1, 2. Ania a trabaho a panagbangon ti ar-aramidem, ken apay a nagpateg ti kalidad dayta a trabahom?

ADDA ikarkarigatam a bangonen. Nabayag bassiten nga inrugim daytoy ken agtultuloy iti masanguanan. Narigat daytoy a trabaho ngem makapnek. Uray ania ti mapasamak, determinadoka a di sumardeng wenno guminad, ta ti kalidad ti trabahom apektaranna ti biagmo, uray ti masakbayam. Apay? Agsipud ta ti mismo a bagim ti bangbangonem!

² Impaganetget ni adalan a Judas ti maipapan iti panangbangon wenno panangpabileg iti bagbagitayo. Idi indagadagna kadagiti Kristiano a “pagtalinaedenyo ti bagbagiyo iti ayat ti Dios,” impakitana met no kasanotay a maaramid dayta: “Babaen ti panangpabilegyo [iti literal, “panangibangonyo”] iti bagbagiyo iti kasasantuan a pammatiyo.” (Judas 20, 21) Ania ti sumagmamano a pamay-an tapno mapabilegmo ti bagim, tumibker ti pammatim ket iti kasta makapagtalinaedka iti ayat ti Dios? Usigentayo ti tallo nga aspeto ti naespirituan a panagbangon a makatulong kenka a mangpabileg iti pammatim.

3-5. (a) Ania ti kayat nga ipapati kenka ni Satanas maipapan kadagiti bilin ni Jehova? (b) Ania ti rumbeng a panangmatmattayo kadagiti bilin ti Dios, ken kasano nga apektaran dayta ti panangmatmattayo? Iyilustrarmo.

³ Umuna iti amin, nasken a pabilgentayo ti pammatitayo iti linteg ti Dios. Iti panangadalmo iti daytoy a libro, inusigmo ti  sumagmamano kadagiti nalinteg a bilin ni Jehova mainaig iti kondukta. Ania ti panangmatmatmo kadagita? Kayat ni Satanas nga ipapati kenka a dagiti linteg, prinsipio, ken pagalagadan ni Jehova ket nainget unay, kednganda pay ketdi ti wayawayam. Us-usarenna daytoy a taktika manipud idi nagkurri idiay Eden. (Genesis 3:1-6) Agkurri ngata kenka ti taktikana? Depende dayta iti panangmatmatmo.

⁴ Kas ilustrasion: Bayat nga agpaspasiarka iti napintas a parke, nakitam nga adda nalagda ken nangato a bakud iti maysa a paset ti parke tapno awan ti makastrek iti dayta. Makaay-ayo ti buya iti labes ti bakud. Iti damo, nalabit panunotem a saan a kasapulan dayta a bakud agsipud ta kednganna laeng ti wayawayam. Ngem bayat a sumirsiripka, nakakitaka iti narungsot a leon nga agar-arudok nga umasideg iti tukmaanna! Ita maawatamon no apay nga adda dayta a bakud—agserbi a proteksion. Adda kadi agar-arudok a mangsipsiput kenka ita? Mamakdaar ti Sao ti Dios: “Agtalinaedkayo a sipupuot, managbantaykayo koma. Ti kabusoryo, ti Diablo, agsursursor a kasla leon a ngumerngernger, nga agsapsapul iti alun-onenna.”—1 Pedro 5:8.

⁵ Narungsot ni Satanas. Gapu ta saan a kayat ni Jehova nga agbalintayo a biktima ni Satanas, nangipasdek kadagiti linteg a mangsalaknib kadatayo iti adu a “pangallilaw a pamuspusan” dayta a managdakdakes. (Efeso 6:11) Isu a tunggal ut-utobentayo dagiti linteg ti Dios, panunotentayo a dagita ket ebkas ti ayat ti nailangitan nga Amatayo. No kasta ti panangmatmattayo, gubuayan ti kinatalged ken rag-o dagiti linteg ti Dios. Insurat ni adalan a Santiago: “Ti mangsukimat iti perpekto a linteg a kukua ti wayawaya ken agtultuloy iti dayta . . . naragsakto iti panangaramidna iti dayta.”—Santiago 1:25.

6. Ania ti kasayaatan a wagas tapno bumileg ti pammatitayo kadagiti nalinteg a bilin ken prinsipio ti Dios? Mangtedka iti pagarigan.

⁶ Ti panagbiag a mayannurot kadagiti bilin ti Dios ti kasayaatan a wagas tapno bumileg ti pammatitayo iti daydiay Manangted-Linteg ken kadagiti nainsiriban a lintegna. Kas pagarigan, “ti linteg ti Kristo” ramanenna ti bilin ni Jesus nga isurotayo kadagiti sabsabali “ti amin a bambanag nga imbilin[na].” (Galacia  6:2; Mateo 28:19, 20) Tungtungpalen met dagiti Kristiano ti bilin a saanda a liwayan ti agtataripnong tapno agdaydayaw ken agpipinnaregtada. (Hebreo 10:24, 25) Karaman met kadagiti bilin ti Dios ti pammagbaga nga agkararagtayo ken Jehova a regular, masansan, ken naimpusuan. (Mateo 6:5-8; 1 Tesalonica 5:17) No tungpalentayo dagita a bilin, ad-adda a nalawag kadatayo a pudno a pagsayaatantayo dagitoy. Ti panagtulnog kadagita ipaayandatayo iti rag-o ken pannakapnek a pulos a ditay masarakan iti sadinoman iti daytoy nariribuk a lubong. Bayat nga ut-utobem no kasano a nagunggonaanka a mismo iti panangannurotmo kadagiti linteg ti Dios, saan kadi nga ad-adda pay a tumibker ti pammatim kadagita?

7, 8. Ania a pammatalged ti ipaay ti Sao ti Dios kadagidiay maamak di la ket ta saanda a makapagtalinaed iti nalinteg a dana iti panaglabas dagiti tawen?

⁷ No maminsan, marikna dagiti dadduma a saan a kanayon a nalaka a tungpalen dagiti linteg ni Jehova bayat nga aglabas dagiti tawen. Maamakda amangan no mapaayda. No kasta ti panagriknam, laglagipem dagitoy a sasao: “Siak, ni Jehova, ti Diosmo, Daydiay mangisursuro kenka tapno magunggonaam ti bagim, Daydiay mangpappapagna kenka iti dalan a rebbeng a pagnaam. O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti  kinalintegmo kas kadagiti dalluyon ti baybay.” (Isaias 48:17, 18) Inut-utobmo kadin no kasano a makaparegta unay dagita a sasao?

⁸ Ipalpalagip ditoy ni Jehova a pagimbagantayo no agtulnogtayo kenkuana. Adda dua a bendision nga inkarina no agtulnogtayo. Umuna, agbalin a kasla karayan ti talnatayo—natalinaay, nabuslon, manayon. Maikadua, ti kinalintegtayo ket agbalin a kas kadagiti dalluyon ti baybay. No agtakderka iti igid ti baybay ken buyaem ti panagsasaruno dagiti dalluyon, awan duadua a panunotem a saan nga agpatingga dayta. Ammom nga agnanayon ti panagbettak dagiti dalluyon sa agtulid nga agpaigid. Kuna ni Jehova a kasta ti kayarigan ti kinalintegmo. No la ket ta ikagumaam ti agtalinaed a matalek kenkuana, pulos a dinakanto paayen! (Salmo 55:22) Saan kadi a dagiti kasta a makaliwliwa a kari pabilgenna ti pammatim kenni Jehova ken kadagiti nalinteg a bilinna?

9, 10. (a) Apay a nagsayaat a kalat para iti maysa a Kristiano ti kinanataengan? (b) Kasano a mangyeg iti rag-o ti naespirituan a panangmatmat?

⁹ Naipalgak kadagitoy a naipaltiing a sasao ti maikadua nga aspeto ti panangpabilegmo iti bagim: “Agreggettayo koma a rumang-ay iti kinanataengan.” (Hebreo 6:1) Ti kinanataengan ket nagsayaat a kalat para iti maysa a Kristiano. Saan a kas iti kinaperpekto, nga imposible ita a maragpat dagiti tattao, mabalintay a ragpaten ti kinanataengan. Maysa pay, ad-adda ti ragsak dagiti Kristiano nga agserserbi ken Jehova bayat nga agmatmataenganda. Apay?

¹⁰ Naespirituan a tao ti nataengan a Kristiano. Kas ken Jehova ti panangmatmatna kadagiti bambanag. (Juan 4:23) Insurat ni Pablo: “Dagidiay makitunos iti lasag iturongda ti pampanunotda iti bambanag ti lasag, ngem dagidiay makitunos iti espiritu iti bambanag ti espiritu.” (Roma 8:5) Saan a naragsak ti tao a nainlasagan ti panangmatmatna ta mabalin a ti laeng bagina ti pakaseknanna, akikid ti panagpampanunotna, ken naipamaysa ti  biagna kadagiti material a banag. Naragsak ti tao a naespirituan ti panangmatmatna ta naipamaysa ti biagna iti panagserbi ken Jehova, “ti naragsak a Dios.” (1 Timoteo 1:11) Maragsakan ti naespirituan a tao a mangay-ayo kenni Jehova ken saan a mapukaw ti rag-ona uray no masuot. Apay? Agsipud ta ipaayannatayo dagiti suot iti gundaway nga agtalinaed a matalek ken mangpaneknek nga ulbod ni Satanas, ket maragsakan ti nailangitan nga Amatayo no aramidentay dayta.—Proverbio 27:11; Santiago 1:2, 3.

11, 12. (a) Ania ti kuna ni Pablo maipapan iti ‘pannakabalin ti pannakaawat’ ti maysa a Kristiano, ken ania ti kayat a sawen ti sao a naipatarus a “nasanay”? (b) Ania a panagsanay ti nasken a maaramid iti bagi tapno tumanor ken makondision?

¹¹ Mapatanor ti espiritualidad ken kinanataengan babaen ti panagsanay. Usigem daytoy a bersikulo: “Ti nakired a taraon agpaay kadagiti nataengan a tattao, kadagidiay a babaen iti panangusar nasanay dagiti pannakabalin ti pannakaawatda a mangilasin agpadpada iti umiso ken di umiso.” (Hebreo 5:14) Idi kinuna ni Pablo a ‘masanay’ ti ‘pannakabalin ti pannakaawattayo,’ nagusar iti Griego a sao a nalabit gagangay a maar-aramat kadagiti gymnasium idiay Grecia idi umuna a siglo, ta mabalin met nga ipatarus dayta a ‘nasanay a kas iti gymnast.’ Ita panunotem no ania ti ramanen ti kasta a panagsanay.

¹² Idi nayanaktayo, saan a nasanay ti bagitayo. Kas pagarigan, saan pay a kontrolado ti maladaga dagiti babassit nga ima ken sakana. Gapuna, no iwagiswagisna dagiti imana, uray la matiruanna ti rupana a pakaklaatan ken pakaigapuan ti panagsangitna. Ngem in-inut a masanay ti bagi no kanayon a mausar. Iti saan a mabayag, makapagkaradapen ti maladaga; no dakkel bassiten, makapagnan; ket no nakadakkelen, makatarayen. * Ngem ti ngay gymnast? No makabuyaka iti kasta nga atleta  nga agsirkosirko a di pulos agmintis, sigurado a panunotem a nasanayen a naimbag dagiti piskel ti bagina. Saan a basta timpuar ti kastoy nga abilidad ti gymnast no di ket adu nga oras ti binusbosna a nagsanay. Kuna ti Biblia a ti kasta a panangsanay iti bagi “bassit ti maigunggonana.” Anian a napatpateg nga amang ti panangsanay iti naespirituan a ‘pannakabalin ti pannakaawattayo’!—1 Timoteo 4:8.

13. Kasanotay a maasaas ti pannakaawattayo?

¹³ Iti daytoy a libro, adu ti nausigtayo a makatulong kenka a mangasaas iti pannakaawatmo tapno makapagtalinaedka a matalek ken Jehova kas naespirituan a tao. Iti panangaramidmo kadagiti desision iti inaldaw a panagbiagmo, utobem a buyogen iti kararag dagiti prinsipio ken linteg ti Dios. Iti amin a panagdesisionmo, isaludsodmo iti bagim: ‘Ania dagiti linteg wenno prinsipio ti Biblia nga adda pakainaiganna iti daytoy a banag? Kasanok a mayaplikar dagita? Ania ti aramidek tapno maay-ayo ti nailangitan nga Amak?’ (Proverbio 3:5, 6; Santiago 1:5) No kasta ti aramidem tunggal agdesisionka, ad-adda a masanay ti pannakabalin ti pannakaawatmo. Ti kasta a panagsanay tulongannaka nga agbalin ken agtalinaed a maysa a pudpudno a naespirituan a tao.

14. Ania ti nasken nga ipaunegtayo tapno dumakkeltayo iti naespirituan, ngem ania a panagannad ti nasken a laglagipentayo?

¹⁴ Nupay maragpat ti kinanataengan, saan nga agpatpatingga ti naespirituan a panagdakkel. Ti panagdakkel ket agpannuray iti taraon. Dayta ti gapuna a kinuna ni Pablo: “Ti nakired a taraon agpaay kadagiti nataengan a tattao.” Tapno ngarud bumileg ti pammatim, nasken a mangipaunegka iti nakired a naespirituan a taraon. No umiso ti panangyaplikarmo kadagiti  masursurom, kinasirib dayta, ket kuna ti Biblia: “Ti sirib isu ti kangrunaan a banag.” Gapuna, nasken a napaypayso a mabisintayo kadagiti napateg a kinapudno nga ipapaay ti Amatayo. (Proverbio 4:5-7; 1 Pedro 2:2) Siempre, di rumbeng nga ipagpannakkeltayo ti nagun-odtayo a pannakaammo ken nadiosan a sirib. Masapul a sukimatentayo a kanayon ti bagitayo amangan no agramut ken agtubo iti pusotayo ti kinapalangguad wenno dadduma pay a pagkapuyan. Insurat ni Pablo: “Itultuloyyo a suboken no addakayo iti pammati, itultuloyyo a paneknekan no aniakayo.”—2 Corinto 13:5.

15. Apay a nasken ti ayat iti naespirituan a panagdakkel?

¹⁵ Uray no nabangonen ti balay, agtultuloy latta ti trabaho. Nasken ti panangmantener ken panangtarimaan, ken nalabit panangnayon iti kuarto bayat nga agbalbaliw ti kasasaad. Ania ti kasapulantayo tapno agmataengantayo ken mataginayon ti espiritualidadtayo? Kangrunaan iti amin, ayat. Nasken nga agtultuloy a patanorentayo ti ayattayo kenni Jehova ken kadagiti kapammatiantayo. No awan ayattayo, awan serserbi ti amin nga ammo ken ar-aramidentayo—mayarig dayta iti makaparurod nga uni. (1 Corinto 13:1-3) No adda ayattayo, magtengtayo ti Nakristianuan a kinanataengan ken agtultuloy a dumakkeltayo iti naespirituan.

16. Ania a panagpampanunot ti imulmula ni Satanas iti isip dagiti tattao, ken ania a proteksion ti impaay ni Jehova?

¹⁶ Usigentayo ti maysa pay nga aspeto ti trabahom a panagbangon. Tapno bumilegka kas pudpudno a pasurot ni Kristo, nasken nga aluadam ti panagpampanunotmo. Ni Satanas, nga agturay iti daytoy a lubong, ket nakalalaing a mangallukoy kadagiti tattao nga agpanunot iti makapaupay, agbalin a negatibo, agduadua, ken maawanan iti namnama. (Efeso 2:2) Napeggad iti maysa a Kristiano ti kasta a panagpampanunot, ta mayarig dayta iti bukbok a mamagpeligro iti balay a naaramid iti kayo. Makaparagsak ta adda impaay ni Jehova a proteksiontayo—ti namnama.

17. Kasano nga inladawan ti Sao ti Dios ti kinapateg ti namnama?

 ¹⁷ Saggaysa a dinakamat ti Biblia ti nadumaduma a paset ti naespirituan a kabal a kasapulantayo iti pannakidangadangtayo kenni Satanas ken iti daytoy a lubong. Ti maysa a napateg a paset ti kabal ket isu “ti namnama ti pannakaisalakan” a kas kabal ti ulo, wenno helmet. (1 Tesalonica 5:8) Idi tiempo ti Biblia, ammo ti maysa a soldado nga agpeggad ti biagna no saan nga agusar iti helmet. Kaaduanna, ti helmet ket naaramid iti metal a mairutap iti bonete a gamusa wenno lalat. No nakahelmet ti soldado, kumdias wenno kumtat ti aniaman a maitiro iti ulona isu a saan unay a masaktan. No kasano a salakniban ti helmet ti ulo, ti namnama masalaknibanna met ti isipmo, ti panagpampanunotmo.

18, 19. Ania nga ulidan ti impasdek ni Jesus iti panangsalimetmet iti namnama, ken kasanotay a matulad?

¹⁸ Impasdek ni Jesus ti kangrunaan nga ulidan iti panangsalimetmet iti namnama. Laglagipem ti inibturanna iti daydi maudi a rabii ti biagna ditoy daga. Gapu iti kuarta, isu ket liniputan ti nasinged a gayyemna. Sa inlibak ti sabali pay a gayyemna, ken binaybay-an dagiti dadduma pay sada nagtataray. Linaksid dagiti mismo a kailianna, nga impukpukkawda ti pannakaparparigatna agingga a matay iti ima dagiti Romano a soldado. Maikunatayo a nakarkaro nga amang dagiti suot a sinagaba ni Jesus ngem iti aniaman a mapasarantayo. Ania ti nakatulong kenkuana? Sumungbat ti Hebreo 12:2: “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.” Pulos a saan a naawan iti panunot ni Jesus ti “rag-o a naikabil iti sanguananna.”

¹⁹ Ania a rag-o ti naikabil iti sanguanan ni Jesus? Bueno, ammona a no agibtur, masantipikarna ti nasantuan a nagan ni Jehova. Maipaayna ti kasayaatan a pammaneknek nga ulbod ni Satanas. Awanen ti sabali pay a namnama a makaited ken Jesus iti dakdakkel a rag-o! Ammona met a sipaparabur a gunggonaan ni Jehova ti kinamatalekna—nga iti saan a mabayag, agsublinton iti denna ni Amana, ket anian a nakaragragsakto dayta a kanito! Silalagip ni Jesus iti dayta a makaparag-o a namnama  kabayatan dagiti karigatan a kanito iti biagna. Nasken a kasta met ti aramidentayo. Adda met rag-o a naikabil iti sanguanantayo. Ni Jehova inikkanna ti tunggal maysa kadatayo iti nadayaw a pribilehio a tumulong a mangsantipikar iti naindaklan a naganna. Mapaneknekantayo nga ulbod ni Satanas no pilientayo ni Jehova kas Soberanotayo ken agtalinaedtayo iti ayat ti Amatayo uray ania a suot wenno sulisog ti pakaipasanguantayo.

20. Ania ti makatulong kenka a mamagtalinaed a positibo ken napnuan namnama ti panagpampanunotmo?

²⁰ Saan laeng a madadaan ni Jehova a manggunggona kadagiti matalek nga adipenna no di ket magagaran a mangaramid iti dayta. (Isaias 30:18; Malakias 3:10) Pagragsakanna nga ipaay kadagiti adipenna dagiti umiso a tarigagay ti pusoda. (Salmo 37:4) No kasta, sititibker a pagtalinaedem iti panunotmo ti namnamam. Pulos a dika tumulok iti negatibo, rinuker, ballikug a panagpampanunot ti daan a lubong ni Satanas. No madlawmo nga in-inut a makaskastrek iti isip ken pusom ti espiritu daytoy a lubong, sipapasnek nga agkararagka ken Jehova ket dawatem nga itedna kenka ti “talna ti Dios a mangringbaw iti isuamin a panunot.” Dayta a talna ti mangsaluad iti puso ken panunotmo.—Filipos 4:6, 7.

21, 22. (a) Ania a nadayag a namnama ti tagtagipatgen dagiti kameng ti “dakkel a bunggoy”? (b) Ania ti kapatgan kenka a paset ti namnamam kas Kristiano, ken ania ti determinasionmo?

²¹ Anian a nagsayaat a pampanunoten ti namnamam iti  masanguanan! No karamanka iti “dakkel a bunggoy” a ‘rummuarto iti dakkel a rigat,’ panunotem ti biag nga asidegen a masagrapmo. (Apocalipsis 7:9, 14) No awanton ni Satanas ken dagiti demoniona, mariknamto ti bang-ar a nalabit saan a kabaelan a tukoden ita ti isip ti tao. Siasino aya ngamin kadatayo ti nakapadas nga agbiag nga awan ti dakes nga impluensia ni Satanas? No awanton ti kasta nga impluensia, anian a nagragsakto ti makipaset iti trabaho a panamagbalin iti daga a paraiso iti panangiturong ni Jesus ken dagiti 144,000 a makipagturay kenkuana idiay langit! Anian a ragsaktayto a makakita iti pannakapukaw ti amin a sakit ken an-annayen, mangabrasa kadagiti agungar a patpatgentayo iti biag a matmaturog ita iti tanem, agbiag iti wagas a mayannurot iti kayat ti Dios a panagbiagtayo! Bayat nga agbalbalintayto a perpekto, adda dakdakkel pay a gunggona nga agur-uray, ti kari a naipalgak iti Roma 8:21—ti “nadayag a wayawaya ti annak ti Dios.”

²² Kayat ni Jehova a magun-odmo ti wayawaya a dimo matukod a panunoten iti agdama. Agpannuray dayta a wayawaya iti panagtulnog. Saan kadi a makagunggona ti panangikagumaan ita nga agtulnog ken Jehova iti inaldaw? No kasta ngarud, itultuloymo a pabilgen ti kasasantuan a pammatim tapno makapagtalinaedka iti ayat ti Dios iti agnanayon!