အဆၢဒိၣ် ၁၇
“သူၣ်လီၤသုသးလၢ သုတၢ်နာ်စီဆှံကတၢၢ် အဖီခိၣ်” တက့ၢ်
“သူၣ်လီၤသုသးလၢ သုတၢ်နာ်စီဆှံကတၢၢ်အဖီခိၣ်, . . . ဟံးဃာ်သုသးလၢ ယွၤအတၢ်အဲၣ်တၢ်ကွံအပူၤ, . . . တက့ၢ်.”—ယူဒၤ၂၀, ၂၁.
၁, ၂. နပာ်ဃုာ်လၢ တၢ်သူၣ်ထီၣ်ဘှီထီၣ် အတၢ်တိာ်ကျဲၤ မနုၤအပူၤလဲၣ်. ဒီးနတၢ်မၤအဂ့ၤအအၢန့ၣ် ဘၣ်မနုၤအဃိ အကါဒိၣ်လဲၣ်.
နဂုာ်ကျဲးစၢးမၤတၢ်လၢ တၢ်သူၣ်ထီၣ်အတၢ်တိာ်ကျဲၤ တမံၤအပူၤလီၤ. တၢ်မၤအကျဲလၢ ဘၣ်ဃးတၢ်သူၣ်ထီၣ်အံၤ နမၤတ့ၢ်ယံာ်လံဒီး နကဘၣ်မၤကဒီးတၢ်အံၤ ဆူညါဒံးလီၤ. တုၤခဲအံၤ, နဘၣ်မၤတၢ်မၤအံၤ ကီကီခဲခဲဘၣ်ဆၣ် နဒိးန့ၢ်ဘၣ်တၢ်သူၣ်မံသးမံလီၤ. ဒ်လဲၣ်ဂ့ၤဒ်လဲၣ်ဂ့ၤ, နကပာ်လီၤနသးလၢ နတပာ်ကတီၢ် မ့တမ့ၢ် နတမၤတၢ်လၢ တၢ်သးတစၢၢ်ဆၢနီတဘျီဘၣ်လီၤ. နတၢ်မၤန့ၣ် ဂ့ၤမ့ၢ်ဂ့ၤ, အၢမ့ၢ်ဂ့ၤ, အဘျုးအိၣ်လၢ နတၢ်အိၣ်မူအဖီခိၣ်, လၢခါဆူညါအဂီၢ်ဒၣ်လဲာ်လီၤ. လၢမနုၤအဃိလဲၣ်. တၢ်သူၣ်ထီၣ်လၢ နဘှီထီၣ်အံၤန့ၣ် မ့ၢ်ဒၣ်နနီၢ်ကစၢ်လီၤ.
၂ ခရံာ်အပျဲၢ်အဘီၣ် ယူဒၤကတိၤဆူၣ်ဝဲလၢ ပကဘၣ်သူၣ်လီၤ ပနီၢ်ကစၢ်ဒၣ်ပဝဲလီၤ. ဖဲအဝဲသဆၣ်ထီၣ် ခရံာ်ဖိတဖၣ်လၢ “ဟံးဃာ်သုသးလၢ ယွၤအတၢ်အဲၣ်တၢ်ကွံအပူၤ” အခါ, လၢလံာ်စီဆှံအဆၢအံၤအပူၤ အဝဲပာ်ဖျါစ့ၢ်ကီးဝဲ တၢ်ဂ့ၢ်လၢပကဘၣ်မၤဒ်သိးအံၤလီၤ. တၢ်အံၤန့ၣ်မ့ၢ် “သူၣ်လီၤသုသးလၢ သုတၢ်နာ်စီဆှံကတၢၢ်အဖီခိၣ်” တက့ၢ်လီၤ. (ယူဒၤ ၂၀, ၂၁) နကအိၣ်ဂၢၢ်ဆိးကျၢၤလၢ ယွၤအတၢ်အဲၣ်ပူၤအဂီၢ်, နကသူၣ်လီၤနနီၢ်ကစၢ်ဒၣ်နဲ ဒီးနကမၤဆူၣ်ထီၣ်နတၢ်နာ်လၢ ကျဲမနုၤတဖၣ်လဲၣ်. ပကသမံသမိးကွၢ်သကိး တၢ်တိာ်ကျဲၤလၢ တၢ်သူၣ်ထီၣ်ဘှီထီၣ် နီၢ်သးအသနၢၣ် သၢမံၤလၢ မၤစၢၤနၤလၢ နကမၤဆူၣ်ထီၣ် နတၢ်နာ်အဂီၢ်န့ၣ်တက့ၢ်.
တၢ်သူၣ်လီၤတၢ်နာ်လၢ ယဟိဝၤအတၢ်မၤလိာ်တီလိၤအပူၤ
၃-၅. (က) စၤတၣ်လီန့ၢ်လွဲန့ၢ်နၤလၢ နကထံၣ် ယွၤအတၢ်မၤလိာ်တဖၣ် ဒ်လဲၣ်. (ခ) ပကြၢးထံၣ် ယွၤအတၢ်မၤလိာ်တဖၣ် ဒ်လဲၣ်. ဒီးလၢပတၢ်ပာ်သူၣ်ပာ်သး အဖီခိၣ်န့ၣ် အဘျုးကြၢးအိၣ်ဒ်လဲၣ်. ဟ့ၣ်အဒိတက့ၢ်.
၃ အဆိကတၢၢ်, လိၣ်လၢပကဘၣ် မၤဂၢၢ်ထီၣ်ကျၢၤထီၣ် ပတၢ်နာ်လၢ ယွၤအတၢ်မၤလိာ်အပူၤလီၤ. လၢနမၤလိလံာ်အံၤအတီၢ်ပူၤ, နဆိကမိၣ်ဘၣ်တ့ၢ်လံ ယဟိဝၤအတၢ်မၤလိာ်တီလိၤအါမးလၢ ဘၣ်ဃးသကဲာ်ပဝးန့ၣ်လီၤ. တၢ်သ့ၣ်တဖၣ်န့ၣ် နထံၣ်အီၤဒ်လဲၣ်. စၤတၣ်အဲၣ်ဒိးကွဲန့ၢ်လွဲန့ၢ်နၤလၢ နကထံၣ်ယဟိဝၤအတၢ်မၤလိာ်, ဒီးအတၢ်သိၣ်တၢ်သီမိၢ်ပှၢ်တဖၣ်ဒ် တၢ်ထုးဃံးတၢ်, ဒီးမၤနးမၤဖှီၣ်တၢ်ဒၣ်လဲာ်လီၤ. အဝဲသူဝဲ ကျဲအံၤန့ၣ် ကဲထီၣ်လိၣ်ထီၣ်တ့ၢ်လံလၢ ဧ့ၤဒ့ၣ်အပူၤအဃိလီၤ. (၁ မိၤၡ့ ၃:၁-၆) အဝဲအတၢ်မၤန့ၣ် ကွဲန့ၢ်လွဲန့ၢ်နၤဧါ. တၢ်အံၤသန့ၤထီၣ်အသးအါမးလၢ နတၢ်ထံၣ်အဖီခိၣ်လီၤ.
၄ အဒိ, နဟးလိာ်ကွဲလၢ ဖီကရၢၢ်ဃံလၤပူၤအခါ, နကပာ်သူၣ်ပာ်သးလၢ ဖီကရၢၢ်တကဝီၤန့ၣ် ဘၣ်တၢ်ကရၢဃာ်အီၤလၢ တၢ်ဒူၣ်ဖးထီလီၤ. နကွၢ်ဃီၤလၢ တၢ်ဒူၣ်အပူၤစ့ၢ်ကီး ထုးန့ၢ်နသးဒိၣ်မးလီၤ. အဆိကတၢၢ်, နကဆိကမိၣ်လၢ တၢ်ဒူၣ်အံၤမ့ၢ်တၢ်လၢ တြီဃာ်နတၢ်သဘျ့လီၤ. ဘၣ်ဆၣ်, ဖဲနကွၢ်ထံကွၢ်ဆးတၢ်ဒူၣ်အံၤအခါ, နကပာ်သူၣ်ပာ်သးလၢ ခ့ယုၢ်အၢသီတဒု စီၤကွၢ်ခူသူၣ်တၢ်လီၤ. ခဲအံၤနကသ့ၣ်ညါလၢ တၢ်ဒူၣ်န့ၣ်မ့ၢ် နီၢ်နီၢ်တၢ်လၢဒီသဒၢတၢ်န့ၣ်လီၤ. ခဲအံၤ တၢ်မံၤလာ်လီၤပျံၤတဒု စီၤကွၢ်နၤဧါ. ယွၤအကလုၢ်ကထါ ဟ့ၣ်ပလီၢ်ဝဲလၢ, “ကီၤသုသးတက့ၢ်. ဆိးသီတက့ၢ်. အဂ့ၢ်ဒ်အံၤ, ဒ်ခ့ယုၢ်ကညီၤရုၢ်ရုၢ်အသိးန့ၣ် သုဒုၣ်သုဒါမုၣ်ကီၤလံၢ် ဟးဝ့ၤဝီၤဃုပှၤလၢ အကယူၢ်လီၤဝဲလီၤ.”—၁ ပ့းတရူး ၅:၈.
၅ စၤတၣ်မ့ၢ် တၢ်မံၤလာ်လၢအအၢအသီလီၤ. မ့ၢ်လၢယဟိဝၤတအဲၣ်ဒိးလၢပကဲထီၣ် စၤတၣ်အတၢ်အီၣ်အဃိ, ကစၢ်ပာ်လီၤဝဲ တၢ်မၤလိာ်တဖၣ်လၢ ကဒီသဒၢပှၤလၢ “တၢ်လီတၢ်ဝ့ၤ” တဖၣ်အဂီၢ်လီၤ. (အ့းဖ့းစူး ၆:၁၁) ပမ့ၢ်ဆိကမိၣ်ယိာ် ယွၤအတၢ်မၤလိာ်တဖၣ် ကိးဆၢကတီၢ်ဒဲးန့ၣ်, ပကြၢးသ့ၣ်ညါလၢ တၢ်မၤလိာ်တဖၣ်အံၤ ပာ်ဖျါပပၢ်အိၣ်လၢ မူခိၣ်အတၢ်အဲၣ်လီၤ. ဖဲပထံၣ်ယွၤအတၢ်မၤလိာ်လၢ ကျဲဒ်သိးအံၤအခါ, ယွၤအတၢ်မၤလိာ်တဖၣ်န့ၣ် မ့ၢ်တၢ်ပူၤဖျဲးဒီး တၢ်သးခုအဂ့ၢ်ခီၣ်ထံးလီၤ. ခရံာ်အပျဲၢ်အဘီၣ် ယၤကိာ်ကွဲးဝဲလၢ “ပှၤလၢအကွၢ်ထံကွၢ်ဆး တၢ်သိၣ်တၢ်သီအလၢအပှဲၤ ဘၣ်ဃးဒီးတၢ်ထူၣ်ဖျဲး, ဒီးအိၣ်ဝဲဆိးဝဲလၢ အပူၤန့ၣ် . . . ကဘၣ်တၢ်ဆိၣ်ဂ့ၤလၢ အမၤတၢ်အပူၤလီၤ.”—ယၤကိာ် ၁:၂၅.
၆. ကျဲအဂ့ၤကတၢၢ်လၢ တၢ်သူၣ်လီၤတၢ်နာ်လၢ ယွၤအတၢ်မၤလိာ်တီလိၤဒီး တၢ်သိၣ်တၢ်သီမိၢ်ပှၢ်အပူၤန့ၣ် မ့ၢ်မနုၤလဲၣ်. ဟ့ၣ်တၢ်အဒိတက့ၢ်.
၆ တၢ်အိၣ်မူဒ် ယွၤအတၢ်မၤလိာ်အသိးန့ၣ် မ့ၢ်ကျဲအဂ့ၤကတၢၢ်လၢ ပကမၤဂၢၢ်ကျၢၤ ပတၢ်နာ်လၢ ကစၢ်လၢအဟ့ၣ်တၢ်သိၣ်တၢ်သီ ဒီးအတၢ်သိၣ်တၢ်သီလၢ အိၣ်ဒီးတၢ်ကူၣ်သ့န့ၣ်လီၤ. အဒိ, “ခရံာ်အတၢ်သိၣ်တၢ်သီ” န့ၣ်ပာ်ဃုာ်ဒီးယ့ၣ်ၡူးအတၢ်မၤလိာ်လၢ သိၣ်လိပှၤဂၤလၢ “ကယဲၢ်တၢ်လၢ ယမၤလိာ်တ့ၢ်သုခဲလၢာ်” လီၤ. (ကလၤတံ ၆:၂; မးသဲ ၂၈:၁၉, ၂၀) ခရံာ်ဖိတဖၣ်ပာ်ကဲဝဲ တၢ်မၤလိာ်လၢ ကဘၣ်အိၣ်ဖှိၣ်ဒ်သိးသိးလၢ တၢ်ဘူၣ်ထီၣ်ဘါထီၣ်အဂီၢ်ဒီး ကဘၣ်ရ့လိာ်သးလၢ တၢ်ဟ့ၣ်ဂံၢ်ဟ့ၣ်ဘါလိာ်သးအဂီၢ်လီၤ. (ဧ့ၤဘြံၤ ၁၀:၂၄, ၂၅) ယွၤအတၢ်မၤလိာ်အပူၤစ့ၢ်ကီး ပာ်ဃုာ်ဒီး တၢ်ဟ့ၣ်သဆၣ်ထီၣ်လၢ ဃ့ဘါထုကဖၣ်ဆူ ယဟိဝၤအအိၣ်ဘၣ်ဆၢဘၣ်ကတီၢ်ဒီး တထံၣ်ဃီ လၢသးဒီဖျၢၣ်တက့ၢ်န့ၣ်လီၤ. (မးသဲ ၆:၅-၈; ၁ သ့းစၤလနံ ၅:၁၇) ပမ့ၢ်အိၣ်မူဒ် တၢ်မၤလိာ်တဖၣ်အသိးန့ၣ်, ပကထံၣ်ဘၣ်လၢ တၢ်သ့ၣ်တဖၣ်န့ၣ် မ့ၢ်တၢ်နဲၣ်လိလၢ အိၣ်ဒီးတၢ်အဲၣ်နီၢ်နီၢ်လီၤ. တၢ်ဒိကနၣ်တၢ်သ့ၣ်တဖၣ်အံၤန့ၣ် ဟ့ၣ်ပှၤတၢ်သးခုဒီး တၢ်သူၣ်မံသးမုာ်လၢ ပတထံၣ်န့ၢ် နီတဘျီလၢ တၢ်လီၢ်အဂၤလၢ ဟီၣ်ခိၣ်လၢအပှဲၤဒီးတၢ်ကီတၢ်ခဲအံၤအပူၤဘၣ်လီၤ. ဒ်နဆိကမိၣ်ယိာ် နဒိးန့ၢ်ဘၣ် တၢ်အဘျုးခီဖျိ နဒိကနၣ်ယွၤအတၢ်မၤလိာ်အဃိန့ၣ်, နတၢ်နာ်တဂၢၢ်ကျၢၤထီၣ်ဘၣ်ဧါ.
၇, ၈. ပှၤလၢအဘၣ်ယိၣ်တၢ်လၢ အဝဲသ့ၣ်ပၢၤဃာ်အတၢ်တီတၢ်လိၤ တန့ၢ်လၢအနံၣ်အါမးတဖၣ်န့ၣ် ယွၤအကလုၢ်ကထါ ဟ့ၣ်ဂံၢ်ဟ့ၣ်ဘါအီၤဒ်လဲၣ်.
၇ ဘၣ်တဘျီဘျီ ပှၤတနီၤဘၣ်ယိၣ်ဝဲလၢ ဆၢကတီၢ်မ့ၢ်ယံာ်ထီၣ်ဒီး ကကီခဲဒိၣ်မးလၢ ကစူၢ်ယွၤအတၢ်မၤလိာ်အဂီၢ်န့ၣ်လီၤ. အဝဲသ့ၣ်ပျံၤဝဲလၢ ကမၤကမၣ်ဘၣ်တၢ်လၢ ကျဲတမံၤမံၤလီၤ. နမ့ၢ်တူၢ်ဘၣ်ဒ်အံၤန့ၣ်, ပာ်တၢ်ကတိၤအံၤလၢ နသးပူၤတက့ၢ်. “ယဲဒၣ်အံၤ, ယမ့ၢ်ယွၤ, နကစၢ်လၢ အသိၣ်လိနၤဒ်သိးနကဘၣ်ဘျုးဘၣ်ဖှိၣ်, ဒီးယဒုးလဲၤနၤလၢ ကျဲလၢနဂ့ၤလဲၤန့ၣ်လီၤ. အိ, မ်နကနၣ်တ့ၢ်ယတၢ်မၤလိာ်တက့ၢ်. မ့မ့ၢ်ဒ်န့ၣ်ဒီး နတၢ်ဃူတၢ်ဖိး ကမၤသးဒ်ထံမိၢ်ပှၢ်အသိး, ဒီးနတၢ်တီတၢ်လိၤဒ် ပီၣ်လဲၣ်အလပီအသိးန့ၣ်လီၤ.” (ယၡါယၤ ၄၈:၁၇, ၁၈) နဆိကမိၣ်ဘၣ် တၢ်ကတိၤတဖၣ်အံၤ ဟ့ၣ်ဂံၢ်ဟ့ၣ်ဘါတၢ်ဆံးဒိၣ်လဲၣ်န့ၣ်ဧါ.
၈ ဖဲအံၤန့ၣ် ယဟိဝၤဟ့ၣ်ပလီၢ်ပှၤလၢ ပဒိးန့ၢ်တၢ်အဘျုးခီဖျိ ပစူၢ်အီၤအဃိလီၤ. ကစၢ်အၢၣ်လီၤဝဲလၢ ပမ့ၢ်မၤဒ်န့ၣ်ဒီး ပကဒိးန့ၢ်ဘၣ်တၢ်ဆိၣ်ဂ့ၤခံမံၤလီၤ. တၢတမံၤ, ပတၢ်ဃူတၢ်ဖိးကလီၤဂာ်ဒီး ထံဖိကျိလၢ အခုၣ်, အါအါဂီၢ်ဂီၢ်, ဒီးတလၢာ်နီတဘျီဘၣ်လီၤ. ခံဘီတဘီ, ပတၢ်တီတၢ်လိၤန့ၣ် ကလီၤဂာ်ဒ် ပီၣ်လဲၣ်အလပီတဖၣ်အသိးလီၤ. ဖဲနဆၢထၢၣ်လၢ ပီၣ်လဲၣ်နံၤဒီးနကွၢ် လပီဒိဝ့ၤဝီၤတၢ်အခါ, နကတူၢ်ဘၣ်နီၢ်ကီၢ်လၢ တၢ်အံၤမ့ၢ်တၢ်လီၤစိၤလီၤ. နသ့ၣ်ညါလၢ လပီတဖၣ် ဟဲကဒီးတလီၢ်လီၢ်, ဒိဝဲပီၣ်လဲၣ်နံၤထီဘိလီၤ. ယဟိဝၤစံးဝဲလၢ နတၢ်တီတၢ်လိၤလၢအမ့ၢ် နမၤတၢ်လၢအဂ့ၤန့ၣ် လီၤဂာ်ဒီးတၢ်အံၤလီၤ. နမ့ၢ်ဂုာ်ကျဲးစၢးတီဒီးအီၤန့ၣ် အဝဲကဒုးမၤနၢၤနၤတၢ်ထီဘိလီၤ. (စံးထီၣ်ပတြၢၤ ၅၅:၂၂) တၢ်အၢၣ်လီၤအီလီၤလၢ အလီၤသးမုာ်အံၤန့ၣ် မၤဆူၣ်ထီၣ်နတၢ်နာ် ယဟိဝၤဒီး ကစၢ်အတၢ်မၤလိာ်တီလိၤကစီဒီဧါ.
“ပလဲၤဆူ တၢ်ဒိၣ်တုာ်ခိၣ်ပှဲၤ”
၉, ၁၀. (က) ဘၣ်မနုၤအဃိ တၢ်ဒိၣ်တုာ်ခိၣ်ပှဲၤန့ၣ် မ့ၢ်တၢ်တိာ်အဂ့ၤကတၢၢ်လၢ ခရံာ်ဖိတဖၣ် အဂီၢ်လဲၣ်. (ခ) တၢ်အိၣ်ဒီးနီၢ်သးအတၢ်ထံၣ်န့ၣ် ဒုးသးခုပှၤဒ်လဲၣ်.
၉ ခံမံၤတမံၤ, လိၣ်လၢပကဘၣ် လူၤထွဲ တၢ်ကတိၤလၢအမ့ၢ် “မ်ပလဲၤသကိးဆူ တၢ်ဒိၣ်တုာ်ခိၣ်ပှဲၤအပူၤန့ၣ်တက့ၢ်” လီၤ. (ဧ့ၤဘြံၤ ၆:၁, ခစ) တၢ်ဒိၣ်တုာ်ခိၣ်ပှဲၤန့ၣ် မ့ၢ်တၢ်တိာ်အဂ့ၤကတၢၢ်လၢ ခရံာ်ဖိတဂၤအဂီၢ်လီၤ. တလီၤဂာ်ဒ် တၢ်လၢတၢ်ပှဲၤ, လၢပှၤကညီတဖၣ် ဒိးန့ၢ်တသ့ခဲအံၤဘၣ်, တၢ်ဒိၣ်တုာ်ခိၣ်ပှဲၤန့ၣ် မ့ၢ်တၢ်တိာ်လၢ ပမၤန့ၢ်သ့လီၤ. အါန့ၢ်အန့ၣ်, ဒ်ခရံာ်ဖိတဖၣ် ဒိၣ်တုာ်ခိၣ်ပှဲၤအါထီၣ်အသိး အဝဲသ့ၣ်ထံၣ်န့ၢ် တၢ်သးခုအါမးလၢ တၢ်မၤယဟိဝၤအတၢ်မၤအပူၤလီၤ. လၢမနုၤအဃိလဲၣ်.
၁၀ ခရံာ်ဖိလၢအဒိၣ်တုာ်ခိၣ်ပှဲၤ လၢနီၢ်သးတဂၤန့ၣ် ထံၣ်ဝဲတၢ်ကိးမံၤဒဲးဒ် ယဟိဝၤအတၢ်ထံၣ်အသိးလီၤ. (ယိၤဟၣ် ၄:၂၃) ပီလူးကွဲးဝဲလၢ “ပှၤဘၣ်ဃးဒီးတၢ်ဖံးတၢ်ညၣ်တဖၣ်န့ၣ်, သးအိၣ်တၢ်ဖံးတၢ်ညၣ်အတၢ်လီၤ. မ့မ့ၢ်ပှၤဘၣ်ဃးဒီးသးတဖၣ်န့ၣ်, လၢသးန့ၣ်အတၢ်လီၤ.” (ရိမ့ၤ ၈:၅) တၢ်ထံၣ်လၢ ဘၣ်ဃးတၢ်ဖံးတၢ်ညၣ်န့ၣ် ဟ့ၣ်ပှၤတၢ်သူၣ်ခုသးခု တဆံးတက့ၢ်လီၤ. မ့ၢ်လၢတၢ်အံၤဒုးအိၣ်ထီၣ် တၢ်အဲၣ်လီၤဒၣ်ထဲသး, တၢ်တဆိကမိၣ်ပာ်စၢၤတၢ်ဆူညါ, ဒီးတၢ်သးစဲနီၢ်ခိတၢ်လိၣ်ဘၣ်တဖၣ်လီၤ. ပှၤလၢအိၣ်ဒီးနီၢ်သးအတၢ်ထံၣ်တဂၤန့ၣ် ပှဲၤဒီးတၢ်သးခု, မ့ၢ်လၢအဝဲသးစဲ ယဟိဝၤ, “တၢ်သူၣ်ခုသးခုအယွၤ” အတၢ်ဘၣ်သးလီၤ. (၁ တံၤမသ့း ၁:၁၁, ဟသ) ခရံာ်ဖိလၢ အဒိၣ်တုာ်ခိၣ်ပှဲၤလၢ နီၢ်သးတဂၤန့ၣ် အသးဆူၣ်လၢ ကမၤမုာ် ယဟိဝၤအသးဒီး ဖဲဘၣ်တၢ်မၤကွၢ်အခါဒၣ်လဲာ် အဝဲကသးခုဝဲလီၤ. လၢမနုၤအဃိလဲၣ်. တၢ်မၤကွၢ်န့ၣ် ဟ့ၣ်ပှၤတၢ်ခွဲးတၢ်ယာ်လၢ ပကပာ်ဖျါထီၣ် စၤတၣ်မ့ၢ် ပှၤလၢလီတၢ်တဂၤလီၤ. တၢ်အံၤမၤအါထီၣ် တၢ်သးတီ, ဒီးဒုးသးခုပပၢ်အိၣ်လၢမူခိၣ်လီၤ.—ကတိၤဒိ ၂၇:၁၁; ယၤကိာ် ၁:၂, ၃.
၁၁, ၁၂. (က) ဖဲပီလူးစံးတၢ်ဘၣ်ဃး တၢ် “ပဲာ်ဖးနီၤဖးညီနုၢ် တၢ်ဂ့ၤဒီးတၢ်အၢအဆၢ” အခါ, တၢ်ကတိၤလၢ တၢ်ကွဲးကျိးလၢ “တၢ်အိၣ်ကတဲာ်ကတီၤတ့ၢ်လံသး” န့ၣ်အခီပညီမ့ၢ်မနုၤလဲၣ်. (ခ) နီၢ်ခိကဒိၣ်ထီၣ်လၢ တၢ်ဒိၣ်တုာ်ခိၣ်ပှဲၤဒီး ကဖျဲၣ်အဂီၢ်န့ၣ် လိၣ်ဘၣ်တၢ်သိၣ်လိမနုၤတမံၤလဲၣ်.
၁၁ တၢ်ဒိၣ်တုာ်ခိၣ်ပှဲၤလၢ နီၢ်သးန့ၣ် ပမၤန့ၢ်အီၤသ့လၢ တၢ်အိၣ်ကတဲာ်ကတီၤသးလီၤ. ဆိကမိၣ်ကွၢ် အဆၢဖိအံၤတက့ၢ်: “တၢ်အီၣ်အသံးအကာ်မ့ၢ် ပှၤဒိၣ်တုာ်ခိၣ်ပှဲၤအဂီၢ်, ပှၤလၢအအိၣ်ကတဲာ်ကတီၤတ့ၢ်လံအသးခီဖျိ အပဲာ်ဖးနီၤဖး ညီနုၢ်တၢ်ဂ့ၤဒီးတၢ်အၢအဆၢန့ၣ်လီၤ.” (ဧ့ၤဘြံၤ ၅:၁၄, ခစ) ဖဲပီလူးစံးဝဲတၢ်ကတိၤလၢ “တၢ်ကတဲာ်ကတီၤတ့ၢ်လံသး” လၢ ပတၢ်သ့ပဲာ်ဖးနီၤဖးတၢ်အခါ, အဝဲသူဝဲ ကြံးခ်အတၢ်ကတိၤလၢ တၢ်သူညီနုၢ်အီၤလၢ ဖဲအဝဲသ့ၣ်စံးဝဲ ပှၤလိာ်ကွဲပြၢတၢ်ဖိတဖၣ် မၤလိအသးလၢ တၢ်လိာ်ကွဲအဂီၢ်အခါန့ၣ်လီၤ. ခဲအံၤပကဆိကမိၣ်ကွၢ်သကိး တၢ်ကတဲာ်ကတီၤတ့ၢ်လံသးအံၤန့ၣ် တၢ်မနုၤပာ်ဃုာ်လဲၣ်န့ၣ်လီၤ.
ပှၤလိာ်ကွဲဖိတဂၤ မၤလိအသး
၁၂ ဖဲပအိၣ်ဖျဲၣ်အခါ, ပနီၢ်ကစၢ်န့ၣ် တဘၣ်တၢ်သိၣ်လိအီၤဒံးဘၣ်. အဒိ, ဖိသၣ်အီနုၢ်တဂၤန့ၣ် တနၢ်ပၢၢ်ဒံးဝဲ အစုဖိခီၣ်ဖိ အတၢ်ဟူးဂဲၤ ဒ်အံၤဒ်နုၤဘၣ်. လၢတၢ်န့ၣ်အဃိ, ဖိသၣ်အီနုၢ်တဂၤ ပယၢ်အစုယၢ်ခီယၢ်ခီ, ဒီးအစုဒိဘၣ်အမဲာ်သၣ်အခါ, ဖိသၣ်အံၤဖုးဘၣ်အသးဒီး ကမၢကမၣ်ဝဲလီၤ. ခီဖျိမၤဟူးဝဲ အစုအခီၣ်အဃိ အနီၢ်ကစၢ် ဘၣ်တၢ်သိၣ်လိအီၤလီၤ. ဖိသၣ်အီနုၢ်န့ၣ် စွါဝဲ, ဖိသၣ်ဆံးဖိန့ၣ် ဟးတီၤတၢ်တီၤတၢ်, ဒီးဖိသၣ်န့ၣ် ဟးဃ့ၢ်ဝဲသ့လံ. * ဘၣ်ဃးဒီးပှၤလိာ်ကွဲသ့တဂၤ တခီလဲၣ်. အဒိ, ဖဲနထံၣ်ပှၤလိာ်ကွဲဖျၢၣ်ထူတဂၤ ကၢၤဃာ်ဝဲ ဖျၢၣ်ထူဂ့ၤဂ့ၤအခါ, နကသ့ၣ်ညါဘၣ်လၢ အဝဲမၤလိပာ်အသး ဂ့ၤဂ့ၤလီၤ. အဝဲအတၢ်သ့တၢ်ဘၣ်စဲၣ်နီၤအံၤန့ၣ် တမ့ၢ်တၢ်ဘၣ်ဆၢၣ်ဘၣ်တီၤဘၣ်. လိၣ်လၢဘၣ်မၤလိအသးလၢ အနၣ်ရံၣ်အါမးလီၤ. လံာ်စီဆှံအၢၣ်လီၤဝဲလၢ တၢ်သိၣ်လိနီၢ်ခိန့ၣ် “အိၣ်ဒီးအဘျုးအဖှိၣ်တစဲးစဲး” လီၤ. ပတၢ်သိၣ်လိသးလၢ တၢ်သ့ပဲာ်ဖးနီၤဖးတၢ်လၢ ယွၤအတၢ်ထံၣ်တခီန့ၣ် အဘျုးအိၣ်ဒိၣ်န့ၢ်တက့ၢ်လီၤ.—၁ တံၤမသ့း ၄:၈.
၁၃. ပသိၣ်လိ ပတၢ်သ့ပဲာ်ဖးနီၤဖးတၢ် ကသ့ဒ်လဲၣ်.
၁၃ လၢလံာ်အံၤအပူၤ ပကတိၤသကိးတ့ၢ်တၢ်အါမးလၢ ကမၤစၢၤနၤလၢ နကသိၣ်လိ နတၢ်သ့ပဲာ်ဖးနီၤဖးတၢ်လီၤ. လၢတၢ်အံၤအဃိ နတီဒီးယဟိဝၤဒ် ပှၤလၢအိၣ်ဒီးယွၤအတၢ်ထံၣ်တဂၤလီၤ. ဆိကမိၣ်ယိာ်ယိာ် ယွၤအတၢ်သိၣ်တၢ်သီဒီး တၢ်မၤလိာ်အဂ့ၢ်ဒီး ဃ့ဘါထုကဖၣ်ဘၣ်ဃး တၢ်သ့ၣ်တဖၣ်အံၤ ဖဲနမၤတၢ်ပာ်လီၤသးလၢ တနံၤဘၣ်တနံၤ တၢ်အိၣ်မူပူၤတက့ၢ်. ဖဲနကွၢ်ဆၢၣ်မဲာ်ဘၣ်ဒီး တၢ်ပာ်လီၤသးကိးဘျီဒဲးန့ၣ် သံကွၢ်လီၤက့ၤနသးဒ်သိးအံၤတက့ၢ်- ‘တၢ်ဂ့ၢ်အံၤဘၣ်ဃးလိာ်သးဒီး လံာ်စီဆှံတၢ်မၤလိာ်ဒီး တၢ်သိၣ်တၢ်သီမနုၤတဖၣ်လဲၣ်. ယမၤထွဲတၢ်အံၤကသ့ ဒ်လဲၣ်. ကျဲမနုၤန့ၣ်ကမၤသးခု ယပၢ်အိၣ်လၢမူခိၣ်အသးလဲၣ်.’ (ကတိၤဒိ ၃:၅, ၆; ယၤကိာ် ၁:၅) နမၤတၢ်ပာ်လီၤသး ကိးမံၤဒဲးလၢ ကျဲဒ်သိးအံၤန့ၣ် မ့ၢ်နသိၣ်လိကဒီး နတၢ်သ့ပဲာ်ဖးနီၤဖးတၢ်လီၤ. တၢ်သိၣ်လိဒ်သိးအံၤန့ၣ် မၤစၢၤနၤလၢ နကကဲထီၣ်ပှၤလၢအိၣ်ဒီး ယွၤအတၢ်ထံၣ်န့ၣ်လီၤ.
၁၄. ပနီၢ်သးကဒိၣ်ထီၣ်အဂီၢ် ပသးကဘၣ်ဃ့အီၣ် တၢ်အီၣ်မနုၤလဲၣ်. ဘၣ်ဆၣ် ပကဘၣ်ပလီၢ်ဆိပာ်ပသးလၢ တၢ်မနုၤလဲၣ်.
၁၄ ပတုၤလၢ တၢ်ဒိၣ်တုာ်ခိၣ်ပှဲၤသ့ သနာ်က့ နီၢ်သးတၢ်ဒိၣ်ထီၣ်ထီထီၣ်တခီ ပကဘၣ်မၤဒိၣ်ထီၣ်အီၤဆူညါ ကွ့ၢ်ကွ့ၢ်န့ၣ်လီၤ. တၢ်ဒိၣ်ထီၣ်ထီထီၣ်န့ၣ် သန့ၤထီၣ်အသးလၢ တၢ်အီၣ်အဖီခိၣ်လီၤ. လၢတၢ်န့ၣ်အဃိ ပီလူးပာ်ဖျါဝဲလၢ “တၢ်အီၣ်အသံးအကာ်မ့ၢ် ပှၤဒိၣ်တုာ်ခိၣ်ပှဲၤအဂီၢ်လီၤ.” တၢ်ဂ့ၢ်မိၢ်ပှၢ် တမံၤလၢ နကသူၣ်လီၤနတၢ်နာ်န့ၣ် မ့ၢ်တၢ်အီၣ်နီၢ်သး အတၢ်အီၣ်အသံးအကာ်လီၤ. နမၤထွဲတၢ် လၢနမၤလိအီၤတဖၣ်န့ၣ် မ့ၢ်တၢ်ကူၣ်ဘၣ်ကူၣ်သ့လီၤ. လံာ်စီဆှံစံးဝဲလၢ “တၢ်အခိၣ်ကျၢၢ်န့ၣ် မ့ၢ်တၢ်ကူၣ်သ့လီၤ.” လၢတၢ်န့ၣ်အဃိ လိၣ်လၢ ပကဘၣ်မၤဒိၣ်ထီၣ် ပတၢ်အဲၣ်ဒိးနီၢ်နီၢ် တၢ်မ့ၢ်တၢ်တီ လုၢ်ဒိၣ်ပှ့ၤဒိၣ်လၢ ပပၢ်အိၣ်လၢမူခိၣ်ဟ့ၣ်ပှၤန့ၣ်လီၤ. (ကတိၤဒိ ၄:၅- ၇; ၁ ပ့းတရူး ၂:၂) နီၢ်နီၢ် ပအိၣ်ဒီးတၢ်သ့ၣ်ညါဒီး ယွၤအတၢ်ကူၣ်ဘၣ်ကူၣ်သ့န့ၣ် တမ့ၢ်တၢ်ဂ့ၢ်လၢ ပကသူၣ်မံသးမံဒၣ်တၢ် မ့တမ့ၢ် ပကပာ်ထီၣ်ထီသးလၢ ပဂ့ၤန့ၣ်ပှၤဂၤဘၣ်. လိၣ်လၢ ပကဘၣ်သမံသမိးလီၤက့ၤ ပသးဘၣ်ဆၢဘၣ်ကတီၢ် ကိးဆၢကတီၢ်ဒဲးလၢ တၢ်ပာ်ထီၣ်ထီသး မ့တမ့ၢ် တၢ်ဂံၢ်စၢ်ဘါစၢ် အဂၤတဖၣ် အဂံၢ်သုတစဲၤလီၤဒီး သုတဒိၣ်ထီၣ်လၢ ပသးပူၤတဂ့ၤလီၤ. ပီလူးကွဲးဝဲလၢ “သုဝဲဒၣ်အံၤ သုအိၣ်လၢတၢ်နာ်အပူၤ, သုတအိၣ်ဘၣ်လဲၣ်န့ၣ် သံကွၢ်သံဒိးလီၤ သုသးတက့ၢ်.”—၂ ကရံၣ်သူး ၁၃:၅.
၁၅. နီၢ်သးကဒိၣ်ထီၣ်ထီထီၣ် အဂီၢ်ဘၣ်မနုၤအဃိ တၢ်အဲၣ်လိၣ်ဝဲဒၣ်လဲၣ်.
၁၅ တၢ်ဘှီဟံၣ်မ့ၢ်ဝံၤ ဒီဖျၢၣ်သနာ်က့ တၢ်အံၤက့ၤကွၢ်က့ၤဒီး တၢ်ဘှီက့ၤတၢ်န့ၣ် လိၣ်ဒံးအဖၢလီၤ. တၢ်အိၣ်အသးမ့ၢ်လဲလိာ်န့ၣ် လိၣ်လၢနကဘၣ်မၤအါထီၣ် ဟံၣ်အဒၢးတဖၣ်လီၤ. လိၣ်လၢ ပကဒိၣ်တုာ်ခိၣ်ပှဲၤဒီး ပကပၢၤဃာ်ပနီၢ်သး အဂီၢ်ပကဘၣ်မၤတၢ်မနုၤလဲၣ်. လၢတၢ်ခဲလၢာ်အဖီခိၣ်န့ၣ် လိၣ်တၢ်အဲၣ်တၢ်ကွံလီၤ. လိၣ်လၢပကဘၣ်မၤဒိၣ်ထီၣ် ပတၢ်အဲၣ်ယဟိဝၤဒီး ပှၤစူၢ်တၢ်နာ်တၢ် ကဒဲကဒဲလီၤ. ပတၢ်အဲၣ်မ့ၢ်တအိၣ်န့ၣ် ပတၢ်သ့ၣ်ညါနၢ်ပၢၢ်ဒီး ပမၤတၢ်ခဲလၢာ်န့ၣ် မ့ၢ်တၢ်ကလီကလီလီၤ. (၁ ကရံၣ်သူး ၁၃:၁- ၃) လၢတၢ်အဲၣ်အဃိ ပကဲထီၣ်ခရံာ်ဖိလၢ အဒိၣ်တုာ်ခိၣ်ပှဲၤဒီး နီၢ်သးစ့ၢ်ကီး ကဒိၣ်ထီၣ်ထီထီၣ် ထီဘိလီၤ.
သးစဲတၢ်မုၢ်လၢ်လၢ ယဟိဝၤဟ့ၣ်ပှၤ
၁၆. စၤတၣ်မၤအါထီၣ် တၢ်ဆိကမိၣ် မနုၤတကလုာ်လဲၣ်. ယဟိဝၤဟ့ၣ်ပှၤ တၢ်ဒီသဒၢမနုၤလဲၣ်.
၁၆ သၢမံၤတမံၤန့ၣ် လိၣ်လၢပကဘၣ်သးစဲ တၢ်မုၢ်လၢ်လၢ ယဟိဝၤဟ့ၣ်ပှၤတဖၣ်လီၤ. ပကမၤဒ်သိးအံၤအဂီၢ် လိၣ်လၢပကဘၣ် ပလီၢ်ပသးလၢ ပတၢ်ဆိကမိၣ်တဖၣ်လီၤ. စၤတၣ်, ပှၤပၢဟီၣ်ခိၣ်အံၤ, မ့ၢ်ပှၤအိၣ်ဒီးတၢ်သ့တၢ်ဘၣ်လၢ ဒုးအိၣ်ထီၣ်ပှၤကညီတဖၣ်လၢ တၢ်ဆိကမိၣ်လၢ အတဂ့ၤ, တၢ်တနာ်န့ၢ်တၢ်, ဒီးတၢ်သးဟးဂီၤလီၤ. (အ့းဖ့းစူး ၂:၂) တၢ်ဆိကမိၣ်ဒ်သိးအံၤန့ၣ် တၢ်ဘၣ်ယိၣ်အလီၢ်အိၣ်လၢ ခရံာ်ဖိတဂၤအဂီၢ် ဒ်သိးကုၤမၤကျၣ်သ့လၢ အမၤဟးဂီၤကွံာ် ဟံၣ်သ့ၣ်တဖျၢၣ်အသိးလီၤ. လီၤသးခုဒိၣ်မးလၢ ယဟိဝၤဟ့ၣ်တၢ်လၢအလိၣ်ဒီးပှၤ လၢပကဒီသဒၢပသးအဂီၢ်လီၤ. တၢ်န့ၣ်မ့ၢ် တၢ်မုၢ်လၢ်လီၤ.
၁၇. တၢ်မုၢ်လၢ်အကါဒိၣ် အဂ့ၢ်န့ၣ်လံာ်စီဆှံ ပာ်ဖျါဝဲဒ်လဲၣ်.
၁၇ လံာ်စီဆှံပာ်ဖျါဝဲ နီၢ်သးစုကဝဲၤ တြီဃာ်တၢ် အတၢ်ကူတၢ်သိး အကလုာ်ကလုာ်လၢ ပကထီဒါစၤတၣ်ဒီး ဟီၣ်ခိၣ်အံၤလီၤ. စုကဝဲၤတြီဃာ်တၢ် အကါဒိၣ်တမံၤန့ၣ် မ့ၢ်ခိၣ်သလုးထး, “တၢ်မုၢ်လၢ်ဘၣ်ဃးဒီး တၢ်အုၣ်က့ၤခီၣ်က့ၤလီၤ.”(၁ သ့းစၤလနံ ၅:၈) လၢလံာ်စီဆှံအစိၤခါ သုးဖိတဂၤသ့ၣ်ညါဝဲလၢ အခိၣ်သလုးထး မ့ၢ်တပာ်လၢ တၢ်ဒုးအပူၤဘၣ်ဒီး အဝဲကသံဝဲသပှၢ်တၢၢ်လီၤ. အါတက့ၢ် ခိၣ်သလုးအံၤန့ၣ် ပှၤမၤအီၤလၢ ထးဒီး ဘၣ်တၢ်ဖျီၣ်လီၤအီၤလၢ ခိၣ်ဖျီၣ်သးကလး မ့တမ့ၢ် ခိၣ်ဖျီၣ်တၢ်ဖံးအဖီခိၣ်လီၤ. မ့ၢ်ကၢၢ်ဃာ်ခိၣ်သလုးအံၤန့ၣ် ကယဲၢ်တၢ်လၢ အဟဲဘၣ်အခိၣ်တဖၣ် ကဖျိးထီၣ်ကဒါက့ၤလီၤ. ဒ်ခိၣ်သလုးတဖျၢၣ် ဒီသဒၢ ခိၣ်အသိး တၢ်မုၢ်လၢ်န့ၣ် ဒီသဒၢ နသးဒီး နတၢ်ဆိကမိၣ်သ့လီၤ.
၁၈, ၁၉. ယ့ၣ်ၡူးပာ်လီၤ တၢ်အဒိတဲာ်မနုၤလၢ တၢ်ပၢၤဃာ်တၢ်မုၢ်လၢ်န့ၣ်လဲၣ်. ဒီးပကွၢ်လိမၤဒိးအီၤကသ့ဒ်လဲၣ်.
၁၈ ယ့ၣ်ၡူးပာ်လီၤ ဒိတဲာ်အဂ့ၤကတၢၢ်လၢ တၢ်ပၢၤဃာ် တၢ်မုၢ်လၢ်န့ၣ်လီၤ. သ့ၣ်နီၣ်ထီၣ်လၢ အဝဲတူၢ်ဘၣ်ဝဲ တၢ်မနုၤတဖၣ်လၢ အတၢ်အိၣ်မူလၢ ဟီၣ်ခိၣ်လၢခံကတၢၢ် အနၤန့ၣ်တက့ၢ်. အတံၤသကိးလၢ အရ့ဒီးအီၤဘူးဘူးတံၢ်တံၢ်တဂၤ ဆါလီၤကွံာ်အီၤလီၤ. အတဂၤန့ၣ် သမၢအီၤလၢ တသ့ၣ်ညါအီၤဘၣ်လီၤ. အဂၤတဖၣ်န့ၣ် ပာ်တ့ၢ်အီၤဒီး ဃ့ၢ်ကွံာ်ဝဲသ့ၣ်လီၤ. အထံဖိကီၢ်ဖိဒၣ်လဲာ်ဂ့ၢ်လိာ်အီၤဒီး, ကိးပသူထီၣ်လၢ ရိမ့ၤသုးဖိတဖၣ် ကမၤသံအီၤ ခီဖျိ မၤဆူးမၤဆါအီၤနးနးကလဲာ်န့ၣ်လီၤ. ပစံးသ့သပှၢ်တၢၢ်လၢ ယ့ၣ်ၡူးကွၢ်ဆၢၣ်မဲာ်ဘၣ်တၢ်ကီတၢ်ခဲတဖၣ် နးန့ၢ်ဒံး ပကွၢ်ဆၢၣ်မဲာ်ဘၣ် ကိးမံၤဒဲးလီၤ. တၢ်မနုၤမၤစၢၤအီၤလဲၣ်. ဧ့ၤဘြံၤ ၁၂:၂ စံးဆၢဝဲလၢ “အဝဲဒၣ်ဒိးထူၣ်စုညါ, ဒီးပာ်တၢ်မဲာ်ဆှးလၢ တၢ်နီတမံၤဘၣ်, လၢတၢ်သးခုအိၣ်ပာ်လီၤအသးလၢ အမဲာ်ညါအဃိ, ဒီးဆ့ၣ်နီၤဝဲလၢ ယွၤအလီၢ်ပစိာ်အစုထွဲတခီလီၤ.” ယ့ၣ်ၡူးကွၢ်စူၢ်ဝဲ “တၢ်သးခုအိၣ်ပာ်လီၤအသးလၢ အမဲာ်ညါ” န့ၣ်လီၤ.
၁၉ တၢ်သးခုမနုၤအိၣ်လၢ ယ့ၣ်ၡူးအမဲာ်ညါလဲၣ်. အဝဲသ့ၣ်ညါဝဲဂ့ၤဂ့ၤလၢ ခီဖျိအဝဲအတၢ်တူၢ်န့ၢ်ခီၣ်ကဲအဃိ ယဟိဝၤအမံၤကဘၣ် တၢ်ပာ်စီဆှံလီၤ. အဝဲပာ်ဖျါတၢ်အုၣ်သးဖးဒိၣ်လၢ စၤတၣ်မ့ၢ် ပှၤလီတၢ်ဝ့ၤတၢ်လီၤ. တၢ်မုၢ်လၢ်အဂၤလၢ ကဒုးသးခုယ့ၣ်ၡူးအါန့ၢ်ဒံးတၢ်အံၤန့ၣ် တအိၣ်လၢၤဘၣ်. ယ့ၣ်ၡူးသ့ၣ်ညါစ့ၢ်ကီးဝဲလၢ ယဟိဝၤကဟ့ၣ်ဘျုးအီၤ အါအါဂီၢ်ဂီၢ်လၢ အဝဲအတၢ်သးတီအဃိ, လၢတယံာ်ဘၣ်ဒီးအဝဲကက့ၤအိၣ်ဘၣ်ဒီး အပၢ်န့ၣ်လီၤ. လၢဆၢကတီၢ်နးနးကလဲာ်အပူၤဒၣ်လဲာ် ယ့ၣ်ၡူးပာ် တၢ်မုၢ်လၢ်လၢအပှဲၤဒီးတၢ်သးခုအံၤ လၢအသးပူၤလီၤ. လိၣ်လၢပကဘၣ်မၤဒ်သိးအီၤလီၤ. ပဝဲစ့ၢ်ကီး တၢ်သးခုအိၣ်လၢ ပမဲာ်ညါလီၤ. ယဟိဝၤ မၤလၤကပီၤပှၤ တဂၤစုာ်စုာ်လၢ ဟ့ၣ်ပှၤတၢ်ခွဲးတၢ်ယာ်လၢ တၢ်ပာ်စီဆှံ ကစၢ်အမံၤအဂီၢ်လီၤ. ပပာ်ဖျါသ့လၢ စၤတၣ်မ့ၢ် ပှၤလီတၢ်ခီဖျိ ပဃုထၢယဟိဝၤဒ် ပတၢ်ပၢကစၢ် ဒီးပမ့ၢ်ကွၢ်ဆၢၣ်မဲာ်ဘၣ် တၢ်ကီတၢ်ခဲဒီး တၢ်လ့ပစီမနုၤတမံၤဂ့ၤဂ့ၤ ပအိၣ်ပူၤဖျဲးလၢ ပပၢ်အတၢ်အဲၣ်အပူၤလီၤ.
၂၀. နကအိၣ်ဒီးတၢ်ဆိကမိၣ်လၢအဂ့ၤဒီး တၢ်မုၢ်လၢ်အဂီၢ် တၢ်မနုၤမၤစၢၤနၤသ့လဲၣ်.
၂၀ ယဟိဝၤအသးအိၣ်ဟ့ၣ်ဘျုး အခ့အပှၤလၢအတီဒီးအီၤတဖၣ် တကးဘၣ် အသးဆူၣ်လၢ ကဟ့ၣ်ဘျုးဝဲလီၤ. (ယၡါယၤ ၃၀:၁၈; မၤလကံ ၃:၁၀) ကစၢ်မုာ်လၤသးခုလၢ ကမၤလၢပှဲၤအခ့အပှၤ အတၢ်အဲၣ်ဒိးလၢ အတီအလိၤတဖၣ်လီၤ. (စံးထီၣ်ပတြၢၤ ၃၇:၄) လၢတၢ်န့ၣ်အဃိ, သးစဲတၢ်မုၢ်လၢ်လၢ အိၣ်လၢနမဲာ်ညါ တထံၣ်ဃီတက့ၢ်. တဘၣ်ဒုးဝာ်နုာ် စၤတၣ်အဟီၣ်ခိၣ်အံၤ အတၢ်ဆိကမိၣ် လၢအတဂ့ၤ, လၢအတတီ, ဒီးအအၢတဖၣ်လၢနသးပူၤတဂ့ၤ. နမ့ၢ်သ့ၣ်ညါလၢ ဟီၣ်ခိၣ်အသးအံၤ နုာ်လီၤဆူ နသးပူၤန့ၣ်, ဃ့ဘါထုကဖၣ် ဆူၣ်ဆူၣ်ဆူ ယဟိဝၤအအိၣ်လၢ နကအိၣ်ဒီး “ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်” အဂီၢ်တက့ၢ်. တၢ်ဃူတၢ်ဖိးလၢ ကစၢ်ယွၤဟ့ၣ်ပှၤအံၤန့ၣ် ဒီသဒၢဝဲနသးဒီး နတၢ်ဆိကမိၣ်လီၤ.—ဖံလံးပံၤ ၄:၆, ၇.
၂၁, ၂၂. (က) ပှၤလၢအပာ်ဃုာ်လၢ “ပှၤဂီၢ်မုၢ်ဖးဒိၣ်”အကျါန့ၣ် အိၣ်ဒီး တၢ်မုၢ်လၢ်လီၤကမၢကမၣ်မနုၤလဲၣ်. (ခ) ခရံာ်ဖိတၢ်မုၢ်လၢ်မနုၤန့ၣ် ဘၣ်နသးကတၢၢ်လဲၣ်. ဒီးနပာ်လီၤနသးလၢနကမၤမနုၤလဲၣ်.
၂၁ နအိၣ်ဒီး တၢ်မုၢ်လၢ်လၢ အလီၤသူၣ်ဟူးသးဂဲၤလၢ နကဆိကမိၣ်အဂီၢ်လီၤ. နမ့ၢ်ပာ်ဃုာ်လၢ “ပှၤဂီၢ်မုၢ်ဖးဒိၣ်,” “လၢအဟဲလၢတၢ်နးတၢ်ဖှီၣ်ဖးဒိၣ်အပူၤ” န့ၣ်, ဆိကမိၣ်ကွၢ်တၢ်အိၣ်မူလၢ တၢ်ယံာ်ဘၣ်ဒီး နကဒိးန့ၢ်ဘၣ်န့ၣ်တက့ၢ်. (လီၣ်ဖျါ ၇:၉, ၁၄) စၤတၣ်ဒီးအတၢ်နါတဖၣ် တအိၣ်လၢၤအဃိ, နကတူၢ်ဘၣ်တၢ်အမုာ်လၢ ခဲအံၤနတဆိကမိၣ် နီတဘျီဘၣ်လီၤ. အါန့ၢ်အန့ၣ်, ပှၤတလဲၤခီဖျိဘၣ် တၢ်အိၣ်မူလၢ တအိၣ်ဒီး စၤတၣ်အတၢ်လုၢ်ဘၢအတဂ့ၤ အတၢ်မၢဆူၣ်မၤဆူၣ်န့ၣ် အိၣ်ဝဲဧါ. တၢ်မၢဆူၣ်မၤဆူၣ်အံၤ မ့ၢ်တအိၣ်လၢၤအခါ, ယ့ၣ်ၡူးဒီးပှၤ ၁၄၄,၀၀၀ လၢအပၢဃုာ်တၢ်ဒီးအီၤလၢ မူခိၣ်တဖၣ် အတၢ်နဲၣ်လိအဖီလာ်န့ၣ် တၢ်မၤလဲလိာ်ဟီၣ်ခိၣ်ဆူ ပၤရဒံစူးန့ၣ် ကမ့ၢ်မးတၢ်လီၤသးခုလီၤ. တၢ်မုၢ်လၢ်လၢ တၢ်ထံၣ်ဘၣ် ပှၤဆူးပှၤဆါဒီး တၢ်က့တၢ်ကွဲၣ် ခဲလၢာ် တအိၣ်လၢၤအခါ, ဘၣ်လဲၤသဂၢၢ် ပှၤလၢပအဲၣ်ဘၣ်တဖၣ်လၢ တၢ်သွၣ်ခိၣ်အခါ, ပကဘၣ်အိၣ်မူတၢ်အိၣ်မူကျဲလၢ ယွၤအဲၣ်ဒိးဝဲအသိး အဆၢကတီၢ်န့ၣ် မ့ၢ်တၢ်လၢအလီၤသူၣ်ဟူးသးဂဲၤဒိၣ်မးလီၤ. ဒ်ပလၢပှဲၤထီၣ်အသိး, တၢ်ဟ့ၣ်ဘျုးလၢအဒိၣ်န့ၣ် ဘူးထီၣ်ဘူးထီၣ်လီၤ. တၢ်န့ၣ်မ့ၢ် တၢ်အၢၣ်လီၤအီလီၤလၢ ပထံၣ်ဘၣ်လၢ ရိမ့ၤ ၈:၂၁ အပူၤအသိး “ယွၤအဖိတဖၣ် အတၢ်ထူၣ်ဖျဲးအလၤကပီၤ” လီၤ.
၂၂ ယဟိဝၤအဲၣ်ဒိးလၢ နဒိးန့ၢ်ဘၣ် တၢ်သဘျ့အါန့ၢ်ဒံးလၢ နဆိကမိၣ်သ့န့ၣ်လီၤ. တၢ်သဘျ့ဒ်သိးအံၤန့ၣ် သန့ၤထီၣ်အသးလၢ တၢ်ဒိကနၣ်အဖီခိၣ်လီၤ. ခဲအံၤ နတၢ်ဂုာ်ကျဲးစၢး ဒိကနၣ် ယဟိဝၤလၢ တနံၤဘၣ်တနံၤန့ၣ် အဘျုးတအိၣ်ဘၣ်ဧါ. လၢတၢ်န့ၣ်အဃိ, သူၣ်လီၤနသးလၢ နတၢ်နာ်စီဆှံအဖီခိၣ်, လၢနကအိၣ်ဂၢၢ်ဆိးကျၢၤလၢ ယွၤအတၢ်အဲၣ်ပူၤ အစိၤစိၤအဃာ်ဃာ်အဂီၢ်န့ၣ်တက့ၢ်.
^ လံာ်အဆၢ. 12 စဲအ့ၣ်ပှၤကူၣ်ဘၣ်ကူၣ်သ့တဖၣ်စံးဝဲလၢ ပတၢ်သ့ၣ်ညါလၢ နီၢ်ခိအတၢ်ဟူးတၢ်ဂဲၤဒီး စုခီၣ်တၢ်အိၣ်သးတဖၣ်န့ၣ် ဒိၣ်ထီၣ်ထီထီၣ်ဝဲလီၤ. အဒိ, တၢ်သ့ၣ်ညါလီၤဆီအံၤအဃိ နဘံၣ်နမဲာ်ဒီး နဒဲနစုသ့လီၤ.
တၢ်ဂ့ၤအဂၤလၢ နကဘၣ်သး
လံာ်တဖၣ် ဒီးဘရိၣ်ခၠၣ်တဖၣ်
