1, 2. Baala taŋgulaa kuɛɛ ŋ cho yɛ, nduyɛ le yɛɛ o bɛnda yɛ ma taŋgul nyɛ kɛndɛi?

A CHO baala taŋgulaa kekelee. Taŋgullo hoo chua niŋ teleŋndo nyɛɛmbɔ. Nduyɛ, a nɔ le hiouwɔɔ lachi a taŋgullo tei o chilaŋ niŋ. Baala kalaa pila o cho ni, kɛ nyaaloo cho leniŋ tau. Kɛ a koŋ kpou ma luaanuŋ ibuŋ maa, mɛɛ mɛɛ la wa, a cho wu ŋdial te, kanifuule, mɛɛ ŋ cho taŋgullo yɛ piiliaŋ niŋ yoomu numndo, vɛlɛ a chilaŋ numndaŋ. Le yɛɛ? Kanifuule, numpila kpeekpei cho taŋgulɔŋndo ni.

² Mi kiilanɔɔ Chiud kindila mɛɛ naŋ nɔ miŋ hiou lachi a naapila taŋgullo yɛ. Mɛɛ o dimul Kilisiɔŋnda le ma “hiou lachi a waa o kaala Mɛlɛkaa bɛŋgu,” mbo chɔm vɛlɛ o bolle Baabui pilɛ leleŋ niŋ kpe mɛɛ nda tosa di yɛ. “La hiou lachi a dialluŋ kalaŋ sɔlaa o tiindaŋ nya nɔ hoo o Mɛkɛka niŋ ndo.” (Chudi 20, 21) Nɛila kuɛɛ naŋ taŋguluŋ yɛ naapila, le mi laalaŋ naa kendu poŋ le loo o kaala Mɛlɛka wo bɛŋgu? Ŋ muliŋndɔ niko hɔlla o sɔɔŋ sala yaa choo ŋ mala num le taŋgul iMɛlɛkaya cho num lachi wo.

3-5. (a) Yiyaŋnda wɔɔŋ kuɛɛ Setana yeema yɛ num ma nɔ a sawala Chɛhowalaŋ okɔɔ? (b) Vɛɛ naŋ nɔ yɛ miŋ che sawala Mɛlɛkalaŋ, nduyɛ, vɛɛ la piiliaŋ yɛ yiyaŋnda naalaŋ? Chɔmndɔ taamaseliiyo.

³ Nyɛ tasoo peŋ cho ni, ŋ nɔ miŋ kindi laalaŋ naa o sawala diandaala Mɛlɛkalaŋ niŋ. Teleŋ ŋ wa yauwo hoo pɛɛkoo wo, ma yaasiaa sawala diandaala Mɛlɛkalaŋ a kaa okɔɔ. Vɛɛ ŋ che  yɛ sawalaŋ ndaŋ? Setana yeema miŋ che maa sawala Mɛlɛkalaŋ la kendu bɔɔ biyɔɔ, nduyɛ maa la lusul bɔɔ. Nyɛ pilɔɔ kpe o cho soliŋndo kpeku ni chɔŋ o kpeloo niŋ Idɛŋ. (Chɛnɛsee 3:​1-6) Baa o cho pa num batiu? I lo a numpila a mɛɛ kaa numndo cho yɛ.

⁴ Le taamaseliiyo, te o yɔŋ pɛ ma wa balɔɔ o kpele kɛndɛ kɛndɔɔ niŋ, ma che kpaki filioŋndo num lachi o ŋ nɔla ma hiou le wo. Kɛ kpele kɛndɔɔ pila cho vɛlɛ o kpakioo hoo kɔɔli ni. O tasela ndɔlaŋ, ma yiyaŋ maa fondo fuu nda heulul num nɛiyo ni. Kɛ mɛɛ ŋ tofa o kpakioo hoo amakɔɔ, ma cha kpɔkuŋndo kelaa hɛ hɛ le nyɛdiaa. A che niko le sabu kpakioo hoo cho loŋndo? Le waŋnda mandaa o cho loŋ ni. Kpɔkuŋ kuɛɛ cho yɛ num hau mɛŋgɛla wɔɔŋ wɔɔŋndo? Diom Mɛlɛkaa sila naa aa, “La manda nya pila a mɛɛ kaala nyalaŋ la nɔ mi la wa yɛ, nduyɛ mi la wa nyɛ kɛndɛ yekeŋ. Kani fuule, Masa Nyinaa Wɔɔŋnda, o cho yaamɔɔnɔ nyaa wo, o cho balɔɔ mbo wa nuuviaa le wana o cha mbo tɛɛmbuu wo, mɛɛ kpɔkuŋ bɛndoo balu visiaa kɔɔli le nda biyɔɔ yɛ.”—Pitɛ Tasoo 5:​8.

⁵ Doosunɔ wɔɔŋ wɔɔŋndo pila Setana cho ni. Chɛhowa yeema miŋ del o yaŋɔɔle ndɔleŋ niŋ te. Lelaŋ o ke naa sawalaŋ ni le naa mandaa yɔŋii naŋ luɛi balaŋ o “sɔɔŋ wɔɔŋ” Setana woŋ niŋ. (Ɛfisiaŋnda 6:​11) Lelaŋ, teleŋ o teleŋ ŋ wa pɛ yiyaŋndo o sawala Mɛlɛkalaŋ choo, ŋ nɔla miŋ sina mɛɛ kpɛ Finya naa o choo choo niŋ kaala naa yɛ. Te ŋ che pɛ sawala Mɛlɛkalaŋ o nɛi koŋ choo, la manda naa nduyɛ mi la ke naa nyaaloo. Mi kiilanɔɔ Chemisi poonyiaa aa, “Kɛ wana pɛɛku yooŋgoo hoo nyɛ kɛndɛi yo, nduyɛ mbo hiou lachi a nyɛ o dimi wo tosaa wo, . . . salaa Mɛlɛka duau ndu ni.”—Chemisi 1:​25.

6. O nɛi sɔvɛ kuɛɛ choo naŋ taŋgul lɛ laalaŋ naa o sawala diandaala Mɛlɛkalaŋ niŋ? Chɔmndɔ taamaseliiyo.

⁶ Nɛiyo opilɛ o naŋ taŋgul laalaŋ naa o Mɛlɛka niŋndo cho sawala ndɔlaŋ biyɔɔ ni. Le taamaseliiyo, “nyɛ Kiliti dimul” naa wo tosaa. Ndu cho ni, waŋnda pɛɛkoo ma tosa nyɛ o nyɛ o dimul naa. (Kaleesiaŋnda 6:​2; Maatiu 28:​19, 20) Kilisiɔŋnda nɔ ma chua ndi suɛi sɔvɛ le chuuŋgiaŋndo diompilɛ le Mɛlɛka piɛiyo, vɛlɛ a chaŋyɛi ndɛi taŋgullo vellaa velle.  (Hibuluiya 10:​24, 25) Sawala Mɛlɛkalaŋ la sim vɛlɛ ni, piɛiyo o Chɛhowa lo lɔɔlɔɔ a kɔl naa fau. (Maatiu 6:​5-8; Tɛsaloniaŋ Tasoo 5:​17) Te ŋ wa pɛ sawalaŋ ndaŋ biyɔɔ, miŋ che kpendekele mɛɛ Chɛhowa kaala naa yɛ. Te ŋ bii pɛ sawalaŋ ndaŋ, ŋ wa a nyaale tau, o naŋ nɔla sɔla ba o ba cheleŋ te wo. Te a chua pɛ teleŋndo ma yiyaŋ a tɔnɔ ŋ sɔla o sawala Mɛlɛkalaŋ biyɔɔ niŋndo, vɛ, laalaŋ numndo chɔɔlu kalu le?

7, 8. Vɛɛ diom Mɛlɛkaa mala yɛ wanaa nɔ buulaŋndo maa a nɔla ma bii sawala diandaala Mɛlɛkalaŋ te wa?

⁷ Mi waŋnda apum buulaŋ maa, mɛɛ wɔsioŋ hiau fau, lende o wa suɛi kala ni le sawala Mɛlɛkalaŋ biyɔɔ. Ma yɔŋ sioonde maa a cho biondɔŋndaŋ tosa. Te yiyaŋ waa lende hiŋ num pɛ o kɔl, kɛsiŋ nyɛ Baabuiyo dimi hoo wo o kɔl, “Ya cho Mɛlɛka Yaawɛɛ, Mɛlɛka nyaa ni. Le teleŋ o teleŋ nyɛ bɛnda le tosaa wo, ndu ya I pɛɛku nya ni, nduyɛ mi chɔm nya nɛi nya nɔ le kɔlaŋ choo wo. Te nya aa tei ya diom pɛ, mi nya aa tosa nyɛ ya I dimul nya wo, sala bɛndoo o wa wa nya choo, nduyɛ mi ndu oo wa nya choo le fɛɛŋ a fɛɛŋ, mɛɛ pioo o hiau nuaa o vela le yɛ. Mɛɛ Mɛŋndaŋ o pee mɛŋma ihɛllo ma huŋ nuaa a kpaaya bɛndo yɛ, lende dɛnɛ nya kɛndɔɔ ndu oo huŋ niŋ a kpaayaa kɔɔli ni.” (Aisaya 48:​17, 18) A chal niŋ pa ma yiyaŋ a mɛɛ diomnda dimiŋ ndaŋ o Aisaya niŋndaŋ la dɛɛniaa num kɔllo yɛ?

 ⁸ Chɛhowa cho naa yiyalaŋndo maa te ŋ bii pɛ sawala ndɔlaŋ, ŋ sɔla tɔnɔɔ. Te ŋ bii laŋ pɛ, O dimi maa salalaŋ la tiɔɔŋ naŋ cho sɔla ni. O tasoo, sala bɛndoo cho wa naa choo mɛɛ pioo o hiau naa o vela le yɛ. O diiŋ ndɔɔ cho ni, dɛnɛ naa kɛndɔɔ cho wa mɛɛ pee mɛŋma ihɛllo ma huŋ naa a kpaaya bɛndoo yɛ. Te o yɔŋ pɛ ma sim o pee mɛŋma ihɛllo ikɛi, ma che maŋ muulɔŋndo a kpuŋkpaŋ. Mi numpila sina kɛsɛ maa ma pɛŋgi niŋ muulɔŋndo le. Ma cho wa kɔŋgɔɔ lɔɔ le fɛɛŋ a fɛɛŋ. Chɛhowa dimi maa lende dɛnɛ num kɛndɔɔ cho wa ni. Te a lo pɛ o sandei choo lɔɔlɔɔ, Chɛhowa mel num te! (Nuawɔ Sam 55:​22.) A ve a kɔl kɛndɛ le sinaa maa diomnde meiyaaleŋ ndeŋ le mala num le laalaŋ numndo dɔuwɔɔ o Chɛhowa niŋ a sawala diandaala ndɔlaŋ te?

9, 10. (a) Le yɛɛ kaasoŋyɛi cho yɛ kpeleŋ sɔvɛ le Kilisiɔŋnɔɔ? (b) Vɛɛ yiyaŋ naa a sɔɔŋ Mɛlɛkaŋ okɔɔ ke yɛ naa nyaaloo?

⁹ Nɛi diiŋ ndɔɔ o wali num taŋgulaa niŋ cho hoo o poonyiaa o Baabuiyo niŋ ni. ‘La ŋ hiounuŋ niŋ lachi a sɔɔŋ ŋkaasoŋndoŋ pɛiyo.’ (Hibuluiya 6:​1) Kaasoŋyɛi o Mɛlɛka piɛiyo niŋ cho bɔɔ suɛi sɔvɛ bɛndu le Kilisiɔŋnɔɔ. Le suŋ suŋ ndu, ŋ tiuba miŋ wa walaŋ te. Kɛ kaasoŋyɛi o Mɛlɛka piɛiyo niŋ ndu, ŋ tiuba miŋ sɔla ndi. Le handɔɔ lechoo, Kilisiɔŋnda sɔla nyaaloo tau o Chɛhowa piɛiyo niŋ te a wa pɛ kaasoŋyɛi chɔmndo. Le yɛɛ naŋ dimi yɛ lende?

¹⁰ Kilisiɔŋnɔ chɔm kaasoŋyɛi wo, mɛɛ Chɛhowa cha sɔɔŋ yɛ ndu bɛɛ cha muŋ ni. (Chɔŋ 4:​23) Mi Pɔɔl poonyiaa aa, ‘Wanaa cho haa nyɛ wana chieeyɛi ndɛii dimul nda le tosaa wo, maa ndu nda tosa ni wa, wanaa waa lende nyɛ wana chieeyɛi keŋ i dimul nda wo, ndu nda landuŋ kɔl le tosaa ni. Kɛ wanaa tosa nyɛ nyina . . . Mɛlɛkaa o dimul nda wo wa, nda nda, nyɛ Mɛlɛka o hɛnaŋndo, ndu nda landuŋ kɔl le tosaa ni.’ (Luomaŋnda 8:​5) Wana tofa hoo sɔɔŋ o nɛi iwanachieeyaa choo wo, nyaale bɛɛ o nɔ le. Kaayei o nɔ ni. O yiyaŋ yiŋgoloŋ te. Nduyɛ kɔl ndɔɔ kpou o nyɛm kiɔɔŋ choo o cho ni. Kɛ wana tofa hoo sɔɔŋ o nɛi iMɛlɛkayaa choo wo ndu, nyaaloo pila o sɔla ni, kanifuule,  o Chɛhowa lo kɔl ndɔɔ cho ni, “Mɛlɛka kɔl kɛndɔɔ.” (Timoti Tasoo 1:​11, NW) Wana landuŋ kɔl o suɛi Mɛlɛkɛi niŋndo, o wa bɛɛ o tɔɔndaŋndo bɛŋgu, o naŋ kɔllo tau le hɛnaŋ Chɛhowaa tosaa. Le yɛɛ? Kanifuule, tɔɔndaŋndaŋ la mala naa le chɔmndo maa wana lachoowaa Setana cho ni. La taŋgul vɛlɛ tiindaŋ naa o Mɛlɛka niŋ, nduyɛ mbo naŋ kɔl tau a naa.—Pulɔwaa 27:​11; nuawɔ Chemisi 1:​2, 3.

11, 12. (a) Te Pɔɔl dimi pɛ aa ’sina lapɛŋgu’ Kilisiɔŋnɔɔ, yɛɛ ndoo yiyaŋ yɛ? Nduyɛ yɛɛ cho yɛ “pɛiyo?” (b) Pɛɛku yɛɛ dialloŋ sɔla yɛ tuupa miŋ kendu?

¹¹ Le miŋ nɔ kɔl landɛiyo nduyɛ miŋ simnuŋ ŋkaasoŋ o Mɛlɛka piɛiyo niŋ, mɛɛ miŋ wa pɛɛkɔŋndo. Tofawɔ nyɛ bolle Baabuileŋ ndeŋ le dimi wo. ‘Kɛ nduyɛ, wana cho niŋ kaasoŋnɔ wo, ndu dia nyɛ diaa yɔŋaa hoo ni. Wana waa nuaa ndu, ndu lo maluaa sina lapɛŋgu ndɔɔ pɛiyo haaa mbo sina yɛ yɔɔ suɛi naŋ le tosaa ve tɛɛŋ a suɛi niŋ le tosa le ve.’ (Hibuluiya 5:​14, NW) Te Pɔɔl dimi pɛ aa “pɛiyo,” diom maKilikiiyo o soliŋ kpeku ni. Wanaa ndaa kua seemala kalalaŋ pɛɛkoo o wɔsiŋ kɛmɛ tasoŋ niŋ o Kilisi niŋnda, mi ndaa soliŋ diomndo hoo kpeku. Mi wanaa seemala kalaa haa ndaa heelu nyɛm lusulɛiyoŋ lɔɔlɔɔ le nyɛsuma ndaŋ kindioo. Yiyaŋndɔ a nyɛ yeemaŋ le pɛɛkoo hoo tosaa wo.

¹² Lɔɔ naŋ veluŋ sɛnɛiyo, dialuŋ naŋ muŋ sɔla wɔ pɛɛkɔŋ te. Le taamaseliiyo, chɛlɛkpɔɔ sina mɛɛ o soliŋ bala ndɔlaŋ a peluŋ ndɔŋ kpeku yɛ le. Mɛɛ mɛɛ ko o siɛndi bala ndɔlaŋ. Lepum o ve pɛŋ kɔl te, mbo nyɛɛsuu hɔlaa nduaa. Kɛ o lo dialuŋ ndɔŋ pɛɛkoo o pɔmpɔmbɔ mbo wuu, mbo kuɛ, nduyɛ mbo kandu nyaanɔŋndo. * Ɔɔ niŋ wana pɛɛku hoo seemala kalalaŋndo? Te a che pɛ waŋndo huuloo mbo muliŋ pelemundeŋ o hueiye niŋ mbo simnuŋ chuba, kɔndɔfillo bii num pa? Sako! Kanifuule, dialuŋ wanachioo nɔ boondoŋ ŋ bɔŋaa sɔ maa maasii.  Lende koni, te a che pɛ waŋndo seemala kalalaŋ, o chue lɛŋ te. O pɛɛku fɛŋ le teleŋ vilɛi. A mɛɛ Baabuiyo dimi yɛ, pɛɛkɔŋndo “le dialloŋ hiiluu yɔŋaa o nɔ wɔ tɔnɔɔ” nyɛɛmbɔ, kɛ, pɛɛkoo chuaa le sinaa sɔɔŋ Mɛlɛka woŋ walaŋ hiou tɔnɔɔ poloŋ.—Timoti Tasoo 4:​8.

13. Vɛɛ naŋ pɛɛku yɛ sinapɛŋgu naa?

¹³ O yauwo hoo niŋ, ŋ soo tau a nyɛ mala num le chɔɔloo sinapɛŋgu numndo pɛiyo wo, nduyɛ, a mɛɛ ŋ lo o kala poŋ o Chɛhowa piɛiyo niŋ yɛ. Te a wa pɛ kɛɛsiaalaŋ tosaa lɔɔlɔɔ o yoomu numndo niŋ, yiyaŋ a sawala Mɛlɛkalaŋ, nduyɛ ma piɛi a laŋ okɔɔ. Kɛɛsiaa o kɛɛsiaa a wa pɛ tosaa, nyunaŋndɔ aa, ‘Sawala Baabuii kuɛɛ cho yɛ a suɛi hei okɔɔ? Nduyɛ, vɛɛ ya tuallɛ laŋ kɔɔli? Nɛi kuɛɛ ya nɔ yɛ mi tol kɔɔli mbo nɛŋi Finya nuu o choo choo niŋ kɔl?’ (Nuawɔ Pulɔwaa 3:​5, 6; Chemisi 1:​5.) Kɛɛsiaa o kɛɛsiaa a tosa pɛ o nɛi koŋ choo, o cho num mala le sinapɛŋgu numndo pɛiyo. Pɛɛku waa naa mala naa miŋ lo o kala poŋ o Mɛlɛka piɛiyo niŋ.

14. Yeemɛi suu kuɛɛ naŋ nɔ yɛ miŋ nɔ le hiouwɔɔ lachioo tosaa o Mɛlɛka piɛiyo niŋ? Nduyɛ sila yɛɛ naŋ nɔ yɛ miŋ kɛsiŋ o kɔl?

¹⁴ Ŋ sɔla bɛɛ kaasoŋyɛi o Mɛlɛka piɛiyo niŋ, ŋ nɔ wɔ kɛ le hiouwɔɔ lachioo tosaa. Le hindɔɔ ŋdiallo sɔlaa, nyɛdiaa yeemaŋ ni. Mi Pɔɔl dimi aa, “Kɛ nduyɛ, wana cho niŋ kaasoŋnɔ wo, ndu dia nyɛ diaa yɔŋaa hoo ni.” Le laalaŋ numndo taŋgullo, a nɔ ma wa nyɛdiaa sikpa iMɛlɛkayaa dioo. Te o yɔŋ pɛ ma hiou lachi a nyɛ ŋ cho pɛɛkoo wo tosaa, mɛɛ taasioo ŋ cho koŋ tosaa ni. Nduyɛ Baabuiyo dimi aa, “Kɔl kaloo cho nyɛ kpeekpei o yoomu wana chioo niŋ mbo hiau nyɛ o nyɛ.” Ŋ nɔ miŋ dɔu kɔllo o tonya Finya naa o choo choo niŋ cho naa pɛɛkoo wo. (Pulɔwaa 4:​5-7; Pitɛ Tasoo 2:​2) Kɛ hoo chɔm naa maa, ŋ sɔla pɛ sinapɛŋgoo a taasi iMɛlɛkayaa, ŋ nɔ  miŋ heeluŋ te. Ŋ nɔ miŋ yaasiaŋ naapila lɔɔlɔɔ, yɔŋii kulii heelaŋnde a dialuŋ vilɛiyoŋ ŋ luɛi naa o kɔl miŋ vil puundoŋ. Mi Pɔɔl poonyiaa aa, “Lelaŋ, wana o wana nya pila la mɛɛndiaŋ o kɔlta nyalaŋ niŋ, wana o wana mi num pila kelu yamɛi te a cho pɛ hiouwɔɔ lachi a tiindaŋndo nɔɔ o Kiliti niŋ.”—Kɔliŋtiaŋ Diiŋ Ndɔɔ 13:​5.

15. Le yɛɛ kaalaa cho yɛ nyɛ sɔvɛ le hiouwɔɔ lachi o Mɛlɛka piɛiyo niŋ?

¹⁵ Te chiɛiyo chuu pɛ taŋgul, koŋ chɔm naa maa wallo chuu le. O nɔ mbo wa toosiaŋndo lɔɔlɔɔ le mbo naŋ nua. Nduyɛ lepum, ma chɔɔlu fondaŋnda lɔlaalaŋ te o yɔŋ pɛ mi bahawɛiyo wa. Yɛɛ naŋ nɔ yɛ miŋ tosa le kaasoŋyɛi sɔlaa, nduyɛ miŋ manda pɛɛku iMɛlɛkaya naa? Nyɛ tasoo cho kaalaa ni. Kaala naa nɔ mbo hiou lachi a hindɔɔ le Chɛhowa vɛlɛ a chaaŋaa naa laalaŋnda. Te ŋ nɔ kaala le, mɛɛ kɔl kalu naa a nyɛ naŋ cho tosaa wo kpou simnuŋ nyɛ fondoo fuu. O cho ko mɛɛ ŋ luaa naa koboo le chaanda nilaŋ bɔɔluu wo yɛ. (Kɔliŋtiaŋ Tasoo 13:​1-3) Kaalaa mala naa miŋ sɔla kaasoŋyɛi o Mɛlɛka piɛiyo niŋ, nduyɛ miŋ tosa hiouwɔɔ lachioo.

16. Yiyaŋ suu kuɛɛ Setana cho yɛ hau waŋnda dɔuwɔɔ a lakɔl, nduyɛ yɛɛ Chɛhowa ke yɛ naa le ndu chɔulabaa?

¹⁶ Ŋ yaasiaŋndɔ vɛlɛ nyɛ cheleŋ a taŋgullo okɔɔ. Te o yɔŋ pɛ ma wa num pila taŋgulɔŋndo maa buɛi sɔvɛ Chiisu wo, a nɔ ma wa yekeŋ a mɛɛ ŋ yiyaŋ yɛ. Setana cho masaa le chieeŋndo hoo ni. O chaa waŋnda hɔlla hiŋndo sɔŋgɔ ndɔ cho le. Mbo tosa mi yiyaŋnda wɔɔŋndaŋ la luɛi nda o lakɔl, kiisaŋndo, kiɔɔ laalaŋndo, a tiindaŋndo nɔɔ. (Ɛfisiaŋnda 2:​2) Yiyaŋ waa naa o wɔu le Kilisiɔŋnɔɔ mɛɛ mɛɛ bau kondaa sia naa yɛ. Kɛ ŋ cho bɔɔ a kɔl kɛndɛ, kani fuule Chɛhowa ke naa nyɛ naŋ soliŋ kpeku le yiyaŋ waa naa chɔulabaa wo. Ndu cho ni, tiindaŋndo.

17. Vɛɛ diom Mɛlɛkaa tuu yɛ tiindaŋ naŋ nɔ wo?

¹⁷ Baabuiyo chɔm naa wolɔɔla chɔula naŋ nɔ miŋ wounuŋ le Setana, vɛlɛ a chieeŋndo hoo chɔulaba wo. Nyɛ  sɔviɔɔ o pilɛ o wolɔɔla chɔulaŋ niŋ cho mɔsillo ni. Ndu sim yɛ ni, tiindaŋ naŋ nɔ “le piŋi Mɛlɛka piŋi niŋ naa wo.” (Tɛsaloniaŋ Tasoo 5:​8) O sindɔɔ niŋ, wana chɔuwo ndoo sina maa te o wounuŋ mɔsil ndɔ chɔuwo le, o cho piɔmndo sɔla. A chiliŋnde nda toosiaa mɔsilta chɔulaŋ ni, nduyɛ ma chua yau visioo o kala kalaa ma sɔɔndu laŋ a ndu. Mɛɛ nda toosiaa mɔsilta laŋ yɛ, o yɔŋ bɛɛ mi nyɔɔ vɛ bolleŋ kpuee, siɛɛlaa o siɛɛla ni, kɛ o luei le. Mɛɛ mɔsil chɔuwo manda puaa chɔuwa bolleŋ naa yɛ, lende kani tiindaŋ naŋ nɔ wo manda yiyaŋnda naalaŋ ni.

18, 19. Taamaselii yɛɛ Chiisu kɛsul lɛ naa le loo o tiindaŋndo choo, nduyɛ vɛɛ naŋ tual lɛ ndu kɔɔli?

¹⁸ Chiisu kɛsul naa taamaselii kpeekpeiyo ni le tiindaŋndo mandaa. Loonuŋndɔ a nyɛ ndoo biunuŋ o nyumma ndɔ ma mɛɛlaŋ niŋ o chieeŋndo choo wo. Mi chaaŋ ndɔ kɛndɛ kɛndɔɔ pisi ndu pɛ le nyɛsɔlaa. Mi opilɔɔ viinuŋ maa o sina ndu le. Mi a tuaa mal ndu ma nyaanuŋ. Wanaa nda fula o chiee pilɔɔ niŋnda bɛɛ ma mululaŋ ndu. Nduyɛ ma wa puaa chɔuwa o Loum niŋ chaŋndo o lani le ma saaŋgiaa ndu, o koŋ ma dii ndu. I cho suɛi sɔvɛ le sinaa maa mi tɔɔndaŋnda kala kalalaŋ la komal Chiisu o yoomu ndɔɔ niŋ. Ŋ komal niŋ tɔɔndaŋnda waa lende pɛŋ o yoomu naa niŋ te. Yɛɛ mala yɛ ndu? Hibuluiya 12:​2 muli aa, “Mbo bii kɔllo mbo sɔla piɔmndo o [yɔmndo, NW] choo, kanifuule, le kɔl kɛndɛ wa ndu chumndo lachi wo. Le hei, o chue bɛɛ bɛɛla tambɛila o sɔla laŋ ndaŋ maa la cho nyɛ o nyɛ le. O cho niŋ hau ichali o fondaŋ lebiɔɔ o ba kɛndɛ Mɛlɛkaa choo.” Chiisu ndoo mel “kɔl kɛndɛ wa ndu chumndo lachi wo” lɛŋ te.

¹⁹ Kɔl kɛndɛ kuɛɛ wa yɛ Chiisu chumndo lachi? Mbo sina maa te o biunuŋ pɛ nyɛ kindilaa, mɛɛ malaa o cho koŋ le diola Chɛhowalaŋ tɔɔ heeloo ni. O hei niŋ, o cho chɔm kpendekele maa wana lachoowaa Setana cho ni. Tiindaŋ o tiindaŋ cheleŋ ndoo ke Chiisu nyaaloo le! Mbo sina vɛlɛ maa te o lo pɛ o laalaŋndo choo, Chɛhowa cho ndu fandaa ke. Ndu sim yɛ ni maa, teleŋ fuuluu niŋ ma miiŋgu vɛlɛ diompilɛ nda Finya ndɔ. Mi che bɛɛ naa Chiisu wa tɔɔndaŋnda kala kalalaŋ komallo,  kɛ o wa lɔɔlɔɔ a nyaale le tiindaŋ wa ndu koŋ lachi wo. Naa bɛɛ kɔl kɛndɔɔ cho naa o kɛsiaa lachi, te ŋ tol pɛ taamaseliiyo hoo kɔɔli. Chɛhowa chɔm naa bɛɛleŋ mbo ke naa dioo le miŋ mala le diola ndɔla tɔɔmalaŋ dindioo. Nduyɛ ŋ tiuba miŋ chɔm maa wana lachoowaa Setana cho ni, te o yɔŋ pɛ miŋ chua Chɛhowa maa ndu cho Mɛlɛka Kpou Kpou Wo ni. Nduyɛ vɛlɛ, ŋ tiuba miŋ lo o kaala Mɛlɛka Finya naa bɛŋgu, mɛɛ mɛɛ tɔɔndaŋndaŋ la komal naa.

20. Yɛɛ mala yɛ num ma kɛsi yiyaŋ numndo nyɛ kɛndɛi, nduyɛ ma nɔ tiindaŋndo?

²⁰ Chɛhowa nɔ ko yeemɛi le wanaa nduaa laalaŋnda fandaa le, kɛ o landuŋ kɔl le ndi tosaa. (Aisaya 30:​18; nuawɔ Malakai 3:​10.) O cho a kɔl kɛndɛ le mbo ke wanaa nduaa yeemɛi sɔvɛ cho nda o kɔl le. (Sam 37:​4) Lelaŋ, handu kɔl numndo nyɛ kɛndɛ kpiŋ o tiindaŋ cho num hoo lachi wo choo. Ŋ chɛlnuŋ yiyaŋnda kɔŋgɔdi kɔŋgɔdi chieeŋ dɛnɛ wɔɔŋ Setanaa hoo le. Te o yɔŋ pɛ ma sina maa yiyaŋnda chieeŋndo hoo la cho num luɛiyɔɔ o kɔl nyɛɛmbɔ nyɛɛmbɔ, mɛɛ piɛi o Chɛhowa lo le mbo ke num “kɔl nyulu Mɛlɛka yɔŋgu wo o wana chiee nɔla mbo sina bɛɛ pɛŋgu le wo.” Kɔl nyulu Mɛlɛka yɔŋgu koŋndo nɔla mbo manda kɔlta nyalaŋ, a yiyaŋnda nyalaŋ.—Filipiaŋnda 4:​6, 7.

21, 22. (a) Tiindaŋ sɔvɛ kuɛɛ faŋga chuu chɔm te wo nɔ yɛ? (b) Tiindaŋ leKilisiɔŋ kuɛɛ num yeema yɛ tau, nduyɛ yɛɛ ŋ nɔ yɛ ma tosa?

²¹ Nuawɔ suɛi kɛndɛ se le yiyaŋndo o tiindaŋndo hoo choo!  Te a wa pɛ waŋndo opilɛ o wanaa ‘faŋga bɛndu bɛnduaa’ haa tɛɛŋ, a cho “fula o nyɛ palaa bɛndoo niŋ nda,” yiyaŋndɔ a yoomu cho num lachi o chilaŋ niŋndo. (Sɔɔŋ Chɔɔmaŋndoŋ 7:​9, 14) Te Setana a nyinaa nduaa wɔɔŋnda faŋaŋ pɛ, a cho hɛnɛkɛyɛi sɔla i num ve bɛɛ pɛŋ kɔl te ve. O fulawɔ bɛɛ okoŋ kɔɔli, nɛɛnɛ cho yɛ naa tɛɛŋ nyɛ kindilaa Setana wo piiliaŋ ndɔ ndu le? Te nyɛ kindilaa Setana wo hoo hiou pɛ fokpi, nuawɔ se nyaale bɛndu wa niŋ le lɛŋndeŋ miŋgioo kpele hɛnɛkiɔɔ wo! O boondii keŋ bɛŋgu, Chiisu a ŋwaŋ 144,000 wa niŋ o masaleŋ choo ni. Nuawɔ nyaale bɛndu wa niŋndo se te naala suu o suu faŋaŋ pɛ, te ŋ wa pɛ wanaa cho wa fulaa o sɛilaŋ niŋnda demullo, nduyɛ te ŋ huŋ wa pɛ sɔɔŋ tosaa o nɛi Mɛlɛka yeema wo choo. Nduyɛ mɛɛ naŋ kua fau a diondɔɔ walaŋ, lende naŋ cha diomnda mɛiyaa la cho o Luomaŋnda 8:​21 niŋndo yɔŋnɔŋndo ni. Laŋ la cho ni, “Paale fuuluu niŋ mi Mɛlɛka soli [chuauwaa nduaa, NW] o chɛleŋ niŋ.”

²² Chɛhowa yeema num ma sɔla hɛnɛkɛyɛi i hɔbɛi i num ve bɛɛ pɛŋ kɔl maa a sɔla le ve. Le baŋaa hoo sɔlaa, ŋ nɔ miŋ diikuŋ Mɛlɛka. Vɛ, o bɛnda ma wou sɛmbɔɔ le Chɛhowa diikɔŋndo lɔɔlɔɔ le? Lelaŋ, tosa a sabu le ma hiou lachi a numpila taŋgullo o laalaŋ num diandaa choo, nduyɛ ma lo o kaala Mɛlɛka wo bɛŋgu lefɛɛŋ!