuluna uli i Yamana. Ari vuluvuga nga kinattamman ni Jesus yatun ta tiempo ira nga kuruga nazziga-riga yaya. Kunnatun gapa nakuan i kuattam. Egga  gapa maginnennag nittam nga pagayayà. Iniddanna ittam ngamin tu pribilehio nga mamakasanto ta makapabbaw nga ngaganna. Mapakurug tam nga laddug si Satanas nu piliattam si Jehova bilang Katannangan nga mammaguray nittam anna nu mattalupaddiattam ta ayâna maski nu anni nga problema anna tentasion i mepa-arubang nittam.

20. Anni i makoffun nikaw tape kanayun nga agga-nonòmu i iddanamam anna mattalupaddian nga positibo?

²⁰ Talaga kakayà ni Jehova nga bendisionan i matalò ira nga aripanna. (Isaias 30:18; bibbigammu i Malakias 3:10.) Magayayà yaya nga iyawà ta aripanna ira i matunung nga karagatan na giffutuadda. (Salmo 37:4) Yari tu kanayun nakuan nga agga-nonòmu i iddanama nga maginnennag nikaw. Ari ka vuluvuga mappa-influwensia ta negatibo, killu, anna awan tu kuentana nga appana-panonò na mundo ni Satanas. Nu matagenòmu nga sesenu nga mattallung ta nonò onu futum i appana-panonò na mundo, napafutuan nga ipakimallòmu kani Jehova i “imammo na nga ari malippawa na tolay.” Yatun nga imammo i manangngal ta futu anna ta appana-panonòmu.​—Filipos 4:6, 7.

21, 22. (a) Anni nga makapabbaw nga iddanama i ini-innaggan na “magaru nga totolay”? (b) Anni i pinaka-kayàmu nga iddanama na Cristiano ira, anna anni i determinasiommu?

²¹ Anni mabba kastana nga pana-panonopan yatun nga iddanama! Nu taddeka ta “magaru nga totolay” nga “nakeyattam  ta nepallo nga kadara-darum,” nonopammu i klase na pattolay nga arannim ngana malawà. (Nepakannammu 7:9, 14) Siguradu nga mabanna-bannayakka, megafu ta mawawan ngana si Satanas anna i demoniona. Ngem awayyana tu mariga tam paga nga malippawà yatun nu kunnasi. Sinni garè gapa nittam i naka-ekspiriensa ngana tu pattolay nga awan tu makadaral nga influwensia ni Satanas? Sonu awan ngana yatun nga influwensiana, kuruga magayayà ittam nga mattrabahu tapenu mabbalin tu paraiso i interu nga davvun, ta pangiyollu ni Jesus anna i 144,000 nga kavulùna nga mammaguray! Kuruga kakayà tam ngana nga matuppal yatun​—mawawan ngana noka i ngamin nga takì, dafunattam i ideddukattam nga naginnolay, anna mattolay ittam mekunnay ta ginakkag na Dios! Durante nga mabbalin ittam tu perfekto, egga paga mas makasta nga bendision nga malawà tam. Yatun i promesa ta Roma 8:21​—i “makapabbaw nga kapalubbang na ána na Dios.”

²² Kayà ni Jehova nga malawàmu i kapalubbang nga ariammu malippawa nu kunnasi. Nakadepende ta pattuppal yatun nga kapalubbang. Ari kari tu makasta nu mappursigi ka ngana nga mattuppal kani Jehova ta kagaggaw? Nu kunnatun gafu, ariammu immangan nga paladdan i kuruga masanto nga pangurugmu tapenu mannanayun nga makapattalupaddiakka ta ayâ na Dios!