1, 2. Dia sat paskaia warkka ra dimram sa, bara warkka ba pain daukaia ba dia muni nit pali sa ki?

DIARA KUM paski man karna wark takisma. Pat pyu aihwa wina dukya ba ra wark takisma, bara kau daukaia sma sin. Warkka ba sika isi apia sa, kuna uba lilia mai sakisa. Dia kabia kra sin, warkka ba lulki swiaia, apia kaka saura daukaia sin lukras sma. Kau ni, dukya ba uba pain pali paskaia lika lukisma. Kan rayakam ra, bara kainam ra dia takbia ba sin, warkka ba mita sa. Dia muni ki? Kan dukya maki ba dahra aisi ba sika, man pali sma!

² Disaipel Judas ba yawan kumi bani wan wîna ra warkka dauki ba dukyara aisisa. Kan “Gâd latwanka laka ra ban bas” wisuya taim, kanra tikska ra baha daukaia dukyara “kasak lukankam laka huli ba kat ban bui bas” wisata (Judas 20, 21). Wan kasakka lukan laka ba Gâd latwanka laka ra kaia help wan munbia dukyara nahki dutki paski sakbia ki? Kasak lukankam laka ba dutki paskaia wisi bapanka yuhmpa kaisa laki kaikaia.

3-5. a) Jehova lâka nani ba dahra, Setan ba dia sat blakanka lamla ra dingkaia want sa? b) Gâd lâka nani ba yawan nahki kaikaia sa ki, bara baku kaiki nahki wan dara walbia? Tanka kum mangks.

³ Taura lika, Gâd lâka nani ra wan kasakka lukan laka ba dutki paskaia sa. Bukka na stadi taki aulma bara, wan rayaka  nahki brih wapaia dukyara Gâd lâka nani sat sat laki kaikram sa. Sakuna, lâka nani na dukyara man nahki lukisma? Gâd lâka, bara smalkanka nani ba, diara kum uba priski mai bri baku lukma Setan daukaia want sa. Eden ra naha sat warbanka ba yus takan ba kaikisi, witin ban yus munisa (Blasi sturka 3:1-6). Setan lamla blakbia yama ki? Baha ba sika, Gâd lâka ba dukyara nahki lukisma ba wina sa.

⁴ Naha ra luki kais: Man plis painkira kum ra kirhbi taukisma, sakuna kaupin yari tara kum mai swiras plis wala kum bara wama. Pliska ba pranakira kaikisma, kuna kaupinka saura ba mai takaskisa lukisma. Sakuna pain kaikuma taim, kaupinka bilara layan tara kum aihwaki bara ba kaikisma. Ba’kat lika tankam brisma, kaupinka ba wan kaina kahbanka kum baku mangkan sa. Sakuna, puramra kauhwaia wisi baku mai pliki tauki kum rait bara sa ki? Baibil ba maisampahkisa: “Tankira watauki bara aihwaki bas; kan waihlam Debil ba, ya ya piaia wisi, layan ihbi baku pliki taukisa” (1 Pita 5:8).

⁵ Setan ba sika, waihla saura kum sa. Bara prak wan alkbia apia dukyara, “Setan kuninka nani ba mapara” wan kaina kahbaia wisi Jehova ai lâka nani wankan sa (Epesus 6:11). Bahamna, Gâd lâka nani ra lukuya taim, wan Aisa painkira latwan laka tara wan bri ba marikanka kum baku kaikaia sa. Baku lukisa taim, wan tanka brisa ai lâka nani ba wan kaina kahbi lilia wan daukisa. Ya ya yamni man briaia want sa kaka, disaipel Jems wisata baku, “baha lâka nina blikaia sa, bara dia wi ba kat sin daukaia sa” (Jems 1:25).

6. Gâd lâka nani ra wan kasak lukanka laka ba kau dutki daukaia dukyara, ani ba tnatka kau pain sa ki? Tanka kum mangks.

⁶ Jehova sika Lâ Yayabra Kau Tara ba. Ai lâka nani ra wan kasak lukanka laka ba paski dutki kaia dukyara, adar wan muni ba kat wan rayaka ra alki daukaia sa. Tila wina “Kraist lâka ba” kat, “dia dia [adar wankan] ba bila wali” upla wala ra lan daukaia sa (Galesha 6:2; Matyu 28:19, 20).  Yawan kristian baku, Gâd ra mayuni pana pana wan kupia buki kaia dukyara, aidrubi kaia lâka ba sin tara kulkisa (Hibru nani 10:24, 25). Baku sin, wan kupia munuhta wina, pat pat Gâd ra wan pura sunaia ba, lâka wala kum sa (Matyu 6:5-8; 1 Tesalonaika 5:17). Naha lâka nani bila walisi, latwan wan kaiki ba mita wankan ba kau param kaikisa. Bara sin kaikisa bila walisa taim, lilia auyapah laka wan dara wali ba, naha tasba pâtkira wina sip sakras. Gâd wi ba kat wapisma taka nahki yamni mai muni ba luki kaikuma taim, rait apia ai lâka nani ra kasak lukankam laka ba kau dutki takisa?

7, 8. Pyu wihka lubia taim, wapni laka ra ban kabia sapa uba luki nani ra, Baibil ba nahki ai kupia bukisa?

⁷ Tila wina kum kum sin pyu wihka ra Jehova lâka ban bila wali sip kabia sapa ai kupia ra turbi lukisa bamna, mahka sibrin alkisa. Baha sat kum kupiam ikisa kaka, naku wan wi ba sinskam ra mangki bris: “Yang Dawan, man Gâdkam; yamnika uya man ra takaia ba mai smalkisni, yabal bak wapaia tam brisna. Bamna man, yang lâika bila nani ra walram kan kata! Bara lika man ra kupia laka ba awala kum baku kaia kan, bara yamnika nani man ra  taki ba kabu ripka nani baku kaia kan” (Aiseya 48:17, 18). Tikska na wan kupia uba buki prais ba dukyara pat luki kaikram sa ki?

⁸ Nara pramis wan munisa, yawan witin bila walbia sa kaka lika, blisin wal briaisa wisa: Wan kupia kumi laka ba awala kum baku —sapkira, ailal bara takaskraskira— takbia. Wala wi ba sin, wan yamnika ba kabu ripka nani baku kabia wisa. Nahki baku? Wel, man kabu auhika ra bui, ripka wala wala ban bal taki auya ba kaikuma taim, ripka nani ba ban kaiara ban bara kabia dukyara lukisma. Kan nu sma pyu aihwa lubia sin, ripka nani ba ban auhika ra bal takan kabia. Bahamna wan marikisa, wapni ra ban wapi kaia sip sa. Kan ban trai munma sa kaka, Jehova yabia man kauhma apia! (Lawana 55:22.) Rait apia pramiska nani na laki kaikuya taim Jehova ra, bara ai lâka nani ra sin wan kasakka lukan laka ba kau dutki takisa?

9, 10. a) Dia muni yawan sut spirit laka ra aitani pawan kristian kum takaia trai munaia sa ki? b) Dia muni spirit kat yaba lukaia ba lilia wan sakisa?

⁹ Wan kasak lukan laka ba tanka wala ra dutki paski sakaia nit ba dukyara, Gâd spiritka ni naku ulban sa: “Wan kainara wap, upla aitani pawan nani baku takaia” (Hibru nani 6:1). Yawan mistik luhakira kaia sip apia sa sakuna, spirit laka ra pawaia ba lika wan mihta ra sa. Bara yawan kau pawrika, Jehova dukya dauki kau lilia lukisa. Dia muni luki?

¹⁰ Aitani pawan kristianka kum ba sika, Jehova wal baku, spirit kat yaba lukaia trai munisa (Jan 4:23). Pâl win “wîna tara brinka kat baman iwi uplika nani ba, wîna tara brinka ba baman dukyara trabil taki lukisa; sakuna spirit brinka kat iwi uplika nani ba, spirit brinka dukyara trabil taki lukisa” (Rom 8:5). Wîna tara brinka nani ra baman  luki nani ba, lilia sip kapras. Kan ai wîna ra man luki tasba dukya nani pliki pliki diara wala sip kaikras. Sakuna spirit kat yaba luki nani ba lika, Gâd liliakira kum ra mayuni bamna, lilia bangwisa (Lawana 104:31). Traika kaikanka nani tilara sin Gâd kupia laka dauki ba mita lilia bangwisa. Dia muni ki? Kan ban wapni bangwi ba mita, Setan ba kuninkira kum sa marikisa. Bara baku heven ra wan Aisika kupia lilia daukisa (Sins laka 27:11; Jems 1:2, 3).

11, 12. a) Wan kupia dara walra ni dia daukaia ba dukyara Pâl dia win, bara bila “lan” wi ba dia tanka sa sapa sin tanka mariks. b) Pawi warkka sat sat daukaia sip kabia dukyara, wan wîna dia briaia sa?

¹¹ Spirit laka ra aitani pawan kristian kum takaia ba sika, kli kli wan kupia lukra yus muni ba mita sa. Baha dahra Baibil ba naku wisa: “Sakuna plun karna ba lika upla aitani pawan nani dukya sa, kan witinka nani ba ai dara walaia lan, bara pat kaikisa wiaia: Naha na pain, bara naha na saura sa” (Hibru nani 5:14). Wan kupia dara walra “lan” kaia sa Pâl bui ulban taim, bila kum Grîk uplika ba ai wîna ra wark yaban watla nani ra (ispail ra “gimnasio” wi ba) yus muni kan. Kan “ai wîna ra wark yabi uplika baku” tanka sa. Sakuna baha sat lan kaia dia tanka sa sapa kaisa kaikaia.

¹² Yawan aisubi takan wal baku, wan wîna wark daukaia lan apia sa. Bibi swap lupia kum ra luki kais: Ai wîna sirpi kumi bani ba anira sa sapa, bara ai klahka, ai kuhma sin yus munaia pain lan apu sa bamna, pat pat kauhwi lal kamhka kat selp pruki tauki ta iwi laui sut takisa. Sakuna tawa tawa —kwasi, prihni ra wapi las kat plapi sut tauki— ai wîna sut pain yus munaia lan takisa. * Sakuna ai wîna yus  munaia lan uplika ba, isti plapi srutwi pâli pasa ra ip takaski sat sat wilwi pain puli, kuna latwan briras kaikuma taim, nu sma ban wina apia sa. Uplika ba ai wîna bunhka sut ra bahamuna pulaia dukyara aihwa wark yabi las kat lan takan sa. Baibil bila “wan wîna tara wark taki ba pain sa, sakuna Gâd ra luki kaia ba lika diara sut mapara kau pain sa” wisa (1 Timoti 4:8).

13. Yawan nahki muni “dara walaia lan” uplika takaia sip sa?

¹³ Bukka na ra diara ailal tanka kaikaia dukyara wan smalki ba, spirit kat yaba luki uplika wapni kum kaia help wan munisa. Yu bani diara daukaia lukuma taim, puram sunisi Gâd lâka kat alki daukaia wisi kupiam wal luki kais: “Naku daukaia lukisna ba dia lâka wal prawan sa? Lâka na nahki alki daukamna ki? Daukaia lukisna ba heven ra Aisiki ba mapara pain kaikbia ki?” (Sins laka 3:5, 6; Jems 1:5). Aima bani kli kli baku luki daukma sa kaka, upla “ai dara walaia lan” takaia sip mai munbia. Baku lika spirit laka ra aihwa aitani pawan uplika kum takma!

14. Spirit laka ra pawaia wisi, dia sat pata pin wan dauki kaia sa ki, bara dia mapara lika aihwaki kaia sa?

¹⁴ Yawan spirit laka ra aitani pawan uplika pat takan kabia sin, ban wan kainara waia sip sa. Yawan nuhwi ba dia pi ba mita sa. Pâl wisata baku: “Plun karna ba lika upla aitani pawan nani dukya sa”. Bahamna, wan kasak lukan laka dutki briaia wisi, spirit pata pain piaia sa. Baku sin sins laka ba, wibia sa kaka, lan takisma ba nahki brih wapai tanka kaikaia laka ba pakaia nit pali sma. Kan Baibil wi ba kat: “Diara sut purkara, sins laka ba alki bri bas”. Baku mika,  kaisa spirit pata auhni wan Aisika wan dakaki ba dukyara plun wan dauki kaia laka ba pakaia (Sins laka 4:5-7; 1 Pita 2:2). Wel au, lan taki sins laka kau paki ba  sika, tara pulaia raitka wankras sa. Tara pulan laka ba wan kupia ra pawbia sia, pat pat yawan selp dia sat uplika sa sapa aman laki kaikaia nit sa. Pâl ulbata: “Laki kais wînam tanka ba aitani sma sapa, kasak lukan laka ra aitani sma sapa kaikaia” (2 Korint 13:5).

15. Spirit laka ra pawaia dukyara dia muni latwan laka ba nit pali sa ki?

¹⁵ Utla kum dan makan taim, ban main kaiki paski kaia, apia sa kaka, kau wira yahpa makaia sin nit sa. Bara spirit laka mapara sim sat takisa. Nahki muni wan spiritka laka ba main kaiki kau pawi wabia daukaia sip sa ki? Diara sut purkara, latwan laka nit sa. Kasak sika! Jehova ra, bara wan muihni-lakri nani ra latwan kaiki ba kau pakaia sa. Latwanka laka na luha, yawan dia lan taki ba, bara dauki ba sut sin bahki ra man sa (1 Korint 13:1-3). Tiwaia dukya apu sa! Spirit kat yaba luki aitani pawan uplika takaia dukyara latwan laka nit sa.

16. Setan bui upla ba dia sat lukbia isa ki, kuna wan kaina kahbaia wisi Jehova bui dia wankan sa?

¹⁶ Wan kasakka lukan laka ba tanka wala ra utla kum baku dutki paski sakaia nit ba dukyara kaisa laki kaikaia. Kristian uplika aihwa kum kaia wisi yawan nahki luki ba aihwaki kaia sa. Setan —tasba wihtka ba— smatkira sa bamna, upla lal ra aihka, sia, srinhka, saura turban laka sat lukbia ikisa (Epesus 2:2). Usra ba utla klauhbi dimi pih sauhki ba baku, baha sat lukaia ba sin saura wan munisa. Sakuna tingki pali, kan Jehova bui wan kaina kahbanka kum wankisa: Wibia sa kaka, bila kaikan laka ba.

17. Bila kaikan laka ba nit pali sa marikaia wisi, Baibil ra dia wal praki kaikan sa?

 ¹⁷ Setan ai tasbaia saura mapara sin yawan aiklabi pura luaia dukyara Baibil bila wan lal prakaika baku “swaki sakan laka ba wan kanra bila kaikaia” nit pali sa wisa (1 Tesalonaika 5:8). Patitara suldawa nani ba daiwan taya ni kyaput kum paskan ba purara, ayan sumurka kum ai lal kaina kahbia wisi yus muni kan. Bara lal ra prukan kaka sumurka ra srumi latwan uya briras kan. Suldawa ba pain nu kan, ayan sumurka ba luha kaka, tisku tus pruai kan. Nahamuna ba wan lal praki ba baku, bila kaikan laka ba wan lukanka nani kaina kahbisa.

18, 19. Wan sinska ba bila kaikan laka ra mangki bri kaia dahra Jisas dia marikan ki, bara nahki muni ai tnata luki daukaia sip sa?

¹⁸ Bila kaikan laka ba alki briaia dukyara Jisas ba tanka kau tara mangkan sa. Kupiam krauks tasba ra las tihmia ba nahki prais Jisas panis wauhwan: Ai panika kum bui lalah tawan ai waihla nani mihta ra mangkan. Ai panika wala sin witin wal kakaira apia kan upla ra win. Bara wala nani ba sin witin ra yakan swisisi mahka plapan. Ai tasbaia uplika pali ba witin mapara bui, Rom suldawika mihta ra rau muni ikbia ai bila kalki wini makabi kan. Yawan baha prais kat panis wauhwras! Dia sip munan Jisas ba pura luaia? Hibru nani 12:2 bila: “Witin kaiki kan pât wauhwaia ba ningkara, ai auyapah kaia kan bara lilia sin; bara nanara, Gâd king iwaika lama pali kat wih iwisa”. Aisi kaikan baku Jisas ban “kaiki kan [...] ai auyapah kaia kan bara lilia sin”.

¹⁹ Baha lilia kaiki kan aisi ba dia sa ki? Wel, witin nu kan ban bapi bui si, Gâd nina ba hulikira dauki, Setan ba kuninkira tara kum sa sin marikaia kan. Jisas kupia kau lilia daukaia diara wala kum apu kan! Bara sin nu kan witin ban wapni kaka, naika pyua ai Aisika witin ra yamni muni ai kulmara kli asla kaia yabai kan. Trabil pyua ra Jisas baha bila kaikanka ban ai sinska ra mangki bri kan. Bara yawan sim sat daukaia sa. Kan wan mawanra sin auyapah liliaka  kum kaikaia bara sa. Amya tikpara Jehova bui wark tara kum wankisa: Ai nina pranakira ba hulikira dauki, Setan ba kuninkira tara kum sa sin marikaia help munaia. Nahki muni daukbia? Dia dia wan mapara bubia kra sin, Jehova wan Wihta baku ai karnika munuhtara baui, ban ai latwanka laka ra dutki kaia sa.

20. Dia tam baikaisa kupiam ra amyapah bila kaikanka tara bri kaia?

²⁰ Yawan wapni ra tauki ba mana Jehova bui yamni wan munaia wilin sa. Sakuna kau sin, isti muni daukaia want sa! (Aiseya 30:18; Malakai 3:10.) Ai suliarka nani diara lâ kat brin dauki ba yabaia want sa (Lawana 37:4). Bahamna kaisa wan bila kaikan laka bri ba ra ban wan sinska mangki briaia. Setan tasbaia ra wahra, mayara, bila kaikan luha man luki ba yarka mai alkbiara. Kupiam ra dimi auya sa kaikuma wal baku, mahka Jehova ra makas “ai kupia kumi laka, bara upla tanka briaia praiska sut pura lui ba, witin maikbia” ni kupiam sinskam sin main kaiki bribia (Pilipai 4:6, 7).

21, 22. a) “Kwara tara” ba dia pranakira bila kaikisa ki? b) Kristian bila kaikanka ba tila wina, ani ba kau kupiam bukisa ki, bara dia sat daukaia lukaia sma ki?

²¹ Wan kainara bila kaiki ba uba painkira sa! “Trabil  tara” ba wina takbia “kwara tara” ba tila wina kum sma kaka, dia bilam kaiki ba luki kais (Param marikan [Reveleshan] 7:9, 14, Lâ Raya Wauhkataya, 1986). Setan ai lasika nani wal wan kaina wina diki sakan kabia taim, wan prika laka sat kum kabia. Kan ya ba Setan traika kaikanka wina pri sa ki? Naiwa upla kumi sin baha sat prika laka ai tanka briras. Sakuna Setan apu kabia taim, Jisas ai 144.000 wal wan ta bribia karnika munuhtara, tasba aiska ba paradais kum ra lakaia ba pura luan liliakira kabia! Bara siknis dan apu, wan uplika prahki nani wal kli wal prawi, blasi wina rayaka pain kum Gâd wankaia want kan ba kat iwaia sin kaikan pali wan daukisa! Yawan saurka apu pali kaia pyua baila kabia taim, Rom 8:21 wi ba kat, kau tara kum —“Gâd luhpia nani pri sakan pranakira ba tilara” kaia— blisinka bribia.

²² Jehova want sa pri laka kau tara kupiam lukaia sip ba brima. Baha sat prika laka kat waia yabalka ba sika, bila walaia bak lui wisa. Baha mita, rait apia yu bani Jehova bila walaia trai munisma ba bahki ra lika apia sa? Bahamna, Gâd latwanka laka ra ban kaiara, ban kaia dukyara, kasak lukankam laka huli ba kat ban bapi bui bas!