1, 2. Suna ineriartortittariaqarpiuk, aamma sooq pingaaruteqarpa?

TAMATTA peqqissoorusuppugut. Peqqissuussaguttali timikkullu ineriartorluassagutta peqqinnartunik nerisassaagut, sungiusartassaagut peqqissuserpullu paariuassallutigu. Taamaaliorumalluta iliuuseqangaartariaqarpugut, inuunerpummi, aap, allaat siunissarput pineqarmata tunniutiinnarnavianngilagut. Aammali allamik eqqumaffigisassatsinnik ineriartortitassaqarpugut.

² Ajoqersukkap Judasip tamanna eqqartorpaa kristumiut ima kajumissaaramigit: “Upperisarsi illernartoq tunngavigalugu immissinnut ineriartortinniaritsi.” Taamaaliornermikkut kristumiut ‘Guutip asanninneraniittuinnarsinnaapput’. (Jud 20, 21) Illit Guutip asanninneraniittuinnarniassagavit uppernerit ineriartortinniarlugu qanoq iliorsinnaavit? Iliuuserineqartussat pingasut eqqumaffigisariaqakkavut sammeriartigit.

3-5. (a) Jehovap piumasaqaatai pillugit Saatanip qanoq isumaqalersinniarpaatit? (b) Guutip piumasaqaataanut qanoq isiginnittaaseqassaagut, tamannalu uagutsinnut qanoq sunniuteqassava? Assersuuteqarit.

³ Siullermik, Guutip inatsisaanik tutsuiginninnerit nakussatsittariaqarpat. Atuakkap matuma atuaqqissaarneratigut  Jehovap pissusilersornermut tunngatillugu piumasaqaataanik naapertuilluartunik sammisaqarsimavutit. Piumasaqaatit taakku qanoq isumaqarfigaagit? Saatanip isumaqalersikkusuppaatit Jehovap inatsisai najoqqutassiaalu sukangavallaartuusut kiffaanngissuseqarunnaarsitsisuusullu. Adamip Evallu nalaanniilli Saatani taamatut iluatsittumik isumaqalersitsisarsimavoq. (1 Mos 3:1-6) Ilinnik taamatut isumaqalersitsiniarnera iluatsissava? Qanoq isiginnittaaseqarnersutit apeqqutaavoq.

⁴ Assersuuteqariarta: Takorlooriaruk naatsiiviliarsuarmi alianaatsumi pisuttuartillutit maluginiarit portusuumik ungaluliarsuaqartoq. Naatsiiviliarsuup ilaa ungalulerneqarsimasoq iserfigineqarsinnaanngitsoq nuannerpasippoq. Immaqa eqqarsaqqaarputit tassani ungaloqartariaqanngikkaluartoq pisariaqanngitsumimmi killilersuimmat. Taavali løveq qaasuttoq ungalusamiittoq takulerpat! Maanna sooq ungalusaqarnersoq paasilluarpat — løvemimmi saassunneqannginniassagavit illersuutaavoq. Ullumikkut arlaannik qaasuttumik ilinnik malersuisoqarpa? Aap, Guutimmi oqaasiani ima mianersoqquneqarpugut: “Eqiingagitsi silatusaarlusilu! Akerartortersi Diaavulu løvitut uiannisaartutut angalasarpoq iisassarsiorluni.” — 1 Petr 5:8.

⁵ Saatani løvitut qaasuttutut ippoq. Jehova uagutsinnut illersuutaasunik inatsisiliorsimavoq Saatanimit ‘qoqassineqarluta’ pisaritinnissarput kissaatiginnginnamiuk. (Ef 6:11) Taamaattumik Guutip inatsisai eqqarsaatigeqqissaaraangatsigit Ataatatta qilammiusup uagutsinnik asanninneranut ersiutaasutut isigisassavavut. Taamatut isiginnittaaseqarutta Guutip inatsisai nuannaarutigalugillu toqqissisimassutigisinnaavavut. Ajoqersugaq Jaaku ima allappoq: “[Kiffaanngissutsip] inatsisaanik  naammalluinnartunik isumaliutiginneqqissaartoq aalajangiussisorlu ... pilluarumaarpoq.” — Jaak 1:25.

6. Guutip inatsisaanik najoqqutassiaanillu naapertuilluartunik tutsuiginninnerput qanoq pitsaanerpaamik nakussatsissinnaavarput? Assersuuteqarit.

⁶ Inatsisiliortumut uppernerput taassumalu inatsisaasa ilisimassutaanerannik tutsuiginninnerput qanoq pitsaanerpaamik nakussatsissinnaavarput? Inatsisinik Biibilimiittunik maleruaanitsigut. ‘Kristusip inatsisaasa’ ilagaat taassuma ‘peqqussutaanik tamanik maleruaanissamik’ ilinniartitseqqusinera. (Gal 6:2; Matt 28:19, 20) Kristumiut aamma Jehovamik pallorfiginninniarlutik imminnullu kajumissaaqatigiittarniarlutik ilagiittut katisimasarnissamut peqqussut pingaartingaarpaat. (Hebr 10:24, 25) Jehovap peqqussutaanut aamma ilaavoq taassumunnga qamannga pisumik qinukulasarneq. (Matt 6:5-8; 1 Th 5:17) Peqqussutit taakku maleruaraangatsigit taakkua Guutimit asanningaartumeersuunerat iluaqutaangaarnerallu paasinerulertarparput. Tamakkuninnga maleruaanerput silarsuarmi ajornartorsiorfiungaartumi nuannaarutigineqarsinnaasumit sumilluunniit nuannaarutiginerullugulu nalerisimaarutigineruarput. Illit Guutip inatsisaanik maleruaanerit qanoq iluaqutigisimallugu eqqarsaatigigaangakku uppernikkut nakussatsinneqartarputit, ilaa?

7, 8. Eqqortuliortuarsinnaanerlutik isumakuluttut Biibilimi allassimasut suut qiimmaallaatigisinnaavaat? (Takuuk assiliaq qupp. 228-miittoq).

⁷ Inuit ilaasa Jehovap inatsisaanik inuunertik naallugu maleruaajuarsinnaanerlutik isumakuluutigisarpaat. Annilaanngatigaat Guutimik ilumoorfiginninngitsuliortuussasoralutik. Taamatut misigiguit Jehovap oqaasii uku eqqaamajuartakkit: “Uanga tassa Naalagaq, Guutit, iluaqutaasunik ilinnik ajoqersuisoq, illit ingerlavigisassakkut  ingerlatitsisoq. Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.” (Es 48:17, 18) Oqaatsit taakku qanoq qiimmaallaataatiginersut eqqarsaatiginikuuiuk?

⁸ Allassimaffimmi tassani Jehovamut naalannerup uagutsinnut iluaqutaangaarneranik eqqaasinneqarpugut. Jehovap marlutsigut pilluaqqujumaarluta neriorsorpaatigut. Siullertut, eqqissinerput kuussuartut allanngujaatsutut kuuttuartutullu ilissaaq. Aappaattut, iluassuserput, imaluunniit naapertuilluassuserput, immap malingisut ilissaaq. Sissami mallit qaaralaartuartut takugukkit allanngujuittuarneq eqqarsaatigigunarpat, nalunnginnakkumi mallit naassaanngitsussamut qaaralaartuarumaartut. Jehovap eqqaavaa illit naapertuilluassutsit, imaluunniit eqqortuliortarnerit, taamaassinnaasoq. Ilumoorfiginnittuarnissat ilungersuutigigukku aalajaattuarsinnaaqqullutit Jehovap ikiortuarumaarpaatit! (Tussiaat 55:23 atuaruk). Neriorsuutit qamuuna attortinnartut taakku Jehovamik taassumalu piumasaqaataasa naapertuilluartuunerannik tutsuiginninnissannut nakussatsissutigaatit, ilaa?

9, 10. (a) Sooq anersaakkut inersimalluarnissaq kristumiunut anguniagassaava ajunngilluinnartoq? (b) Sooq anersaakkut ittunik pingaartitsisoq pilluarsinnaava?

⁹ Uppernerit ineriartortinniarlugu iliuuserineqartussat aappaat oqaatsinit Guutip sunniineratigut isumassarsiarititaasunit ukunannga erserpoq: ‘Inersimassummut ingerlaniarta.’ (Hebr 6:1, 1936) Anersaakkut inersimalluarnissaq kristumiunut anguniagassaavoq ajunngilluinnartoq. Naammalluinnassuseq maannakkut  anguneqarsinnaanngikkaluartoq anersaakkut inersimalluarnissaq anguneqarsinnaavoq. Kristumiullu anersaakkut inersimalluarnerujartortillutik Jehovamut kiffartornertik nuannaarutiginerulissavaat. Sooq taamaappa?

¹⁰ Kristumiu anersaakkut inersimalluartoq anersaakkut ittunik pingaartitsivoq. Jehovap isiginnittaasiatut isiginnittaaseqarpoq. (Joh 4:23) Paulusi ima allappoq: “Uinik malillugu inuusut uinimmut atasut kajungerisarpaat, Anersaarli malillugu inuusut anersaamut atasut kajungerisarpaat.” (Rom 8:5) Uinikkut ittunik pingaartitsisoq namminissarsiorpoq, uungaannaq isigaluni pigisanillu pingaartitsinerusarluni. Taamaattumillu pillualivissinnaanngilaq. Anersaakkulli ittunik pingaartitsisoq Jehova ‘Guuti pilluartoq’ pingaartikkamiuk pilluarsinnaavoq. (1 Tim 1:11) Jehovamit iluarineqarusussuataarami allaat misilinneqarnermini nuannaarsinnaavoq. Misilinneqartillunimi Saatanip sallunera uppernarsarsinnaavaa assuarnaatsuuninilu ineriartortissinnaallugu.  Taamaaliornermigullu Jehovap uummataa nuannaartissinnaavaa. — Uss 27:11; Jaaku 1:2, 3 atuakkit.

11, 12. (a) Paulusip anersaakkut ittunik paasinnissinnaassusermut tunngatillugu oqaaseq ‘sungiusagaasoq’ atoramiuk suna pivaa? (b) Timi ineriartussaguni qanoq sungiusarneqartariaqarpa?

¹¹ Kristumiu sungiusarnermigut anersaakkut inersimallualersinnaavoq. Paulusi allappoq ‘nerisassat tamuasarissat inersimasunngorluarsimasunit nerineqartussaasut’. Maluginiariarullu nangilluni allammat inersimalluartut “eqqortumik eqqunngitsumillu immikkoortitsisinnaanermut sungiusagaasumik paasinnissinnaassuseqartut” (NW). (Hebr 5:14) Paulusip paasinnissinnaassuserput ‘sungiusagaasoq’ allaatigigamiuk oqaaseq grækerisooq itsaq Grækenlandimi timersortarfinni eqaarsaartarfinnilu ilisimaneqarluarunartoq atorpaa, oqaasermi ‘eqaarsaartartutut sungiusagaasumik’ isumaqarsinnaammat. Eqqarsaatigeriaruk qanoq sungiusartoqarsinnaasoq.

¹² Inoorlaap timaa sungiusarnikuunngilaq. Avatini qanoq aqussinnaanerlugit nalugamiuk naalungiarsuk tupaatigisaminik kiinamigut imminut eqqortoortarpoq. Piffissalli ingerlanerani timiminik atuinermigut avatini aqussinnaanngortarpai. Aap, sungiusarnikkut pikkorinneruleriartortarpoq. Meeraq paarmortalertarpoq, pisuttalertarlunilu naggataatigullu arpattalertarluni. * Taavami inersimasoq eqaarsaartartoq? Eqaarsaartartoq periallaqqilluni eqaarsaartoq takugukku qularutiginngilat timini aqulluinnarsinnaagaa. Imaaliallaannaq  taama piginnaaneqalersinnaanngitsoq nalunngilat, nalunaaquttammi akunnerpassui atorlugit sungiusarsimavoq. Biibilimi allassimavoq timikkut sungiusarneq ‘annikitsuinnarmik iluaqutaasartoq’. Anersaakkulli ittunik paasinnissinnaassutsitta sungiusarnissaa pingaaruteqarnerungaarpoq, ilaa? — 1 Tim 4:8.

13. Anersaakkut ittunik paasinnissinnaassutsit qanoq sungiusarsinnaaviuk?

¹³ Jehovamut aalajaattuarsinnaaqqullutit sungiusagaasumik paasinnissinnaassuseqalernikkut anersaakkut ittunik pingaartitsisunngornissannut iluaqutigisinnaasarpassuatit atuakkami matumani sammereerpavut. Aalajangiiniaraangavit Jehovap najoqqutassiai inatsisaalu eqqarsaatigeqqissaartakkit Jehovamullu qinusarlutit. Imminut ima aperisarit: ‘Inatsisit najoqqutassialluunniit Biibilimiittut suut aalajangigassannut attuumassuteqarpat? Qanorlu taakku maleruarsinnaavakka? Ataataga qilammiusoq nuannaartikkumallugu qanoq aalajangiissaanga?’ (Ussatit 3:5, 6; Jaaku 1:5 atuakkit). Inatsisit najoqqutassiallu Biibilimiittut tunngavigalugit aalajangiiniaraangavit illit anersaakkut ittunik paasinnissinnaassutsit sungiusarneqartarpoq. Taamatut sungiusarneq anersaakkut inersimalluartunngornissannut inersimalluartuujuarnissannullu iluaqutigissavat.

14. Anersaakkut ineriartortuarumalluta suna kajungerisariaqarparput, suullu mianersuutigissavavut?

¹⁴ Kristumiu anersaakkut inersimalluartunngoreeraluarluni anersaakkut ineriartortuarsinnaavoq. Ineriartussagaannilu nerisassat pingaaruteqarluinnarput. Paulusi ima allappoq: ‘Nerisassat tamuasarissat inersimasunngorluarsimasunit nerineqartussaapput.’ Uppernerit ineriartortissagukku anersaakkut nerisassat  tamuasarissat neriuartariaqarpatit. Ilikkakkatit malillugit inuuguit ersersissavat ilisimassuseqarlutit. Biibilimilu ima kajumissaarneqarpugut: ‘Ilisimassuseq pingaarnerpaatiguk!’ Taamaattumik sallusuissutinik naleqangaartunik Ataatatta tunniussaanik kajungerinninneq ineriartortittariaqarparput. (Uss 4:5-7; 1 Petr 2:2) Soorunami Guutimeersumik ilisimassuseqalernerput imminut naammagisimaalissutigissanngilarput makitalissutiginagulu. Makitanermik sanngiissutinilluunniit allanik uummatitsinni sorlaqalersitsinaveersaarumalluta imminut misissukulasariaqarpugut. Paulusi ima allappoq: “Immissinnik paasiniaaffiginiaritsi uppernermiinnersusi! Immissinnik misiligitsi!” — 2 Kor 13:5.

15. Anersaakkut ineriartorsinnaaqqulluta sooq asanninneq pingaaruteqarluinnarpa?

¹⁵ Inuup peqqissuujumasup nerisarnissaa imminullu paarilluarnissaa pingaaruteqarluinnarpoq. Anersaakkut inersimalluartunngorsinnaaqqulluta anersaakkullu peqqissuujuarsinnaaqqulluta suna pingaaruteqarluinnarpa? Asanninneq. Jehovamut uppeqatitsinnullu asanninnerput ineriartortittuartariaqarparput. Asanninngikkutta ilisimasavut iliuutsivullu tamarmik naleqarnavianngillat — nipitut tusarniitsutut issapput. (1 Kor 13:1-3) Asannittuuguttali kristumiutut inersimalluartunngorsinnaavugut anersaakkullu ineriartortuarsinnaalluta.

16. Saatani qanoq ittumik eqqarsartaaseqalersitsisarpa, Jehovalli illersuutaasoq suna pilersippaa?

¹⁶ Pingajussaanik, uppernerit ineriartortinniarlugu suut eqqarsaatigisarnerlugit mianersuutigisariaqarpat. Saatani, silarsuup naalagaanera, tatiginnikkunnaalersitsillaqqissuulluni neriuutaarutilersitsillaqqissuullunilu isumalluarnartuunngitsunik eqqarsaateqalersitsillaqqissuuvoq. (Ef 2:2) Taamatut nikallornartumik eqqarsartaaseqalersinneqarneq kristumiumut ajoqutaangaarpoq, soorlu oquk illumut ajoqutaasoq. Jehovali eqqarsartaatsitsinnut illersuutaasumik pilersitsisimavoq — tassa neriuut.

17. Neriuutip pingaaruteqassusia Biibilimi qanoq paasinarsarneqarpa?

¹⁷ Anersaakkut sakkutuussutit Saatanimut silarsuarmullu sorsunnitsinni pisariaqartitavut Biibilimi allaatigineqarput. Sakkutuussutit ilaat pingaarutilik tassaavoq ‘neriuut niaqorortinnaveeqqutigisarput’. (1 Th 5:8) Biibilip nalaani sakkutuup nalunngilaa niaqorortinnaveeqquteqanngikkuni navianartorsiorujussuartussaalluni. Sakkutuup meqqulualimmik amermilluunniit nasariarluni niaqorortinnaveeqqut saviminermik sananeqartartoq atiguniuk niaqqumigut eqqorneqarnini ajoquserneqaatigivallaarnavianngilaa. Soorlu sakkutuup niaqorortinnaveeqqutini illersuutigigaa neriuut illit isumannut, imaluunniit eqqarsaatinnut, illersuutigisinnaavat.

18, 19. Neriuuteqartuarnissamut tunngatillugu Jiisusi qanoq maligassiuilluarnerpaajua, qanorlu ilaarsinnaavarput?

¹⁸ Neriuuteqartuarnissamut tunngatillugu Jiisusi maligassiuilluarnerpaajuvoq. Unnuaq kingulleq nunarsuarmiitilluni qanoq pineqarsimasoq eqqarsaatigeriaruk. Ikinngutigilluagaasa ilaasa killuutigaa. Allap ilisarisimannginnerarpaa.  Ikinngutaasalu allat tamarmik qimappaat. Nunaqqataasalu upperinagu Romamiut sakkutuuinit naalliutsitaalluni toqutaanissaa piumasaraat. Misilinneqaatiginngisaannagassatsinnik Jiisusi misilinneqarsimavoq. Suna pinertusaassutigigamiuk? Akissutaa Hebræerinut allakkani 12:2-mi atuarsinnaavarput: “Taassuma nuannaarnissaq siunerminiittoq pillugu sanningasulik [nappagaq anniartitaaffik, NW] naammagalugu atorpaa kanngunarsaataanera soqutiginagu, maannalu Guutip issiavissaarsuata talerpiata tungaani issialluni.” Jiisusip “nuannaarnissaq siunerminiittoq” eqqarsaatigiuarpaa.

¹⁹ Jiisusip ‘siunerminiittut’ suut nuannaarutigisinnaagamigit? Nalunngilaa misilinneqarnermini pinertusaaruni Jehovap aqqanik illernartitseqataassalluni. Saatanillu sallutuujuneranut pingaarnerpaamik uppernarsaassaaq. Pitsaanerusumik allamik nuannaarutaasumik Jiisusi neriuutissaqanngilaq! Aamma nalunngilaa aalajaannini pissutigalugu Jehovamit pilluaqquneqangaarumaarluni — tassa ungasinngitsukkut Ataataminik qilammeeqateqaqqilernissani nuannaarutigisussaallugu. Taamatut nuannersumik neriuuteqarnini pissutsini artornarnerpaani eqqarsaatigiuarpaa. Uagummi? Uaguttaaq ‘siunitsinniittunik’ nuannaarutigisassaqarpugut. Jehovap aterminik illernarsisitseqataasinnaanissamik immikkut pisinnaatitaaffilerpaatigut. Jehova kisiat naalagarigutsigu aamma qanorluunniit misilinneqaraluarluta ussernartorsiortinneqaraluarlutalu taassuma asanninneraniittuinnarutta Saatanip sallutuujuneranik uppernarsaasinnaavugut.

20. Neriuuteqartuarumallutit isumalluarnartumillu isiginnittaaseqartuarumallutit suna iluaqutigisinnaaviuk?

²⁰ Jehovap kiffaminik pilluaqqussinissaminut piumassuseqaannarani  aammali pilluaqqussinissani qilanaaraa. (Es 30:18; Malaki 3:10 atuaruk). Kiffami uummataasa kissaatigisaannik piumasaminut naapertuuttunik tunisisarnini nuannaarutigaa. (Tuss 37:4) Taamaattumik siunissamut neriuutigisat eqqarsaatigiuaruk. Saatanip silarsuaata eqqarsartaasiatut isumalluarnartuunngitsutut, aserorsaataasutut tammarsaataasutullu eqqarsartaaseqalernaveersaarit. Misigiguit uummatit eqqarsartaatsilluunniit silarsuup anersaavanit sunnertinneqalersoq “eqqissinerup Guutimit pisup siuneqassusernit tamanit annerungaartup” pinissaanut qamannga pisumik Jehova qinnuigisaruk. Eqqissinerup tamatuma Guutimeersup uummatit eqqarsaatitillu sernigissavai. — Fil 4:6, 7.

21, 22. (a) ‘Inuppassuarnut amerlangaartunut’ ilaasut qanoq neriuuteqarpat? (b) Kristumiut neriuutigisaasa ilaat suna nuannarinerpaaviuk, sunissallu aalajangiusimaviuk?

²¹ Neriuuterput nuanningaarami! Illit ‘inuppassuarnut amerlangaartunut’ “annikilliortitaangaarnermit” aniguisussanut ilaaguit siunissat nuannivissoq eqqarsaatigeriaruk. (Saqq 7:9, 14) Saatani anersaapiluilu piujunnaarsinneqarniariartut takorloorsinnaanngisannik  oqiliallanneq misigissavat. Aap, aatsaat taamanikkussamut silarsuarmi Saatanimit sunnerneqanngiffiusumi inuulerumaarpugut! Eqqarsaatigeriaruk ajortumit tatineqarnata Jiisusimit naalakkersueqataanillu 144.000-nit siulersorneqarluta nunarsuarmik paratiisinngortitseqataanissarput qanoq nuannertigissanersoq! Nappaateqartoqarunnaarnissaa, innarluuteqartoqarunnaarnissaa, asasatsinnik toqusunit makititaasunik tikilluaqqusinissarput Guutillu siunertarisaatut inuulernissarput qilanaarutigingaarpavut! Naammalluinnartunngoriartortilluta ‘kiffaanngissuseq Guutip qitornaasa pisassaat’ — ajortimit toqumillu aniguisinneqarneq — pilluaqqussut sunit tamanit naleqangaarnerusoq pigilissavarput. — Rom 8:21.

²² Jehovap kissaatigaa takorloorsimasannit tamanit pitsaanerungaartumik kiffaanngissuseqalissasutit. Taamatut kiffaanngissuseqalissaguit Jehovamut naalattariaqarputit. Ullut tamaasa Jehovamut naalakkumallutit ilungersornitit tamarmik imminut akilersinnaappat? Aap, ilumut! Taamaattumik naassaanngilluinnartussamut Guutip asanninneraniittuinnarumallutit uppernerit illernartoq ineriartortittuaruk!